اول دروسي في كورس المكياج

1. و بصورة عامة تمرير التلجة على الوجه قبل المكياج يساعد على تثبيته


2. مرحلة التجهيز لرسم العين


3. مرحلة البلاشر و الروج

هلا يا احلى فراشات
كيفكم و كيف اخباركم..... هذا اول درس لي زي ما وعدتكم قبل كده و حوريكم فيه كيف تقدرو تاسسوا وجوهكم كاملة و تغطوا كل عيوبها و اتمنى انكم تستفيدو منو
بس مرة تانية اذكركم انا للاسف ما اعرف شي عن الماركات انا استعمل أي لون يعجبني بغض النظر عن ماركتو يعني يا ريت ما تسالوني عن الماركات
نبدا الدرس:
اول شي لازم طبعا وجهك يكون نضيف من أي اثار للمكياج من قبل كده و تكون بشرة وجهك مرطبة بكريم الترطيب عشان يكون الوجه مستعد جدا انو يستقبل المكياج
بس احب انبهك انو ما ينفع تعملي مكياج بعد تنظيف البشرة بالبخار او بعد حمام دافي لانو مسامك بتكون مفتوحة
و طبعا المسام لما تكون مفتوحة ما تساعد المكياج انو يثبت
بس عشان تسكريها ممكن تمرري على وجهك تلجة لمدة دقيقتين تقريبا و هي تتقفل

و بصورة عامة تمرير التلجة على الوجه قبل المكياج يساعد على تثبيته

اما اذا حبيتي انك تستعملي السبراي المثبت فانا انصحك انك تستعملي السبراي اللي يبخوه بعد الانتهاء من المكياج مو قبلو لانو التاني لو غلطت يصعب عليك انك تمسحي الغلط و يخلي الرسم مو مزبوط بعكس التاني اللي انت تكوني متاكده من انك عاملة كل شي صح و حابة تثبتيه
داحين نبدا وضع المستحضرات:
مرحلة اخفاء العيوب
طبعا اغلبنا وجوهنا فيها عيوب حابين نغطيها و المكياج ما صنعوه الا عشان يبرز الجمال و يغطي العيوب فاحنا اول خطوة حنعملها هي تغطية العيوب اللي في الوجه:
اذا كان عندك أي اثر لجرح او خدش او أي حبة في وجهك استعملي خافي العيوب الابيض عليها كمية معقولة لا هي كتيرة و لا هي بسيطة
اما اذا كان عندك أي حبة حمرا او منطقة محمرة في وجهك او حتى اذا كنت من النوع اللي تحمر وجناتو فحطي على هذه الاماكن خافي العيوب الاخضر و اتاكدي انو حيخفيها
اذا كانت حواجبك ماهي مزبطة او حتى لو مشقرة فانت ممكن تخفي الزيادات اللي في حاجبك باستعمال كريم او شمع الترميم و نفس الكريم تقدري تغطي بيه الحفر و المسامات الواسعة اللي في الوجه
اخر شي هي تطبيق نظرية الاضاءة و الظل بحيث انك تحطي خافي عيوب من اللون الفاتح على الحتة اللي حابة تظهريها و لون غامق على اللي حابة تخفيها
طبعا كده اخفينا كل العيوب اللي في الوجه ( استحملي شكلك داحين لانو حيصير زي الشبح كلو بقع)
مرحلة وضع الاساس
قبل ما نحط كريم الاساس لازم تغطي منطقة الجفن اللي حتسوي عليها الظل كلها بخافي العيوب عشان يخلي لون العين كلو موحد و في نفس الوقت يثبت الشدو و يخلي لونو اتقل و اوضح ويساعدك في دمج الالوان
و اذا كانت الوانك مطفية و حابة تخليها بلمعة ممكن تحطي شي بسيط جدا من الفازلين مع خافي العيوب
طبعا لا تكتري خافي العيوب على الجفن و لا تخليها قليلة يعني شي معقول خليها
بعد كده اختاري كريم اساس بلون بشرتك تقريبا او افتح منها بدرجة و اذا بشرتك دهنية استملي كريم اسا خالي من الزيوت
وزعي الاساس على كل وجهك بشكل نقط و بعدين استعملي الاسفنجة في انك توزعي النقط دي على باقي الوجه بس مو بطريقة المسح انما بالطبطبة و اتاكدي انك وزعتيه كويس على وجهك و رقبتك و أي منطقة بتكون مكشوفة من فستانك
استني شوية لغاية ما تكون بشرتك امتصت كريم الاساس
اذا حبيتي تتقلي مكياجك حطي طبقة تانية من كريم الاساس بنفس الطريقة الاولى
الحين جيبي البودرة حقتك و حاولي انك عن طريق الطبطبة تغطي كامل الوجه و الرقبة و كتري منها تحت العين و بعد كده ممكن تستعملي فرشة كبيرة في انك تزيلي البودرة الزايدة

مرحلة التجهيز لرسم العين

طبعا انا اليوم ما راح اعطيكم أي شي عن رسمات العيون بس حابة اذكركم انو لازم تحت العين تحطي بودرة لونها فاتح كتيرة عشان و انت بتسوي الشدو فوق العين لو نزل منو شي تحت لا يبهدل لك وجهك انما بالعكس بسهولة تنفضي البودرة الفاتحة و معاها تقدري تزيلي أي اثار للظلال بعد ما تنتهي من الرسمة اللي فوق الجفن
طبعا لون البودرة الفاتحة يعتمد على لونك و لون مكياجك و بلاشرك و روجك يعني ممكن تحطي بودرة بيضا او وردية فاتحة او لحمية او برونزية او حتى فضية يعتمد زي ما قلت على لون المكياج

مرحلة البلاشر و الروج

طبعا بتاخدي الفرشة الكبيرة و تاخدي من البلاشر حقك و تبتسمي لنفسك في المرايا ابتسامة كبيرة و تروحي حاطة البلاشر على العظمة البارزة من خدك باتجاه الاذن بس ديري بالك لا تبداي البلاشر من الخد انما من الاذن عشان لا يكون كثير على خدك و اذا حسيتي انك كترت من البلاشر و حابة تخففيه ممكن تحطي فوقه شوية من بودرة وجهك
بعد كده اخر شي عندنا هو الروج فانت اذا كانت شفايفك كبيرة حدديها من جوة حدودها و اذا كانت صغيرة حدديها من برة حدودها اما اذا كانت عادية فحددي على الحدود بصورة عادية بس انتبهي لا تصغري شفايفك مرة او تكبريها مرة ترى بتكون واضحة و يطلع شكلك مو حلو يعني حاولي الفرق ما يكون كبير بين شفايفك الطبيعية و اللي انت محدداها
بعدين استعملي الروج يكون لونه مناسب مع لون التحديد وحطيه على شفايفك عادي وبعدين حطي منديل بين شفايفك و اضغطي عليه و مرة تانية حطي الروج على شفايفك هذه الطريقة تزيد من تثبيت الروج طبعا
ممكن اذا كان لون الروج يختلف عن لون التحديد ممكن تظللي شفايفك كلها بلون التحديد قبل ما تحطي الروج و بعد ما تحطي الروج تدمجيه مع التحديد بيطلع لك لون متجانس كده و حلو
اخر شي اذا حبيتي و كنت رايحة مناسبة بالليل ممكن تحطي شوية ملمع على شفايفك بالذات اذا كانت صغيرة لانو يكبرها
كده نكون انتهينا من الدرس الاول و اعذروني اني طولت عليكم بس حبيت اقول لكم كل شي عندي و الاسبوع الجاي ان شاء الله نبدا معاكم دروس رسمات العين
ياريت الاقي تعليقاتكم يا فراشات و اذا عندكم أي استفسار تراني حاضرة ان شاء الله
انا ادخل النت كل يوم سبت ان شاء الله لو في استفسار ارد عليكم
يله سلام