تبون تعرفون وش يسوي الحبأدخلوا وتعرفون هذي أول رواية لي روعة

في بيت بوفهد:
نايف: أحسن لك يا سارة أنا بلعب اللاعب الأول في البلاي ستيشن..
سارة: مو كله إنت اللي تلعب اللاعب الأول حتى أنا أبغى..
لولوه(أم فهد): الحمدلله والشكر يعني إنتوا ما تخلون سوالفكم..كل واحد وش عرضه وطوله يوصل لآخر الجدار وتلعبون ألعاب بزارين..كبروا عقلكم شوي..
سارة: أصلا إنت تدرس صيفي والحين الساعة 4 إلا ربع يعني باقي ربع ساعة وتروح الجامعة يا أخي عطني اللاعب الأول..
نايف: عنادٍ لك ماراح أروح الجامعة وبخلي واحد من أخويائي يحظرني..وهذني قاعد على كبدك..حرة..(يمد لسانه)
سارة: طيب أنا أوريك إن ما علمت عليك فهد وعلى فضايحك ما أكون أنا سارة..
دخل فهد توه جاي من الدوام..
فهد: السلام عليكم..
الكل: وعليكم السلام والرحمة..
نايف قام يطالع سارة نظرات تهديد علشان ما تفضحه عند فهد بس هي قامت تضحك وقالت إنها مو قايلة شي لفهد..
لولوه: وش أخبارك يا وليدي وش أخبار الشغل معاك..(تأشر بيدها على الكرسي)اجلس يا وليدي ارتاح..
فهد: آآآآآآآآآآه يا يمه تعب والله تعب.. بس ما نقدر نعترض على رزقنا..
لولوه: الله يسهل لك دربك..
فهد: سارة لو سمحتي قومي حطي لي الغدا تعبان أبغى اتغدى وأنام..
سارة: إن شاء الله..
فهد التفت على نايف باستغراب..
فهد: نايف..!! وش عندك ما رحت الجامعة الحين الساعة 4 و خمس؟!
نايف: هاه..ايه الحين بروح يلا مع السلامة..
لولوه: الله يحفظك والله الله في الدراسة شد حيلك هذه آخر سنه ما أبغى لعب..
نايف: إن شاء الله يمه..
لولوه: أقول فهد.. عندك شي بعد المغرب؟
فهد: آمري يمه بغيتي شي؟
لولوه: ايه والله يا ولدي ودي توديني الزامل(محل يبيع الأدوات الفنية بكل فروعها) علشان أشتري الحرير اللي يرسمون عليه وأبغى أشتري برواز علشان لما أخلص من الرسمة أبروزها..
فهد: إن شاء الله على هالخشم يا الرسام بيكاسو..
لولوه: تتطنز مع وجهك..
فهد:ههه...لا يمه بس أنا افتخر إن أمي رسامة..
لولوه: أنا قلت لأبوك بافتح معرض أو أبيع أعمالي بس هو مو راضي..
فهد:ههه..ولا يصير خاطرك إلا طيب أنا بحاول أقنعه بالموضوع.. يلا أنا استأذن بروح اتغدى وأنام..
لولوه: اذنك معاك يا ولدي..
فهد: أدري أن إذني معاي..أجل وشلون أسمع؟ههه
لولوه: فيك النوم وما تخلي سوالفك عنك..آآآه من هالولد..
فهد:ههه
******************
نايف في طريقه للجامعة..يرن جواله..
نايف: الو
عبدالله: الو هلا نايف
نايف: هلا فيك وش أخبارك وين إنت؟
عبدالله: والله الحمدلله إنت اللي وين؟
نايف: أنا بروح الجامعة تآمر على شي؟
عبدالله: أقول بلا جامعة بلا هم.. تعال نلعب بولينج في أرامكوا.. أنا موصي واحد من الربع يحظّرني ويحظرك معاي..
نايف: والله يا سلام عليك يا عبود.. ونعم الصديق..يلا أنا جاي مسافة طريق بس
عبدالله: أوكي باي
نايف: باي
نايف: إيه والله بلا جامعة بلا هم.. خلني أروح أوسع صدري مع الشباب..
ويلف سيارته عن طريق الجامعة ويروح على طريق أرامكو ومطول الأغاني على أعلى صوت..وهو في الطريق مر بنقطة تفتيش..طبعاً ما كان رابط الحزام.. بسرعة اربطه..ووقفه العسكري..
العسكري: الرخصة والاستمارة لو سمحت..
نايف يبغى يستهبل على العسكري لأنه مطول الأغاني يسوي نفسه ما يسمع..
نايف: ايش؟؟
العسكري قام يصرخ: الرخصه والاستمارة لو سمحت..
نايف:ههه إن شاء الله..
ونزل من صوت المسجل..وعطاه الرخصة والاستمارة..
العسكري: تفضل الله معاك..
نايف: اصلاً الله فوق في السما ههه
نايف يحب يطفر بالعسكريين خاصة اللي يوقفون عند نقاط التفتيش..سرع بالسيارة السرعة الغير قانونية وطبعاً العسكري خذ رقم السيارة(000 م ل ح)وسجل عليه مخالفه ويا كثر المخالفات اللي على نايف(تظليله-مورابط الحزام-سرعة-جاي عكس الطريق-داخل من مخرج وهلم جراً)..
نايف بينه وبين نفسه: خلني أدق على فيصل..هالولد ما أدري وش يحب في الجلسة لحاله..
جوال فيصل يرن..خذه في يده وشاف الشاشة..ابتسم يوم شاف الاسم..(بايع الدنيا)..
فيصل: الو
نايف: الو هلا والله بالقاطع اللي ناسينا ويقدم الكتب اللي ما تتكلم علينا..
فيصل: ههه..حرام عليك توني أمس رسلت مسج أسألك عن حالك.. وبعدين لا تنسى هذه السنة آخر سنة..ياخي أبغى أشد حيلي علشان ما أتعب في الوظيفة..
نايف: طيب أنا أبغى أسمع صوتك الجميل.. أنت تدري لما أسمع صوتك أصير في عالم ثاني وبعدين لاحقين على نهاية التيرم والوظيفة ..تعال أنا عندي لك طلعة معتبرة تنسى فيها أمٍ جابتك..
فيصل:ههه..لا أنا أبغى أتذكر أمي دايماً بصراحة..خلها مرة ثانية إن شاء الله..
نايف معصب: ترى ما صارت هذه يا فيصل..كل ما أقولك تعال معاي المكان الفلاني قلت خلها مرة ثانية,,ما كأن عندي ولد عم اسمه فيصل..
فيصل: يا رجّال وش فيك عصبت.. الموضوع ما يستاهل..
نايف: إنت الظاهر بتجيب أجلي اليوم على برودك..يلا باي..
فيصل: نايف..نا...
نايف قفل الخط في وجه فيصل..
فيصل: ياالله كل شي ولا زعل نايف..أووه وش أسوي الحين؟..
نايف في السيارة..
نايف:ههه..مثلت عليه إني معصب..وش أسوي فيه.. طفشني مع وجهه ومع كتبه.. الحين الكتب صارت أحسن من نايف ولد عمه..بس أنا أوريه شغله..إن ما خليته يحب رجولي ما أكون نايف ولد عبدالمحسن..هذا جزاي إني أبي أطلعه من هالمحراب اللي قاعد فيه..
وكمل نايف طريقه لأرامكوا وفيصل مسكين قاعد يفكر وشلون يرضي نايف..
**********
فهد لما تغدى وراح لغرفته علشان يرتاح..رمى بجسمه بكل قوة على السرير من التعب..و جلس يفكر..هل أبوي راح يوافق أتزوج أمل بنت عمي؟؟!!..وإلا بيرفض؟..طيب أنا أبغى أمل حتى لو كان فيها أقوى مرض..استغفر الله بعيد الشر عنها إن شاء الله..أقول خلني أنام الحين أنا تعبان وبيحلها ألف حلاّل بعدين..بس غمّض عيونه إلا هو في سابع نومه..
.....
**********
سارة: خلني أروح أدق تلفون على أمل من زمان عنها..
أمل: الو
سارة: الو هلا والله وشلونك؟ وشأخبارك يا القاطعة..
أمل: والله تمام الحمدلله وشأخبارك أنتي؟(أمل متغير صوتها من البكي)
سارة: أمل.! وش فيه صوتك متغير..؟
أمل والعبرة خانقتها: مافيني شي.. بس شوية زكام من مكيف غرفتي بارد..
سارة:لا.. إنتي فيك شي.. قولي حبيبتي وش فيك؟
أمل: خلاص لا تسأليني قلت لك مافيني شي..
سارة: ترى الحين بجيكم بخلي نايف يجيبني عندكم..
أمل: حياك الله تصدقين يا سارة محتاجه أحد أتكلم معاه..
سارة:تامرين أمر أنا سارة صاحبة المهمات والأوقات الصعبة..ههه
أمل:ههه ضحكتيني وأنا مالي خلق أضحك..
سارة: طيب يلا باي بروح ألبس..
أمل:باي..
سارة: بدق على نايف بخليه يوديني بيت عمي ماجد..
نايف يرن جواله..
نايف: أوه..وش تبي هذه بعد؟!!..الو
Hi naïf. How are youسارة?:
Hi sister Iam fine. نايف:
سارة: أقول نايف.. الله يخليك وش رايك توديني بيت عمي ماجد؟
نايف: لا سارة بطق مشوار من أرامكوا إلى بيت عمي ماجد..
سارة: نايف بلا عباطة بيت عمي ماجد حذفة حصاه من أرامكوا..بيت عمي في الظهران يعني لاصق في أرامكوا..
نايف: طيب طيب أنا جاي.. بس إن جيت البيت وما جهزتي ترى بمشي عنك
سارة: أفا عليك دقيقة وأنا جاهزة
نايف: لا واجد دقيقة ههه
Okسارة: تآمر أمر.. ثانية وأكون جاهزة.
Ok see you. Bayنايف:
Bayسارة:
**************
عبدالله: مين اللي داق عليك الحين؟
نايف: أختي تبيني أوديها بيت عمي ماجد..والله طلبات البنات ما تخلص..بس تصدق البيت من غير خوات مو شي..
عبدالله: يلا روح وأنا بنتظرك هنا بس مو تسحب علي السيفون وتنساني..
نايف: ولو أبوالعبد..أنا ما أنسى أعز أصحابي ههه
عبدالله: أقول قوم عن وجهي ووصل أختك وتعال..
نايف: إن شاء الله..
***************
نايف شاخط بالسيارة في الطريق.. وفي خمس دقايق وصل البيت وقام يضرب هرن ( بروي) على سارة علشان تطلع من البيت..
سارة: طيب طيب ما فيك صبر..أف..سارة طلعت من البيت وركبت السيارة..
سارة: من جدك نايف تضغط هرن كذا.. فقعت أذني
نايف: على بالي إنك فوق ..
سارة: طيب يلا خلنا نمشي..
نايف: إن شاء الله..
*****************
أمل: أماني....أماني وينك؟..تعالي الحين بتجي سارة بنت عمي..
أماني جاية تركض من غرفتها: قولي والله تصدقين ميتة من الطفش..جات في وقتها..
أمل: طيب روحي إلبسي وقولي لتينا تسوي الشاي والقهوة وتحط مكسرات ودونت ..
أماني: إن شاء الله..تينا ....تينا..
تينا: نأم ماما..
أماني: سوي شاي وقهوة وحطي مكسرات ودونت وحطيهم في مجلس الحريم..
تينا: طيب ماما..
ويرن جرس الباب وتركض أماني علشان تفتحه..سارة تطل براسها من الباب..
سارة: أنا جيت
أماني: هلا والله ببنت العم تفضلي وشلونك وشأخبارك؟
سارة: أنا لوني حنطي وأخباري في الجرايد ههه
أماني:ههه ما تخلين سوالفك اجلسي بالمجلس وأنا بروح أنادي أمل خذي راحتك البيت بيتك..سارة من جابك هنا؟
سارة: نايف أخوي..
أماني حمرت خدودها وابتسمت وسرحت..
سارة: اوه اوه اوه كل هذا علشان قلت اسم حبيب القلب..
أماني ماردت على سارة وراحت تنادي أمل..
سارة: مسكينه هالبنت متعبه نفسها مع واحد رايح فيها..الله يعينها
جات أمل: هلا والله.. نوّر البيت وشلونك وشأخبارك؟
سارة البيت منور بأهله أنا الحمدلله بخير.. شوفي مدام أماني مو موجودة قولي لي وش بلاك اليوم من يوم سمعت صوتك بالتلفون وهو مو عاجبني..
أمل: تذكرت الموقف اللي صار لي يوم كنت صغيرة,,وامتلت عيونها بالدموع..
سارة: خلاص يا أمل اللي راح راح.. والله لا يعيده من يوم.. وبعدين كلنا نسينا وإنتي ما تدرين وش مخبيلك المستقبل؟
أمل: سارة صعب والله صعب وإنتي تعرفين إني....وسكتت
سارة: إنك تحبين أخوي فهد؟
أمل تبكي..
سارة: أمل إنتي تدرين إن فهد يقول لي كل شي.. وهو قايل لي إني بتزوج أمل مهما كان اللي فيها حتى لو كان أقوى مرض بعيد الشر عنا وعنك..يلا عاد أبغى أشوف ابتسامه حلوة على وجهك يلا قبل لتجي أماني وتشوفك كذا.. عاد إنتي تعرفين أماني تحبك وبتنشب في حلقك بالأسئلة.. وشفيك تبكين وش فيك تبكين..ههه
ابتسمت أمل وجلسوا يسولفون ويتقهوون إلى ما جاتهم أماني وجلسوا يسولفون مع بعض
سارة: أقول بنات عندي فكرة ليش ما نروح سوبر ماركت المزرعة؟
أمل: والله فكرة لأني طفشانه..
أماني: أنتوا مجانين وإلا بايعين أعماركم؟؟.. لالا أنا مو رايحة لأني أخاف و احنا جايين يشوفنا عمي عبدالمحسن.. طيب مين بيوصلنا السوبر ماركت؟
سارة:أصلا أبوي الحين في بيتنا رايح في سابع نومه.. وبعدين هذه خليها علي حل أسهل من السهل.. نمشي على رجولنا..!!
أماني: ايش؟!..لا إنتوا من جد راح تجيبون أجلي اليوم..
أمل: أقول بلا قلة أدب وخوف مال أمه داعي.. احنا بنروح بتجين حياك الله ماراح تجين بكيفك..
أماني: لالا خلاص بروح معاكم حشر مع الناس عيد..
أمل وسارة: أجل يلا خلنا نلبس عباياتنا..
أماني:يلا
راحوا البنات يلبسون عباياتهم وخذوا معاهم شناطهم وخذت أمل مفتاح البيت علشان لما يجون ما يضربون الجرس ويحسون فيهم استأذنت أمل من أمها وراحوا.. وهم في الطريق..
أمل: أقول أنا ماعندي ولا فلس في بوكي خلنا نمر الصرّاف.. هذا هو جنب البقالة الصغيرة..
أماني: بعد فيها مرور بالصراف.. طيب ليش ما نروح هذه البقاله القريبة وخلاص..؟!
أمل: لأ أنا بصراحة مشتهية أشتري بطاطس من برجر جنج لأنه جنب السوبر ماركت ففرصة مدام احنا رايحين هناك..إذا ما تبين تروحين معانا خلنا نرجعك البيت مدام احنا قريبين..
أماني: لالا وش يرجعني الحين لا خلاص بروح معاكم أمري لله
انتظروا عند باب الصراف لأن كان فيه رجّال بعدين يوم طلع دخلوا وسحبت أمل فلوس وسارة بعد وكملوا طريقهم للسوبر ماركت وكان الجو حلو..يوم وصلوا السوبر ماركت أول ما دخلوا كان على يمينهم محل (سينابون) وكان فيه فلبيني جالس يذوّق كل من يمر من عنده قطعة سينابون طبعاً كلهم خذوا وكملوا طريقهم وما بقى شوكولاته أو شيبس أو علك إلا وخذوه ويوم خلصوا مروا على قسم المجلات واشتروا مجلة(لها)..يوم خلصوا راحوا عند الكاشير علشان يحاسبون حاسبوا وخلصوا بعدين وهم طالعين من السوبر ماركت إلا لقوا محل جوالات ..
Memoryسارة: شوفوا محل جوالات أبغى أشتري لجوالي الهمر
أنتوا روحوا برجر كنج روحوا اشتروا بطاطس وبجيكم.. لأن الحين الساعة 6 علشان يمدينا نرجع البيت ما يصيدونا على هالطلعة..
أمل وأماني: طيب بس يلا بسرعة..
أمل وأماني راحوا يشترون بطاطس وجلسوا ينتظرون إلى ما جاتهم سارة..ورجعوا وفي طريق الرجعة..
سارة : وش في الدنيا كذا حر يوم نجي كان الجو حلو..
أمل:ايه والله يوم احتجناه لأننا تعبانين راح ههه
أماني: يوه الحين الساعة 6 وثلث ما بقى شي على أذان المغرب يا ويلي ويلاه بيشوفنا عمي عبدالمحسن..أقول خلنا ناخذ تكسي إذا شفنا على الطريق..
أمل: ايه والله بديت أخاف خلنا نسرع في مشيتنا..
قاموا يسرعون في مشيتهم ويوم شافوا تكسي في طريقهم قاموا يأشرون..
البنات: هيه هيه هيه وقف وقف
يوم قرّب إلا شاب سعودي ومعاه واحد وأصلا ما وقف لهم قام يطالع فيهم..وما عطاهم وجه..
البنات فاقدين الأمل: وي شوف طلع واحد ومعاه واحد بعد
سارة:لا وشكلها سيارته الخاصة لأن فيه بعضهم ياخذون السيارة اللي يشتغلون فيها ويتمشون فيها
وهم يمشون أذن المغرب..
أماني: يوه يا ويلنا أذن المغرب
أمل:وش رايكم نركض؟
أماني : من جد تتكلمين؟؟.. الشارع مليان ناس وبعدين تخيلي أشكالنا بالعبايات نركض..والله ما يصدقون على الله هالشباب ويصورونا بلوتوث...
أمل:ههه..الظاهر البنت متأثرة من السوالف اللي تسمعها في المدرسة.. أجل لما تجين الكلية وش بتسوين؟
سارة :ترى والله ما فيه إلا هالحل..أقول بنات مافيه أحد في الشارع خلنا نركض..واحد ..اثنين..ثلاثة..
وقاموا البنات يركضون وتعالوا شوفوا الأشكال..اللي عبايتها طايرة..واللي نعالها طاح منها..وخلوها على الله..
طبعاً أمل سبقتهم إلى الباب علشان يدخلون على طول محد يشوفهم..والحمدلله عدا اليوم على خير..
.....
فيصل إلى الحين محتار وشلون يرضي نايف؟!..وكما هو معروف الناس الانطوائيين أكثر تعمق في التفكير..خلى الكتب على جنب ونسى أمٍ جابتها..ومسك جواله وهو متردد..يارب وش بقول؟؟ وشلون ببدا؟؟هل هو راح يتقبل الاعتذار؟؟ولا يسد الباب في وجهي؟؟وقاعد يفكر والاسئلة تدور في راسه وكل ما تعمق في التفكير الاسئلة تكثر والسالفة تكبر والتخيلات تتوسع(يعني بالعربي فيصل مكبر السالفة على ولا شي)..نشوف وش بصير مع فيصل!!!..
فيصل دق على جوال نايف ويده على قلبه..
طوط......طوط.....طو وط.....طوط
لا أكيد الولد زعلان من جد.. واللي يدل على هذا الشي إنه مايرد!!ياربي وش أسوي وأنا مع خشتي حاشر نفسي مع هالكتب..بس وش أسوي خلاص تعودت أدفن نفسي بينها..هي اللي أبث لها همومي بدون ما تزيد علي هموم..صحيح ما تتكلم بس أحس إنها تقرا أفكاري..أوه شوف بس أنا وين رحت؟؟.. خلني أشوف وش سالفة هالولد المرجوج..
نايف ولا يدري وين الله حاطه يلعب بولينج في عالم ثاني وحاط جواله على الطاولة ويلعب..
عبدالله يصرخ لأن صوت الأغاني عالي في مكان اللعب:نايف جوالك يرن تعال..
نايف وهو يحذف كورة البولينج بكل قوته:طيب..طيب..جاي..أوه هذا ولد عمي فيصل..
عبدالله: وش تنتظر رد عليه تراه من ساعة يرن جوالك أنا بس كذا التفت إلا لقيته يرن..
نايف يضحك وتطلع الغميزات بشكل واضح على خدوده: ههه..أوه أكيد الحين جالس ياكل في عمره يحاتي وشلون يراضيني..
عبدالله مستغرب: ليش وش مسوي غالط عليك بشي..
فيصل في هاللحظة وقف عن الاتصال..
نايف: أوه شكل الرجّال يأس..أنا أقولك وش السالفة....وقال لعبدالله كل السالفه..
عبدالله: هههاي والله هالولد طيّب.. بس إنه حساس..بس وشلون تفهم عليه أحس أنه شخص غامض بمعنى الكلمة..
نايف: أفا عليك يا عبود تبغى نايف ما يفهم شخص مثل فيصل..
عبدالله: يالله خلنا نتعلم منك يا أفلاطون..إلا ما قلت لي..أرسطو وش يقرب لك؟!
نايف: أقول احترم نفسك ترى أنا أحسن من ابن خلدون بعد إذا مو عاجبك..
عبدالله: أوه هذا هو دق مرة ثانية..
نايف يحط صبعه على فمه:أوش ولا كلمه بسوي نفسي إلى الحين زعلان..
عبدالله يضحك بس كاتمها..
نايف يرد بحزم: نعم!!
فيصل........
نايف بكل ثقة: قلت نعم تبي شي.. تراك مو غلطان صح هذا جوال نايف عبدالمحسن
فيصل بنبرة منكسرة: أنا آسف..
نايف:ههه ههه
فيصل فرحان: يعني إنت مو زعلان مني..
نايف: يا رجّال عن حركات البزارين..حرّك حرّك..
فيصل:ههه ولد عمي وأنا أعرفه.. مجنون.
نايف: هاه..بتجي والا بتقبر نفسك مع الكتب..
فيصل: الله يرحمنا برحمته.. الله يوسع علينا القبر.. وما نشوف إلا نعيمه..
نايف: وش فيك صرت واعظ ديني!
فيصل: ما تشوف نفسك وش تقول..
نايف: المهم ما علينا بتجي وإلا لأ؟؟
فيصل: أفا عليك جايك على صاروخ ديسكفري كانوا بيطلقونه اليوم في الليل بس أنا خذته علشان أرضيك..
نايف: الله يرضى عليك يا وليدي..
فيصل:ههه يلا أنا في الطريق..
نايف: انتبه على نفسك لاتسرع..ههه
فيصل: ههه إن شاء الله يلا في أمان الله
نايف : في أمان الكريم..
*********************
فهد قام من النوم على الساعة 7,00 المغرب..حس إنه متضايق وماله خلق أحد..دخل الحمام وغسل وجهه وتوضى وصلى ..لبس ثوبه وخذ مفتاح السيارة مع جواله وطلع من غرفته وهو طالع إلا سارة شافته..
سارة: فهد أخوي.. وش فيك مو طبيعي؟!
فهد: مافيني شي.. مالي خلق أحد..
سارة: وش فيكم اليوم كل ما أكلم أحد يقول متضايق!!
فهد: مين غيري بعد؟
سارة: أمل..
فهد انصدم وش فيها أمل؟..وليش متضايقة؟؟..سارة حست بتغير ملامح فهد.. انتظرت إنه يتكلم بس ما نطق ولا حرف وإلى الحين واقف مكانه يفكر..جات سارة بتمشي إلا فهد مسكها من يدها..
فهد يطالع في الأرض: سارة وش فيها أمل؟
سارة توهقت ما عرفت وش تقول له؟؟!!..
سارة: لا مافيها شي بس وحدة تعرفها في الكلية تهاوشت معاها..
فهد: أدري أنه مو هذا السبب بس أنا بمشيها لك..
مشى عنها وسارة واقفه مكانها مستغربة ..يا الله يا فهد وش هذا الإحساس المرهف العجيب اللي عندك؟..حتى وهي بعيدة عنك تحس فيها مثل الروح اللي تلاصقك..
ركب فهد السيارة وشغّل الراديوا..
(الحب كله لو جمع عشر ذرة*في قلبي لك ملايين ذرات*احساسي لك كوكب تعدى المجرة*فيه الفضا شيّد لنفسه مجرة*يا من تسخّر كل أمري وأمره*همي وحزني والفرح والمسرات*ماترحم اللي وسمت فيه عبرة*اشتاق حتى صار به الموت لمحات)
قفل الراديوا وجمّع كل هوا العالم بصدره وتنهد من قلب..يوم شاف نفسه وصل البحر وقّف سيارته في المواقف وجلس مقابل البحر..
آآآآآآآآآآآآآه يا بحر.. إنت أقوى واحد يتحمل الناس وهمومهم..مهما قالوا من كلام ما تقول لهم اسكتوا ما أقدر أسمع أكثر من كذا..بالعكس صدرك وسيع على الناس ولا تنفر منهم..يا تجاوبهم بالسكون والموج الهادي..أو بالعواصف والأمواج الهايجة..هذه وسيلة تعبيرك الوحيدة..يا ليتني مثلك ما أسمع علشان ما أسمع كلام يجرح..ليتني ما أتكلم علشان ما أنصح أحد وفي الأخير يرد علي بالإساءة..ليتني ما أشوف علشان ما أشوف أفعال الناس المتناقضة مع أنفسهم..كلامهم غير وفعلهم غير..ليتني .........يرن جوال فهد..شال الجوال..شاف الشاشة..رد بصوت حزين..
فهد: الو
مهند: الو فهد وينك؟
فهد:آمر تبي شي؟
مهند: أبيك إنت.. وش فيك صوتك مو عاجبني..مدام صوتك كذا خلاص عرفت إنت وين
فهد: خلها على الله يا مهند..
مهند:أوكي يلا باي
فهد: باي..
مهند يعرف فهد وين يروح إذا كان متضايق..فعلى طول راح للبحر ولقاه هناك..شافه رافع ثوبه ورابطه على خصره..ويلعب برجوله مع البحر..ابتسم يوم شافه..
مهند جاي من بعيد ويصرخ: هونها وتهون يا أبو الشباب..
فهد بابتسامة حزينة: هلا مهند تعال قرّب..
مهند رفع ثوبه هو الثاني وربطه على خصره وقام يمشي على البحر هو وفهد..
مهند: وش فيك يا فهد شايل هموم الدنيا على راسك..
فهد معصب: لا تتعيبط يا مهند معقوله مو عارف وش فيني؟!
مهند: وش فيك تصرخ علي.. قلنا معصب بس لا تصير أخلاقك تجارية..
فهد: والله تعبان ..أختك يا مهند..
مهند عرف السالفة: فهد إنت تعرف راي أبوي فيك وبالعكس راح يكون مبسوط لو تزوجت أمل..وبعدين ليش كل هالشكوك اللي تجيك بين فترة والثانية يعني معقولة أبوي بيردك؟!
فهد:ما أدري ليش أحس بالخوف من ناحية هذا الموضوع بالذات؟
مهند: اترك هذا الموضوع عنك تو الناس أصلاً على هذا الموضوع..إنت توك مشتغل صار لك سنة..وانت ترفض أي مساعدة من أحد تحب تعتمد على نفسك..ومدام تبي تعتمد على نفسك..كوّن نفسك أول بعدين

مو لازم الرواية تعجبكم
لكن الردود كثيرة
وأكيد فيه مشاهدين يبون يكملونها

فهد ومهند يوم الجمعة بعد الصلاة..راحوا للطعوس اللي في هاف مون ( شاطئ نصف القمر)..ومعروف كل جمعة الشباب اللي في الشرقية يتجمعون على الطعوس ويسوون استعراضات..خذ فهد اللاند كرزور حق أبوه..بعد ما استأذن منه وبطلعة الروح رضى..بعد ما وعده فهد ان أي تخريب في السيارة يصلحه على حسابه..ويغسلها عن الرمل على حسابه..طبعاً الشباب في سبيل الوناسة يضحون بأي شي..طبعاً مهند ما راح ينسى فهد وراح يساعده من ناحية الفلوس..
مهند يصرخ من الوناسة: و..وناسة..
فهد:ههه أقول أمسك عمرك لا تطير من الشباك...
مهند: والله لو يحصل أطير كان لقيتني في السما من زمان..
بعد ما فحطوا وطعسوا واستانسوا راحوا على البحر شوي..كان البحر هادي لأن كل الناس عند الطعوس..
فهد: أقول مهند مو ناوي تسبح في البحر؟
مهند: فهد الحين الشمس حارة انتظر إلى العصر..
فهد: لا ما فيني صبر ..بروح أطب ألحين..الشورت وجايبه..
مهند: ما شاء الله جايب الشورت ..وليش ما قلت لي..؟؟
فهد: لأنك بتسبح بالثوب اللي عليك..( ويفاجأ مهند ويدفه على البحر)
مهند تفاجأ ما توقع هذا الشي..كان بيمسك بثوب فهد لكن فات الفوت..طبّ في البحر..
مهند وهو ميت من الضحك: أوريك شغلك يا الخاين..خوّنت فيني واستغفلتني..الحين من وين أجيب ثياب غير اللي علي..
فهد: بسيطة وقف في الشمس وبتنشف..ههه
مهند: يا سلام يعني انت في البحر مبرد على نفسك..وأنا أوقف في الحر والشمس..يعني إلى هالدرجة شايفني أبيض وتبي تسمرني..ايه وش عليك..انت أبيض كأنه كابين عليك قارورة كلوركس...
فهد يضرب يده على راسه: الله أكبر..الله أكبر عليك..لا..رحت فيها بصير أسود ألحين..الله لا يقوله..قل أعوذ برب الفلق..
وقاموا يلعبون مع بعض في البحر..وكل شوي فهد يسوي في مهند مقلب..مرة يحاول يغرقه..ومرة يقط عليه قناديل..ومهند عنده حساسية من القناديل..ومسكين مهند راح فيها..بعدين طلعوا وراحوا أقرب مطعم في الهاف مون واطلبوا رز ودجاج وتغدوا..يوم أذن العصر صلوا العصر..وبعدها انسدحوا تحت وحدة من العريش اللي على البحر..
فهد: أقول مهند..تذكر يوم قلت لك اني مشتهي أروح البر؟
مهند: ايه أتذكر..
فهد: يلا متى العزم؟
مهند: فهد وش فيك خرفت؟؟..نايف في المستشفى..لما يطلع بالسلامة نعزم إن شاء الله..
فهد يضرب جبهته: ايه صح..والله نسيت..
مهند:ههه..اللي ماخذ عقلك يتهنى به..
يوم قال مهند هالكلمة..فهد سرح..
مهند: هيه نحن هنا..
فهد: يعني الواحد ما يختلي بنفسه شوي..
مهند: لا حرام..بنقز لك في كل مكان..ههه
فهد:ههه
*********************
****************************
بعد أسبوعين طلع نايف من المستشفى..ومعاه الجهاز اللي راح يستمر معاه طول حياته..نايف متظايق من هذا الموضوع شوي..بس الحمدلله على كل حال..
أماني سمعت أبوها يقول لأمها إنهم بعد المغرب بيروحون لنايف في البيت..تذكرت الهدية..
أماني: أمل..
أمل: هلا
أماني: ما غلفنا هدية نايف..مو حلوة نعطيه إياها في كيس المحل..حتى لو كان المحل ماركة..خلنا نوديها محل تغليف الهدايا..في محل في الراشد اسمه ( بيبر مون )..في الدور الأرضي..تغليفه مرّة حلو ومرتب..
أمل: ايه والله وانت الصادقة..وأمي تحب الحركات اللي مثل كذا خلني أقول لها..ومدام العصر فاضيين..نروح الراشد..
عايشة جالسة تسولف مع ماجد..
أمل: يمه
عايشة ما ردت على أمل وتكمل السالفة مع ماجد..
أمل: يمه..
عايشة منسجمة في السالفة..
أمل: يمه..
عايشة: أمل وجع ما تشوفين قاعدة أسولف مع أبوك..خلني أكمل السالفة وبعدين يصير خير..
ماجد: ايه والله حرمتي صادقة..كلتيها بقشورها..ههه
أمل: لا يمه هذا الشي مهم ما يتأجل..لازم نسويه اليوم..
عايشة: يلا قولي..
أمل: تذكرين الهدية اللي شريناها لنايف؟
عايشة: ايه أتذكر..
أمل: مو حلوة نعطيه الهدية بكيس المحل نفسه..ليش ما نروح نغلفها؟؟
عايشة: ايه والله صح كلامك يا بنتي..احنا كريمين ونايف يستاهل..ماشاء الله عليك يا بنتي والله وكبرتي وتعرفين السنع..
أمل: مشكورة يمه ما عليك زود..ههه..المهم العصر ما عندنا شي خلنا نروح..
ماجد عرف انه هو اللي بيوديهم..فقام علشان يهرب منهم..
ماجد: احم احم..أنا بروح الحمام..
عايشة: تعال أعرف حركاتك ..زوجي وعاجنته بيدي..الله يعطيك العافية انت اللي بتودينا..
ماجد حس انه ما راح يقدر يتهرب أكثر..
ماجد: أمري لله راح أوديكم..بس ما راح أنزل معاكم..بنزلكم وبعد ما تخلصون اتصلوا على جوال..تعرفون أنا يدور راسي من المجمعات..
عايشة: إن شاء الله ..بس انت ودنا الحين..
ماجد: ما طلبتي شي يا أم مهند تآمرين أمر..
عايشة: الله يخليك لنا ولا يحرمنا منك..
أمل: أقول أماني تعالي خلنا نروح فوق.. نصفي لهم الجو شوي..ههه
أماني وأمل ركبوا فوق..هم دايماً مع بعض نادر ما تلاقون وحدة منهم لحالها..
أماني: أمل تذكرت شي..
أمل وهي جالسة على الكمبيوتر: وشو؟؟
أماني: الميدالية..
أمل: ايه صح..كيف بتعطينه؟
أماني: بحطها في جيب البنطلون اللي شريناه له..وبكذا محد يدري عنها إلا هو..
أمل: الظاهر تعلمتي مني الأفكار الجهنمية..ههه
أماني: المهم أنا بروح أحطها وبجي..
راحت أماني بتحط الميدالية في جيب البنطلون..الميدالية من خشب..على شكل كورة..لونها خشبي..محفور عليها بالنار اسم نايف..والميدالية إذا أحد لمسها يطلع منها ريحة عود..خذت ورقة
Aصغيرة وكتبت عليها الحمدلله على السلامة يا الغالي..بنت عمك:
هي متعمدة ما تكتب اسمها علشان يحتار أمل وإلا أماني..؟؟؟
حطت الميدالية والورقة داخل الجيب..ورجعت البنطلون في الكيس ولا كأن صار شي..
بعد صلاة العصر..ماجد وصلهم الراشد وراح يتابع الأسهم..دخلوا محل تغليف الهدايا..اختاروا علبة على شكل مستطيل لونها بني فاتح..طقم مع الساعة ولون البدله..حطوا داخل العلبة قش..وحطوا البدلة والساعة بشكل مرتب داخل العلبة..بعدين قفلوا العلبة ولفوا عليها شريطة لونها بيج ومطرزة بخيوط ذهبية..واشتروا بطاقة لونها بيج..علشان تكبت فيها عايشة..حطوها في كيس لونه بيج..وحاسبوا وطلعوا من المحل ..كلموا ماجد يجيهم وعلى طول من المحل إلى بيت عبدالمحسن..
****************
نايف صار دايماً يجلس بالصالة..لأن الدكتور قال له اجلس في البيت خمس أيام بعد المستشفى راحة..نايف طفشان حياته..فصار دايماً يجلس على الكنب اللي عند التلفيزيون وماسك الريموت..ويفرفر من قناة لقناة..يوم رن الجرس..
نايف: الله فيه ناس جاوا..جودي....جودي..
جودي: نأم بابا..
نايف: بابا في عينك..انا توني صغير..المهم روحي شوفي مين عند الباب..
جودي: زين بابا..
نايف: ما أدري أشوتها هذه الحين..افتكينا من الممرضة اللي في المستشفى..جات العلة الثانية الخدامة..
ماجد يدخل الصالة وعايشة وراه والبنات ادخلوا وراهم بس متغطيين..
ماجد: السلام عليكم..
نايف نسى الجهاز اللي مركب فيه وقام بقوة: هلا عمي..( حط يده على مكان الجهاز)..آآآآآآآآآآآه..
ماجد: الله يهديك يا نايف..احنا مو ناس غريبين انا عمك وهذه خالتك وهذولا بنات عمك..استريح الله يهديك..
نايف: والله من الطفش اللي أنا فيه لا أروح ولا أجي..أفرح لما أحد يجيني..
عايشة: وشأخبارك يا بعد عمري إن شاء الله بخير..
نايف: الحمدلله يا خالتي..آآآآآآآآآه..هذا الحال قدامك..( يأشر على الجهاز)..
ماجد: خلك رجّال يا ولد أخوي..واحمد ربك انها جات على كذا..احمد ربك انه مو شلل..
نايف: الحمدلله على كل حال..
أمل: نيوف وشأخبارك..إن شاء الله بخير؟؟
نايف: هلا ببنت عمي المرجوجة..وشأخبارك..
أمل: أنا الحمدلله تمام..
أماني وهي مستحية: وشأخبارك يا ولد عمي؟
نايف التفت على أماني ويبتسم: أنا بخير مدام انت بخير يا بنت عمي..
أماني استحت..
عايشة: أقول نايف وين أختي..؟؟
نايف: أختك جالسة تسبح مع الألوان تحت في البهو..ههه
عايشة: الله يرجك ما تخلي سوالفك..ههه..أجل بروح أشوف أختي..أماني لا تنسين تعطين نايف اللي وصيتك عليه..خذ يا نايف هذا شي بسيط وانت تستاهل أكثر من كذا..
نايف التفت على الكيس اللي بيد أماني: يا خالتي ليش كلفتي على نفسك؟؟
عايشة: هذا بس شي بسيط مثل ما قلت لك..عن أذنكم أنا بروح لأختي..
ماجد: وأنا بروح المجلس بتشوف أخوي..
أمل: وأنا بروح لسارة فوق ..أكيد ما تدري ان احنا جينا..( أمل متعمدة تروح فوق وتخلي نايف وأماني لحالهم)..
أماني حست انها بجلس لحالها مع نايف: وأنا بعد بروح معك..
أمل: لا انت عطي نايف الكيس اللي في يدك..( وتغمز لها)..
أماني انقهرت على حركة أمل..وأمل راحت فوق وخلتها..
أمل تدخل غرفة سارة وتفتح الباب بقوة: أنا جيت..
سارة: أهلين..هلا والله..حياكم الله وشلونكم وشأخباركم من زمان عنكم.؟؟
أمل: الحمدلله بخير..أقول سارة سويت شي خطير..
سارة متحمسة: وشو؟؟
أمل: خليت أماني لحالها مع نايف تحت..
سارة: قولي والله ..وش رايك نشوف وش بصير من الصالة اللي فوق..
أمل متحمسة: يلا..
راحت أمل وجنبها سارة وقفوا عند طرف الدرج من فوق ويطلون على نايف وأماني..ويشوفون الأحداث..
نايف: ترى أنا من ساعة قاعد انتظر..أبغى أشوف وش في الكيس..الفضول ذابحني..يلا بسرعة..
أماني:ههه..طيب ما فيك صبر..
قرّبت أماني من نايف بتعطيه الكيس..مدت يدها بتعطيه الكيس..جا هو بياخذ الكيس وتجي يده
بالصدفة على يد أماني..هو خذ الكيس وحس بقشعريره وقامت يده ترجف وحس بحراره في جسمه..وهي شالت يدها بسرعة وراحت فوق منحرجة ووجهها أحمر..
نايف بعد ما راحت أماني: يا الله يا نعومة يدها..بس أنا ليش جاتني قشعريره؟؟..أول مرة احس بهالشعور..أنا لما أمسك يد بنت بالغلط ما عمري حسيت بهذا الشي..وش معنى الحين؟؟..ما علينا..خلني أشوف وش في الكيس...
أماني لما وصلت فوق شافت أمل وسارة يطلون من فوق..ومستغربين من اللي صار ..واسمعوا كلام نايف لما تكلم مع نفسه..ماتوا من الضحك..وأماني عصبت عليهم وأدخلت غرفة سارة..
أما أمل وسارة جالسين يتابعون الأحداث..
نايف يطلع العلبة من الكيس: الله حلوة العلبة..خلني أفتحها..
شاف بطاقة ملصقة عليها فتحها مكتوب..( الحمدلله على السلامة وما تشوف شر..بو مهند وعائلته)..
نايف: شكراً لك جميعاً...ههه
فتح الشريطة اللي كانت مربوطة على العلبة..وبعدين فتح العلبة..وشاف البدله والساعة..انهبل على الساعة وعلى البدله أكثر لأنه يحب البدل..
نايف: الله..يحليك يا عمي كأنك حاس اني أبي أشتري بدله جديدة..
سارة وأمل من فوق يضحكون..
نايف لبس الساعة..( ما عند وقت)..وقام يتفرج على البدله..فتح التي-شيرت وحطه على صدره بيشوفه على جسمه..ودخل مزاجه..خذ البنطلون وفتحه..بس افتحه وهو مقلوب..طاح منه شي..لفت نظره هالشي..يوم طالع الأرض..إلا لقى ميدالية ومعاها ورقة صغيرة..خذ الميدالية
)..Aوالورقة من الأرض وقام يقرا الورقة(الحمدلله على السلامة يا الغالي..بنت عمك:
نايف قام يحك راسه ويفكر: مين هذه؟..ما عندي بنت عم بحرف الألف..( الظاهر نسى الحروف)..ايه تذكرت أمل وأماني..وثنتينهم بحرف الألف..ههه..والله وخرفت يا نايف..
أمل وسارة يضحكون..ومستمرين في المراقبة..
نايف: طيب..مستحيل أمل لأن أمل يحبها أخوي فهد..هالمفعوص يحب بعد..
سارة ماتت من الضحك وأمل معصبة على كلام نايف..
نايف: معقولة أماني تحبني؟؟..البنت المؤدبة اللي ما لها صوت يا الله يا الله يطلع هالصوت..معقولة تحبني..؟؟..يا حليلك يا نايف والله البنات قاموا يحبونك من جد..بس وين أنا عنها من زمان..
أمل: سارة.. الأخ توه يحس على دمه..
سارة: ههه..الحمدلله أحسن من ولا شي..
نايف تذكر لمسة أماني: لا أنا لازم أكلمها وأسألها بنفسي..تحبني وإلا لأ؟
أمل شهقت..وسارة افتحت فمها..
أمل: شوف هذا وش قاعد يقول؟؟..ما توقعت نايف بهذه الجراة..
نايف يكمل كلامه: بس وش تبي في واحد مريض..لا..لا..ما أبغى أظلم البنت معاي..خلها تاخذ لها واحد صاحي أحسن..( وقام نايف وحط الهدية في علبتها بيروح غرفته وطبعاً قرر إنه يحط الميدالية في مفتاح سيارته..)
سارة يوم سمعت كلام نايف دمعت عيونها..وأمل حزنت عليه.(والله ولد عمي قلبه طيب)..يوم شافوا نايف بيركب الدور الثاني ركضوا وراحوا لغرفة سارة..
****************************
طبعاً خلصت الإجازة وبدت الدراسة..في أول يوم دوام..انتوا تعرفون الحالة اللي يصير فيها أي طالب سواءً كان مدرسي أو جامعي..والأم هي اللي تتعذب..
عايشة: أمل يلا قومي ذبحتيني..أنا الحين كم مرة رايحة جاية عليك بس اصحي فيك..
أمل تفرك عيونها : إن شاء الله الحين يقوم..
عايشة فتحت اللمبات والستارة وطفت المكيف..
أمل: يمه..يعني لازم تسوين تعذيب..( ورمت اللحاف)..وهذا أنا قمت..
أمل راحت الحمام وهي معصبة..
عايشة: وانتي الثانية متى بتقومين؟؟..قومي.. طلعت ريحتك من النوم..
أماني انقلبت الجهة الثانية..
عايشة: اماني..يلا قومي..
أماني بكل ببرود..قامت من السرير وراحت الحمام اللي في الصالة اللي فوق..لأن أمل بحمام غرفتهم..
عايشة: حشى مو ناس..خياش نوم..بروح أقوم فيصل..يحليله هو اللي مريحني..
راحت غرفة فيصل..فتحت الباب شوي شوي..راحت عنده وجلست تمسح على شعره..
عايشة: فيصل حبيبي ..يلا قوم..
فيصل يتعدل وينسدح على ظهره: إن شاء الله يمه..( يقوم ويدخل الحمام)
عايشة: الله يرضى عليك يا وليدي..أنا أخبر البنات يقومون بسرعة..احنا هنا في هذا البيت بالعكس..
راحت عايشة تجهز الفطور على الطاولة..وبعدين رجعت فوق تقوم أبو العيال وتتطمن على الوضع فوق..إذا قاموا البنات وإلا لأ؟..
عايشة: ماجد..ماجد ....
ماجد:ام
عايشة: ماجد يلا قوم..الله يعطيك العافية..
ماجد يجلس على السرير: الله يعافيك..روحي جهزي الفطور وبلحقك..( يبي يكمل نوم)
عايشة عرفت وش بيسوي: أنا أصلاً مجهزة الفطور من زمان..ويلا ما فيه نوم مرة ثانية..
استسلم للأمر الواقع ودخل الحمام..
عايشة: خلني أروح أقوم مهند...( لما وصلت عند الباب)..ايه صح مهند إجازة..يا عمري إجازته بدت متأخر بعد المدارس بشهر..خله يرتاح بعد عمري..
وعلى طاولة الفطور..الكل كان جالس بس ينتظرون الوالد..جا ماجد..
ماجد: السلام عليكم..
الكل: وعليكم السلام..
ماجد: تفضلوا ..سمّوا..
أمل: أقول يبه..
ماجد: يا الله صباح خير..
أمل تتدلع: يبه..
ماجد:ههه..هلا بنتي..
أمل: ليش ما تجيب لنا سواق؟..أحس إن احنا نخلي فيصل يتأخر على جامعته..
فيصل: ايه والله يا أختي..كأنك حاسة فيني..
أمل: شفت يبه..كل وحدة مكانها في جهة..أنا شرق وأماني غرب..
ماجد قام يمسح على لحيته: مدام الموضوع كذا ..خلاص نجيب سواق..
فيصل: أشكرك يا أختي العظيمة على اقتراحك الرهيب اللي جا في وقته..
أمل وأماني:ههه
عايشة: أقول بلا هذرة ويلا فطروا علشان ما تتأخرون..
أمل وأماني وفيصل: إن شاء الله يمه..
***************
على طاولة الفطور في بيت عبدالمحسن..الكل يفطر بهدوء..نايف إلى الحين ما نزل..
لولوه: سارة يمه..شوفي أخوك نايف وش فيه إلى الحين ما نزل..يمكن يبي أحد يساعده..
سارة: إن شاء الله يمه..
عبدالمحسن حط الكوب بقوة على صحنه: ماله داعي..هو رجّال يتحمل مسؤولية نفسه..
لولوه: بس يا عبدالمحسن......
عبدالمحسن: انتهى الموضوع..
قام عبدالمحسن غسل يده وركب سيارته وراح لشغله..
لولوه: سارة يمه شوفي أخوك..
سارة: إن شاء الله
سارة ركبت فوق بتروح غرفة نايف.. إلا نايف طالع بالبيجامة ..
سارة: نايف مو مداوم اليوم..
نايف: وكل يوم..
سارة: ايش؟؟..وش فيك نايف خرفت؟؟
نايف: لا ما خرفت..بس ما تشوفين الحال اللي أنا فيها..
سارة: يعني انت أحسن حال من المشلول اللي في جامعتكم؟؟
نايف ساكت ومنزل راسه بالأرض..
سارة: تدري يا نايف إن هذا المشلول انتشرت قصة كفاحه ومثابرته على تحقيق حلمه وهو اكمال الدراسة..على كل الشرقية..وما شاء الله من المتفوقين بعد..
نايف حس بحماس وبحزن في نفس الوقت على المشلول..لكن غيّر قراره عن انه ينقطع عن الدراسة..فدخل الغرفة وراح يبدل..
نزلت سارة وسألتها أمها عن أخوها..وقالت سارة لأمها اللي صار..
لولوه: بارك الله فيك يا بنتي..ونعم البنت..والله اني أفتخر فيك..
سارة ابتسمت لأمها وهي تشرب الحليب..وانتظرت نايف إلى ما نزل..كان نايف شايل كتبه في جهة..ومعلق الجهاز في جهة..سارة دمعت عيونها يوم شافته..بس بسرعة مسحتهم علشان ما يشوفها..
نايف : سارة يلا..
سارة: نايف تقدر تسوق؟؟
نايف: لا..اتصلت على عبدالله يجي ..الحين بيجي..
سارة: ايه أشوه..
نايف: غريبة فهد ما قام من النوم..
سارة: فهد إجازة..
نايف: ايه صح نسيت..( يرن جوال نايف)..يلا سارة هذا هو عبدالله..
سارة: يلا..
طبعاً في أول يوم دوام..كل الشباب اللي في الجامعة سواء كانوا معاه في الكلاس أو في الجامعة بشكل عام اللي توهم يدرون عن الحادث جاوا يسلمون على نايف..خاصة يوم شافوا الجهاز اللي عليه..طبعاً نايف كره نظرة الشفقة اللي كانت في عيونهم..ما يحب أحب يناظر فيه على إنه شخص ضعيف..فكان نايف يتحاشى نظراتهم وما يطالع في وجوههم..
في آخر الدوام..
نايف: آآآآآآآه يا عبدالله..أحس بتعب فظيع..ما كنت أحس فيه أول..
عبدالله ما عرف وش يقول لأنه يدري إن هذا التعب ناتج عن ايش..
نايف: عبدالله إذا ما عليك أمر ..يلا وصلني البيت..
عبدالله: إن شاء الله..
طبعاً وهم متجهين للسيارة..كل ما واحد من شباب الجامعة يشوف نايف يسلم عليه..يوم وصلوا السيارة..وحرّك عبدالله السيارة..
عبدالله: ما شاء الله..ما توقعت إنك مشهور والناس يحبونك كذا..عيني عليك باردة..
نايف: عين الحسود فيها عود..الله أكبر عليك..قول ماشاء الله..
عبدالله: هذا أول شي قلته..بعد قول ما سمعت..
ساد صمت رهيب على السيارة..بعد فترة تكلم نايف..
نايف: أقول عبدالله..
عبدالله: سم..
نايف: سم الله عدوك..بس ما لاحظت شي اليوم في الجامعة..؟!
عبدالله: من أي ناحية؟؟
نايف: ما شفت كيف الشباب يناظروني؟؟..يناظروني بنظرة الشفقة..وأنا ما أحب يناظرني على إني إنسان ضعيف..
عبدالله: أسألك سؤال؟؟
نايف باهتمام: تفضل..
عبدالله: إنت مثلاً إذا شفت شاب رجله مكسورة..وش بتقول وقتها؟
نايف: مسكين كسر خاطري..
عبدالله: طيب إذا مر على هذا الشاب فترة..هل بتقعد تتذكره دايم؟
نايف: بصراحة لأ..لأنه مشهد مر من قدامي وانتهى..
عبدالله: شفت..إنت قلتها بعظمة لسانك..مشهد مر من قدامي وانتهى..يعني هذا شعور أي واحد يشوف إنسان ثاني مثل حالتك..صدقني فترة وبتعدي على شباب الجامعة..بعدين راح يكلمونك على إنك نايف العادي..
نايف: بس يا عبدالله..........
عبدالله: لا بس ولا شي..بعدين إنت ما تدري بعلم الغيب..يمكن في يوم من الأيام ما تحتاج لهذا الجهاز..يعني إنت أحسن حال من الشاب المشلول اللي عندنا بالجامعة..؟؟
نايف تذكر كلام سارة الصباح..
عبدالله: من شاف مصيبة غيره تهون عليه مصيبته..خل إيمانك وأملك بالله كبير..وأنا ما أخبر إنه يهزك شي بهالبساطة..
نايف: والله ما أدري وش أقول يا عبدالله..أشكرك على كل شي سويته لي بهذه الفترة اللي فعلاً كنت محتاج لأحد يكون معاي..والله إني تعبتك معاي..
عبدالله: اشدعوة يا بوسعود..تعبك راحة..
**************
أمل من اول ما جات من الكلية على طول راحت نامت من التعب..يوم أذن العصر قامت توضت وصلت..ونزلت تحت تحط لها غدا..لقت أماني تسوي كيكة لقهوة العصر اللي تجتمع عليها العايلة دايما..
أمل: مساء الخير..
أماني : إلا قولي مساء الليل..شوفي عيونك متنفخة من كثر النوم..
أمل: لا تلوميني يا اماني..والله من التعب..تعبت اليوم من كثر ما أسلم على خلق الله تعرفين أول يوم..لازم أسلم..حتى أحس إن خدودي متنفخة..
أماني:ههه..ليكون رئيس الوزراء وأنا ما أدري..ههه
أمل: يمكن حتى رئيس الوزراء ما سلم كثر ما أنا سلمت اليوم..أماني وش بتسوين حلا اليوم؟؟
أماني: كيكة التوفي..
أمل ما تقدر تقاوم هذه الكيكة بالذات: اله..مو لازم غدا..ياالله بسرعة سويها علشان ناكل..
أماني: أمل وش فيك مفجوعة كذا ..صبري شوي..أخاف تاكليني بعد..الجوع بيعميك ما راح يخليك تميزين بيني وبين الكيكة..ههه
أمل: المهم ياالله بسرعة وأنا اتنظر في الصالة..
راحت أمل للصالة..ماجد وعايشة يتابعون الأخبار..مهند يقرا جريدة..فيصل مو موجود بالصالة..
أمل: أقول مهند..
مهند وهو ماسك الجريدة مندمج في القراءة: ام
أمل: وين فيصل ما أشوفه..؟؟
مهند: تلاقينه يطقطق على النت..حشى ما تتعب أصابعه من كثر ما يطقطق على هاللوح..
أمل: أول شي قول ما شاء الله على أخوي..ثاني شي ما يسمونه لوح يسمونه كيبورد..
مهند ما اهتم لكلامها وكمل قراية..
راحت أمل تشوف إذا فيصل فوق وإلا لأ..أمل تطق باب غرفة فيصل..
فيصل: تفضل..
أمل: هاي فيصل..
فيصل: وعليكم السلام..
أمل: يعني انت لازم تفشلني وتخليني ألقط وجهي من الأرض..
فيصل:ههه..من طقك على يدك وقال لك قولي..(يقلد صوتها)..هاي..أنا كم مرة أقول لك ما أحب هذه الكلمة..
أمل: المهم ما علينا..تبي تذوق كيكة أماني؟
فيصل: أي كيكة..؟؟
أمل: كيكة التوفي..
فيصل: بشوف إذا خلصت من اللي عندي بنزل..أما إذا نسيت نفسي على الكمبيوتر ونسيت سالفة الكيكة عاد كيفكم تسوون لي كيكة ثانية..
أمل بينها وبين نفسها: الله يعينك يا أماني..
فيصل: ايش؟؟..كأنك تقولين شي..؟؟
أمل: هاه؟؟..أنا؟؟..لأ..لأ ما قلت شي..يلا عن أذنك..
وراحت أمل تحت علشان تلحق على الكيكة قبل ما تروح عليها..يوم جات تنزل شافت الشعب متحمسين في أكل الكيكة..
أمل وهي نازلة من الدرج تركض: هيه لحظة انتظروني..خلولي قطعة وحدة على الأقل..
عايشة: يمه بسم الله..وش فيك كذا تصارخين؟..الحمدلله خير الله واجد..
أماني: أمل لا تخافين على رزقك..ترى فيه زيادة في المطبخ..
مهند وهو ياكل الكيك: هذه إذا ما كلت من الكيكة..حطي رجلك ولحقي على عمرك يا أماني..لأنها راح تاكلك إذا ما كلت شي..ههه
أمل تبي تفشل مهند: يع..الناس لما ياكلون ما يتكلمون..نص الكيكة نثرتها في وجهي..ههه
مهند خذ الجريدة اللي جنبه وقام يضرب فيها أمل..وأمل ميتة من الضحك لأنه تفشل وصار وجهه أحمر..
أمل: ههه. .لقط وجهك من الأرض..لقط..ههه
مهند هنا قام من مكانه وجلس على بطنها وهي منسدحة على الأرض ميتة من الضحك..وهو بس مزح معاها شي وبعدين قام عنها..
مهند: أصلاً لو الموضوع بيدي كان دست برجلي على بطنك وطلعت الأكل اللي فيه كله..بس بصراحة أع

النفس السادس عشر:
جا شهر رمضان وبعده عيد الفطر..الكل مستانس بالعيد وكاشخ آخر كشخة..طبعاً معروف كل عيد جمعة العايلة تكون في بيت ماجد..بس هالمرة أصر عبدالمحسن إن الجمعة تكون عنده..طبعاً طول رمضان لا ماجد ولا عبدالمحسن رضوا الشباب يكلمون حريمهم..وش السبب؟؟..ماندري؟؟..
عبدالمحسن: عيدك مبارك يا أخوي..
ماجد: الله يبارك فيك..عساك من عواده..إلا وين العيال؟؟
عبدالمحسن : وصيتهم يجيبون الغدا من المطعم..
ماجد: أنا ما قلت لا تكلف على نفسك يا أخوي..طبخ البيت أحسن من برى..
عبدالمحسن: لا يا أخوي..إنت ناسي إن هذا أول عيد تعيد عندنا ..
ماجد: الله يكرمك ويبيض وجهك..
فهد ومهند داخلين: السلام عليكم..
ماجد وعبدالمحسن: وعليكم السلام..
فهد: كل عام وأنت بخير ابوي..كل عام وانت بخير عمي وأبو حرمتي..
عبدالمحسن: وأنت بخير يا وليدي..
ماجد: ههه..وأنت بخير يا ولد أخوي ونسيبي..
مهند: كل عام وأنت بخير عمي..كل عام وأنت بخير أبوي..
عبدالمحسن: وأنت بخير يا الحبيب..
ماجد: وأنت بخير يا ولدي..
عبدالمحسن: هاه..وش صار على الغدا؟..عسى جبتوه مثل ما وصيتكم..
فهد: كل شي تمام يا أبوي ..مثل ما وصيتنا..
ماجد: وين نايف وفيصل..؟؟
فهد: واقفين برا في الشارع..
عبدالمحسن: فهد..كلمت ربعك علشان يجون يتغدون عندنا..
فهد: ايه يبه..هذا هم..جايين في الطريق..
عبدالمحسن: وفيصل كلم خوييه خالد؟
فهد: والله ما أدري عنه!..
مهند: إلا يا عمي كلمه وهو جاي في الطريق بعد..
عبدالمحسن : خير إن شاء الله..
إلا الشباب كلهم داخلين..
الشباب: السلام عليكم..
ماجد وعبدالمحسن وفهد ومهند: وعليكم السلام..
طبعاً كل واحد قام يسلم على كل اللي في المجلس ويبارك لهم بالعيد..جلسوا وجابوا القهوة والشاي وقاموا يتقهوون..
جهة الشباب مع نايف وفيصل..
عادل: نايف..ما فكّرت بالزواج؟
نايف: الله..العمدة يتكلم معاي..شي غير معقول..
الشباب:ههه
عادل:ههه..وش فيك؟..أنا إنسان طبيعي مو نازل من الفضاء..عادي كلمني مثل ما تكلم أي واحد..
نايف: والله يوم تروحون كشتة للبحر..خفت بصراحة أقدم على هذه الخطوة..شكلك المعصب وأنت تطالع مباراة..يمه يخرع..
عادل: ههه..المهم لا تصرف الموضوع..فكّرت في الزواج وإلا لأ..؟
نايف: بالله عليك وجهي وجه زواج..طبعاً لأ..
عادل: ليش طبعاً لأ؟
نايف: مسوؤلية وقلق وحوسة..ويا نايف جيب هذا ويا نايف حط هذا ..ويا نايف روح ويا نايف تعال..بس أجيب لنفسي عوار الراس..
عادل: ههه..يا حليلك..
طلال: وأنت يا فيصل..
فيصل: لأ..أنا بكمل الماجستير والدكتوراة..بعدين الزواج..ويمكن ما أتزوج بعد..
طلال: ليش عاد؟..مرة وحدة ما تبي تتزوج..
فيصل: ما أحس إن لي رغبة في الزواج..
حامد يلتفت على فهد: هاه يا الحبيب..إلى الحين ما رضوا تكلم الحرمة..
الشباب:ههه
فهد: انقلع..أصلاً بيرضون وغصبٍ عنهم..
مهند: ايه والله صح كلام فهد..
حامد: ايه صح..اثنينكم نفس الحالة..( يبي يتحداهم)..طيب أتحداكم الحين تروحون تقولون لهم..
فهد: ما عاش من يتحداني أنا وولد عمي..
مهند: صح لسانك يا ولد عمي..يلا خلنا نروح..
فهد: يلا..
طبعاً الكل التفت جهة الشيبان لأن فهد ومهند رايحين لهم..علشان يحاولون معاهم المحاولة الأخيرة..لأنهم حاولوا من قبل بس محاولاتهم بائت بالفشل..
******************
فهد: احم احم..يبه..
عبدالمحسن: هلا فهد..آمر
فهد: ما يآمر عليك عدو..بس حبيت أذكرك إن زواجنا ما بقى عليه إلا ثلاث شهور..وبصراحة نبغى نتعرف على حريمنا أنا و مهند أكثر..صحيح إنهم بنات عمامنا على عينا وعلى راسنا..بس خبرك إنت ما نحتك في بعض كثير..وأتذكر آخر مرة شفنا حريمنا يوم الملكة..
عبدالمحسن وعلامات الغضب على وجههه: الزبدة؟؟؟
فهد بلع ريقه وكمل: يبه..بصراحة نبي نكلم حريمنا بالتلفون..( فهد قام يطالع عمه بنظرة توسل)
عبدالمحسن قام يحك لحيته يفكر في الموضوع..
ماجد: ايه والله يا أبو فهد..أنا صحيح كنت رافض من الأول..بس الحين خلاص ما بقى على العرس إلا القليل..وهذا من مصلحتهم علشان يعرفون بعض أكثر ولا يتعرضون لمشاكل كثيرة في حياتهم..
عبدالمحسن يوم سمع كلام أخوه أقتنع: أجل خلاص..على بركة الله..بس هاه حدكم الساعة 1:00 بالليل وبعدين خلاص..البنات وراهم كلية..
فهد نقز من الفرحة وباس راس أبوه وعمه: مشكور يبه ..مشكور عمي..
ماجد: الله يسعدكم ويهنيكم ويوفقكم..
مهند ضم فهد من الفرحة..
حامد: الله..كل هذا الزواج يسويه..
الشباب: ههه
***********************
بعد إجازة العيد ..رجع الكل للدوامات وعوار الراس والقومة من الصبح..
أمل وهي تفرك عيونها: يمه بغيب اليوم..
عايشة: ليش يا بنيتي؟..ما فيك إلا العافية..
أمل: والله فيني النوم..متعودة على السهر..والكلية يبي لها واحد مصحصح..
عايشة: أقول..بلا دلع بنات..توكلي على الله وروحي للكلية..لا تفوتك محاظرات..
أماني: من عذر تبي تغيب..أمس سهرانة مع....................
أمل عصبت: أماني..أحسن لك أسكتي..
أماني: يمه بسم الله علي..انتبهي لا تطلع عيونك برا بعدين تطيح..
أمل:اف..يا الله صباح خير..
ماجد: خلاص يا عيال أفطروا وأنتوا ساكتين..
فيصل: يلا أنا أستأذن..يمه..يبه..تآمرون على شي..؟؟
ماجد: في حفظ الرحمن..
عايشة: روح الله يحفظك من كل شر..
فيصل: يلا مع السلامة..
أمل: فيصل على طريقك..قول لشوبير يشغل السيارة..علشان يوصلنا دواماتنا..
فيصل:طيب..
.......................
في السيارة:
أمل: آآآآآآآآآآآآآه..فيني النوم..
أماني: أحسن تستاهلين..طول الليل وأنا أقول لك..خلاص يا أمل..لاحقين على الكلام بكرة..خلاص يا أمل..ورانا دوام بكرة..خلاص يا أمل ..نامي علشان تشبعين نوم..وأنتي ولا هامك..هذرة وسوالف وغزل مع الأستاذ فهد..
أمل: أقول انقلعي..بنشوف بكرة وش بتسوين مع الأستاذ نايف..باليومين راح تكلمينه..حتى من كثر ما تكلمينه.. راح تلزقين الجوال على أذنك..
أماني: أصلاً أنا الحين مو فاظية أرد عليك..شوفي وصلت المدرسة وراح أفتك من هذرتك..
نزلت أماني من السيارة وسكرت الباب بقوة..
شوبير( السواق ): هيه..ايس فيه إنتَ..؟؟هدا سيارة بعدين فيه كربان..
أمل: وجع..أف ما بغيت أفتك من هذرتها..يلا شوبير روح كلية مال أنا..
شوبير: زين مدام..
أمل بصوت واطي: ماما في عينك قول آمين..أنا آنسة..
***************
في سكيكو...
فهد يتثاوب: آآآآآآآآآآآآآآآآآآآآآآآآآآه
مهند: وش فيك ما نمت أمس..
فهد: بالله عليك هذا سؤال تسأله..؟؟
مهند: ليش؟
فهد: مهند لا تصير ثور..كنت أكلم أمل أمس..
مهند يتثاوب: آآآآآآآآآآآآآآآآه..أنا نفس الحالة..
فهد: والله هي مسكينة كانت تقول خلاص يا فهد وراك دوام..بس أنا اللي أقول لها عادي..
مهند: ايه ..ترى أختي حرمة سنعة..
فهد: وش قصدك يعني ..سارة ماهي سنعة..
مهند: بصراحة ..سارة بنت أمها وأبوها..رهيبة..ويني عنها من زمان..؟؟
فهد: ما أدري عنك؟..أقول وش رايك تتغدون عندنا اليوم؟
مهند: والله فكرة..بس خلني أعطي أهلي خبر..(خذ سماعة التلفون واتصل على البيت)..الو
عايشة: هلا يمه..وشأخبارك؟
مهند: بخير يمه..أقول يمه..وش رايكم نتغدى اليوم في بيت عمي عبدالمحسن..؟
عايشة: على خير ..بس اتصل في أبوك وقول له..
مهند: إن شاء الله..مع السلامة..
عايشة: مع السلامة..
مهند التفت على فهد: خلاص..تمت الموافقة..
فهد: هيا..
مهند: وش فيك صرت كويتي..؟؟بعدين ليش كل هالفرحة؟
فهد: علشان بشوف أمل اليوم..
مهند: هاهاهاهاي..كثر منها ..قال بيشوف أمل قال..هذا إذا أبوي و أبوك رضوا..
فهد: لا لا تخاف ..أنا بكلم أبوي وبيرضى..
مهند: بنشوف..
*****************
في بيت عبدالمحسن:
ماجد: وش رايك يا عبدالمحسن نطلع للبر في العيد..عيد الأضحى معروف بجوّه الحلو..
عبدالمحسن: والله أنا ما عندي مانع..نرتب أمورنا ونتوكل على الله..
نايف: ايه والله وإنت الصادق عمي..خاطري أروح البر..من قبل الحادث..الله لا يعوده من يوم..
فيصل: ايه والله..
فهد يتكلم مع مهند بصوت واطي: يلا مهند وش فيك ما تكلمت..؟
مهند بمكر: أنا وش علي منك..مو إنت اللي قلت إنك بتكلم أبوي وعمي..؟؟
فهد: الله يخليك ..يلا بس هالمرة..
مهند: لأ..أنا بصراحة أخاف من عمي لما يعصب..
فهد: لا لا تخاف..صدقني مثل كل مرة..أبوي يعصب بس عمي ينقذ الموقف..
مهند: طيب خلاص بقول..بس إن تفشلت..يا ويلك..
فهد: طيب..بس إنت الحين روح..
مهند يقرّب من الشياب: احم احم احم..عمي..أبوي..ممكن أكلمكم شوي..
عبدالمحسن: تفضل يا ولدي..
مهند بلع ريقه: يبه عمي..أنا و فهد ودنا نشوف حريمنا لو عشر دقايق..اليوم..
عبدالمحسن عصب: وش هالكلام..العرس ما بقى عليه إلا شهر..لأ أنا مو موافق..ما عندنا رجال يشوفون حريمهم والعرس ما بقى عليه شي..
ماجد: ايه والله يا أخوي ..في هذه أنا معك..
مهند عصب على فهد..التفت عليه وقام يأشر على رقبته يعني يقول له ترى بخنقك..يعني فهد بيروح فيها..راح مهند لفهد وحط يده على رقبته وقام يخنقه..
فهد: كح كح كح..خلنا نتفاهم يا أبو الشباب..كح كح كح..
مهند: أنا أوريك يا حمار..فشلتني الله يفشلك..
فيصل: ههه
مهند: تضحك أنت ووجهك..يا الخكري..
فيصل: أنا الخكري؟..
نايف:ههه..في هذه صدق..
فيصل: بعد بعد..أنا أوريك ..
وصار المجلس ضرب ومضارب..هذا يضرب هذا..وهذا يحط ركبته في بطن هذا..يعني بالعربي حلبة مصارعة بس على مزح..والكل كان ميت من الضحك..بس الشياب ما عجبهم الوضع..
عبدالمحسن يصرخ: يا عيال..
الكل تخرع ورجع محله..
عبدالمحسن: كل واحد منكم دلخ وش كبره وتسوون حركات بزران..وأنتوا ( يأشر على مهند وفهد)..على بالي عقلتوا..قلت العرس بيعقلكم..أثر العرس خبلكم زيادة..
فيصل ونايف يضحكون..
عبدالمحسن : والكلام يشمل الكل..( يقصد فيصل ونايف)..فهد..قول لأمك تحط الغدا..
فهد: إن شاء الله..( يلتفت على الشباب) حسبي الله عليكم ..خربتوا مزاج الوالد..
الشباب:ههه
************************
النفس السابع عشر:
ثالث يوم العيد..قرروا العايلة يروحون للبر..توجهوا للنعيرية..وجهزوا الخيام قبل ما يجون للنعيرية بيوم..المخيم يتكون من ثلاث خيام..خيمة للرجال وخيمة للحريم وخيمة مطبخ والشغالات طبعاً..و الحمامات ( وانتوا بكرامة )..حمام للحريم وحمام للرجال..وصلوا للمخيم وحطوا العفش والأغراض في الخيام وجلسوا يرتاحون..بعد ما تغدوا وقيّلوا شوي راحوا البنات يتمشون..
أماني: الله..هوا يرد الروح..
أمل: إلا وين الشباب؟
سارة: إلا قولي وين فهد..
أمل ابتسمت: انقلعي..
أماني:تدرون شنو ودّي؟
سارة: شنو ودّك؟
أماني: ودّي أركض وأصرخ بأعلى صوتي..
أمل: أختي استجنت وقعدت..
نايف يمر من قدام البنات بالدباب يسوي نفسه بيصدمهم ( استهبال شباب)..
نايف يصرخ: وخروا..
البنات يصرخون: وا..
نايف:ههه
سارة: وبعدين يعني..إلى متى راح تكبر على هالسوالف..
نايف: لازم الواحد يرفه عن نفسه شوي..يرجع لأيام الطفولة شوي..يكبر شوي ..يصغر شوي..
سارة: ليه..بوكيمون..
البنات:ههه
نايف: مين يبي يركب..؟
سارة: اللي يبي ينتحر وبايع نفسه يركب مع نايف..
نايف: تتطنزين..أنا أوريك..
ويسرع نايف بالدباب ويلاحق سارة فيه..وهي مسكينة تركض وتهرب منه والبنات ميتين من الضحك عليها..
سارة وهي تركض: خلاص نايف..توبة..أنت سواق محترف بس وخر عن وجهي..
نايف: علشان ثاني مرة تعرفين تتكلمين مثل الناس والعالم..
وقعد يلاحق فيها تقريباً عشر دقايق..بس كانت بالنسبة لسارة عشر سنين..وتحاول تقرب من الخيام علشان تدخل في وحدة ..بس هو ما يخلي لها مجال تروح جهة الخيام..
في الجهة الثانية وعلى طعس صغير..مهند وفهد قاعدين يسولفون..فهد قاعد يلعب بالتراب ومهند يسولف..
مهند: أقول فهد وش كثر أنت متحمس للعرس؟
فهد: آآآآآآآآآآآآآآآه..أبيه اليوم قبل بكرة..
مهند: ليش؟
فهد: علشان أتطمن إن أمل خلاص صارت لي..
مهند: فهد أنت إلى الحين حاس بالخوف؟..ياخي خلاص البنت لك ومستحيل تصير لغيرك..
فهد: مهند إذا ربي كتب علي الموت قبل يوم الزواج..خلّ طلال ياخذها من بعدي..طلال إنسان فرفوش وطيب وقلبه كبير و........................
قاطعه مهند وهو معصب: فهد وش هالكلام؟..
فهد: أنا من جد أتكلم..ولا تخلي عادل ياخذها..هذا ثور وما يعرف شي ..وبيظل طول عمره ساكت ما يتكلم..آخاف يطفشها..
مهند:ههه..في هذه صدقت..بس لأ..إن شاء الله تتزوج ونفرح أكبر فرحة في حياتنا كلها..
وهم في وسط السوالف..فهد رفع راسه ..إلا يشوف نايف يتحرش في البنات..ويلاحق وحدة منهم ومطفشها في حياتها..مو مخلي لها فرصة تستريح..
فهد: مهند..ألحق ألحق..شوف هذا وش يسوي..!!
مهند: التفت..مو كأن هذه سارة اللي تركض...؟إلا هي..( عصب مهند..وقام من مكانه ووقف يصرخ) نايف..يا النذل..
فهد: هيه أنت وش دراك إن هذه سارة؟
مهند: يا ثور..خطيبتي و أعرفها..مسكينة يا عمري تعبت..
فهد: ههه...روح ألحق عليها قبل ما يخلص نفسها وتموت..
مهند: جعلك تموت إنت ولا هي..( وراح يركض جهة نايف علشان يهزئه)
من جهة البنات...
أمل: أماني..تكلمي قولي شي..صدقيني إذا تكلمتي راح يوقف..
أماني وهي ميتة من الضحك: لأ أنا أستحي..
أمل: حرام عليك البنت مو قادرة تتنفس من التعب..
أماني: شوفي هناك مهند جاي وهو معصب..يا ويلك يا نايف..
مهند: نايف..وقف يا حمار..
نايف: يمه..جاكم الإعصار ما شي يعيبه..(ويلف نايف عن طريق سارة..ويشرد)
مهند: أنا أوريك يا كلب..إن ما علقتك من رقبتك في وسط الخيمة ما أكون أنا مهند..(التفت على سارة اللي كانت قاعدة على الأرض وتلهث من التعب)..هاه سارة وشأخبارك!!
سارة مو قادرة تتكلم تأشر بصبعها الإبهام إنها تمام..جاته الضحكة على شكلها بس هو خلاها وراح علشان تاخذ راحتها..
مهند ركب دباب ثاني وراح يلحق نايف..ونايف من كثر ما لحق سارة خلص بنزين الدباب فوقف الدباب..يوم وقف الدباب نزل منه وراح يركض علشان يهرب من مهند..بس وين يهرب منه وهو يركض على رجوله وذاك يلحقه بدباب..
نايف: خلاص...آسف والله آآآآآآآآآآآآآآآآآآآآآسف..
مهند: علشان تعرف ثاني مرة تتحرش في مين..
نايف: ياخي أختي وكيفي..
مهند: وتطول لسانك يا قليل الأدب..
طبعاً مهند من القهر عليه نزل من الدباب وقام يركض ورى نايف يلاحقه إلا ما مسكه ورماه على الأرض وقام يعطيه من الكفوف والبكسات إلى ما قال بس..وآخر شي خذ تراب وقام يفركه في راسه..
نايف: لا..إلا شعري الحرير ما أقدر..شلون أغسله ألحين..
مهند: روح بقالة النعيرية ..يبيعون شامبو ضد التراب مو ضد القشرة..
نايف:ههه...تصدق يضحك شكلك وأنت معصب..
مهند هنا وصل حدّه: نايف..( وداس في بطنه)
نايف: آآآآآآآآآآآآآآآآآآآآآآآآه..
مهند: قول آسف..
نايف: آسف والله آسف..
مهند شاته برجله: انقلع ..اقلع الله روح إبليس..
وقام نايف المسكين اللي تقريباً تروش بالتراب بدال الماي..والبنات ميتين عليه من الضحك..أماني ميتة من الضحك بس في نفس الوقت عورها قلبها على نايف..لأنه أكيد تعور..لأن مهند إذا عصب ما يرحم..
في خيمة الرجال:
عبدالمحسن: بصراحة يا أخوي..صدقت يوم قلت خلنا نطلع للبر..نغير شوي من جو الشغل اللي يجيب الهم والمرض..
ماجد: ايه والله..إلا كأن اليوم فيه مباراة؟..بين مين ومين؟
عبدالمحسن: والله ما أدري؟..خلنا نشوف التلفزيون..
ماجد يمد بيالة الشاي لعبدالمحسن: تفضل..
عبدالمحسن: زاد فضلك..
ماجد: إلا وشأخبار أبو أحمد؟
عبدالمحسن: والله الحمدلله ماشي حاله..يفكر يزوج ولده يوم شاف عيالنا بيتزوجون..
ماجد: الولد أحسن شي له الزواج..يركده شوي عن الرجّة والحواطة في الشوارع بلا هدف..
عبدالمحسن: ايه والله ..
ماجد: أقول فيصل..
فيصل وهو مشغول باللاب توب: هلا يبه..
ماجد: الدور عليك..
فيصل تفاجأ: في ايش؟
ماجد: الزواج..
فيصل:ههه..يبه تو الناس علي..خلني أكمل دراستي وأشتغل..ذيك الساعة أفكر أتزوج وإلا لأ..
ماجد: فيها لأ ذي بعد..
فيصل يستهبل على أبوه: يمكن أفضل العنوسة على الزواج..
ماجد: عنّس الله أيامك قول آمين..بتتزوج يعني بتتزوج..وغصبٍ عن خشمك سامع؟!!
فيصل:ههه..إن شاء الله يبه..يفداك هالخشم وصاحبه ( يأشر على خشمه)..
فيصل من أول ما خلصوا صلاة العصر وهو يحوس في هاللاب توب..وجايب معاه زحمة أغراض..( استريو ، أسلاك ، بروجكتر ، سي ديات ، .......الخ)..يزعم بيسوي لهم مفاجأة..شنو؟ ما ندري..وهو يشتغل فكر إنه يكمل شغله برا الخيمة..خذ أغراضه وكمّل خرابيطه برا الخيمة..بعدين فكر إنه ياخذ استراحة شوي ويغير جو على الأهل..راح سيارته وفتح شنطة السيارة وطلع الكفر السبير والقلص..خذ طرف القلص الأول وربطه في سيارة أبوه الجيب..وخذ الطرف الثاني وربطه في الكفر..وخل الكفر على الأرض..
فيصل يصارخ: شباب..
فهد ونايف ومهند والبنات التفتوا عليه..
فيصل: تعالوا بقول لكم شي..
نزلوا من الطعس اللي كانوا عليه وراحوا عند فيصل..
فهد: نعم وش تبي؟..وش فيك تصارخ؟
فيصل: فهد مو وقت تحرش..أنا عندي فكرة جديدة..بتنهبلون عليها..
نايف: قول يا مخترع الديزل..
فيصل: ما عندي وقت أرد عليك..المهم أنا ربطت القلص في الكفر..أبي واحد منكم يركب فوق الكفر وأنا أشده بالسيارة..شرايكم؟..
نايف: والله وناسة..أنا أول واحد..
فيصل: يلا أركب..والباقي يركبون معاي السيارة..
ربكوا الربع السيارة..فهد وفيصل قدّام..وفي النص مهند وسارة وورا آخر شي أمل وأماني..التفت فهد ورا..انتبه إن مهند راكب جنب سارة ومستانس..
فهد: هيه إنت ..أنزل وأنا بركب ورا..
مهند: لأ..أنا عاجبني ورا..
فهد: مهند أحسن لك..يلا عاد..بلا لعب عيال..
مهند: قلت لك خلاص..أنا عاجبني..علشان أشوف شكل نايف من قرّب..( يلتفت على سارة ويبتسم)..
فهد يصارخ: مهند..
مهند: يمه بسم الله علي..وش فيك قمت تصارخ..
فهد نزل من السيارة وفتح الباب اللي ورا ونزّل مهند غصبٍ عنه وركب جنب سارة..مهند عصب وسارة ما عجبها الوضع..كان عاجبها الوضع أكثر مع مهند..مهند ركب السيارة وسكّر باب السيارة بقوة..
مهند: زين يا فهد..مردودة لك..
فهد:ههه..
فيصل: يلا شباب..مشينا..؟؟
الكل: مشينا..
بدا فيصل يسوق السيارة..وكان يسوي تمويه لنايف إنه ما راح يسرع..ونايف كان ماسك الكفر من فوق ..ومستانس..
نايف: أسرع وش فيك بطيء..
فيصل: يا غبي..بعدين تطير في السما..شلون نلقاك بعدين؟؟
نايف: معليش..إن شاء الله أرجع..ما عليك مني ..أدبر نفسي..
فيصل: قلت لك لأ..ماني مسرع..
نايف: قلت إلا..
فيصل: قلت لأ..
نايف: قلت إلا..
فيصل: قلت لأ..
نايف: قلت..آآآآآآآآآآآآآآآآآآآآآآآآآآآآآآآآآآآ..
*********فجأة سرع فيصل بدون ما يعطي نايف أي تنبيه..مسك نايف الكفر بقوة وقام فيصل يحوّس في نايف ويركبه فوق طعوس ومرره في وسط قشع(أعشاب في الصحرا بس كون طولها مرة طويل)..ونايف مسكين راح فيها..واللي في السيارة ميتين من الضحك..
نايف: فيصل..خلا اص. .آآآآآآآآآآآآآآآآآآآآآآآآي..خلا ا اص..
مهند يطلع راسه من الشبّاك ويكلم نايف: أحسن تستاهل..علشان ثاني مرة تعرف شلون تتحرش في خطيبتي..
الكل:ههه..
فيصل وهو يسوق جا صخر قداّم نايف..بس فيصل ما انتبه لها..
نايف: فيصل...انتبه خفف صخر قدامي..هيه..
فيصل: وش تقول؟
نايف: صخر..صخر..آآآآآآآآآآآآآآآآآآ
فيصل قام يضحك على نايف ووقف..رأف بحاله المسكين..نايف من التعب انسدح على الأرض وقام ياخذ نفس عميق..الكل نزل من السيارة وقام يضحك على شكل نايف..بس فيه وحدة مو راضية عن هذا كله..أماني..في قلبها حرّة وقهر..بس بعدين قالت هم مو قصدهم يأذونه ..قصدهم يلعبون..يلا خلهم يستانسون..كانت تتمنى تقول له انتبه على نفسك..وهي قاعدة تطالعه..انتبهت ليده إنه كان لابس خاتم..تذكرت الخاتم اللي في يدها ورفعت يدها وقعدت تطالع فيه وابتسمت..باست الخاتم والتفت عليه..ياعمري عليه..حتى هو لابس خاتم..أهم شي إنه مستانس وما صار له شي..الله يحفظك من كل شر..ولا يحرمني منك..
نايف:آآآآآآآآآآآآآآآآآآآآآآه..حرام عليك يا فيصل..وش سويت فيني..
فيصل:ههه..ترى مو بس إنت ..حتى مهند وفهد بيركبون غصبٍ عنهم..وبعدين أنا..صاحب الفكرة طبعاً..
نايف: ايه..على بالي بعد..
فيصل يأشر على الكفر: أستاذ فهد..تفضل..
أمل: فهد..ما عليك منه لا تركب..
فهد كان بيموت في محلّه..التفت عليها وابتسم: خايفة عليّ؟
أمل نزلت راسها: ايه..
مهند: يا عيني على الرومانسية يا شيخ..
فهد: أمل قالت ما أركب..
فيصل: تسمع كلام حريم..يلا خلصني تعال..
فهد: يا حمار..هذه مو حريم..هذه أمل..
فيصل: امل وإلا غير أمل..يلا عاد..لا تتهرب..
أمل: أنا ما علي منك..فهد إنت رجّال وغصبٍ عنه ..ماعليك منه لا تركب..
فهد مستانس: خلاص..ما راح أركب..
فيصل يغمز لنايف علشان يساعده..
فيصل: نايف ..تعال معاي..
فيصل ونايف راحوا لفهد وحطوا على الكفر..نايف مسك فهد علشان ما يهرب..وفيصل ركب السيارة بسرعة وحرّكها..
فهد:هيه...يا حمار..وقف..
الكل:ههه
أمل:فيصل..أنا أوريك شغلك يا النذل..
فهد: أمل...لحقي علي..
قامت أمل تتلفت يمين ويسار..شافت جنب الخيمة اللاب توب حق فيصل..جاتها فكرة جهنمية..
أمل تصارخ:فيصل..وقف وقف..بقول لك شي مهم..
فيصل: أدري تقصين علي..
أمل: لا والله ما أقص عليك..الأسلاك اللي في اللاب توب تطلع دخّان..ألحق عليه قبل ما يحترق..
فيصل تخرع: ايش؟..إلا اللاب توب..
وينزل فيصل من السيارة بسرعة ..ويركض لاب توب..وأمل وفهد يضحكون..طبعاً لما راح فيصل لاب توب ما لقى شي..عصب على أمل..
فيصل: أمل..أنا أوريك..( راح يركض لأمل)
أمل: فهد..شوفه..بيضربني..
راحت أمل ورا فهد ومسكت ظهره وهو مسك يدها..هنا فهد من جد حس إن أمل صارت له..له وبس..حس فهد بعصبية..فجأة صرخ..
فهد: فيصل..وقف أحسن لك..إن لمست شعرة من شعرها..ما أكون أنا فهد..
فيصل هنا وقف مكانه..حس إن فهد من جد معصب..وشاف أمل وراه وماسكة ثوبه..حلو شكلهم..والله لايقيين لبعض..الله يخليهم لبعض..ابتسم وراح الخيمة..
فهد: خلاص حبيبتي

غريبة
ما أعجبتكم القصة
والله ما عندكم ذوق

الله يعطيك العافية
القصة باين إنها حلوة ويكفي إنك نزلتيها كاملة
راح اقرأها بإذن الله وأرد بعد مااقرأها كاملة
ويعطيك العافية للمرة الثانية