انا قررت قرار مين بدها تشاركني

حبيباتي الفراشات الغاليات...اول شي كل عام وانتم بألف خير وصحة وعافية وينعاد عليكم بالسعادة والهناء
وان شاء الله باذن واحد أحد مابيجي عيد الأضحى الجاية الا وكل وحدة تتأبط ذراع نصفها الآخر ( حلو التعبير ما ؟ ههه )
والله اني بستحي وبخجل كتير اتحدث بمواضيع الزواج وتأخره والرغبة بالزواج الا معكم...حتى مع امي او رفقاتي بستحي
مابحب بين اني مقتلة حالي عالزواج وبشان الناس كمان ماتخاف اني احسدها لما تخطب او تتزوج
وبشان من مبدأ الشكوى لغير الله مذلة
لي ربي اشكو له ليش اشكي للبشر اللي مابترحم؟؟؟
نجي هلق للمهم
أنا قررت قرار اعتقد انه مهم جدا في حياتي وان شاء الله احتسب من الله انه سيكون عند حسن ظني به
بعد أيام من التعاسة والحزن والاكتئاب والضيق بسبب تأخر الزواج
وبسبب انو انا بالرغم من انو الحمدلله الف الحمدلله جميلة وخلوقة وماناقصني شي عالأغلب
لكن ماحدا بتطلع بخلقتي ولا بفكر يخطبني ولاحدا بفكر يدل عليي للخطبة ولاشي صفر الحمدلله ناشفة من كل النواحي
وعم شوف الناس حوليي عم تتيسر أمورها وتنخطب وتتزوج...
لكن بسأل حالي انا وين من هالمعمعة؟؟
مارح تلحقني شي طرطوشة؟؟
(يارب تشتي عرسان وتلحقني شي طرطوشة ) بتتذكرو غنية صباح؟
انا والله قررت ابث لكم خبايا نفسي لانكم جزء من نفسي والله العظيم
واحبكم جميعا بالله واتمنى لكل فتاة منكم ان يتحقق حلمها مهما كان يبدو صعبا او مستحيلا ولا شئ كبير على الله
لقد قررت ان احسن الظن بشدة بربي...واعمل بمبدأ قانون الجذب
طبعا كتير اخوات حكو عن هالموضوع بالمنتدى ومن ناحية اسلامية
انا هلق دعيت كتير لربي واستغليت يوم عرفة الحمدلله
لكن في داخلي احساس غريب جديد من اليقين بالله
وان الله مخبي لي شي ماكنت بتوقعه
مفاجاة يعني
اللهم ياكريم
يامن اذا اعطى ادهش
ادهشني
ادهشني بما ستعطيني
نعم
انا من هلق بعتبر حالي عروس
عروس وجاهزة كمان ( يعني عم جهز حالي انو صرت اهتم بحالي بشغلات ماكنت اهتم فيها من قبل كتير متل بشرتي وشعري وجسمي )
وصرت كل ما اعمل شي او جيب شي اعتبر اني ماني مخلدة ببيت اهلي
وانو السنة الجاية انا يمكن ماكون هون
يمكن يتغير كل شي
مازاد يقيني بهالموضوع انو هالسنة انا فعلا ماعاد اعرف شو مصيري السنة الجاية ماعم اقدر خطط لشي كل شي واقف بوجهي
يمكن لحكمة من الله ان شاء الله انو رح تتغير حياتي ويتفضل يشرف نصفي الآخر
يعني اشتدت والله اشتدت
اشتد الكرب واشتد الهم وعظم الضيق في داخلي
( عندما يشتد الظلام اوقن ان القادم هو الفجر )
نعم يابنات
قررت انو خلص اقنع نفسي اني رح اتزوج وقربت صير عروس
او اني اصلا عروس حاليا
جبت ورقة
صرت اكتب عليها رسائل ايجابية لنفسي
انا سأتزوج رجلا ليس كباقي الرجال
رجل يليق بي
بشخصيتي وعقلي وروحي وطيبة قلبي
صرت اكتب مواصفاته واقنع حالي انو رح ياخدني رجل مميز حقا
وان الله ما أخره الا لانه لسا بكون نفسه او بكتمل وضعه المميز من ناحية أي شئ مو قصدي المال أي شئ آخر
لكن الله سيعوض صبري
والله يابنات انا صرت حس اني ممكن كون مسحورة او صايبتني عين او حسد
لانو والله شي غريب فعلا اللي عم يصير معي
بس كيف فيني اتأكد اني هيك فعلا؟
بأي حال قررت ارقي حالي على قدر الاستطاعة
ولا أيأس
واني اكيد رح اتزوج
وبإذن الله مارح يخيب ظني
واذا كنت مريضة بشي معين الله يلهمني اقدر ادرك هالشي و اعمل الاسباب والله يشفيني
والله يابنات لسا انا عم اتمرن على هالامور
اهلي سافرو على سوريا بشان اخي يكتب كتابه وقاعدين هنيك مبسوطين وهو كل شي بدقله مابرد عليي مشغول مع خطيبته وهي طايرة من الفرحة الله يهنيهون
لكن عم قول انو اكيد العيد الجاية حيكون الي انا وفرحتي انا لانو هالعيد ممل جدا ومو الي وقعدنا لحالنا بالبيت انا واخواتي الصغار بسبب ظروف ماقدرنا نسافر معهون
لكن اكيد بعد كل هالعسر والتعب واليأس والحزن والضيق اكيد الله رح يفرجها
ومو أي فرج
الله رح يدهشني بالرجل اللي رح يبعتلي ياه ورح يكون جزاء صبري وانتظاري
ودعوتي له وتمسكي بتعاليمه بالرغم من صعوبتها هالفترة كالمسك عالجمر الله يثبتني يارب
الله يخليكون بنات
كونو معي
خلينا كلنا نكون هيك
نحسن الظن بالله تعالي اكرم الاكرمين
واكيد باذن الله رح يعوضنا
اعملو متلي اقنعو حالكون انو رح يجي هالانسان رح يجي الحبيب الغالي رح يجي نصفي الآخر
واكيد ان شاء الله رح يجي ويحبك بجنون
بنات بإذن الله تعالى مارح يجي عيد الأضحى الجاية الا ونحن مرتبطين قدام الناس كلها بشباب من خيرة الرجال
يلا يا بنات مين رح تبلش معي؟؟