انا والكاميرا في السوق لكشف المستور ستايل وشيك

السلام عليكم ورحمة الله وبركاتة
كيفكم بنات وان شاءالله مبسوطين؟؟
تتذكرون موضوع كحل سمايلينق والمغناطس اللي شطف ابو القلم ؟ ههه
هذا فوق الايميلات اللي يكون عنوانها فيلم رعب (خطير وعاجل)
تحسين قبل تفتحين الايميل انك محتاج خوذه وعدة حماية شخصية
المهم هالمووضوع اشغلني وقلت بتأكد وانا ماني من النوع اللي اقتنع كثير بحكاية الصور لانو اوقات تكون مفبركة ولا حركة منافسة ولا حسد ولا اي شي تجاري ومو مطروح للفائدة العامة
الكحل اساسا زي ماسمعت انه يستخرج من حجر وهالحجر فيه نسبة حديد اولريدي
لذلك الخلل وين ؟؟
الخلل انه نسلط الضوء على ماركة شعبيه زي سمايلينق والواقع انو جميع الماركات نفس الشي
وسواء شي خطير او مو خطير انا طلعت للسوق ومعي جوالي وكنت لابسه بالطو ونظارة وعدسه مكبرة ههه<<لاتتحمسين واجد
فعلا اصعب شي انك تدخلين المحل وانتي بنيتك تكتشفين شي وانتم عارفين اصحاب الماركات
شوي ويصيرون بروشات بعبايتك من كثر القرقة وطريقة العرض اللي اشتري ولا انتي اكبر قروية بالعالم ههه
الحقيقة اضطريت اني اصير بنت قوقو ودخلت بكل براءة وكان معي صديقة تهز رأسة يمنتن ويسرتن على بالها ضابطه الدور
دخلت لفافوم وقلت لهم ابغى كحل مايسيح ويكون قلم <<اكثر سؤال انسئلته بحياتي
قال شو بدك مدام
قلت بدي 2شاورما وعصير طماط
عفوا
قصدي ابيك تجمع لي كل انواع الكحل القلم واذا سمحت لي بروح اجربهابالتواليت لاني مابقدر اخذ راحتي هنا
وطبعا سويت فيها بنت ريتش وطلعت 500ريال وقلت خلها عندك على بال ما اجي
وكنت اقول بخاطري لو جحد هالفلوس حقي برقبة الفراشات ههه
عطاني اضن خمس ماركات
منها سان لوران وشانيل وكلارانس ونسيت وش الباقي
وقلت حكمي على هالانواع راح يكون شامل للبقية
دخلت التواليت وطلعت المغناطيس من شنطتي وهات ياكلوزات ههه
عاملة النظافة برا واحس لسان حالها يقول (ايش سوي هذا حورمه جوا...!!!)
وصراحة كل الانواع طلعت نصب×نصب
بنات الدورة السابقة تتذكرون لمن سويناها على ماركة مكياجي وسمايلينق وبرفكت بالمشغل؟؟؟
كان المغناطيس يادوب يجذب طرف الكحل صح؟
هذا الله يسلمكم رفع لي الكحل فوق هام السحب وارفع راسك انتي سعودي ممغنط ههه
اتمنى منكم دعوة حلوة نظير هالمجهود واقولكم لاتصدقون كل شي ولا تثقون بأي معلومة واللي خلاهم يجربون يخليني انا وانتي نجرب ونحكم بأنفسنا
واخر شي رجعت الانواع كلها وقلت له مافيه شي ناسبني وشكرا لكم وترقبو فضيحتكم في الفراشة وآسيه ههه