بنات تكفون ساعدوني الله يعافيكم مره مخنوقه

السلام عليكم و رحمة الله و بركاته
بنات مره مره مره مره مره مره مره متضايقه و احس الدنيا مو سايعتني من كثر الضيق
انا قبل فتره طويله كتبت موضوع ان في ناس خاطبيني من الكويت و كلموا امي و قالوا لها نبي بنتك
يوم قالت لي حسيت انها ما تبي اخذهم لآن عندي اختي أكبر مني
المهم... كانت الحرمه تنتظر نرد عليها يا حنا موافقين او لا
تخيلوا بالبدايه يوم كنت اسولف مع امي كانت تمدحه لي قبل لا يخطبني و يوم تكلموا فيني على خطبه
صارت تذمه 24 ساعه و تقول انه صايع و يغازل بنات و غيره
و كلمت ابوي على الموضوع ابوي ماكان عنده مانع ابد يعني حسيت مبدائا موافق و كنت مرتاحه
و مر اول اسبوع على الموضوع و كلمت امي قلتلها يمه ما كلمتي الناس قالت لا و صارت تصرفني تقول لي اثقلي بكره اكلمهم
و كل يومين وانا وياها اقولها اتصلي و هي تصرفني
المهم ..... كلمت عقب شهرين قامت تسولف مع الحرمه ام الولد عادي عن اخبارهم يعني سوالف مره عاديه ولا فتحت موضوع الزواج
يوم قفلت التلفون من الحرمه سألتها قلتلها وش صار طالعت فيني و صارت تنافخ و تقول وش صار حرام ما اسولف مع صديقتي قلتلها لا بس قلت انك بتقولين لها الله يحيكم مبدئيا
سكت و ضاق صدري و رحت الغرفه و جلست اصيح و بعدها 3 ايام فتحت موضوع صديقتها و قالت ان ولدها اللي يبيني صايع و داشر و راعي سفريات ولا يحترم احد
تناقشت معها وش عرفك قالت خالته تقوله لي لآن امي مشاء الله تعرف عايلتهم كلها
ناظرت فيها و قلت ما اقتنعت بالكلام طيب خليهم يجيون و ابوي بيسال زين ان شاء الله و اذا الولد بطال و عنده سوالف شينه اكيد بيعرف
يعني بالعاميه الريحه الخايسه تطلع ريحتها و تفوح
المهم ...........
تخيلوا قبل رمضان باسبوع يعني كملنا 3 شهور بعد اخر اتصال نشبت بأمي و قلتلها الا تتصلين و تشوفين وش صار ابي ارتاح طفشت و مليت
والله اتصلت امي على الحرمه تخيلوا وش ردت قالت ملكنا للولد و خلاص امي و هي تكلم الحرمه جالسه تضحك و تطالع فيني و تبارك للحرمه
و يوم قفلت طالعت فيني قالت خلاص ارتاحي ملكت لولدها و خلاص لا تقعدين تاكلين قلبي
و اجبرتني احضر زواجه تخيلوا و انصدمت يابنات مشاء الله الولد رجال و كل اللي بالزواج يمدحون فيه و يقولون ياحظ البنت اللي اخذته الولد ينشرا بفلوس
و ام المعرس سلمت علي و هي في عينها الدمعه اقول لها مبروك و تقولي الله يبارك فيك عقبالك و حضنتني و دمعت عينها
و ربي يابنات اني خلاص احس الدنيا قفلت بوجهي و مدري وين اروح ما عندي احد اشكيله و يعطيني رايه
قسم بالله يابنات ان ما عندي احد افضفضله اللي بقلبي صديقتي الروح بالروح تركتني و السبه تعرفت على صديقات جدد و غرتها الفلوس
يعني مالي احد اتكلم معه ماني عرفه وش اسوي ابي حل احس قلبي عورني و كل يوم اصيح اخر الليل ولا صرت انام زين
نسيت اقولكم انا عمري 28 سنه
ودي اعرف ليش امي تسوي فيني كذا اي احد يتكلم فيني يبي يخطبني تسحب عليهم ولا تطفشهم مدري ليش يابنات
ابي حل الله يخليكم