الوصفة الفطينه لمواجهة الزوج ثقيل الطينه

السلام عليكم ورحمة الله وبركاته
تحيه طيبه لجميع الأخوات في هذا المنتدى المبارك
هذي أول مشاركه لي معكم اتمنى انكم تستفيدون منها
( الوصفة الفطينه لمواجهة الزوج ثقيل الطينه )
قبل مانبدأ بالوصفه لازم نعرف من هو الشخص الثقيل
فقد نقول عن الشخص ثقيل من باب المدح اذا كان عاقل ورزين وهادئ وغامض
وقد نقول عن الشخص ثقيل من باب الذم اذا كان يتدخل فيما لا يعنيه او يتطفل على الاخرين مثل ( أشعب )
اما الشخص الذي نتحدث عنه فهو الشخص ( ثقيل الدم او الطينه )
الذي تكون طبائعه ثقيله لايستطيع من حوله تحملها
حيث يتميز بسلوك جاف وجارح في اقواله وافعاله ونظراته
وتكون ردود افعاله غير متوقعه ومفاجئه
ويصعب عليه تغير سلوكه لانه طبع متأصل فيه
وهذا الشخص يستطيع قلب مزاجك 180 درجه في لحظه
فيحول حالك الهادئ والرايق الى غاضب ومنفعل
وبعض النساء ابتلين بازواج ( ثقال الطينه ) ولكن للاسف لم يستطعن التكيف معهم
بل بالعكس مع كل تصرف سئ للزوج ( ثقيل الطينه ) تكون ردة فعل الزوجه ( أثقل طينه ) هذا غير النفسيه التعبانه والمتحطمه للزوجه.
فالرجل ( ثقيل الطينه ) عندما يدخل الى منزله مستحيل يسلم وتعلو وجهه تكشيره
ومن يدخل البيت يبدأ ينقد هذا وذاك
واذا كنتي متزينه له يناظرك باندهاش ( كأنك متزينه لغيره ) ثم يعطيك ظهره
هذا اذا ماعلق على شكلك تعليق جارح
واذا جلس على الاكل كشر بخشته كالعاده وبدأ يسب طبخك
وياكل ويسب وياكل ويسب وياكل الين يلحس صحنه ( بس وش نقول ابوطبيع مايجوز عن طبعه )
اما اذا دخل وانتي تكلمي بالجوال او الهاتف فيعطيك ذيك النظره ويطير عيونه
كأنك مسويه جريمه .. ويخليك تتلعثمين وتسكرين السماعه وانتي ماقلتي مع السلامه.
اما على الفراش ماتنامين الا وانتي تافله العافيه
يالله همزيني وحككيني ودلكيني ودهنيني وفرقعي اصابعي و ... و ... و.. و... و......
وبعد التعب لاشكر ولا مدح وسب في شغلك : ماش والله انك ماتعرفين روحي تعلمي من الحريم.
وماينتهي ليلكم الابهوشه ثمن يعطيك ظهره وينام
وتنامين وانتي مقهوره على كل اللي سويتيه له.
هذا غيض من فيض وهذا اللي امداني اكتبه
المهم
نجي ( للوصفه الفطينه للزوج ثقيل الطينه )
اذا صدر من زوجك أي تصرف ثقيل الطينه فعليك بالتالي :
1) استعيني بالله عز وجل لمساعدتك.
2) ألزمي الهدوء وضبط النفس.
3) تفهمي طبيعة زوجك وان عليك أنتي أن تتكيفي معها وليس أن تغيريها.
4) عليك بالتجاهل وإظهار عدم الانتباه لكل نظره او قول او فعل فيه ( ثقل طينه).
( يعني سوي نفسك ما انتبهتي ولهي نفسك بشئ)
5) عليك بالصمت ثم الصمت ثم الصمت <<<< يؤ العمه متأثره بالامير سلطان
المهم انتبهي تكون لك ردة فعل لان هذا ببساطه راح يسبب لكم مشاكل والأفضل انك تنهين الموقف من بدايته بعدم الرد.
6) مع هذا كله اظهري ابتسامه خفيفه لطيفه على وجهك (بدون ماتحطي عينك بعينه ) وكملي شغلك وغيري الموضوع.
7) وأخيرا انسي وتناسي كل تصرفاته السيئه حتى تريحي بالك لأنها طبيعه ماراح تتغير.
وبإذن الله اذا استمريتي على هذي الوصفه راح تتغير حايتكم الزوجيه للافضل وبتحسين براحة نفسيه ورضا .
يالله عاد قومن جربن هالوصفه وعلمونا وش صار معكن خلونا نستفيد ونتسلى
مع أطيب تحياتي
عمتكم
العمّه