المكياج بألوان الطبيعة والفاكهة

1. البنت اللي عينيها مرهقة تعمل إيه؟


2. نرجع تاني لألوان الإيشاربات والمكياج؟


3. نصيحة سريعة لو البشرة مرهقة وعاوزة أحط مكياج؟

السلام عليكم
الألوان السنة دي ألوان الطبيعة، الرمادي والبني والتركواز والأخضر والأورنج وكل ألوان الفاكهة، وتدخل الألوان دي في الMakeup والإيشاربات.
ملاحظة في ألوان المكياج وخاصة مكياج العين استخدامك للون الأخضر، إيه الحكاية؟
لازم أهم حاجة في الMake up العينين... لما تحبي تركزي مع حد بيكون من خلال العين... رسمة العين بتخلي اللي قدامك يبص في عينك قوي، عشان كده لازم نهتم إن الرسمة تكون مظبوطة، والألوان مناسبة مع لون العين....
كمان مهم تكون العين صافية مش مرهقة، وعلى فكرة فيه نصيحة بتقول: "مهما يكون المكياج حلو والخامات غالية جداً بس الوجه تعبان والعين مرهقة، هيكون المكياج بدون فائدة" لأن الMake Up ما ينفعش يداري كل حاجة، اهتمي الأول بنفسك وبصحتك وبشرتك وبعد كده حطي مكياج.

البنت اللي عينيها مرهقة تعمل إيه؟

قشر الخيار مفيد جداً وبيمتص الإرهاق بسرعة، لكن لو إنتِ مستعجلة اغسلي وجهك كويس بغسول مناسب لبشرتك وبلاش الصابونة عشان دي بتجيب تجاعيد، وإما إنك تمرري قطعة ثلج تحت العين أو تستخدمي "التونيك" ده عشان يفرد المنطقة الموجودة أسفل العين وعشان لما تحطي مكياج العين شكلها مايكونش مكرمش ويبان كريم الأساس والبودرة تحت العين في صورة خطوط بيضاء..
فيه ماركات كثير بلاش حاجة غالية، بس لازم تتأكدي إنه "تونيك" مخصوص لتحت العين، وهو مفيد جداً عشان بيحافظ على منطقة الجفن السفلي مشدودة وبيقلل من مظهر العين المرهقة، ويخفي شكل الخطوط الرقيقة أو التجاعيد البسيطة الناجمة عن الضحك أو تعبيرات الوجه العامة.

نرجع تاني لألوان الإيشاربات والمكياج؟

اللون البني والأخضر والأوف وايت والموف والأصفر داخل في اللبس وفي الإيشاربات، وهي دي الألوان الموضة جداً، وكمان بتدخليها في المكياج، ولكن بروح اللون البرونزي أو "البرونزاج"، اللون السنة دي الغامق في البشرة... لون كريم الأساس أغمق أكتر من درجة عن لون البشرة الأصلي...
الصور بتحب البشرة الغامقة أفضل من البشرة الفاتحة، كمان الألوان الغامقة في الإيشاربات موضة قوي، بني وذهبي وأخضر زيتي والبيج الذهبي وباعمل Mix بين الألوان واللفة الإسبانيش بتساعد طبعاً على تداخل الألوان... اللي تختار اللفة دي لازم تلبس حلق شكله حلو..
ازاي الوصول للون "البرونزاج"، نعمل إيه؟
نستخدم كريم أساس غامق درجتين عن تحت العين أفتح درجة مش أكثر من كده، وبعد كده أستخدم بودرة شفافة -بودرة سايبةLoose Powder- أو بودرة غامقة عن لون كريم الأساس.
على فكرة بودرة Max factor الجديدة 2×1 حلوة جداً، وعشان أعمل لون حلو استخدمت درجة رقم 5 واسمها Sand، البودرة المضغوطة فيها كريم أساس وبودرة مع بعض.
نصيحتي مهما كانت بشرتك فاتحة ماتستخدميش درجات فاتحة قوي في كريم الأساس لأنها من الأخطاء اللي كتير بيقعوا فيها..
الموضة اللون الأسمر أو الخمري شوية، يعني السمرا تخلي بشرتها سمرا زي ما هيّ؟
طبعاً، وعلى فكرة السنة دي الBlusher درجاته غامقة، مثلاً فيه درجة "الخوخي" حلوة جداً وممكن تكون ماشية مع كل الألوان لأنها بتحدد عظمة الوجه وشكلها حلو في الصور، وكمان على الطبيعة وممكن كمان تحطي لونين Mix في Blusher الخوخي، والأورنج بيدي لون جديد ومبتكر جداً، والخوخي مع الروز بيكون لون جميل ياريت تجربوه.
فيه بنات بتخاف من تغيير شكل الإيشارب، بمعنى إن البنت اللي بتربط الإسبانش خلاص بتثبت عليها وتخاف ترجع للربطة التقليديه!
ده غلط جداً مش لازم يكون الحجاب على طول إسبانش، لازم تلبس الشكل التقليدي البسيط، وفي نفس الوقت يكون شيك جداً، ممكن يكون الإيشارب سادة وبسيط من فوق ومن الطرف عليه أحجار كريمة أو تطريز رقيق أو وحدات من الخشب، كلها حاجات بتدي شكل جميل، مش معنى إن الربطة عادية أو تقليدية إني ماهتمش بشكل الإيشارب.. دلوقتي فيه "ديزينر" للإيشاربات مخصوص وممكن بنات بص وطل يتصلوا بيها، كل الإيشاربات الموجودة في الصور من تصميمها.
لاحظت عودة الإيشارب الأبيض للموضة، وهل صحيح إنه بيكبّر في السن أو بيغمق في اللون لو البنت بشرتها سمراء؟
بالعكس ده موضة جداً... فيه سر.... أي حاجة غامقة اعكسي ألوانها لو حاطة إيشارب فاتح غمقي لون المكياج والعكس صحيح، وتلبسي كل الألوان، والأبيض جميل ومع مكياج غامق بيخلي الوجه منور... المهم إن الأبيض تبتعد عنه البنات اللي وزنهم زيادة.
أفكار جديدة لإيشاربات السهرة، وازاي المحجبة تلبس توب للسهرة وتكون محتشمة؟
البني المحروق والسماوي لونين مستمرين للصيف وحلو للإسبانيش، كمان الربطة دي حلوة لو عندك سهرة أو خروج بعد الظهر، فيه بنات محجبات بيعجبهم "توبات" مطرزة بس بيخافوا يشتروها عشان كت أو حمالات، الحل السحري هو لبس بدي برقبة تحت التوب المشغول وشكله بيكون حلو جداً، ويمكن لبس جيب واسعة سادة إسبانيش أو ضيقة على حسب جسمها. ومهم جدا الاهتمام بلبس الحلق في الربطة الإسبانيش.

نصيحة سريعة لو البشرة مرهقة وعاوزة أحط مكياج؟

الثلج علاج سريع جداً، عموماً بشرة البنت العربية جافة في الشتاء ودهنية في الصيف، والجو بيأثر على البشرة جامد جدا، البشرة تبدأ تفرز دهون وتطلع حبوب في منطقة الجبهة والذقن لأنها تتأثر بالشمس، والثلج بيقفل المسام ويعطي فرصة تحطي مكياج على بشرة مسامها ناعمة، نصيحتي الذهبية لك في الصبح اشربي كوباية ميه وعليها ملعقة عسل نحل، وبعدها مرري قطعة ثلج على وجهك "وشوفي النتيجة الحلوة" وبكده يكون جسمك وبشرتك استفادوا