بيجيك ضيوف وتبين تصلحين كم نوع مع القهوه والشاهي وبسرعه

السلام عليكم
اختكم العجازه وصلت
طبعا انا موتيني ولاتحطين عندي طبخه تستغرق ساعه في تصليحها
وفكرت في هذا الموضوع بأجمع لكم كذا صنف حلا وموالح سريعه بحيث اذا جاك ضيوف بالكثير ساعه وانتي مصلحه ثلاث انواع حلا وثلاث اشكال موالح وياسلام على السنعه!!
نبدأ ونرحب بالاضافات من الاخوات
أولا :الحلا
هذا الحلا اخذته من المنتدى هنا ولذيذ بس عدلت فيه شوي
كأس جوز هند
ست ملاعق حليب بودره
ثلاث أرباع كأس سكر مطحون
ثلاث ملاعق قشطه
ملعقتين شوكولاته بودره
حركيها على النار الى ان تتجانس ثم خليها تبرد شوي وكوريها اذا كانت جافه خلي عندك صحن فيه ماء غطي يدك في الماء قبل تكورين عشان تلين شوي ثم كوريها وغطيها بجوز الهند.....
الثاني
3 اكواب جوز هند + علبه كبيره حليب نستله تعجن معا حتى تصبح متماسكه ثم تذوبين اي نوع شوكولاته عندك وتشكلين العجين على شكل كرات وتغمس بالشوكولاته
الثالث
جالكسي مبشور يخلط مع قشطه على حسب الكميه
بسكويت شاهي يغمس في الحليب ويصف في الصينيه ويغطى بطبقه من الخلطه ثم بسكويت مغموس فس حليب ثم باقي الخلطه ثم يزين بجالكسي مبشور
تبرد وتقطع
الرابع
علبة بسكويت مطحون تخلط بقشطه وتصف في الصينيه
شعيريه باكستانيه تحمس على النار ثم يوضع عليها حليب مركز وتصف على الطبقه الاولى
3 جالكسي او اي نوع شوكولاته ساده تذوب مه ربع اصبع زبده وعلبة قشطه وتوضع على الطبقه الثانيه
تبرد وتقطع
الخامس
كأس ونصف بسكويت شاي مطحون
نصف كأس زيت
نصف كأس فسيق
نصف كأس سكر مطحون
ملعقة بكنج بودر
ملعقة فانيليا
ثلاث بيضات
تصلح مثل الكيكه
في الخلاط علبة قشطه + 1حليب مركز صغير + 5 جبن مثلث او كيري حسب الرغبه
توضع على الكيكه بعدما تخرج من الفرن
للأمانه ماجربت ولا واحد الا الاول لكن لأنهم سريعات جبتهم هنا
نجي للموالح كلها بالتوست وماتاخذ وقت
احمسي بصل على النار حتى يذوب ثم حطي عليه طماط مقطع صغير وملعقتين صلصه (معجون طماط) واتركيه الى ان يذوب اضيفي ملح وفلفل اسود ثم ارفعيه من على النار وحطي عليه ثلاث ملاعق كتشب
جيبي كيس توست وانزعي الاطراف خذي عدد من الشرائح وقطعيها اربع قطع مربعه كل وحده تقطعينها بالطول والعرض على شكل +
ادهني كل قطعه بالخلطه السابقه ثم حطي عليها زيتون شرائح وفلفل بارد وجبن موزاريلا وحطيها في الفرن خمس دقايق بس
ثانيا
اخلطي جبن مالح مع بقدونس وافردي شريحة التوست وادهنيها بالجبن ولفيها رول وقطعيها شرائح كل شريحه بعرض 2 سم
ثالثا
قطعي شريحة التوست مثلثات بحيث تقطعيم من الزاويه للزاويه كل شريحه اربع قطع مثلثه واخلطي تونه مع مايونيز وبقدونس وزيتون شرائح حطي كميه على قطعة التوست وغطيها بقطعة ثانيه واضغطيها بقووه عشان تتماسك
بعدين تعالي للصينيه حطي صف من البيتزا وصف من رولات الجبن وصف من التونه وهكذا.......
ماتاخذ معك كلها نصف ساعه
وبالهناء والعافيه
اللي عندها اضافه تحطها