بخصوص الهدايا بين الأزواج ارجو منكم الدخول

1. بنات أنا لي سنتين ونص متزوجه وبدخل 3 سنوات بشهر 7

بنات أنا لي سنتين ونص متزوجه وبدخل 3 سنوات بشهر 7

زوجي ولله الحمد يحبني و انا كمان اموت فيه بس مشاكلنا هالايام كثرت مره يعني كل اسوع او اسبوعين و احنا في مشكله
المهم زوجي أخر مره جاب لي هديه قبل سنه وكل ما دخل للبيت وسمعت صوت اكياس معه أقول يمكن جاب لي هديه , او اذا تأخر ما جا أقول اكيد تذكرني وراح يجيب شي , والله ما أطلبه يتكلف بشي بالعكس و على الأقل مع الراتب يجيب لي شي , وانا لما اروح لأسواق نسائيه والله ما أنساها ابدا واجيبله ورود , عطور , علبة شكوكلاته شكليها يفتح النفس و طعمها جنان حتى ان الشوكلاته اعجبته مره وحط كيس الحلاوه معه بالبوك عشان يشتري عليها.
ولما أورح بالصيف لأهي يجيني بعد فتره و أجيب له هدايا و هو جا والله ما فكر يجيب حتى لو عطر, والمشكله ان معي بنفس البيت اللي بنت عمي وعماتي وكل وحده منهم زوجها يجيب لها بين فتره وفتره وبالأعياد يجيبون لزوجاتهم الا انا ما أدري وش ناقصني عنهم
وبشهر2 مره فتحنا موضوع الهدايا وتناقشنا فيه وقلت له انك ما تجيب لي وهذا وانت يجيك راتب وماتفتكرني بشي , وانا لما يجيني فلوس أول شخص اتذكره انت و اجيب لك , قال ليه متى اخر مره جبتي لي وحتى انت ما جبتي لي شي ( بدا ينكر ) وذكرته باللي قد جبت له , وقال ان شاء الله خير
المهم بعد شهر 2 صارت بيني وبينه مشكله كبيره وقلت لأهلي ع المشكله اللي صارت وطبعاً زعل ويقول ليه تقولين لهم ؟؟
المهم قالي عشان هالمشكله والله اني كنت ناوي اجيب لك هديه و كنت مخطط عليها بس والله معد اجيبها لك ( والمشكله هو الغلطان )
المهم بداء يتأسف و يقولي اش تبغين اراضيك فيه قلت له أبي جوال .. قال والله لو بعشره ريال ما جبته لك تخيلو بغيت انجن يوم قاله أنا زوجته ليه يقولي كذا .وبعد المشكله بيومين تقريبا فتحنا السالفه وقلت له لي أنا ما استاهل لما تقول والله لو بعشره ما أجيب لك ؟؟
قال الا تستاهلين بس حركات بنات الشوارع لما يزعلون من أخوياهم ويطلبون منهم هديه ما أبغها
وقلت له ليه أنا زي بنات الشوارع بنظرك ؟؟
قال لا بس هذي حركاتهم
تخيلو ما عمره راضاني بهديه الا مره واللي هي قبل سنه , ودايم الغلط يجي منه مو مني ولما أزعل يقول أصلاً انتي تزعلين من اي شي وزعلك كثير
ويعني كل ما زعلتي اجيب لك شي ,, قلت له على الأقل لما تغلط علي غلط كبير جيب , وقالي شيلي فكرة انك تطلبين مني عشان ترضين
أنا بجيب بدون ما تطلبين , أصلاً ما عمري طلبته الا لما زعلني وقالي وش اراضيك فيه..
ولعلمكم لما كنت متملكه طلبته يجيب لي جوال وقال طيب وسحب علي ومره قال اني قد اشتريته و بالسياره وماجاب لي ولا أرسله , ووقتها كان جوالي خربان , المهم ارسلت له راساله وقلت له بترسل الجوال قريب لأن جوالي خربان ولا ابوي بيجيب لي ..ارسل وقال أنا ما اشتريت ..وبعدها جاب لي ابوي الله لا يحرمني منه , وبعد الزواج فتحنا السالفه وقال والله وقتها ما كان عندي فلوس ولا كنت جبت لك ,
ولما كنت بالصيف عند اهلي وهو بالرياض طلبته جوال قال خلاص ابجيب لك بس بحدود 800 قلت خلاص وشفت جوال وبنفس السعر اللي طلبه واعجبني مره وقلت له جيب قال ما أقدر اجيب وانا ما طلبته جوال الا لأني عارفه ان عنده فلوس
وما جاب لي وراح سوا له منتدى ب 4000 تقريباً وعانيت معاناه منه المنتدى و أغلب مشاكلنا عليه
وابوي حس أني ابي جوال والله العظيم اني ما قلت لأبوي شي بسالفة الجوال نهائياً
وبعد السالفه بيومين تقريباً قمت من النوم ورحت لأبوي بالمقلط وقال شوفي كرتون جوال ع التسرحيه بالغرفه اللي كنت نايمه فيها ولما رحت لقيته جايب لي جوال نفس اللي كنت ابي فديته يا ناس والله لا يحرمني منه واي شي يحس ان احد من اخواني أو أمي أو اختي يبي شي يجيبه له ويسويه مافاجأه
حطو نفسكم مكاني أنا ابي جوال او اي شي منه هو شخصياً ودي لما أحد يسألني عن الجوال اقول من زوجي
ولما شفته معد جاب لي شي حلفت معد اجيب له .. وفعلاً صرت اروح الأسوق وما أجيب له شي ,,
وحتى لما أجلس مع البنات كل وحده تقول زوجي جاب لي كذ وكذا ,
أكيد انا تحز بخاطري شوي احس الهدايا لها وقع بنفس ولها تأثير كبير , وغير انها تجدد بالعلاقه الزوجيه
هذا مشكلتي وش اسوي معه ..
أعطوني حلول الله يعافيكم