برد وجفا ونسمة هوى قصة سعودية مميزة للكاتبة وصيت قلبي عليك

وردة الدلووعة

26-03-2022 - 03:11 pm

يتذكر ذيك الليله السوده..وكأنها صايره اليوم ..مو كأن فات على الحادثه 11 سنه …
يتذكر كل شي…يتذكر يوم جاه أتصال من صديق ولده وراح له
وهو يلهث من كثر المشي اللي مشاه لحد ماوصل سيارته اللي مبركنه
في اخر الشارع الرئيسي
يتذكر ويتذكر ويتذكر وادمعت عيونه بسبب الذكرى اللي مرت على باله
ذي اللحظه
سأله بعيون كسيره ومتعذبه تطلب نظرة امل ..تطلب كلمة رجا …تطلب
أجابه لسؤال محير ..ويبيله اجابه…
تطلب كلمه وحده ..كلمه تحيي قلوب ماتت واندفنت وهي
متعذبه ..متعذبه من القهر وحرقة الجوف ..
وين ولدي….وين يوسف…!!!
هذا السؤال اللي محير عايلة العالي من كبيرهم لصغيرهم …
1april 1997
اليوم كانت ملكته على بنت عمه…وهو لسه ماجاء والشيخ وصل
والمعازيم ينتظرونه…
بو يوسف\محمد..!! وينه..وينه يوسف….تكلم ..أنطق!!
محمد\عمي…..يوسف..يوسف…أخر مره شفته عند باب شقتي..وسياره تلحقه..
بو يوسف بأعلى صوته\سياره تلحقه..!!ليش..!!
محمد بعيون تدمع\مدري ..والله مدري ياعمي.. كل اللي أعرفه أنه بينزل من السياره..ويوم شاف السياره اللي وراه ركب مره ثانيه..…
وأخر كلمه قالها لي:
قول لأهلي انا راجع..
اسودت الدنيا بوجهه ومابقى مكان الا دوره فيه.. …وحتى اصدقاءه سألهم واحد واحد..لكن بدون فايده..
وضاع الحلم…ضاع أحلى حلم يتمناه أي أبو وام لولدهم العود
كانوا يتمنون يشوفون ولدهم في بيت هو مع زوجته وعياله…
كانوا يتمنون الليله تكون أول ملكة حفيد بهالعايله…
كانوا يتمنون المعازيم تبارك لهم وتدعي لهم بالتوفيق لباقي عيالهم..
كانوا وكانوا وكانوا…
وماكل مايتمناه المرء يدركه…
انتشر الخبر على المعازيم كلهم أن يوسف ضايع ومالقوه والكل مستغرب
من أختفائه المفاجأ والغريب
والأم تقطع قلبها على ولدها وماتت من الصياح بس بدون فايده…
والكل قام يبحث عن يوسف مره ثانيه بجميع الأماكن بالمستشفيات والمغافر
والشوارع وكل مكان..
وبالأخير وبعد بحث أسبوع كامل بشتى الأماكن كانت النتيجه وحده
يوسف أختفى..
وكأن الأرض أنشقت وبلعته….

التعليقات (8)

وردة الدلووعة

26-03-2022 - 05:23 pm

الجزء الثاني
في بيت الجد يوسف كانت العوايل مجتمعه على العشاء
وكان كل يوم اربعاء يتم هالأجتماع العائلي ..
طبعا البعض يحسون نفسهم غير مرغوبين بهاللمه الأسريه والود ودهم ينتهي اليوم عشان يروحون لبيوتهم..
اما الباقي فكانوا يتمنون لو اليوم يطول عشان يستمتعون بهالجو العائلي اللي نادر مايصير فيه اجتماع الكل
ماجد\شوفه شوفه..كيف ماسك عبدر الرحمن بأيده..ياخي خله يتنفس ..حشى...والله لو واحد من عيالك كانت
ماسويت له اللي تسويه بهالعبدالرحمن..
سلطان\ياخي أيش عليك أنت..خل الوالد على راحته...واقف له على الحبه...
ماجد\أيه أنت شعليك..الطفل المدلل وأخر العنقود..شتبي أكثر من كذه..انا مدري شمسوي لكم هال عبدر الرحمن
عشان تحبونه هالكثر..!!ياخوفي أنه ساحركم وانتوا ماتردون...
سلطان\أستغفر الله العظيم من كل ذنب عظيم...ياماجد أذكر الله..شالكلام اللي تقوله..ولا وهذا أنت أخوي الكبير
تقول هالكلام أجل أنا ماأشره على البقيه...!!
وحب يغير الموضوع..
الا أقول شخبار سماح..وافقت والا لا!!!
ماجد\أووف لاتذكرني بهالبنت..مدري على مين طالعه عنيده..الولد بيروح من أيدها وهي جالسه تتفرج...
حاولت فيها كذه مره بس مش راضيه تقتنع ..حتى أمها زهقت وهي تقنع فيها...
سلطان \طيب أيش رايك اكلمها يمكن تقتنع..!!
ماجد\ليه أحنا مانكفي..!!
سلطان بخاطره\مو هذا البلاء أنت وزوجتك..
سلطان\لا أنا قصدي يمكن تسمع مني...هي محاوله لا أقل ولا أكثر...
ماجد\والله تسوي فينا خير ياسلطان ..
سلطان\خير أن شاء الله
ماجد..الأبن الثاني للجد يوسف عمره 40 سنه بشتغل في شركة ابوه العالي للعطور العربيه متزوج من بنت خالته مريم
سلطان..أخر العنقود عمره 24 سنه طالب في جامعة الملك فيصل
كانت جالسه مع جدتها..وتسمع سوالفها..وكل ماتخلص سالفه تلعوزها عشان تقول لها سالفه ثانيه..
طبعا الجده ملت من هالبنت الشيطانه بس زي مايقولون عمك أصمخ ..والبنت عنيده وراسها يابس.
هذه جمانه عمرها 18 سنه بتدخل هالسنه ثانويه عامه
بنت حبوبه وتموت في شي أسمه سوالف أول وخصوصا سوالف الجد وحركاته الغراميه مع الجده...
المسكينه تفكر أن زمان أول بعادته وتقاليده مثل هالزمان اللي مايعرف شي غير الماده..
ماتدري أن زمان اول كانوا يحكمون الناس بطيبة قلوبهم ومبدأهم هو الوفا اللي يحطونه تاج
على روسهم...
أيه نسيت البنت عنده هوايه ثانيه...وهي تحب الرياضه وخصوصا كرة القدم ومن مشجعين المنتخب السعودي وأولهم نواف التمياط...
الجده\ياجمانه ..والله ذبحتيني ..هلكتني...عورتي راسي..ماصارت ذي أسئله...خلاص..روحي مع البنات...
جمانه\جدتي..حبيبتي أنتي.بس وحده..سالفه وحده بس..وبقوم..تكفين تكفين....!!!
الجده\جمانوا.وبعدين معك..قلت لك خلصت السوالف..فكيني...
جمانه\لالالا..أبي أسمع سالفة جدي وهو راكب الحمار...
الجده\حسبي الله على بليسك..هالسالفه ذي بالذات عدتها لك ألف مره...
جمانه\تكفين أخر مره..صدقيني أخر مره..
الجد\يابنات...ياسميه روابي أبتسمام ...وينكم تعاولا خذوا مني هالبنت والله لأذبحها...
أبتسام\عجوز العالي...شمسويه بجدتي...
جمانه وهي ترفع شعرها من عيونها\نعم...شتبين أنسه أبتسام...هذا شي بيني وبين جدتي ماأبي أحد يتدخل فيه...
أبتسام\أوكي..جمانه..بس بعدين تعالي وقولي لي..وين الصور...اللي من الوليد....
جمانه وكانها تذكرت شي كبير وفزت من مكانها\حبيبتي عمري قلبي بنت خالي...أنا اصلا ماأقدر أزعل
هالقمر..خلاص حبيتي هذاني قمت وسمعت الكلام بس تكفين الا الصور...
ابتسام\أيه تسنعي بنات مايجون الا بالعين الحمراء...
الجده\صج ماتستحين يابنيه ..وأنا اللي من زمان ارتجاك تقومين ماقمتي...
جمانه\شكلها العجوز خرفت..
وتوها الجده بتمسك العصا عشان تضربهم الا أمسكت جمانه يد ابتسام وأنحاشوا..
ابتسام عمرها 25 سنه مخلصه كليه وجالسه في البيت تبحث عن وظيفه...
أخت يوسف والوليد
.
.
.
.
.
.
.
.
كانت جالسه معهم في الصاله وتسمع كلامهم اللي يقطع القلب قطعه قطعه...ياما تناقشت معى أمها وفهمتها
الوضع ..لكن طيبة أمها وحنيتها..خلتها حتى تنسى كرمتها المهزوزه...
وهذا حالها هي مع أمها ...كل جمعه تصير أضحوكه للكل من كبيرهم لصغيرهم هذا غير الحش اللي ورى
ظهورهم..
كثير تستغرب ..وتسأل نفسها ..ليه أمها ماترد عليهم..!!
ليه ماتصير شخصيتها قويه مثلهم...!!!
وليه هي غير عن البنات..!!
ليه دايم تحس بالمذله وهي تسمع سوالفهم..!!
ليه ماتحس بالأمان وهي عند أهلها..!!
معقوله....!!
اذا ماشفنا الأمان عند أقرب الناس لنا!!!اذا مالمسنا هالخصله فيهم....!!
وين نحصله..!!
وين نلقاه!!!
وعند مين نشوفه..!!!
عند شخصية الأب اللي كلمته تطيح بالأرض قدام أخوانه..!!!
والا عند الأم الحنونه ..الي غلطتها بهالدنيا كلها أنها أجنبيه...!!
والاعند الأخ الأناني...!!
وش هالدنيا هذه!!!
وأيش الجرم اللي أرتكبناه عشان نكون أحقر الناس...!!
هذه هي راوين ..
العمر 20 سنه طالبه في جامعة الملك سعود تخصص علوم طبيه
حزينه ..كئيبه ..ولكن هناك نور يشع من قلبها الصافي...
هناك حب عذري يتاميل ويطرب أعذب كلمه قيلت للمحبين...
مريم\أها..وبعد مدام نور..وش تسون اذ رحتوا الهند...
لطيفه\يعني وش بتسوي بعد ...!!أكيد بتشتري لها ذاك الكريم اللي يطول الشعر..ماتشوفين كيف شعرها غادي
طويل كل ماتروح الهند...ههه
نور بطيبة قلب\ههه ياحليلكم شكلكم تبون مثلها..والا منقهرين من شعري صح!!!
مريم بتطنز\ههه مين اللي منقهر...!!أحنا!!! وأشرت على نفسهاههه ظحكتيني
وأنا مالي خلق أضحك
يانور...
الجده وبدت تعصب من حريم عيالها\بس يابنات...ويالله قوموا حطوا العشاء لرجالكم...أكيد اللحين ميتين
جوع...وتعالي ياهند أبيك بالغرفه
هند\أن شاء الله يمه...
دخلت هند الغرفه وهي عارفه وش السالفه اللي تبي أمها تكلمها عنها..
.
ولمحت أبتسامة سخريه من مرت أخوانها مريم ولطيفه وشافت الراحه في عيون نور وشيخه بس أسكتت
عشان تبعد الشر والمشاكل لأنها مش ناقصه اللي فيها كافيها..
هند\نعم يمه...
الجده\يابنتي أنتي عارفه وش أبي منك...و
قاطعت أمها هند \يمه الله يخليك لاتبدين بالسالفه,,وبعدين لازم مانيئس من رحمة الله وأنا راضيه باللي الله
كاتبه مهما كانت النتايج...والحمد لله انا اللحين حامل
الجده\بس يابنتي أنا خايفه عليك ...
هند\أدري والله أدري يايمه..بس شسوي ..أنا أنسانه...ومتزوجه وأتمنى يكون عندي طفل ثاني سليم أنا ماراح
اوقف على جمانه وناصر اللي بالمستشفى...لازم أحاول ثانيه وثالثه..وبعدين اذا ماساعدتيني أنتي اللي أقرب
الناس لي..منوا اللي بيساعدني يايمه..
الجده\لاانتي شكلك نسيتي أن هذه المره الرابعه اللي تجبين فيها عيال ويموتون بنفس اليوم...!!
هند اللحظه نزلت الدموع اللي بعيونها وماقاومت أكثر وفرقت اللي بداخلها\لا يمه..وسكتت .....لا
مانسيت...تبيني أذكرك بأساميهم حتى..!!
الأول محمد..والثاني نوره والثالث نايف والرابع عبد العزيز...وكلهم..وكلهم..ماتوا...وانا مت وحييت ألف مره
واللي مستحيل أنساه...ولدي عبد العزيز...وبكت بسبب الذكرى..
كان توه بالمهد..صغير وابتسمت وأبيض...حتى عيونه..عيونه يايمه أنحرمت منها ..ماشفتها...
تدرين ليه ..لأنه كان دايم بالحضانه...والأوكسجين مركب له..
واذا أنشال منه الأوكسجين بيموت..حاله مثل حال أي ولد جبته ومات..
كنت دايم أدعي ربي أنه اذا كان هالولد خير أنه يعيش فيخليه لي...
أما اذا كان هالولد شر أنه يعيش فأنا راضيه باللي كاتبه لي ربي..
وبعدها..وبعد شهر واحد بس ..توفى عبد العزيز..
وأنا حمدت ربي وشكرته..لكن...لكن حرقة القلب شابه بصدري يمه...
ولحد يومك هذا مش قادره أطفي النار...
وكل ماأشوف ولدي ناصر المعاق اللي طايح بالمستشفى ..أتذكر عبد العزيز وعيالي البقيه اللي ماتوا..
شفت الظيم يمه...وقلبي منقطع على زوجي الي يبي الولد ...
أنا ماألومه...يبي ولد يرفع راسه ويروح معه المجالس
ويقول هذا ولدي....!!
تعبت يمه..تعبت...
ضمت الأم بنتها وهي تصيح
وتدعي ربها الف مره أنه يسهل الولاده لها ..
هند بنت الوحيده للجده بعد وفاة أختها اللي أصغر منها وهي حامل بالشهر الخامس متزوجه من واحد من أهلها اسمه جاسم وساكنه ب راس تنوره
عندها بنت وحيده اللي هي جمانه وولد أسمه ناصر معاق غير قادر على التحرك والكلام وداخل مركز للسمع والنطق عمره 15 سنه..
جمانه\العش اء.......جاهز..ياأحلى أم وأحلى جده...

وردة الدلووعة

26-03-2022 - 06:24 pm

جمانه\العش اء.......جاهز..ياأحلى أم وأحلى جده...
الجده وهي تمسح دموعه وتفك بنتها\ياربي من هالبنيه...ماتجلس في مكان واحد زي النحله....
هندبابتسامه حالمه\ههه الله يخليها لي يمه...
ابتسام\وأنا...!!
هند\أنتي الزين كله...
سماح\أحم..أحم....سماح جت..وخروا عنها.....!!طريق طريق...
أيوه..وأنا....!!
هند\أنتي شيخة البنات..بس ياليت تتركين هالدلع ..وتريحين قلوب متعذبه...
سماح\عمتي....وبعدين يعني..خلص..طبوا هالسالفه...
هند \وليه نسكرها..احنا بدينا أصلا....!!!!
أبتسام\عمتي تكفين لاتحاولين معها...الولد بيستخف...وهي مروقه...
الجده\أبي أعرف شغله وحده بس...وش هو اللي مو عاجبك ب أحمد..ولد ياحلوه ولا..وشرطي بعد...
هند\وغير كذه ولد عمك...
سماح\بيأس ..مو كأنكم نسيتوا شي..!! العشاء جاهز..يالله..أنا بسبقكم..
الجده\أيه تهربي تهربي...بس أنا وراك ياسماح والزمن طويل..
جمانه\صدقوني كل هذا بسبب أختها سميه ....
هند\عيب يابنت...لاتدخليين بهالأمور ...
الجده\ليه..وش دخلها سميه...
جمانه\ياجده...ماتعرفين سميه الحقوده...
ابتسام\جمانه..كأنك خرتيها حييل..
جمانه\شكلي....بس شسوي من هاللسان الطوييل..
الجده\والله يبيله قص...
سماح طالبه في الكليه العلميه عمرها 20 سنه
البنت الثانيه لماجد ومريم
مصابه بصرع وتطورت حالتها بسبب عدم تعاونها مع المرض..
جميله وحادة الملامح ودلوعه بعض الشيء..
هيثم\ياهوا...طلال,,,,
طلال\هأ..
هيثم\لالالا أشك أنك منت بصاحي....طلالوا..
طلال\أوف منك....ياأخي خير شتبي....!! خلصنا!!!
هيثم\لا ..وبعد معصب ...أقول يالحبيب وشفيك..مش بعوايدك تخبي عني شي....
طلال\هيثم.
.
هيثم\نعم...
طلال\أبي أتزوج...!!!
هيثم\طيب...
طلال\أقولك أبي أتزوح تقولي...طيب...
هيثم\شتبيني يعني أقول.....اذا قلت لك أنت مجنون بتقولي ليه!! واذا سكت وما أهتميت بالموضوع بتقول لي
أنت ماتحس فيني ياهيثم...
طلال\خلاص..هيثم...ماعدت أتحمل أبي أتزوج...
هيثم\ومنوا اللي تبي تتزوجها !!
طلال\......راوين.....
هيثم\منوا راوين...!!!!
طلال\بنت عمي ياغبي...
هيثم\. مبروك مبروك.......وسكت …. أنت من صجك....!!
طلال\توك تقولي مبروك..شفيك غيرت رايك!!!
هيثم\ومالقيت غير راوين..
طلال ومات قهر\وشفيها راوين..هي بنت عمي وأنا أولى من الغريب...
هيثم\وأنت تتوقع أمك بتوافق...
طلال\هذا اللي مخوفني ياهيثم..اخاف ترفض وتذبحني...
صدقني اذا ماتزوجت راوين بمووت..تعرف وش بسوي بموت..
هيثم\بسم الله عليك من الموت ..ياأخي لاتفاول على روحك..وأن شاء الله موضوعك بيتسهل ..
طلال\أدعيلي ياهيثم أدعيلي صدقني محتاج لدعواتك...
هيثم\من عيوني ياأخوي...الله يوفقك ان شاء الله..
طلال\آمين..
هيثم\أسكت اسكت جاء أخوها...أنا مدري كيف أنت مستحمله !!
طلال\ومين قالك أني أجلس معه....أنا ياأذاكر ..او أني طالع مع الربع..مستحييل أجلس معه في مكان واحد...
طلال طالب في جامعة الملك سعود بالرياض تخصص جراحه عمره 24سنه ساكن في بيت عمه بو تركي
يحب بنت عمه راوين ...
هيثم طالب في جامعة الملك فهد للبترول والمعادن عمره 23 سنه الولد الثاني لأبو أحمد
يمشي في شوارع فرنسا...وللأسف ....ماله أي هدف..!!
شعره الطوييل ..لحيته اللي كثرت ..ملابسه المبهدله ..اللفافه اللي على رقبته..أيده اللي ترتجف من كثر البروده..
كل هذه أشياء تدل على حالة حزنه وتوتره الدائم...!!
يشوف الناس كيف تبتسم ..وهو مايعرف كيف الأبتسامه...
يشوف الناس كيف تضحك وتتمايل في مشيتها من كثر الوناسه وراحة البال...وهو مايعرف وش ورى هل الأبتسامه...!!
تمنى يرجع الزمن لورى..تمنى ترجع 11 سنه ..تمنى يكون كل اللي صار له حلم وأنتهى..تمنى يفتح عيونه
ويشوف نفسه في بيته..في حضن أمه وأبوه...بين أعمامع وجده وجدته...وتمنى وتمنى وتمنى....
ويابعد هالأمنيات..
لحد اللحين مش مصدق اللي صار له..!!
مش مصدق أنه متغرب 11 سنه عن بلاده ..
وعشان ايش...!!
عشان غلطه بسيطه....ماينحاسب عليها...!!
توه يعرف مين هو..!!مين يكون..!!وولد مين..!!
هو ولد رجال ...حاله زي أي مواطن بالمجتمع..
له حقوق ..وعليه واجبات...
لو يدري أنه هالشيء بيوصله لهالمرحله..!!
كان ولافكر حتى أنه يجازف ..المجازفه اللي سببت لحياته الموت...
ومش أي موت...
هذا الموت البطيء...
هذا الموت اللي يذبح الروح والقلب...
موت الغربه..
موت الوحده...
موت الهجره من بلادك اللي عشت فيها وتنعمت..
موت الهجره من أعز الناس لك..
موت البعد عن أحبابك...
ذبحت قلوب يايوسف...
ذبحت قلوب متعذبه من بعدك...
ذبحت قلب أمك وأبوك...
وذبحت قلب ثاني ..قلب كبير...لكنه رهيف وتعبان..
قلب كان يكتب أحلى أنواع القصيد ...
قلب يحبك حتى النخاع...
قلب وفي ..أنتظرك 11 سنه...ومامل من الأنتظار...!!
وبيظل ينتظرك وينتظرك ...لمن يجيه خبر وفاتك...
وأنت في الغربه...
أرسم يايوسف...
ارسم....ماصار عندك غير هالذكرى...!!
ماصار عندك غير الواح وريشة فنان...
فنان حزين راحل....مهاجر في دنيا بعيده...
بعيده....
صرت أثنين يايوسف..
لوحه ..وغربة

وردة الدلووعة

26-03-2022 - 07:25 pm

الجزء الثالث
………………
عبد الرحمن\حبيبتي..وبعدين يعني..خلص خليني أناام...وغمض عيونه..
وفتحها فجأه..
أوه...نامي حبيبتي..نامي...
ريوف وتضربه بأيدها\بابا..بابا..بابا...لاتن ام...
عبدالرحمن\ريوفه..حبيبتي أنتي...علامج اليوم...!!ترى بوديك ل روز تناميين معها...
ريوف\لا بابا خلص...بثكت..وحطت ايدها على ثمها...
ريوف\بابا..بقولك ثي...
عبدالرحمن\قولي ياروح بابا...!!..
ريوف وهي تقرب من أبوها\بابا ..أنا أحبك....كثير....وباسته على خده
عبدالرحمن\حبيبتي أنتي,,,,,انا أحبك أكثر..واكثر بس نامي ياعيون بابا...
ريوف\تيب قولي قثة ليلى والذيب...
عبدالرحمن\اوكي عيوني...قربي حبيبتي...
أخذ عبد الرحمن بنته وحطها في حضنه وحكى لها القصه وهو يمسح على شعرها بأيدها اليمنى ..أما ايده اليسرى كان ماسك فيها ظهرها ..وماحس الا بأنفاس بنته تتزايد ..وعرف أنها نامت مثل أي ليله تنام فيها...
عبدالرحمن وهو يناظر للسقف\ماأصعبج ياسماء..وماأصعب بعدج..
خلتيني لوحدي ورحتي لبعيد..
آآه ياسماء...بعدج عذاب...
هذا عبدالرحمن كويتي الجنسيه ..يشتغل مع الجد يوسف..وهو الوكيل الرئيسي لمحلات العالي للعطور العربيه..
أمانته وطيبته خلته يكون زوج ل سماء بنت الجد يوسف...
اللي توفت بسبب مرض السل ...
وماكان عندهم غير بنت وحده أسمها ريوف عمرها 4سنوات وبتدخل في الخامس..
مقطوع من الشجره بعد وفاة والديه ..واخذ الجنسيه السعوديه...
وب نباهته وأسلوبه السلس في المعامله وشدة ذكائه..
صار أفضل تاجر كويتي صغير السن..
وبسبب شغلته التجاريه عرف فيها عايلة العالي وكون معاهم شراكه ظلت سنين طوييله..
وأتحدت هالشراكه يوم تزوج عبدالرحمن سماء..
وبسبب جدراته ووفائه اللي ماله نهايه وتضحياته ..
أصبح االوكيل الرسمي لمحلات العالي..
كان أجمل يوم في حياته..يوم عرف سماء وصارت حليلته على سنة الله ورسوله...
حبها من أول نظره بريئه..وأول ماشافها عرف أنها هذه رفيقة الدرب اللي بيكمل معها حياته الناقصه
كان مفتقد الحنان قبل مايعرفها..كانت حياته كلها غربه..كان فاقد الجو العائلي..
وماعمره عاش هالجو الا يوم عرف سماء وعايلتها..
حسدهم من قلب على ترابطهم اللي شافه بعيونه..
بس ماكان يعرف أن بعضهم كانوا يتخذون هالرابط قناع أمثال ماجد وغيره اصحاب القلوب الخبيثه..
ريوف وهي نايمه\بابا..أحبك..يابابا..
عبدالرحمن وهويناظر بنته\وأنا اكثر حبيبتي..ياريحة الغاليه والله..
حب عبدالرحمن راس بنته وسمى عليها ووغطاها عدل ونام الجهه الثانيه..
_______________________________________________
كفاك دموع ياقلبي ترى دمعك علّي غالي...
أنا مالي بهالدنيا سواك أحٍد يواسيني....
دخيلك حتى لوصاحت جروحك ترفق بحالي...
أخاف صياحها يحيي جروحٍ ميته فيني...
صعيبه والله هالدنيا على مثلك وأمثالي...
صغار عالحزن لكن أبت تستوعب سنيني...
سقتني الّمر في عمرًٍ شرب به غيري الحالي..
وكل ماصحت يادنيا ذبحني المر تسقيني.!!
وحيده عشت أنادي الفرح لجروحي ولاجالي...
رحلت بكل صوب ومالقيت اللي يداويني...
وتراها ماغدت تفرق معي لو طال ترحالي...
أنا أصلا سكنت الجرح وضاعت به عناويني...
عشقت الحزن مو برضاي وعيّا الوقت يصفالي...
ويوم إنه رجف دمعي ذبحته في وسط عيني...
لك الله وش يفيد الدمع ولو هو سيل متوالي...
لك الله امسح دموعك ترى هالدمع يشقيني...
مصير جروحنا تذبل قصر هالعمر أو طالي....
وإذا جرحك أبى يبرى بضمده بشراييني...
مع التحيه:فجر

وردة الدلووعة

26-03-2022 - 08:26 pm

انا ابا اعرف قصتي حلوة ولا لا عشان اعرف انزل الاجزاء الباقية ولا لا عشان كدا ردوا

احلى قمر

26-03-2022 - 09:27 pm

حبيبتي القصه روعه

وردة الدلووعة

26-03-2022 - 10:28 pm

قريت الردود اللي جات على أخر قصيده نزلتها في المجله ..وفرحت كثيير .. !!
كل مره يزيدون عدد قراء قصايدي..
واللي مفرحني أكثر أن هذه القصيده تعني لي الكثيير..!!
خصوصا لمن أشوف بصمة الحزن في عيون كلماتها..!!
طويت على الصفحه الشعريه ..وسكرت المجله ..وأنا أبتسم بصمت..
قمت من كرسي المكتب واتجهت للنافذه الي تطل على حديقة بيتنا..
شفت الشمس وهي تغرب وماأحلى غروبها...!!مدري..!!حسيت بشيء..!!.شي حلو...
.بس فيه مراره..!!
حسيت أن غروب هالشمس يمس شي من شخصيتي...!!
بس بالظبط مدري أيش..!!
يمكن لأن مدة غروب الشمس فيها طول أنتظار..!!
أو يمكن لأنها نوع من انواع الصبر..!!
أو لأن خيوط الشمس الساطعه قريبه مني....!!
وهي بالأصل بعيده..!!
أم كل البشر يفكرونها بعيده..بس ياترى.!!
ليش أنا بالذات أحسها قريبه...!!
أحسها ألم وأمل..
أحسها حلوه ومره...
أحسها برد ..صقيع..!!لكنها حاره..حريقه..!!
شالأفكار المتناقضه يافجر...!!
هاللحظه..
جات في بالي خاطره ..
وعلى طول ماصدقت خبر وأخذت قلم وورقه
وبديت أكتب مطلعها...
ماتعبتي...!!والا لسه مأعلنتي الأنهزام..!!
مابكيتي...!!والا باقي على هالمحاجر مكان..!!
مانسيتي..!!والا نفسك أبعدت النسيان..!!
ماأنجرحتي..!!والا كثر الجروح أطلقت الأستسلام..!!
ماأنتهيتي ..!!والا نفسك ابت تقبل حرقة النيران..!!
يامنار(ن) للوفا..يافانوس (ن) للمكان...ياتغاريد الصبح....يا....يا....
وقفت عند هذا المقطع..... وماكملتها ..!!
الصراحه..
ماأأبي أكملها...!!
خصوصا هالوقت...!!
لأنه..لأنه..هالوقت حرج جدا بالنسبه لي...!!
هالشهر ..من اصعب الشهور اللي مرت فيها...!!
هالأسبوع مضى زي الشيء المتعلق في البلعوم...!!
من اسوء أيام حياتي كانت شهرمارس ...وماأبي أتذكر وش حصل في شهر مارس..!!
طلعت من الغرفه وأنا أسكر جرح عيا يبرى...وكتمت آهاتي..وتنفست الصعداء...
هذه أنا ..!!
أنا فجر...
....................................
جرح..مابرى..
وانتظار ماله نهايه...
....................................
عمري 28 سنه معلمه في رياض الأطفال..
أهوى الشعر والقصيد وبعض كتابة الخواطر..
أحب الليل والقمر..
أحب الشمس وغروبه..
ولي أكثر من 88 قصيده كاتبتها..
وكلها في مجلد محفوظ..باسمي..
.................................................
رحت لغرفتها..وأنا ناويه على اللي في بالي...
ومستحيل أخلي اللي يبونه يصير ...هذا اللي ناقص بعد...
تتزوج سماح وأنا لسه مطلقه وماتزوجت...!!
لازم أخرب عليهم مخططاتهم..
لازم أنهي كل شي اليوم...
أنا أعرف أمي وابوي..بيحاولون فيها لمن ترضى..بس لا وألف لا ...
سماح ماتتزوج أحمد...مستحيل...مستحييل تتزوجه..
سميه العمر33 سنه مطلقه أنانيه وحقوده وسيئة المعامله مع الآخرين..
كل هذه أسباب في عدم استمرار زواجها ..
مريم أم طلال\شفتي يابنتي..حتى عمك سلطان جاك وكلمك عن أحمد..خلص عاد.أرضي وريحينا..
سماح وشوي وبتصيح\يمه أنتوا ماتفهمون...!!نا ماأقدر أتزوج أحمد ماأقدر..
مريم\ليه يابنتي وشفيه أحمد..
سماح\مافيه شي ..مافيه شي..أنا ..أنا اللي فيني..
مريم\ويه...بسم عليك تهبلين ..كامله والكامل الله سبحانه وش تبين أكثر من كذه..
سماح\ومرضي نسيتوه...!!
مريم\لا ياحبيبتي مانسيناه...بس كل شي له حل وأنتي اذا تجاوبتي مع المرض صدقيني بترتاحيين..
يمه سماح..ريحي قلب أميمتك وخذي احمد..وصدقيني بيحطك بعيونه..
ها يابنتي وش قلتي...!!
سماح\يمه أرجوك...خليني أرتاح أنا تعبانه...
مريم\حبيبتي أجيب لك الدواء...!!وتوها بتقوم الا شافت سميه واقفه ...
أنتي من متى هنا...!!
سميه\توني جايه...!!
مريم\المهم روحي جيبي كاس مويه لأختك بسرعه..
سميه وتوها بترد بعصبيه الا أمسكت نفسها عشان مايخترب اللي سوته\أن شاء الله
وراحت تجيب كاس المويه..
مريم\خلص حبيبتي بكره أكلمك واللحين بخليك ترتاحيين وفكري بكلامي زيين...
جابت سميه المويه لأختها واعطتها أمها الدواء
وطلعت مريم مع بنتها عشان تنام سماح وترتاح...
بس هيهات ترتاح..!!هي تعرف أنها تكن مشاعر خاصه لأحمد ولد عمها ...
وكانت تتمنى له الخير...
وتتمنى أن الله يجمعها وياه بالحلال..
بس كانت خايفه..
خايفه من مرضها..
خايفه أن هالحب الكبير يختفي فجأه..
.كانت خايفه انها تكون ثقيله على أحمد..
كانت خايفه انه يمل ومايستحمل مرضها خصوصا أنها دلوعه زياده عن اللزوم وحساسه حييل
وماتستحمل أي كلمة من أي شخص حتى لو هالشخص تعزه وتحترمه...
بس اللي ماتعرفه أنه أحمد يموت في شي أسمه سماح..
ويتمنى اليوم اللي يجمعه هو معها...
ياما تقدم ل سماح وياما رفضته ..وكل مره يخطبها وهي ترفض ..
بس هالمره هو مصر وبنفس الوقت صابر...
بس المهم أنه يتوصل لحل ونتيجه تريح الطرفين..
أحمد العمر 28 سنه ظابط في قسم الشرطه الولد الأكبر لشيخه وناصر ..
توني داخل البيت...وتعبان..منهد حيلي...!!
اليوم المدرب الألماني الله ياخذه قولوا آميين كارفنه كراف..
الناس عطله ومفتكين من الدراسه..وأحنا من صبح الله وفي صقعة الشمس نتدرب ..!!
أوف شالحاله....!!
والله مرض هالمدرب
أنا لازم أقدم شكوى عليه..!!
مستحييل أخليه بحاله...
أبد ا..مافي راحه لو تموت ..
حتى شرب الماي مانعنه عنه..
واللي يغلط غلطه ياويله...!!
أمه داعيه عليه...!!
ياناس لا تلوموني اذا قلت اكرهه..
أكرهه من قلب بعد..!!
لا ويبينا بكره من الساعه 5 ونص في الملعب...
والمشكله أنه مايتعب كأنه رجل آلي..!!
ماعمري شفته يقول ستوب وقفوا اللعب..!!
ولا عمري سمعته يقول خلص كفايه جري..!!
أنا أشك أنه دجاجه ينام الساعه 6 المغرب...!!
أيش عليه أجنبي مش مثلنا مسلمين نخاف ربنا..!!
الله حاله..!!
الله يعينا عليه بكره..!!
وشكلي من كثر الهذره وصلت الغرفه بدون ماأحس..
وعلى طول رميت نفسي على السرير..وغمضت عيوني...ونمت...
الوليد عمره 20 سنه طالب في كلية المجتمع التابعه ل جامعة الملك فهد
هاوي للرياضه من صغره وخصوصا كرة القدم
لدرجة أنا معدله في الدراسه نازل بسبب هذه الهوايه
أختاروه نادي الأتفاق لاعب سنه عندهم حتى يثبت وجوده وتحت المراقبه
وصار من أفضل لاعبين نادي الأتفاق السعودي..
ويطمح للمزيد في مجال الكره مستقبلا...
أحس بازعاج وحركه على شعري...
ودي أفتح عيوني وأشوف وين مصدر هالحركه ..!!بس النوم مغطي على الوضع كله...!!
عبست وجهي وفركت عيوني بقوه وماحسيت الا بأيد صغيره على شعري ..
واللحين بس عرفت مصدر هالأزعاج كله..!!
أنتظرت شوي عشان اعرف وش نهاية هالحركه..!!
وفتحت عيوني شوي وانا أطالعه بغيظ....
أطالع الخبل عبد العزيز..!!
الوليد بغيض\عزيز وعمى أن شاء الله..صدتك يالسبال..ومسكت أيده عشان مايفلت..
عزيز\أي أي أيدي أيدي...وليد..أيدي
الوليد وهو ماسك المقص اللي في أيد عزيز\ومدام تعرف انه يعور ليه تقص شعري..!!
عزيز أخو الوليد من ابوه ولد لطيفه
عمره 5 سنين
شعره أسود وناعم وبشرته بيضه وعيونه كبار وشعره ماشاء الله بسرعه يطول وهو يموت على الشعر الطويل...الولد راعي كشخه بس دايم أمه تقص له شعره وتخلي شوي شعر بين عيونه
عشان كذه هو دايم ينقهر وي يقص شعر الوليد الطوييل ..
وهو والوليد دايم مع بعض على أن فارق السن كبير مابينهم بس عزيز اللي يشوفه يعطيه عمر اكبر من كذه وكل واحد مايقدر يستغنى عن الثاني ودايم يتضاربون ويتصالحون بنفس الوقت..
عزيز\وليد ..انا لازم أقص شعرك...!!
الوليد\ليش!!
عزيز وبصوت واطي\عشان بعدين مايخترب شعرك...!!
الوليد\لا والله!!
عزيز\ايه...واذا قصيته لك بيصير بعدين حلو مثلي...صح!!
الوليد وهو معصب\عزيزو هذا أخر مره تجي وتدخل الغرفه وأن شفتك مره ثانيه ماسك المقص بذبحك...فهمت!!
عزيز شوي وبيصيح\فهمت..
الوليد\يالله أنقلع بره خلني أنام...
وتوه بيطلع عزيز الاتذكر شي مهم وأبتسم بخبث وقرب من أخوه\أقول وليد...
الوليد\ها..ياليل ماأطولك...
عزيز\ترى ابتسام...
الوليد وهو مغمض عيون\أيش فيها ابتسام..!!
عزيز\خذت...
الوليد\أيه!!
عزيز\............الصور
الوليد\أي صور....!! وفتح عيون...الصور اللي بالدرج...!!
عزيز وهو يضحك\أيه..وبتعطيهم جمانه..
وعلى طول قام من السري وراح لغرفة ابتسام وهو غالي نار عليها
وفتح الباب بدون مايستأذن وشافها تتكلم بالتليفون..
الوليد\ابتسام...وين البوسترات اللي بالدرج...
ابتسام\لحظه جمانه
أبتسام بغباء زايد\أي درج...!!
الوليد\الدرج اللي بغرفتي...!!
أبتسام\أها....عندي..
الوليد\لا والله ومين سمح لك تاخذينهم..!!ولا تقولين لي بتعطينهم جمانوا...!!
ابتسام\ههه لحظه جمانه سكتي لاتفضحينا...
الوليد\هذه جمانه..
ابتسام بابتسامه\ايه..تسلم عليك...
الوليد\الله لايسلمك ولا يسلمها..ومره ثانيه أن خذتوا صور بدون ماتعلميني ياويلك...وطلع من الغرفه وهو معصب..
جمانه\أنا بعرف شغله وحده بس..ليه اخوك مايطيقني مالت عليه..
ابتسام\تكفيين اللي يشوفك يقول أنك تحبينه ياأختي كلكم نفس الصنف ..
جمانه\بس أحسن حرييت قلبه باخذ الصور...ههه
ابتسام\أيه حبيبتي لو ماخذتهم كان ماطلتيهم...أنا مدري وش عاجبك بهال نواف ..!!!أخوي أحلى منه..!!
جمانه\وع أيش جاب القمر لأخوك...أقول خليك ساكته بس....شخبار مرت أبوك..
أبتسام \آه بس ياجمانه خليني ساكته بس...
جمانه\ليه أيش صاير..!!
ابتسام\كالمعتاد ياجمانه الكلمه في البيت لها واي شي تبيه مجاب..وابوي لا حول ولا قوه ..مايقدر يسوي أي شي ..!!
جمانه\طيب ليه ماتكلمين أبوك عن هالمفتريه!!!
ابتسام\اللي جاء لأبوي كفايه وماابي أزيد عليه المواجع...!!
جمانه\ولو ياابتسام لين متى بتظلين ساكته وحقوقك مسلوبه..لازم تسوين شيء..!!
ابتسام\خلاص ياجمانه من أول ماتوفت أمي الله يرحمها وأنا مش في الدنيا ..في دنيا ثانيه بعيده كل البعد عن هالدنيا الفانيه..كفايه صدمات ياجمانه..
انا خلاص أستسلمت...ماأبي أخسر ناس عزيزين على قلبي ..
خسرت كثيير كثيير ومابقى لي غير أبوي وأخواني الأثنيين..
وأنتوا الله يخليكم لي...!!
جمانه\زمن قاسي ياابتسام...مايرحم ...
طيب بتجينا بكره...!!
ابتسام\لا ماأتوقع لأن حرمة أبوي بتطلع عندها زواج وصعبه أخلي البيت فاضي..والوليد أكيد عنده تدريب..
جمانه\حسافه يعني مش شايفتك لأن بنروح راس تنوره بكره..!!
ابتسام\أفا ليه..!!
جمانه\أبوي عنده شغل لسه مابدت أجازته..
أبتسام\طيب ليه ماتمين بيت جدي..!!
جمانه\أخاف أزهق ..بس أن شاء الله على الأسبوع الجاي بنجي الخبر..
ابتسام\أن شاء الله..
جمانه\يالله مااطول عليك سلمي على عزيز وحافظي على الصور أوكي..!!
ابتسام\أوكي حبيبتي مع السلامه
جمانه\مع السلامه..
صحيت من النوم وأنا مرتاحه
وكانت الساعه 12 الظهر..!!
بسبب الحلم اللي حلمته..
.هذه أول مره أحلم فيها عن أحمد ..!!
وكان الحلم حلو...!!
حلو كثيير ..!!
وبتحفظ فيه لنفسي..!!
وقمت من سريري
وأنا احس بنشاط غير طبيعي ..!!
وعلى طول رحت توضيت وصليت شكر لربي ..!!
وبعدها..!!
رحت لغرفة أمي
عشان أقولها الخبر اللي بيفرحها وبيفرح ابوي..
سماح\يمه...انا موافقه...
مريم\أيش..!!
سماح\أنا مواقفه على أحمد ولد عمي..
مريم\ياقلبي والله..واخيرا...
\وأخيرا...
سماح\وأخيرا...
سلطان\صدقيني مراح تندميين..!!
سماح بابتسامه\أن شاء الله..مشكور سلطان
سلطان\لا وبعد سلطان..شكلك نسيتي أني عمك يابنت..
سماح\شسوي بعد عمي صغيير حييل ماأقدر أسميك الا سلطان..
سلطان\المهم لا شكر على واجب وأنا اللي قلته عن احمد قليل ..صدقيني لو أتكلم عنه ليل نهار مراح أخلص...
سماح\لهدرجه!!
سلطان\وأكثر بعد..عاد يالله ماأطول عليك بروح أدق عليه عشان افرحه وأخذ البشاره..
سماح\أوكي مع السلامه..
سلطان\في حفظ الله..
كل العوايل عرفوا بموافقة سماح على الخطوبه وأنتشر الخبر على الأهل كلهم

وردة الدلووعة

26-03-2022 - 11:29 pm

الجزءالرابع
........................................
\مادريت الظابط أحمد خطب بنت عمه
العسكري2\وأخيرا بيطلع من حياة العزوبيه..!!
العسكري1\وأنت الصادق بيفكنا من أحكامه الصارمه علينا..!!
العسكري2\أي والله هذا أحسن مافي الموضوع..!!
العسكري1 بقلق\خلاص سكر الموضوع كل الدائره سمعتنا..!!
العسكري2\وأنا شعلي جاء الفرج والله يعين بنت عمه عليه
العسكري1\هههاي ظحكتني ...يابابا الظابط أحمد يطلع حرته فينا لكن مع الجنس الناعم شي ثاني..
العسكري2\وأنت شدراك اللي يشوفك يقول جالس معه 24 ساعه..
العسكري1\يكفي أنه متصنمين زي الأهرام جنب مكتبه...
العسكري2\شتسوي بعد هذا شغلك ولازم تأديه على أكمل وجهه بس من جد فاجئتني يوم قلت لي انه قرر يتزوج أخيرا...يالله عقبالي...!!
كل يوم تقول اليوم الله بيفرجها من العذاب اللي عايشه فيه...
وكل يوم تقول يالله...يالله صبرك...صبرك
هي عادي عندها تتقبل الأهانه ..
وتتقبل الضرب اللي يجيها...
بس أمها...أمها وين من هذا كله...!!
أمها الضعيفة الجسم والهيئه..
أمها ضعيفة القلب ومكسورة الخاطر..
هي طاحة تحت تضحية أخ ظالم ..وزوجة أخ أظلم
هي تقدر تستحمل..
جسمها لسه بنيته قويه
ويستحمل الضرب ..والتجريح..
لكن أمها...
أمها المسكينه اللي تالي عمرها
صارت فاقده الرعايه والصحه
بعد ماكانت مهيئ لها كل سبل الراحه..
صحيح اذا قالوا الدنيا دواره ..
بس معقوله
معقوله.. بيجي يوم وبتدور على الظالم...!!
الله العالم.....!!
قاعد على كرسي حديقة بيته وحاط أيده الثنتين على العكاز وهو بهذه الوضعيه سرح فكره لبعيد.
وهو يتذكر أحلى المواقف اللي مرت مع ولده وهو صغير وعمره 11 سنه
يوسف\يبه
بو يوسف\لبيه
يوسف\أنت تعرف..أن كبرت وصرت رجال أبي أسمي ينعرف بالسوق كله
وأصير مشهور مثل جدي .
وأبيهم اذا مريت يقولون هذا يوسف بن محمد بن يوسف العالي
هذا السبع ولد السبع
اللي شرف أهله هذا هو يوسف..
بو يوسف\ياولدي أنت توك صغير على هالسوالف اذا كبرت يصير خير لاتشغل أمورك بهالسوالف
يوسف\لا يبه أنا كبرت وطلع لي شنب
بو يوسف\ياحليلك يايوسف أنت تسمي هالشعرتين شنب ههه
يوسف بزعل\يبه الله يخليك لاتكسر مجاديفي أنا اتكلم جد...بس لحظه أنا ماأبي أصير عطار مثل جدي أبي أصير رسام عود ..ايه وأبي أسويلي معرض كبير قد شركة جدي...
بويوسف\ولايهمك نذر علي يايوسف اذ كبرت لأسوي لك معرض لاصار ولا استوى...
أنت أكبر ياويوسف..وبتشوف اللي يرضيك...
يوسف بفرحه غمرته\صج يبه..
بويوسف\صج يايوسف...
يوسف\..طيب يبه بقولك شي ثاني بعد..
بويوسف\أمر ياولدي..
يوسف\أم بنت عمي فجر...
بويوسف\شفيها...‍‍بنت عمك..!!
يوسف\أحبها...وابي أخطبها....
بويوسف\نعم....
يوسف\يبه أحبها...
بويوسف\أنت من صجك...
يوسف\أيه من صجي...
بويوسف\لالالا منت بصاحي... ياولديأنت تعرف كم عمرك اللحبن..
يوسف\أيه أدري 11 سنه ..بس لايغرك عمري ترى عقلي يوزن بلد..
بويوسف\وهذا اللي مخوفني...
يوسف\يبه تكفي على ألأقل كلم عمي بالموضوع ويصير خير بعدين..
بويوسف\أحاول بس لاتحط أمال...
يوسف\أنا واثق فيك كل الثقه..
كل الثقه..
كل الثقه..
فتح بويوسف عيونه على أخر كلمه قالها يوسف
وشاف دموعه تنهمر بهالمحاجر اللي عيت تستلم للحقيقه
اللي يعرفها كل شخص
يعرف يوسف..
من أول ماعرفت ان ملكتها بعد اسبوعيين وهي في حوسه كبيره
من مجمع لمجمع...ومن مشغل لمشغل ثاني..
بس اللي مريحها شوي ان معها بنات عمها فجر وابتسام...
وخصوصا فجر أخت المعرس اللي تكفلت بكل شي ..
من الألف الى الياء..
عشان بس عيون وغلاة أخوها أحمد...
بكل براءه الدنيا\بقول لكم شي..
ابتسام\أيه بسرعه ترى دقايقي معدوده...
سماح بزعل\ابتسام..هذا وأنا ماأتكلمت خلاص لاتكلميني زعلت...
فجر\أقول بسومه..ياويلك أن زعلتي سماح...أنا ماأرضى عليها..
ابتسام\أيه وشعليكم بتصيرون نسايب...عقبالي يارب...
سماح\أقول كانكم طلعتوا عن الموضوع..نسيتوا أني بقول شي..
فجر\أي يالله تكلمي...
سماح\تصدقون ..وغمضت عيونها..أحس نفسي طايره...
أبتسام\يعني كيف طايره..!!
سماح\مدري..أحساس...أحس نفسي طايره من الفرحه...
أبتسام\أها اللحين فهمنا..قولي كذه من البدايه...قولي أنك تحبين...
سماح\أحب..أم..يمكن...
ابتسام\الا أكيد تحبين ياسماح..
سماح\ليتني ماقلت لكم..أنا قلت أحساس ..أحساس ياناس...
ابتسام\شرايك ..فجر..!!
فجر\رأي بأيش...!!!
ابتسام\باللي قالته سماح...!!
فجر بابتسامه\ماأقول الا الله يهني سعيد بسعيده..
سماح\المهم شرايكم بهذا حلو...
ابتسام\لا هذا أحلى...
فجر\لا شوفي اللي جنبه أحلى وأحلى...
ابتسام\لالالالا هذاك أحلى...
سماح\لا أنا اقولك أول وااحد أحلى منهم...
فجر\ ..كلهم حلوين ..أمشوا ندخل المحل ونشوف..
سماح+ابتسام\يالله
ماسكه المبخر وجالسه تدخن البيت كله..تبي ريحته تفوح من خشومهم ..
سمعت كلمات كثيره من أمها وكلها تهديد ووعيد ..
بس هي تبي تطبق المثل اللي يقول..
عمك أصمخ..
تسمع من هنا ..وتطلع من هنا..
على قولتها تبي تمسك مهمة أختها لو يوم واحد
مدام هي طالعه من البيت..
بس هي اللي ماتعرفه
أن مافي أحد مثل فجر...
هذه غلا بنت الثانيه لأبو أحمد
عمرها 19 سنه
تدرس في الجامعه
بنت ياي وكشخه ودلع..
عكس أختها فجر تحب المظاهر
ومتابعه جيده لأخر الموضا بكل أنواعها..
بس مع ذلك ماغرتها مظاهر العصر الزايفه
لأنها والده من بيت كله موده ووفاء..
والده من بيت جذعه سالم وفاطمه
وساسه أحمد وهيثم
وقلبه فجر..
أم أحمد\غلا..غلا...غلا وصمخ...
غلا\ها يمه..امري تدللي...قولي اللي تبين...
أم أحمد\ذبحتوني جننتوني..كمن مره أناديك وماتردين...
غلا بدلع\يمه..صدقيني ماسمعتك...
أم أحمد\المهم دقي لأخوك أحمد وقولي له ننتظره على العشاء والا لا...
وحطي هالمبخر في المطبخ خنقتينا بريحته...
غلا\من عيوني يالغلا أنتي بس هدي شوي...
\هاتشوا..
سمعوا صوت عطسه ولفوا وجهم على مصدر الصوت..وشافوا...
أحمد\مساء الخير على أغلى أم ..واشطن أخت....
ام أحمد\هلا يمه..هلا بولدي الغالي..هلا بالمعرس...
غلا\أيه عرفت أنا السالفه اللحين ..أنا لي الزفه المحترمه والدلع كله لأحمد وهيثم...والحب كله ل فجر..
لا وبعد أسمي غلا..أمحق غلا...
بو أحمد\ياغلا ..أنتي غلا أبوك وبس...
أم أحمد\بسم الله الرحمن الرحيم من متى أنت جاي...!!اللي أعرفه أنك نايم بغرفتك...
بو أحمد\أيه أنا من خذت التقاعد المبكر وهامليني بالغرفه..ولو غلا كان رحت فيها..
أم أحمد\والله محد قالك خذ التقاعد...أنت اللي ماصدقت على الله ...
أبو أحمد\أيه أصلا أنتي هذا اللي تبينه أطلع بره البيت...
أم أحمد\والله كيفك افهم اللي تبيه واللي ماتبيه لاتفهمه..
أحمد\يمه ..يبه..شفيكم
...من اول ماتشوفون بعض وتبدون بخناقه جديده...
صلوا على النبي...الله يهداكم بس..
أبو أحمد\والله علم أمك هالكلام ..أنا مدري أشفيها علي ليتني جلست في الجيش وأفتكيت..من حنة أمك..
أم أحمد\شفت شفت..أنت اللي بديت باللي المعاير....
أبو أحمد\لا حول ولاقوة الا بالله...أستغفر الله العظيم..
غلا بصوت هادي\أقول أحمد...كأن السالفه مطوله...!!
أحمد وهو مش عاجبه كلام اخته\أقول غلا ..سكتي أحسن..
غلا بأدب\أن شاء الله عمي...
أحمد وهو يقاطع كلام أمه \يمه..الا وين هيثم ..وفجر مالهم حس...
أم أحمد\هيثم رايح للندوه اللي باللجنه ..وفجر بالسوق مع البنات...
أحمد\أي بنات..!!
غلا بخبث\علينا...حط عينك بعيني ..ماتعرف أي بنات...!!
أحمد\بنت استعدلي شالحركات....!!!أنا من صجي أتكلم أي بنات...
بو أحمد\مع بنات عمك يتشرون حق الملكه...!!
أحمد وهو مستحي ووده أنه ماأطول بالكلام\أها..أوكي بروح داري واذا جهز العشاء نادوني...
أم أحمد\الله يحفظك
غلا\ياحليله أخوي لحد اللحين يستحي...
أم أحمد\على الأقل أحسن منك ياخبله.

وردة الدلووعة

27-03-2022 - 12:31 am

واقف وسط غرفته وفاتح النوافذ عشان يدخل الهواء
لكن كانت الستاير شفافه ومسكره
وماسك الريشه بأيده اليمين
وبأيده اليسار ماسك قطعه من الخشب
فيها ألوان البني والأحمر وتدرجاته..
هذا ألوانه المفضله ..البني والأحمر الفاتر..
مزج اللون البني بالأحمر الفاتح..
ورسم الجزء اللي ماكمله ليلة امس
لأن النوم داهمه
وسيطر عليه..
والا هو بعادته مستحييل يخلي لوحه مش كامله...
لازم ينهيها بظرف يوم..
لكن في لوحه شاذه عن القاعده..
جلس فيها ثلاث أيام
ب لياليها..
وكانت هذا عزيزه عليه..
بشكل جنوني..
ياما أشخاص شافوها..
وساموها بمبالغ باهضه..
لكن هو رافض فكرة
بيعها ..
لأنها أغلى من الغلا نفسه..
لذلك..
يحس أنه روحه الباقي..بهاللوحه
يحس أنه عايش معها..وبدونها ميت..
........................
وهو دايم يسمي أي لوحه يرسمها باسم معيين
وهو محتارأيش يسمي هاللوحه اللي جالس يكملها..!!
فلما شاف شكلها أنفجرت أحاسيسه باسم
معين وغريب بعض الشيء..
وسماها...بركان
،،..بركان ميت..،،
لأن الرسمه تشبه
شكل البركان المتفجر..
وفي قمتها الوان تبدى تفتح...
لكن الشي الغريب في اللوحه...
أنها محايطه بسلاسل حديده غليظه..
وهذا الشي زاد جمال اللوحه
بكل دلع\هاي جوزيف
عبس يوسف وجهه وهو يسمع الترحيب المايع..ومالف وجهه واكتفى بكلمه وحده..
يوسف بصوت رجولي\هااي.....سيلينا..
لؤي وهو يقرب من يوسف\روكي يسأل عنك ..وينك اليوم..!!
يوسف بصوت واطي\مو أنا قلت لك لاتجيبها معك..!!
لؤي\شسوي فيها..هي اللي لزمت أنها تشوفك..!!
يوسف\أوف ..الله ياخذك أنت وياها...
لؤي\لا وأبشرك...بتجلس معنا طول النهار...
سيلينا..أمريكية الجنسيه لكن امها فرنسيه
عاشت طول عمرها مع أبوهافي امريكا ولكن أيام الكريسمس
تزو أمها..
وبعد مابلغت سن الرشد سكنت مع أمها ..
تحب يوسف بشكل مو طبيعي وتتمنى نظره منه ..
وكانت تعرف بقصته وغربته..وهذا الشيء زاد تعلقها فيه..
.................................................. ..
لؤي ..أخو دنيا ل يوسف..ولو الله ثم هو كان مات وهو ميت جوع وفقر..
يشتغل هو مع يوسف في مطعم صغير ..
وبهذه الشغله البسيطه قدروا يتعايشون مع واقع الحياه المر..
.................................................. .......
بعد أسبوع ونصف من الأحداث السابقه
_أخيرا شرت سماح فستان لملكتها بعد مافرت روس بنات عمها وياها واخيرا استقرت على لون معين مناسب لها..
_بدت تجهيزات بيت بو احمد على احر من الجمر
وتقريبا خلصوا كل شي وحجزوا الأستراحه اللي بيسون فيها الملكه
والشغل طايح كله على هيثم وفجر وشوي غلا..
أما أحمد بحكم وظيفته كان ماينشاف الا في تالي الليل
واذا قدر ياخذ ساعه أو ساعتين أستراحه عشان يكمل باقي ترتيباته
_أما بيت بو طلال فكانت سميه ماسحه أيدها من كل شي
وتاركه الشغل كله على سماح وبنات عمها
وهم ماشاء الله عليهم ماقصروا خصوصا فجر وابتسام...
_وصلت الخاله هند من راس تنوره عشان تحضر الملكه..
هذا بعد اصرار جمانه اللي ذبحتهم من الحنه وعوار الراس..
لأنها منقهره ليش بنات خالها كلهم مع بعض وهي لوحدها..
والسبب الخفي اللي مااحد يعرفه أنها تبي تشوف صور اللي واعدتها عنها ابتسام..
_اما العم بو تركي ماراحوا الرياض هالأسبوع لأنه ماخذ الأجازه السنويه
والعيال معطليين
وصار هالشيء من صالحهم عشان يحظرون الملكه
بيت الجد يوسف
الساعه 12 بالليل
...............................
كانوا كل بنات العايله مجتمعين في بيت الجد بسبب أنه جمانه وراوين موجوديين
وكانوا ناويين أنهم ينامون بعد..
بس مادرت الجده عنهم ..لو تدري بتطردهم بكشيشهم...
ابتسام وهي متسنده على الكنبه\أقول بنات..تدرون أيش أحلى مافي الجلسه..!!
غلا\طبعا..أنا
جمانه\ميين قال أنك أنتي....أنا جمانه والأجر على الله..
ابتسام\ياأختي واجد مصدقيين نفسكم أنتوا...خلوني أقول وش الحلو في جلستنا..
سماح\يالله قولي..
ابتسام\الحلو في جلستنا الله يسلمكم..
راوين\أقول بنات..ماتسمعون صوت..!!
أبتسام\أوهوا...ياختي كل ماأبي أتكلم تقاطعوني...والله حاله أنتوا يابنات عمي...
فجر\بنات رجاء ..لا أحد يقاطع الآنسه أبتسام..
ابتسام\أحلى مافي الجلسه ..أن مافي أحد ينكد علينا عيشتنا...
لا في مرت ابو ذابحتنا ..
ولا في بزاريين يزهقونا...
ههه وعجيزنا نايمه...
حلوه الحريه...
صح..!!
سماح\وأنا اللي مفكره بتقوليين شي عني...!!
ابتسام\مشكله الدلع يابنت عمي..!!
فجر\الا صحيح ..وين عمتي هند..!!
جمانه\أمي الله يسلمك سهرانه مع مرت خالي أم تركي في شقتهم..!!
وشكلها اللحين طلعت لغرفتها وماحسينا فيها
ابتسام\والله ياحظكم..كل ماتبون تجونا على الشرقيه على طول تنامون بيت جدي..!!
مش أنا الجيه محسوبه علي ..
جمانه\أيه حسديينا على جيتنا...قول أعوذوا برب الفلق من شر ماخلق.
.تف تف تف
ابتسام بقرف\وع عليك طبعتينا..
غلا\المهم بنات..متى بتجي الحنايا بكره...!!
فجر\بعد صلاة المغرب...
راوين\بنات...تصدقون مشتهيه من باسكن روبنز ميلك تشيك..
غلا\ومين بجيب لنا هالحزه كلن نايم...
راوين\مالي شغل والله مشتهيته..!!
فجر\طيب دقي على أخوك يمكن يرضى..
راوين\مالت على هالأخو..أمحق يرضى..
جمانه\لحظه ..عمي سلطان كلموه هو لسه ماجاء من بره..
سماح\ومنوا اللي بيدق عليه...!!؟
ابتسام\صاحبة الفكره..
راوين\لالالا أستحي...
جمانه\كيفك أنتي الخسرانه...
غلا\يالله راوين دقي عليه بسببك أشتهيته...
راوين\أوكي ..ناوليني سماح التيلفون اللي جنبك..
سماح\تفضلي..
دقت راوين على عمها سلطان ومارد عليها..دقيت ثانيه وبرضوا مارد...
راوين\مارد..خلص مش مكلمته..
وبهالحظه دق التليفون وكان سلطان
سلطان\مرحبا..
راوين\مرحبتين عمي...شو أخبارك..!!
سلطان\هلا والله ببنت أخوي راوين.. هلا بالحبايب هلا..ولف على طلال وهو يبتسم بخبث..
راوين بترجي\عمي...
سلطان\أها..مدام السالفه فيها عمي الله يستر.
.أمري شالمطلوب...
رواين\أفا ياعمي فشلتني..!!
أنا أصلا الوحيده اللي بالعايله اللي أسميك عمي ..صح!!
سلطان\أيه واضح واضح..المهم الزبده..أي وخر عني..
راوين\عمي أنت معي...
سلطان\أيه أيه معك بس في ناس جنبي ثقال دم..
روايين\منوا..!!
سلطان\عيال عمك...طلا وهيثم..
أرتبكت راوين من ذكر أسم ولد عمها.
بس قررت انها تطنش الموضوع..
سلطان\المهم شنوا تبين..!!
راوين\أحم..الصراحه..أأأ ..أم
سلطان\أيوه..
رواين\أحنا البنات كلنا مجتمعين
وودنا أيس كريم من باسكن روبنز...
سلطان\خرعتيني مالت عليك..
فكرت السالفه كايده مثل بعض ناس ..
راوين باستغراب\أي ناس...!!
سلطان\لا ولاشي لاتشغليين روحك...!!كم وحده أنتوا...
راوين\أحنا..أم وتعد البنات..سته بنات..
سلطان\أوكي أحنا راجعيين الحين..تبين شي ثاني..
راوين\تسلم...مع السلامه
سلطان\مع السلامه..
طلال\وش يبون البنات...!!؟
سلطان\يعني مسوي نفسك مؤدبها..
توك سامع الحوار كله..مالي
داعي الزياده...!!
طلال\هذا جزاني أني معلمك سري المكنون..!!
سلطان\تكفي ياأبو سر مكنون...
ياأخي أنا مدري شاللي بلاكم بالحب...
وبلهجة تهديد ..أوعا..أوعا ياهيثم يجي يوم وتقول..
عمي الحقني أنا احب..ههه
هيثم\ههه وشفيها يعني الحب مش جريمه..
طلال\مالت عليكم وعلى اللي يقول لكم أنه حب...
رجال شكبري كلها كم سنه وبصير طبيب جراح وتطنزون علي..
سلطان وبدى يطرب\طبيب جراح ..قلوب الناس أداويها..
هيثم\ها..ها..وش قلنا أحنا بلا هلأغاني...
سلطان\أن شاء الله عمي..المهم وصلنا نزلوا..
نزلوا الشباب محل الأيسكريم وطلبوا للبنات أيسكريم بالتوفي
ويوم بيحاسب سلطان طلب طلال ميلك تشيك بالفراوله..
سلطان\ياحليلك تحبه..
طلال\لا ..هذا مش لي...
سلطان\أجل ..لمنوا..!!
طلال\بس كذه..حطه..زياده وبيتصرفون فيه..!!
سلطان\أوكي يالله...!!
غلا\مو كأنهم تأخروا...!!
جمانه\الا صحيح تأخروا...!!
فجر\الغايب عذره معه..
وفجأه وصل مسج ل فجر على تليفونها..!!
قرت فجر المسج وابتسمت..وبنفس الوقت بانت على وجهها ملامح الدهشه
لكنها في الأخير زادت ابتسامتها..
ابتسام\وش سر هالمسج اللي خلاك تبتسمين هلأبتسامه..!!
فجر\أسرار..
سماح\أفا والله أفا..تخبين علينا ..ماهقيتك يافجر...
غلا\لا أعرفها فجوره أختي...ماتخبي علينا شي صح فجر...
فجر\ياويلي على الفضول اللي فيكم..
بقرى المسج لكم وبعدين بقولكم من وين أرتحتوا.
البنات\اأيه
فجر\
..قول أحبك يبتسم عالم خيالي ..
..وأحلم أني مالك الدنيا لحالي..
..واشتري كل النجوم من السماء ..
..ماأحلى ورده تشعر بالظما..
المرسل:أحمد
غلا\واو أخوي شاعر..
راوين\أحلى أحلى..
جمانه\ياويلي على الحب وسنينه..
ابتسام بصوت عالي\قول أحبك قول..وريح قلوب...
طبعا كل وحده تقط كلمه وتلفت على سماح...
وسماح ميته مستحى...
ماأستحملت مزح البنات وطلعت من الصاله..
طلعت من الصاله ودقت قلبها تضرب بقوه
لدرجة أنها راحت تاخذ دواها..
تحسفت على ايام عمرها اللي مضت بدون أحمد..
تحسفت على كل دقيقه بعيده عن أحمد..
توها تحس أن حبها لأحمد تعدى الخطا والحدود
توها تحس الشعور اللي ينتابها أنه قوي ومؤلم
لكن حتى وهو مؤلم حلو..
غلا\ياحليلها مرت أخوي تستحي...
دق جرس البيت وطلعوراوين تشوف مين وطلع أنه سلطان جايب الأيسكريم..
راوين\مشكور ياأحلى عم..
سلطان\لا شكر على واجب..المهم كلوه قبل مايذوب..
ايه على فكره ترى فيه ميلك تشيك زايد
سلطان\مو حق أحد بس طلال شراه لكم..
راوين\أها..
سلطان\المهم بروح أوصل هيثم وأجيكم ...يالله سلام..
طلع سلطان وترك اكبر علامات الأستغراب بوجه راوين
وراح فكرها لبعيد يوم طلبت من أخوها الصغير يشتري لها
ميلك تشيك وكان معه طلال ولد عمها...
راوين\معقوله ...معقولد لحد اللحين يذكر....!!!
غريبه..!!!
دخلت راوين للبنات وهو لحد اللحين السالفه في بالها وتفكر فيها...

متوفاة يخرج منها ريح المسك عند تغسيلها←
قصة مؤثره جدا جدا حدثت في جده→