انتي واهل زوجك الى متى للنقاش الجاد

السلام عليكم ورحمة الله وبركاتة
كثير منا تصير معاها مشاكل مع اهل الزوج مره نتكلم وعشره نسكت
بعض الاحيان تدورين احد تطلعين له اللي بقلبك او حتى حل للي يصير
بس احيان تنصدمين وتندمين انك شكيتي
لو جيتي تشتكين مين الشخص اللي فعلا تحسينه قريب لقلبك وتلاقين عنده الراحه والحل ..؟
امك.. اختك.. صديقتك.. قريبتك.. زوجك..
امك.. راح تزعل اكيد وتتضايق وتكره زوجك واهله وانتي ما ودك هالشئ يصير
اختك.. نفس الشي غير كذا راح تقول لا امك او اي احد من العايله بغرض المساعده :: وطبعا ماودك غسيلك ينتشر::
صديقتك.. اما تغثك وتقول اصبري وانتي غلطانه وماتفهمك وتقول استسلمي وانتي ماتبين احد يحط من قدرك وقيمتك
واما تجلس تسب في زوجك واهله وتضيق صدرك وتزيد همك
قريبتك.. ممكن تنشر الاخبار للي حولها لو حصل بينكم شئ
زوجك.. وحده من الاثنين بيوقف مع اهله ولا يعطيك وجه او انه يقول تحملي واصبري عشان خاطري >>وانتي مالك خاطر يعني
طبعا وباختصار انا عملت كل شئ وما حصلت نتيجه الا في حاله وحده وهي تخفف عني كثير وهي
اني اشكي لزوجي لانه مشجعني على الشي هذا يقول خذي راحتك وطلعي اللي بقلبك ولا اسمعك تتكلمين على اهلي في وجههم واذا صار شئ بادافع عنك
والحمد لله من الناحيه هذي لقيت احد اشكي له بس اللي خوفني
ان كثير من الحريم يقولوا لا تشتكي للرجال كل شوي عن اهله بعدين يكرهك ويمل منك لو بعد 20 سنه
طيب الحين ابي رأيكم هل صحيح الرجال ممكن يمل من زوجته رغم انه هو يطلب منها هذا الشي ويسالها في شئ مضايقك صار شئ ؟؟
والله يابنات ما ابي بيتي يخترب لو بعد 100 سنه ومو لاقيه انسان يخفف عني كثر زوجي الله لا يحرمني منه
ويسخره لي
والله اشوف انواع القهر من اهله واسكت عشان ما يكرهوني رغم ان معايه حق
وخصوصا تدخلاتهم اللي ما تنتهي زوجي حاول كم مره يفهمهم انه مرتاح وما يبي احد يتدخل بحياته لكن لا حياة لمن تنادي
والله مشكله اذا تكلمنا قالوا ما يبونا واذا سكتنا زودوها
اتمنى ياعزيزاتي تقولوا لي وش الصح من الغلط
ورجاء خلونا نفتح حوار راقي يعني اللي بتجرح رجاء اللي فيني مكفيني وتحتفظ فيه لنفسها
واسفه على الاطاله ومشكورين
لا تنسوني من صالح الدعاء اذا ما عندكم رد