بنات هيا نتشجعوا و نعملوا حملة نطولوا شعورنا

1. و شنوة الحاجات الي استعملتها و جابت معاها نتيجة


2. و شنوة برنامجها الي جربته من قبل ولا ناوية تجربه معانا بإذن الله

باسم الله الرحمان الرحيم و صلى الله على شيدنا محمد و على آله و صحبه أجمعين
عسلامة بنات
شنوة احوالكم؟
إن شاء الله تكونوا كلكم بخير و الف عافية و سلامة
إن شاء الله تكونوا كملتوا امتحاناتكم على خير، و تجيبوا معدلات باهية و تفرحوا رواحكم و آباءكم و تعديوا صيف كله ضحك و لعب و سعادة و خير
آمين يا ربي
توة بعد ما كملنا من غصرة الإمتحانات و تعب التحصير و المراجعة ، قلت نتلهاوا بشعرنا شوية
و الله شعرنا المسكين تعب معانا عام كامل و احنا نعنفوا فيه بشدان و تجديل و سيشوار
و لا حتى نتلهاوا بتغذية باهية و شرب الماء و الخليب و ماكلة الخضرة و السلاطة
على كل، أنا قلت نجيوا اليوم نعملو تجمع
نقرروا نهتموا بشعرنا و أهم حاجة نطولوه
و الله أنا حلمي يكون شعري طويل حتى لآخر ظهري و لا لخصري (موش أكثر بش ما ياخذوهش بعين يهدوه -أعوذ بالله من كيد الحاسدين)
عاد قلت كل وحدة تحط برنامجها و الخلطات الي تعمل فيهم و الأعشاب الي جربتهم وو أحسن الزيوت لتطويل و تغذية الشعر و أحسن الشامبووات و الماسكات و الكريمات .
و لازم كل وحده كيف تدخل تقول:
شنوة نوعية شعرها
وفين طوله الحالي
و حتى أي حد تحب تطوله

و شنوة الحاجات الي استعملتها و جابت معاها نتيجة

و شنوة برنامجها الي جربته من قبل ولا ناوية تجربه معانا بإذن الله

و ياريت، يعني نطلب بكل لطف من الأخوات الي يدخلوا ما يعملوش إشهار لزيوت و خلطات تتباع في المنتدى خاطر أنا مثلا ما نجمش نشري منهم لأني نسكن في تونس ، يعني مستحيل توصلني ، وزيد على هذا، أغلب الخلطات الحاضرة من الشارع ما نحبش نعملها، نحب حاجة متأكدة منها و نعملها بإيدي .
و توة، هاني أنا بش نبدأ معاكم و نقلكم شنوة عملت و وقتاش و شنوة نوعية شعري
باسم الله الرحمان الرحيم، توكلنا على الله
أنا شعري قريب لنصف ظهري، يعني موش طويل برشا ولا قصير برشا
نوعيته جاف من الأطراف و متقصف ، أما من قوف عادي و فيه لمعة و الحمد لله
ما تقولوليش قصه لأانو أصل خربة شعري من القصان وحدة قصتهولي عندها 3 سنين و حلف بش مايطوالش أبدا، أنا نقص الأطراف كل مدة ، يعني شهر و نصف ولا شهرين، أما قصة مستحيل..
السيشوار ما نستعمله كان في المناسبات، يعني مرات قليلة في العام، خاطر شعري أصلا موش ناقص تقصف
بالنسبة للعلاجات :
شريت شامبو فاتيكا للترطيب الهميق و مقوي للجذور
كريم حماما زيت فاتكا للترطيب العميق بالحناء و الزيتون و اللوز
زيت فاتكا باللوز نحطه بعد الحمام
زيت داير أملا الأخضر الأصلي ، ما نستعملوش بانتظام ، يهني أنا ووقتي ، لكن الي حسيته هو ان طيحلي شعري أكثر من العادة، أما البنات قالولي عادي بش اشعر الضعيف يطيح في الأول
عملت الحنة مرة وحدة
عملت خلطة الهاجرية بالسدر 4 ولا 5 مرات
عملت خلطات أعطاتهملي الأخت الأفعى الحنونة الله يجازيها ألف خير، و ممكن تلقاوا الخلطات في مواضيعها
نستعمل في سيروم كريستالوكس لعلاج الشعر المتقصف
الزيوت الي شريتها :
زيت الزيتون طبعا
زيت السمسم
زيت الخروع
زيت الوز
زيت الحلبة (ما استعملتوش خاطر ما عرفتش الطريقة ولا فوائده)
زيت الذرة (قالوا الأحسن للشعر)
و زادة عملت زيوتي الخاصة :
زيت الذرة بالحلبة
زيت الزيتون بالثوم و الحلبة و حبة البركة
و الأعشاب :
السدر
الحناء :مرة وحدة
الحبة السوداء
الحلبة
الثوم
الزعتر
الإكليل
الزنجبيل
القهوة
الشاي
هذا غير البيض
المايونيز
العسل
الخل
الزبادي
الزبدة
الحليب
هذي أهم الحاجات الي جربتها بش نطول شعري، ولاحظت طوال شوية، يعني 1 سنتيمتر ولا 2 لكن النتيجة موش واضحة خاطرني ما نستمرش، نقلق و نتعب بسرعة و ماعنديش برنامج منظم
كل حاجة نقراها نجربها
هذا علاش، حبيت نلقى بنات نشجعوا بعضنا أنا وياهم، و بإذن الله من هنا إلى العودة المدرسية تكون شعورنا مهفهفة على ظهورنا و لا أحلى
أستحلف بالله كل وحدة تدخل، تشاركنا بتجربة ولا وصفة ولا حتى ترفع الموضوع بش تعم الفايدة
و الي حابة تشارك معايا تقول أنا مشاركة
و الله ندعيلكم من كل فلبي ربي يوفقكم و ينولكم الي في بالكم و يعينكم و يرزقكم دنيا و آخرة
آمين و الله لا يضيع أجر المحسنين
بسرعة، مستنيتكم