اموت واحيا بك قصه روعة لا تفوتونها الجزء الثاني

1. ماشفت اي ردود لي القصة فحبيت انزل تكملة القصه لمن يهمه الامر


2. الجزء الثاني عشر..


3. سعيد: هم مب مشكله...واحين وينهن هن؟


4. عبدالله: بيتلبسن عبيهن وبيين....


5. نورة: ههه شو هاي بعد اترياهم يعزمون؟ يعني انخطبتي والا لا؟


6. خوله: هم رسميا لا....بس احس انه بيستوي قريب..


7. رفعت خوله حواجبها بتكبر... كانها مستغربه من هالسؤال...


8. خوله: يغار عليه... على منو يعني بيغار؟..


9. نورة: خوله خبريني السالفه من اول...


10. خوله: طبعا... منو يعني غير سعيد؟


11. نورة: اها...بالبركه ان شاء الله... خلينا نسير تحت عندهم..


12. خوله: اوكي..


13. نورة: ان شاء الله...


14. بو خالد: على خير ان شاء الله..


15. خليفه: السودا؟؟.. هي سيارة عبود..

ماشفت اي ردود لي القصة فحبيت انزل تكملة القصه لمن يهمه الامر

الجزء الثاني عشر..

يوم الخميس الساعه 10 الصبح.. دخلت حصه الصالة وحصلت امها وخالها وحرمه خالها وعليا ووياها هلال الصغيرة وسلامه... سلمت عليهم كلهم ويلست حذال امها... ام فيصل كانت تتكلم في التيلفون مع اختها... والباقي يسولفون ويتريقون رباعه..
عليا: حصه اصبلج شاهي.؟
حصه: خلي عنج بصب ارووحي...
بعد ماصبت لها شاهي ..
حصه: امايه وين عبدالله؟
ام خالد: في الميلس يتريق ويا سعيد وفيصل...
حصه: متى تبينا نسير؟..الساعه عشر احين..هبابنا نخلص..
عليا: وين بتسيرون؟
ام خالد: اختج تبا تتشرا قطع حق فستان تخرجها..
عليا: هي..زين والله....من وين بتشترين؟
حصه: بسير مركز المنال..يمكن احصل شي حلوو..
عليا: نورة بتسير وياكم؟
حصه: والله مادريبها... ها امايه اسير البس عباتي والا بعدج؟
ام خالد: لا لا..قومي لبسي عباتج وهاتي عباتي وياج...
في هاللحظه سكرت ام فيصل عن اختها...وسمعتهم يطرون السيرة..
ام فيصل: ويدي..!!!.. وين بسييرون؟
ام خالد: بنسير السوق ام فيصل.. بودي حصه تتشرا قطع..
ام فيصل: لاه..؟ شقايل انتي بتسيرين واختي يايتنج...سمعت انج في الشارجه قالت يايتنكم في الطريج..
ام خالد: حلييلها ام خوله من زمان عنها والله... خلاص عيل بنترياها...
بطلت حصه عيونها ولصقت في امها تصاصرها...
حصه: امايه...شو هذا بعد بنترياها.؟؟؟ ماشي وقت.. لاتسوين هالحركات فيني احين...
ام خالد: يابنتي فظيحه نجفي بالحرمه يايه تزورنا ونحن نروح عنها...
حصه: والحل يعني؟؟ مااسير؟
ام خالد: سيري انتي واخوج وانا بعطيج فلوس عشان تشترين اللي تبينه...
حصه: هي اذا جي اووكي...يالله اتصلي بعبدالله وخبريه..
في هاللحظه دخلت نوره معاها فاطمه والبنات منى ومنال..
نورة : السلام عليكم جميعا...
الكل: وعليكم السلام..
يت نورة ووايهت علىامها وحبت خالها على راسه..ويلست عداله... نورة تمووت في خالها هلال...ويعيبها تسمع سوالفه...
نورة: شحالك خالي؟؟..شو اصبحت؟
بو فيصل: بخير بنتي ..شحالج انتي؟
نورة: الحمد لله...(وصدت صوب حصه) حصووه سمعتج تقولين خبري عبدالله..شو تخبره؟ شوفيكم؟
حصه: ماشي امايه مابتسير ويايه ..بسير انا وعبدالله بس...
نورة: اها زين والله...
فاطمه: وين بتسيرين حصه؟
حصه: بسير اشتري قطعه لفستان التخرج..
فاطمه بطلت عيونها وشافتها فرصه..
فاطمه: حلفي؟؟... ( وصدت صوب ابووها) ابويه..فديتك انا بسير وياهم..؟
بو فيصل: شو عندج من الشغل تسيرين؟؟!!..والا بس هوامه..!!
فاطمه: لا والله ابوويه . جي انا بعد ماشريت قطعه لفستان تخرجي.. بيسوون حفله في مدرستنا والبنات بيتكشخن وانا بعدني مافصلت لي شي...باخذلي قطعه كاشخه بس بسيطه..فديت رووحك انا..
بو فيصل: وقته هذا انتي بعد؟؟؟ وين بتتلصقين وياهم؟...بنت عمتج اخووها بيوديها...
فاطمه: ابويه سعيد بيوديني وياهم.... دخيلك لا تقول لا... مابتصيرلي فرصه حد يوديني عقب...
بو فيصل: زين فكينا من حشرتج... ام فيصل عطيها بيزات هذي سدي حلجها...
فاطمه: فديتك انا يعلني ماخلى منك ياربي...
وهوت على راس ابوها وحبته...
فاطمه: نورة تعالي ويانا...
ام خالد: لالا ..مالها حايه ماتسير...
نورة: فطوم امبوونه انا مالي بارض عالسووق والمشي..خليني يالسه ابركلي...
ام فيصل: سيري حجرتي بتحصلين البوك في التواليت.. خذيلج بيزات ...
فاطمه: ان شاء الله امايه...
حصه: انا بعد بسير اتلبس... امايه اتصلي بعبدالله خبريه...
ام خالد: احين بتصلبه..
الشباب في الميلس عبدالله وسعيد بعد ماترخص عنهم فيصل وسار يودي سيارته الوكاله... دق تيلفون عبدالله ورد عليه..
عبدالله: مرحبا العيووز
ام خالد: هلا ابويه...يالسين في الميلس؟
عبدالله: هي نعم...شو فخاطرج؟
ام خالد: اباك تودي اختك السوق..
عبدالله: وانتي؟
ام خالد: انا حرمه بتي تسلم عليه ماروم اجفييبها...وفاطمه بعد تبا تسير وياكم..
عبدالله: حياها الله...
ام خالد: لا خالك يقول يوديها سعيد وياكم...
عبدالله ظحك وهو يطالع سعيد..وقاله " ورطووك ويانا انته بعد" ...
عبدالله: خلاص تمام امايه خليها تجهز انا هني بترياها..
ام خالد: خلاص ابوويه..الله يحفظك .. وهاا عن لخبال انته وسعيد ويا البنات..
عبدالله: افا عليج امايه..شو يهاال نحن؟
ام خالد: محشووم ياولدي بس اوصيك ...
عبدالله: لا توصين حريص... يالله فمان الله
ام خالد: مع السلامه .
سكر عبدالله تيلفونه ..
سعيد: شو بلاها عموه...؟
عبدالله: ماشي..توصي.. تباني اودي حصه السوق..واختك بعد تبا تسير عشان جي قال خالي لازم تي انته ويانا بعد..
سعيد: منو من خواتي؟
عبدالله: فاطمه..
سعيد: يه يا هذي... يبالها ظرب عن هالسوق...
عبدالله: خللها برايها دامها وياك ماعليها شر... وبعدين صراحه ابا اغير جوو انا وماريد اسير اروحي ويا حصووه..

سعيد: هم مب مشكله...واحين وينهن هن؟

عبدالله: بيتلبسن عبيهن وبيين....

وبعد دقايق طلعوا الاربعه فسياره سعيد صوب دبي..وسعيد متحسف لان نورة مب وياهم.. وفي البيت وصلت اخت ام فيصل " ام خوله" وطبعا وياها بنتها خوله... دخلن الصالة وسلمن على الموجودين ( ام فيصل وام خالد ونورة وعليا وعيالها وشيخه ومنى ومنال) .. نورة من زمان ماشافت خوله..وما اندمجت وياها وايد ..واللي تعرفه عنها اشياء بسيطه...وبعد السلامات يلست خوله عدال نورة..
خوله: شحالج يانوورة..؟ وين من زمان ماشفنااج..
نورة: والله شو نسوي نحن بعد بالغصب نحصل فرصه وني الشارجه..شخبارج انتي؟ شو دخلتي من الجامعات؟
خوله: جامعة الشارجه..
نورة: هيي ياحيج والله...ما انخطبتي؟
خوله: ههه لا ..اترياهم يعزمون...والا انا واثقه..
استغربت نورة من كلام خوله ...

نورة: ههه شو هاي بعد اترياهم يعزمون؟ يعني انخطبتي والا لا؟

خوله: هم رسميا لا....بس احس انه بيستوي قريب..

خوله من النوع الواثق من نفسه بغروور..كانت تفكر ساعتها بسعيد وهي تشوف نفسها الانسب له وانه بيخطبها قريب لا محاله.... وخصوصا بعد الموقف الاخير اللي اعتبرته ارضاءا لغرورها..انه غيره من قبل سعيد عليها...ونورة مسكينه على نياتها ماعرفت شو تقصد وماحبت تدخل...
نورة: هيي..ماشاء الله..بالبركه عيل.. الله يوفقج.
خوله: الجميع ان شاء الله...اقولج..نسير حجرة فطيم..ابا ابدل عباتي والبس شيلة بيظا...
نورة: يالله..
سارت نوره مع خوله فوق وتموا الباقي تحت...يوم وصلوا غرفه فطوم...قالت خوله..
خوله: اكييد راقده الطويله...
ودخلت الغرفه واستغربت...فاظيه...
خوله: وينها فطوم؟
نورة: سارت السوق ويا حصه وعبدالله اخويه وسعيد...
رفعت خوله حواجبها وهي تعق شيلتها وعبالتها وتعلقهم في الكبت...
خوله: معقوله ؟؟؟
نورة: شو اللي معقووله؟
يلست خوله على الشبرية وسكرت نورة باب الغرفه ويلست وياها...
خوله: معقووله سعيد يودي فطووم السوق؟
نورة فز قلبها لطاري سعيد...
نورة: ليش لا؟؟..اخوها...
خوله: بس من بعد الموقف الاخير صراحه ماتوقعت انه يخليها تطلع من البيت...
نورة: خيبه..!!..ليش شو مستوي بينهم؟؟ ماحد خبرني شي...
خوله: ياختي سعيد وايد يغار... وورط فطوم المسكينه في السالفه..
بطلت نورة عيونها.... كانت حاسه انه السالفه فيها ان... بس مابتخلي خوله الا يوم اطلع منها كل العلووم اللي ماتدري عنها...
نورة: سعيد يغار؟؟؟ يغار على منو؟

رفعت خوله حواجبها بتكبر... كانها مستغربه من هالسؤال...

خوله: يغار عليه... على منو يعني بيغار؟..

بهتت نورة كان حد صافعنها طراق قوي.... سعيد.... سعيد حبيبي انا ...يغار على خوله..!!!!!!؟؟؟؟ ليش؟؟ شو تعنيله هي عشان يغار عليها ؟ تمالكت نورة اعصابها وحاولت تخلي ملامح ويهها طبيعية... نورة صحيح انها حساسه..بس قوية في مواجهة المواقف الصعبه عليها...

نورة: خوله خبريني السالفه من اول...

خوله: الله يسلمج تواعدنا انا ونورة نسير السوق ويا امايه..ويوم اتجهزنا حصلنا امايه تعبانه وقالت مافييني اسير وسيرن انتن رواحكن...شلينا نحن البشكاره والدريول ورحنا السوق...وانا اصلا ماتعودت اني اتغشى ..فطوم تنقبت بس انا كان ويهي مكشوف...المهم يوم ردينا شافني سعيد اني بلا غشوه..اول شي نازع فطوم..بس النزاع اللي ياها مايسوى شي عند النزاع اللي ياني انا...والله زعلت وسرت بيتنا اصيح...وامبوني حالفه ماطب هالبيت..لكن اول امس يا واستسمح مني وراضاني وقالي انا اغار عليج ووانا وانا ومادري اشوو ومن هالكلام... المهم ردولي اعتباري..وعقب عاده خذ مني وعد اني ماكشف ويهي جدام غريب.. وانا طاوعته ماروم اتم زعلانه عليه وارفض له طلب.... هذا سعييد...غيير...
نورة كان يبل طاح على راسها... حست بالقهر...بالغضب... وبالغيره... كانت تقدر تذبح خوله في هاللحظه...بس خوله ماتهمها هي...اللي يهمها سعيد....كيف سعيد يسوي فيها جي كييف؟؟؟ امس بس واللي قبله كان بيقولها انه يحبها وهي اللي منعته...شو يعني هالكلام؟؟ يلعب عليها؟؟؟... يوم يشوفها يسوي نفسه يحبها ومن تروح يلعب بذييله مع بنت خالته؟؟.... لا ياربي لا... شو سويت انا عشان انصدم فاغلى انسان عندي....يارب ارحمني وبين لي ان كل هالخبر جذب ...سعيد مايسويها ..مستحيل يقص عليه انا...
انتبهت خوله ان ملامح نورة تغيرت...
خوله: نوره بلاج؟
تمالكت نورة نفسها...مهما كان اللي صار...مابتخلي نفسها ظعيفه جدام أي شخص...
نورة: ها.؟؟ لا ماشي بس كنت افكر....يعني سعيد هو اللي كنتي تقصدينه بانه بيي يخطبج قريب؟

خوله: طبعا... منو يعني غير سعيد؟

نورة حست بالموت...وفعلا شي في قلبها مات... الامل بان سعيد بيكون لها تبخر... كيف خوله تتكلم بكل هالثقه؟؟..اكيد في شي معطنها كل هالثقه بان سعيد بيخطبها...هو مخبرنها؟ والا كلم حد من اهله بخصوصها؟؟؟ ووصلها الخبر؟؟...
ابتسمت نوره بسخرية على نفسها... صدق اني كنت عايشه فحلم حلوو...بس كل حلم يخلص.. وانا احين اواجه نتيجه اغفالي عن الواقع.... طبعا سعيد يبا بنت خالته... يوميا مطيحه فبيتهم..واقرب له منها هي.. خوله موجوده عدالهم وفي الشارجه نفسها ودايما عندهم بالبيت...اكيد انه تعلق فيها ..اما نوره... تسلية بين فتره وفتره...وانا استاهل اللي ياني لاني صدقت عيونه واللي تقوله لي... حلال عليج ياخوله ان كان سعيد من هالنوع... خذيه ومابااه...نفسي عافته...

نورة: اها...بالبركه ان شاء الله... خلينا نسير تحت عندهم..

خوله: اوكي..

لبست خوله شيلة بيظا من شيل فطوم ونزلت مع نورة تحت... نورة كانت ماسكه نفسها طول الوقت.. كانت معصبه لدرجه انها ماقدرت تصيح...ومر عليها الوقت وهي الافكار تدور بها..لين مارجعوا حصه وعبدالله وفطوم وسعيد من السوق...وكان الوقت موعد غدا..حصه وفطوم كانن يالسات في الصالة مع الحريم يراونهن شو تشرن من القطع.. نورة ماقدرت تتحمل الازعاج..شلت عمرها وركبت فوق في غرفه فطوم عشان تريح اعصابها شوي وتفكر بمصابها...مرت ربع ساعه وهي يالسه في غرفه فاطمه ومحد درى عنها..بس بعدين استحت على ويهها وقررت انها تنزل..اكيد بيسالون عنها وبيستغربون الحركه.. يوم طلعت من غرفه فطوم شافت سعيد طالع من غرفته هو بعد.. التفت صوبها ويوم شافها ابتسم كالعاده وظحك... زاد قهر نورة من سعيد...كيف تسوي فيني جي...؟؟ وتطلع بهالبراءة؟؟ .. ماا انلام يوم صدقتك يا سعيد دامك تعرف تمثل ...تمت نورة اطالعه بنظرة قهر وغيظ وماردت له ابتسامته..استغرب سعيد... اول مره نورة اطالعه بهالطريقه ..وعلى طول اختفت ابتسامته...
سعيد: نورة بلاج؟
نزلت نورة عيونها ومشت ناوية تتخطاه وتنزل بدون ماترد... بس يوم قربت منه مسكها سعيد من ايدها وسحبها على ورا... استغربت نورة من هالجرأه... غمضت نورة عيونها وهي ميته من القهر...
نورة: فجني...
سعيد: مابفجج...رمسيني...بلاج؟
نورة: ماشي...فجني...
سعيد: نوره.... شوفيج؟؟ شو مضايقنج؟
التفتت نورة صوبه وهي اطالع في عيونه بطريقه عتاب...
نورة: اللي مضايقني اني ماكنت اتوقع انك من هالنوع...لكن دام هذي تصرفاتك..مابيني وبينك كلام... مب بس الكلام....مابيني وبينك أي شي....
وسحبت ايدها من ايده بقو ونزلت بسرعه للطابق الارضي ودخلت الصالة قبل مايلحقها...
سعيد انصدم من كلام نورة وتصرفاتها... شو هالنغمة اليديده بالكلام؟؟..شو صار بين امس واليوم؟؟ امس كانت تلمح له انها هي بعد تحبه...واليوم تقطع أي صلة بينها وبينه؟؟..ليش ..شو صار؟؟ وعلى طول حس بالمرض والتعب...كله ولا نوره مايتحمل منها هالتصرف.. شو سويت انا؟؟... والله اني ماسويت لها شي ولا بسويلها شي بعد... يقدر يجرح كل الناس ماعدا هي...
تعب من تساؤلاته وكان خاطره يرجع يدخل غرفته ومايشوف حد...لكن الواجب اجبره انه ينزل ويتغدى مع ابوه واخوه وولد عمته ويقعد معاهم...
بعد الغدى بساعه كانوا اهل العين واقفين في الحوش مع اهل البيت ..يسلمون عليهم لانهم رادين العين.. الكل يظحك ويسولف ماعدا سعيد ونوره.. كل مارفع عينه عشان يشوفها يمكن يفهم شي من ويهها وعيوونها..كانت تصد وتنزل عيونها..ومات من القهر يوم شافها تطلع اول وحده من بيتهم وهي تتغشى... معقووله يانورة؟؟.. لهالدرجه طفرانه من بيتنا وتبين تردين؟؟... آآخ يالقهر لو ادري بس شو صار فيج وخلاج تتغيرين عليه...
ردوا اهل العين لبيتهم ووصلوا المغرب...واول ماوصلوا البيت ركضت نورة صوب حجرتها وصكت الباب على نفسها... وفتحت لمشاعرها المكبوته حريتها وقعدت تصيح على حب حياتها اللي مات...الجزء الثالث عشر
كان الوقت بعد صلاة المغرب يوم نزلت حصه من فوق نازله الصالة حصلت امها يالسه ميرة وحمده.. والعيال.. سلمت عليهم وسارت على طول عند التيلفون..واتصلت بعنود على موبايلها...
عنود: آآلوو,,,
حصه: مرحبا عنووده..السلام عليج..
عنود: هلا والله وغلاا بريحة الحبايب...
حصه:ههه ياويلي عليج انتي يالرايقه..شخبارج؟
عنود: بخير فديتج شحالج انتي؟ وعلومكم؟
حصه: بخير وسهاله ...
عنود: متى رديتوا من الشارجه؟
حصه: العصر والله... سكتي يا عنوده شريت لج ذيج القطعه اللي تسكت..
عنوود: والله؟!!.. حصلتي شي مناسب للموديل..
حصه: هي حصلت وايد حلوات لكن هذي دشت مزاجي على طول..
عنود: تمام عيل..شو لونها؟
حصه: لونها غريب..اخضر على ذهبي..اخضر محرووق..ماتعرفيله..
عنود: اوش والله كشخه...بكم خذتيها؟
حصه: وانتي شو لج تسالين عن السعر؟؟..
عنود: لا اتحسبين اني مابدفع عنها...
حصه: جب جب... اعتبريها هدية التخرج...
عنود: ياسلام..وانا شو اييبلج هدية تخرج؟
حصه: كيفج بس انا ماارضى باي شي.. ابالي شي عليه القيمه..
عنود: هم....بيوزج اخويه...
انصدمت حصه وتمت ساكته.... وماتعرف ليش خذت الموضوع بجدية مع انها تعرف ان عنود تمزح...
عنود: ههه سكتت...آآلو...
حصه: وياج.وابوي عليج شو هالرمسات بعد..!!
عنود: اسوولف وياج ويا هالويه... ولو عزم اخوويه مابخبرج اصلا...
حصه: ويا ويهج انتي واخوج..المهم متى بتين تشوفين القطعه؟
عنود: وين اي؟؟؟ حليلي والله... خليفه وحمدان محد سايرين البدع يلعبون بالدراجات...
حصه: اسمعه عبدالله يتحظى في الدرب يقول فوتوا عليه سيرة البدع....
عنود: احسن يوم فوتوا عليه..اخافه يتكسر...
حصه: ياويلي انا عالحب..
عنود: هي عيل شو على بالج...
حصه: ههه الله يكمل عليج ان شاء الله..المهم بخليج بسير ايلس عندهم ..
عنود: برايج الغاليه..ومشكوره وايد عالقطعه... مردووده هالهدية ان شاء الله..
حصه: لا اتعبلين ولا شي مابينا نحن هالرسميات.. المهم سلمي على اهلج وعمي..
عنود: يبلغ ان شاء الله وانتي ردي السلام عليهم كلهم...
حصه: ان شاء الله..فمان الله..
عنود: مع السلامه..
سكرت حصه التيلفون ويت ويلست عدال حمده.. وميرة وامها..
حمده: وينهانورة ماشفناها من يت؟
حصه: ظني الا رقدت.. اول مايينا من الشارجه على طول سارت حجرتها وصكت على عمرها الباب.. حتى شنطتها لين احين برا في الممر.. مادخلتها..
ام خالد: حشى شو هالرقاد اللي ياها مره وحده؟..لايكون شي يعورها؟
حصه: والله ماحيدها مريضه امايه...
ام خالد: تيمّلي بنتي قومي شوفي اختج..اخافها مريضه..
حصه: ان شاء الله..
قامت حصه وسارت فوق ادق على نورة... وبعد فتره فتحت نورة الباب وويهها متنفخ ...
حصه: بسم الله الرحمن الرحيم.. اللهم سكنهم في مساكنهم.... شو بلاج جي غاديه؟؟ّ!!!!!
نورة: شو تبين؟
حصه: يتخبرون عنج تحت...بلاج نورووه؟؟؟
نورة: شو بلاني بعد .. كنت راقده...
حصه: ماحيد ويهج جي يتنفخ يوم ترقدين...
دخلت حصه حجرة نوره وفتحت الليت عشان تشوفها عدل...وهي كانت خايفه على اختها ..اول مره تشوفها بهالحاله...
نورة: يمكن كنت راقده على ويهي...
حطت حصه ايدها على خصرها..وهي متشككه...
حصه: والله انج تجذبين..
نورة: مشكوره اختي..
حصه: نوروه.... انتي راقده وانتي تصيحين..اعرفج...
نورة: اوف..شو بيصيحني يعني حصيص...!!!
حصه: هذا اللي ابا اعرفه.. انتي من كنا في الدرب صوب العين وانتي مويمه.. شو مستوي..
نورة: مب مستوي شي..ولا شي يستاهل اصلا اني اصيح عشانه..احين ممكن ماتفتحيلي تحقيق..وتروحين وتقوليلهم اني برقد لين باجر..؟؟
نورة من النوع اللي يوم يظايق يحب يرقد بشكل غير طبيعي..هي تفكيرها انها تشرد من الهم والتفكير لفتره وترتاح بالرقاد...بطلت حصه عيونها مستغربه من اختها...وهي في خاطرها تقول ابد..هالبنت مب طبيعية اليوم..
حصه: ماتبين عشا؟؟
نورة: لا..
حصه: هم صليتي العصر؟؟
نورة: استغفر الله.. لا ماصليت...
حصه: والمغرب؟
نورة: بعد...
حصه: هم...يوم اقولج فيج شي والا ماحيدج تفوتين صلاتج..
نورة: حصوه... كنت ...راق.... دة... فهمي..
حصه: خلاص لاترقدين احين تريي لين صلاة العشا صليهن كلهن وتعشي وعقب رقدي اذا تبين..

نورة: ان شاء الله...

خلتها حصه ونزلت وهي قلبه مقبوض..نورة مب طبيعية فيها شي...وشي جايد... يوم وصلت عندهن تحت حصلت ان حمده ردت بيتها عشان تعشي العيال وترقدهم..وان خالد وصل البيت ويالس عدال امه وحرمته ويرمس عياله حمد ومحمد ويالسه في ثبانه شما بنته الصغيره..
يت حصه وسلمت عليه...
حصه: هلا اخويه شحالك؟
خالد: بخيير حصيص الله يسلمج...شحالج انتي..؟
حصه: بخيير والله...وين من زمان ماشفتك ماتقولون ساكنين فبيت واحد...وتراك من زمان ماوديتنا البرر...
خالد: عزموا انتوا وانا مابقول لا...
حصه: بعد امتحاناتي ان شاء الله...
ام خالد: شفتي اختج؟
حصه: هي امايه..الا راقده ..مافيها شي..
ام خالد: وعيتيها؟
حصه: هي وعيتها..
ميرة: يالله شباب قوموا بتتعشون وبعدها رقااد... وراكم مدارس..يالله شماني..
مدت ايدها وشلت شما ..ووقفت..
حمد: ماماه مب الحين بعديين...
خالد: حمد قووم يالله تعشى وارقد..ماشي سهر...
نش حمد وهو متظايق... وتبعوا امهم اللي سارت صوب بيتها تعشي عيالها وترقدهم..واول ماطلعت دش عبدالله ووياه ابووه...
بو خالد + عبدالله: السسلام عليكم..
الكل: وعليكم السلام والرحمه...
نشوا كلهم يسلمون عالشايب... وبعد مايلسوا..
حصه: ابويه اقولهم اييبون عشاك؟
بو خالد: لا صبري بصلي العشا اول بعدين بتعشى..
خالد: هاا ابوويه شو العزبه اليوم..؟
بو خالد: والله مثل كل يوم.. وباجر عندي تفحيم بنشر من الفجر..
خالد: ان شاء الله يسبقن عاد هالمره..
بو خالد : على الله... ( والتفت صوب عبدالله الي كان يشرب شاهي).. ابويه عبدالله تراني شفت عمك اليوم ورمسته عسب سالفة الملجه..
ارتبك عبدالله وحط كوبه في الصينية....
عبدالله: وشو رد عليك؟
بو خالد: يقول هو ماعنده مانع...لكن بيرمس البنت وخوانها الليله وبيردون علينا خبر...
خالد: ليش تبا تملج بو الشباب.؟؟
عبدالله: هي والله خالد...بملج ان شاء الله..
خالد: حق شو الحين تملج؟ باقلك سنه عن التخرج ..يوم بترد املج...
عبدالله: لا ياريال..اول مارد من امريكا بعرس..متى بملج؟؟؟
خالد: كيفك...
عبدالله: ابويه انا ماريد الملجه احين... البنت بتتخرج ويا حصه واحين مشغوله بدراستها ..بعد ماتخلص بنملج ان شاء الله...

بو خالد: على خير ان شاء الله..

في الطريج من البدع للعين.. خليفه كان يالس في الكرسي اللي عدال السايق... وماسك ايده وهو متعور.. وكان يسوقبه ربيعه سيف الشامسي (هو نفسه اللي شاف حصه في بيت قوم خليفه).. سيف ريال طيب وحبوب ربيع خليفه من ايام الثانوي... وهو اكبر منه بسنه.. بعد ماتخرج من جامعة الامارات بتخصص المحاسبة..اشتغل محاسب في وحده من الدوائر الحكومية... سيف كل شوي يطالع خليفه بنظرة قلق...
سيف: ها بعدها تعورك..؟؟
خليفه: هي والله .. الله يخس محمد اللي خلاني انجلب...
سيف: بسيطه ان شاء الله... هزرك مكسوره؟
خليفه: والله مادريبها بس تعورني.. كم باقلنا عن نوصل العين؟؟
سيف: نص ساعه بالكثير وبنكون هناك...وتراني بوديك المستشفى سيده...
خليفه: لا ...لا توديني ولا عندك خبر...بسير البيت والعيوز بتحط عليها كركم وملح وبتخف..
سيف: جب جب ... كركم وملح اون....يمكن مكسوره...
خليفه: سواف قسم بالله مافينا نتمرر بعدنا المستشفيات...
سيف: اظن انا اللي اسوق مب انته...
خليفه: الله يهديك...
سيف: يهدي الجميع...اقول خلوف..تذكر ذاك اليوم يوم كنت فبيتكم.. ودخل علينا عبدالله العصر ؟؟ قبل كم يوم بس...
خليفه: هم ..هي...
سيف: يوم ظهرت شفت عرب فبيتكم...
خليفه عقد حياته...
خليفه: قوم عمي... اهل عبدالله..
سيف: اها...
سكت سيف وبلع لسانه..مايروم يرمس ويقوله والله انا شفت بنت عمك في حوشكم وعيبتني... اقل شي بيسويه بيلمّه ببكس على ويهه...
خليفه: ليش تسال؟؟
سيف: هم ماشي بس فضول...عيبتني السياره اللي واقفه...ثرها سيارة عبدالله؟؟

خليفه: السودا؟؟.. هي سيارة عبود..

ومرت هالسالفه على خير بدون مايشك خليفه باي شي.. وصلوا العين بعد نص ساعه وعلى طول سيف راح صوب المستشفى... حمدان كان هو اللي بيوصل خليفه العين بس سيف قاله انه هو راد اصلا العين وهو بيودي خليفه وبرايه حمدان يكمل لعبه لين الجمعه...فوافق حمدان ورد عند ربعه...
في المستشفى قالوا لخليفه ان ايده مكسورة من المرفق كسر خفيف..وبيصح خلال اسابيع ...ربطوها له وجبسوها .. وعقب وصله سيف البيت وتعشى عندهم وروح صوب بيتهم..
دخل خليفه الصالة وكانت هناك عنود وامه وابوه .. اما سلطان وحميد تعشوا ويا خليفه وسيف وريال ثاني في الميلس..وبعد ماطلع سيف من عندهم ط