بنات انا مصدومه زوجي خاني مع فلبينية وبالصور بعد اه ياقلبي

1. يافراشات ياحبايبي زي مانتوا شايفين بالموضوع ..

يافراشات ياحبايبي زي مانتوا شايفين بالموضوع ..

انا سجلت بهالمنتدى علشان هالمشكله لاني مسجله بمنتدى ثاني وكل اقاربي وزوجي وجيراني يعرفون النك نيم حقي في ذاك المنتدى وبغيت اسجل فيه بمعرف ثاني بس رفض الموقع فقلت مالي الا الفراشات بعد الله لاني سمعت انكم متعاونات مره ...
المهم مالكم بالطويله
يابنات انا متزوجه من اربع سنين وللحين ماعندي عيال وزوجي طيب معي وتعامله راقي وكلمتي عنده مسموعه لحد الحين حلو
وانا بطبعي بعد من النوع اللي اذا حبيت احد اخلصت له بكل جوارحي <<<حلوة جوارحي بس والله من حر مافيني ومن شدة الحب والاخلاص عطيته ثقه ماكان يستحقها للاسف
قبل كم شهر جلست اقلب بجواله ووالله العظيم ماكان ببالي اي شيء بس قاعده ادور برسايله رساله تناسب ارسلها لاختي يعني شوق ومن هالكلام وفجأة طاحت عيني على رساله مرسلتها وحده فلبينية مرسله صورتها وهي عريانه وسايط ..انا هنا بديت افكر وقلت يابنت ايش جاب صورت هذي النجسه في جوال زوجك بس برضوا قلت لا ياشيخه اكيد في حاجه غلط وطبعا هذا من اخلاصي وثقتي الزايده فيه قصدي غبائي ..طبعا انا سكرت الجوال ولاكأني شفت شيء علشان لايحس واجلس افتش واخذ راحتي بدون مايحس
المهم صرت انتظر الين ينام وبعدين اخذ جواله وافتش لاني مابغى اظلمه ولا اظلم نفسي ..المهم ياطويلات العمر والسلامه لقيت لها رساله حب وغرام بالانجليزي والمصيبة والطامه لقيته هو بعد مرسلها صورته وكلام ماينقال ..انا هنا جن جنوني وضاقت الوسيعه فيني لان تصرفاته ماتدل على هالشيء ابد..وانا ومع كل هذا سكت الين اجمع الحقائق واوجهه فيها وهو طول الفتره هذي هو وياها رسايل وصور مخله بكل ماتعنيه الكلمه المهم دقيت عليها من جوال زوجي وردت تخيلوا وش قالت يابنات ((هلا هبيبي )) يعني هلا حبيبي وبمياعه والله يابنات انا حسيت اني بحلم مو حقيقة من هول الموقف المهم بعد فترة واجهته وبكيت ماعاد قدرت اتحمل خلاص وحلف انه مايعرفها وانه مدري ايش مع كل الأدله اللي قدمتها كابر بس عرف اني عرفت هالشيء وحلف انهها غلطه بس اني انا فهمته غلط ومدري ايش..انا سامحته لكن قلبي مجروح من هالحركه وخصوصا انه وعدني انها ماتتكرر ولشان لاهدم بيتي بنفسي وحطيت شروط المهم مشى الحال مع اني كل ماطلع ولانام بس اجلس ابكي اذا تذكرت الحركه
وبعد فترة واحنا عايشين بأمان الله وحياتنا مستقرة ومعيشين بجوو رومانسي ويدلع ويدلل وهذي عادته من تزوجنا ..المهم جالسة اصور بجواله كريم عندي لان جوالي مافيه كاميرا علشان بنزله للبنات بالمنتدى وشوي وتطيح عيني على مقطع فيديو تخيلو يابنات المقطع لمين له وهو ياها في وضع الله لايووريكم ولايعيشكم باللحظات اللي عشتها لحظات صعبه بكيت الين استغفرغت الله يكرمكم واغمى علي مرتين ماتخيلت بحياتي انحط بموقف زي كذا
انا وقتها قلت لحد هنا وخلاص مافيه حل الا الطلاق وش حادني عليه انا بنت ناس محترمين وحتى اهلي لو دروا بهالشيء وعرفوا اني ساكته راح يلوموني انا ..
المهم انا التزمت الصمت وماعاد تكلمت معاه نهائيا وهو اشفيك يافلانه ويسال ولا رديت عليه الا بجمله وحده بس احجز لي على اقرب رحله لاهلي ..وهو وحاول وحاول وحاول معي اتكلم وانا راسي والف سيف ماتكلم الا في بيت اهلي
قالي خلاص بحجز لك وتروحين بس والله العظيم ماتروحين الين اعرف وش سالفتك بعدين روحي وانا ذيك اللحظه نفسي ثور فيه والله العظيم جتني لحظه فكرت اخذ سكين واذبحه وابرد قلبي انا هنا قلتله شوف بقولك اللي فيني بس ترى مابغى الا حل واحد للمشكله اللي انا فيه وانت بيدك الحل وحلف انه يساعدني ويسوي اللي اطلبه وقال امري يافلانه ياعيوني طلبك والله لانفذه لو قلتي لي اروح اخر الدنيا بس ارضيك قلت له ((انا ابي اتطلق وبأسرع وقت )) هو طلع وخلاني لحظتها وانا زي المجنونه انفجرت ابكي
لقى حجز بس بعد ثلاه ايام وطول الثلاثه ايام وانا ماكلمه ولا اطالع في وجهه لاني كل ماناظرته احس بالاهانه وخصوصا يابنات كل ماتذكر اللي خطبوني قبله اثنين من جماعتنا ناس على خلق ودين ورفضتهم لاني عقلي صغير وقتها احس ان ربي عاقبني
وبعد كذا جاء ضمني وبكى وانا ابكي وهو يبكي وانا ابكي جلسنا ساعه واول مره بحياتي شوفه يبكي وانا انبسطت قلت ان شاء الله دم مو دموع المهم راضاني وخصوصا انه بوقتها صارت عند اهلي مشكله فما حبيت اضيق صدورهم بمشكلتي وخصوصا ان زوجي تاب وعقل وابوي عنده امراض الدنيا وامي تعبانه ولا ابغى احد يتشمت فيني لاني اخذته ورفضت اللي قبله والناس يقولون والله اللي رفضتيهم رجال ومدري ايش
ومن ذاك اليوم الى الحين مالاحظت عليه شيء بس كل ماطلع احس انه بيروح يقابل وكل مادخل ماقدر اضحك له ولاابتسم لاني اقول بقلبي اكيد كان مع وحده ويستخف بعقلي ومرة اضحك له وعشر ايام مكشرة لاني مو قادره انسى مقطع الفيديو جاب لي هدايا وطلعني وسفرني وكل ماصار يرد على الجوال يرد ويحط سبيكر ومع كذا انا ماعاد اثق فيه ولاعاد اثق حتى في اقرب الناس لي وكل يوم وانا ابكي ومقهورة على نفسي احس اني دفنت نفسي مع واحد مايستاهل حتى لما يضمني او يقولي احبك ابكي واخبي دموعي لاني احس انه يخدعني في كل شيء
وخصوصا اني احاول اساعده بالتوفير لان وضعه مش ولابد وساعات اقول بدل ماوفر له ويروح يصرف على فلبينيه لاو الله انا اولى وكمان اساعده بعض الاحيان ماديا اذا احتاج
ياه يابنات الله لايعيشكم شعور الخيانه والغدر والله حتى عدوي ماتمنيت له اللي عشته وشفته لكن الله كبير
انا الحين طولت عليكم ولكن حبيت افضفض شوي والله اني احس بجبل على صدري وتشوفون لي حل ايش اسوي وكيف اتصرف