ام زوجي ظلمتني في حياتي مع اني اموت فيها

"
السلام عليكم ورحمة الله
في شي مضايقني حيل وودي افضفض لكم
الغصه ذابحتني ومليت من البكى وتعبت وتنفخ وجهي منه..
معليه بطول عليكم
انا تزوجت ولد حارتنا لما جو يخطبوني قالولي انه لي بيت شرعي
طبعن هو ملحق بالسطح
بس لما تزوجت انقلب الحال بعد اسبوع بالتمام .دقت ام زوجي علي وقالت لي تعالي تحت
وحصلتها مطلعه لي دجاج ولحم وقالت يلا اطبخي كذا وكذا
وخلتني اطبخ عندها كل يوم غدا وعشا
وزياده على كذا زوجي كل ماشافني في بيتي فوق نزلني
قال انزلي عند امي اجلسي عندها
اقوله امك ماتجلس معي تخليني اجلس بالحالي وهي تجلس عند زوجها
كان يقول لي اهم شي تكونين تحت عند امي ماعليك من بيتنا فوق انا مااطلبك شي
وكنت اطلع على النوم واول ماافتح عيني انزل تحت
حتى لما كنت اسهر انا وزوجي ويطلع علينا الصبح كنت اخاف انام وتروح علي نومه
اواصل الين انزل واسوي الغدا واخلص شغلي
وكان زوجي من وراي يروح عند خالي ويقوله بنت اختك وصخه ومهمله في البيت ..!!
وكتب الله وحملت ومع نزلت الدرج كل يوم من الدور الثالث للاول
نزلو توأمي متوفيين في الشهر الخامس
ورجعت حملت مره ثانيه ومع نزلت الدرج والصعده
ولدت في بداية الشهر السابع وجلست بنتي شهرين بالحضانه..
بعدها كنت انزل بعد تحت وبنتي بالمهاد وكنت انيمها على رخامة المطبخ واطبخ الغدا
وبعدين اطلع الغدا لزوجي فوق
صحن الغدا بيد وبنتي بيد ..ولما كبرت بنتي
كانت تحط يدها بالصحن والاكل حار اثناء ماانا طالعه ع الدرج..
وكل هذا وانا راضيه ولاهمي كنت اقول اهم شي انهم راضيين علي وزوجي مبسوط مني<<حسب التربيه الخاطئه للأسف !
بعدها حملت ببنتي الثانيه وخافو يصير لي مثل الاول ويتفشلون من اهلي
قالو خلاص خليك فوق
المهم كنت موقاطعتهم ابد انزل عندهم يوم بعد يوم انا وبناتي
وانا بالدور الثالث
مع ان حرمة ولدهم الكبير بالدور الثاني وماتنزل الا بالاعياد او المناسبات الكبيره
غير كذا نحلم نشوفها
والله يابنات كنت اتمنى اكون انا بالدور الثاني عشان اكون قريبه منهم
المهم لما تزوج اخو زوجي اللي بعده اخذ بنت اختها يعني بنت خالته
طبعن المعامله اللي كانو يعاملوني فيها اتغيرت معها 100%
كانو فارضين علي لبس خاص
هي تلبس اللي تبيه قصير عاري شورت قميص النوم اللي تبيه
تطلع فيه قدامنا
والاكل تفرض عليهم انه يكون من دون بصل لانها ماتحبه
صارو يسمعون كلامها
وانا كان ممنوع الماجي والمسمار والفلفل الاسود
وكانت عمتي فوق راسي عشان تتاكد في المطبخ
الحين الباب الي يوصل بيننا وبين اهل زوجي بيتسكر
والسبه مرة ولدهم اللي تقرب لهم
تقول بتسكر باب الدرج نهائيا لانه بتاخذ الغرفه اللي عند الدرج
مع انها في الغرفه اللي فوقها بالتمام
طبعن هالكلام جاني مع السلفه
وانا ناديت عمتي وقلت لها ان منى تقول بتسكرون الباب اللي بيننا وبينكم ؟
قالت لي بالحرف الواحد (وش عليك منهم خليهم براحتهم )
قلت لها طيب وحنا
قالت اللي يبينا يروح لنا من ورا الحوش من الباب الثاني
قلت لها طيب ليه وش السبب
قالت لي لان بنت اختي ماتاخذ راحتها بالشلحه كل ماطلعت ولا نزلت
واحد شافها على الدرج
قلت لها وتسكرين الباب على عيالك عشان بنت اختك
قالت ايه اللي يبينا يلف الحوش من ورا
وياليتكم تشوفون الحوش من ورا حتى هم اهل البيت ماكانو ينظفونه ولا يمرون منه
ولا فيه كهرب كله كفرات واكياس اسمنت
المهم انا قلت لها ماتقدرين تقولين لها تلبس قميص وهي نازله او تاخذ لها جلال
مثل ماكنتي تقولين لي..
المهم ماردت علي سوت ان زوجها يناديها وطلعت من عندي
وانا قلت لها انك ظالمه
انا قلت لزوجي طالما امك سكرت الباب معناها ماتبينا وهي ماسوت حساب
ااننا احيانا ننزل عندها بظروف مثل المطر والعج ويكون رجال بالحوش او تكون قاطعه الكهرب
قلت له انا ماراح انزل الا بالاعياد او مناسبه او مصيبه بس
اليوم بنتي كسرت خاطري نزلت تبي تدخل عندهم وحصلت الباب مقفل جلست تصيح عند الباب ..اه بس
اللي قاهرني ان معاملتها لبنت اختها تختلف تماما مع اني انا اللي قايمه فيها
بالمناسبات وبالزواجات حتى لو يصير عندها عزى انا اللي كنت اقوم بكل شي..
وبنت اختها قمة في الاهمال لابنفسها ولابزوجها ولاعيالها وهي معترفه بهالشي بي تداريها
بس الحين قررت اني انتبه لنفسي ولا ادور رضا زوجي او حتى اهله بشي انا مو راضيه عنه اصلا
واني مااتفرج على نفسي وانا انظلم !!انا على صح او غلط ؟؟