تبين تعرفين شلون تكونين انثى مرحة يعشقك زوجك بجنون تعالي هنا

1. و تصرفي كأنك طفلة تبي عروسه عاجبتها

لا شك ان الانسجام التام و المؤازرة الدائمة هي سر السعادة الزوجية
عشان كذا الزوج يظل حاير و تايه لحد ما يلاقي المرأة اللي تأسره بحبها و حنانها
الرجل بطبعه يحب الزوجة اللي تحسسه انه ملك وهي مملكة
و عشان تكتمل انوثتك أمام زوجك كوني دائماً طفلته المدللة المرحة
يعني لا تملين و تكلين تقولين له كلام الحب
و الابتسامة ارسميها دايم على وجهك خليه لما تجين في مخيلته يتخيلك و ابتسامتك في وجهك
لا تكونين هادية معظم وقتك بالعكس كوني مبدعة و خلاقة
ولما تشوفين الملل بدا يتسلل في قعدتكم بلمحة سريعة و بدون مبرر رجي المكان بزعاقك
يعني مثلاً قاعدين بالصالة و ابو الشباب قاعد يقرا الجريدة و العيال بالغرفة يذاكرون و لو ما عندك عيال مو مشكلة
المهم حسيتي ان الجو هدوء و ملل قومي وابعدي الجريدة عن وجهه و قربي وجهك له و قولي له : قولي أحبك
شي طبيعي بيرجع الجريدة مكانها و بيقولك أقول اهجدي بس
ارجعي قولي له أقولك قولي أحبك
شي طبيعي بيقول: الحمدلله و الشكر على العقل طيب أحبك
قولي ما أسمع قولي احبك بصوت عالي
بيقول اقول ضفي وجهك
حطي اصبعك بأذنك و قولي بأعلى صوتك ماني ساكته لين تقولي احبك بصوت عالي و ارفعي صوتك
لين تخلينه يقولك احبك بصوت عالي
بعدين طالعي فيه ببرود قولي سلامات حبيبي وش فيك قصر صوتك لا يسمعون الجيران وش قالولك عن ما أسمع....؟
و اضحكي بدلع و اغمزي له و انتي تتكلمين
اهم شي يكون توقيتك صح يعني مو و الرجال ضايقة به الدنيا تسوينها لا لين شفتي الوضع هادي وهو مروق بس مافي شي لا مانع انك تسوين هالحركات
دلعيه دايم لا تنادينه باسمه ابداً اذا ما قلتي حبيبي قولي ( حمودي - صلوحي - سعودي -عزوزي ........)
حتى و انتي تكلمينه في موضوع جدي ناديه بالاسامي لأن لا امه ولا ابوه يقدر يناديه بهالاسم
خلي الدلع خاص بك انتِ وبس
لما يرن جرس المنبه الصبح و تشوفينه حط على الغفوة
قومي و غسلي وجهك و فرشي اسنانك
وارجع الغرفة و ضمي زوجك من ورى و قولي صباح الخير يا أطعم و أحلى ( اسم الدلع ) بالدنيا
بيقولك ابي انام انتي لا تردين بس عطيه من هالبوسات بالعربي نكدي عليه النومة بس برومانسية..
وبعدين قولي بأجهزلك الكافي عشان تصحصح...
ولو الكافي جهز وهو ما بعد قام عاد كملي الشوط الثاني بس شلون اهمسي في اذنه
( اسم الدلع ) بتقوم ولا لا...و اذا طنش قومي ولفي منديل و العبي فيه برقبته من ورى هالحركة ابد مهي مزعجة بالعكس لذيذة وراح تصحيه
وقبل ما يطلع سلمي عليه و عطيه بوسة طبعاً هالشي مو دايم بس ايام و ايام لانك لو عودتي رجلك عليها راح تصير من الروتين و ما يحس بلذتها
نجي للسوق لما تكونون سوى و تشوفين مثلاً بلوزة هي عادية بس عجبتك و تبينها قولي ( اسم الدلع ) ابيها اذا قال لا قولي تكفى تكفى

و تصرفي كأنك طفلة تبي عروسه عاجبتها

ولما يشتريها ولابد بيعلق على تصرفك و يقول الحمد لله كأنك بزر قولي عادي حبيبي أهم شي ( اسم الدلع ) ما خلها بخاطري و جابها لي....
أحياناً خليك في البيت لابسه بجامة بناتية أو بجامة ألوانها زاهية و ألبيس الشورت و التشيرت بألوان زاهية كبجامة نوم و خلي شعرك بتسريحه بناتيه مثلا ارفعي شعرك ذيل حصان عالي و خلي الخصل نازلة من آخر جوانب جبهتك فوق أذنك إلى تحتها و حطي في جسمك بودرة بيبي جونسن حسسية انك طفلة ....
ادخلي عليه مرة و في فمك مصاصة و اذا شفتيه يضحك عليك قولي خير غاير ولا تبي مثلها
خلاص اذا طلعت العلكة اللي جوا عطيتك أياها...
او إذا شفتيه داخل و في فمه علكه مثلاً او في يده شوكولا ولا عصير
اشهقي ببراءة و قول هههي أبي
بيقول: ما معي غيره ناظريه بنظرة كلها مكر و قولي
هع هع هع هع هع أنا أبيه هو
بيقولك عقبي
قولي يا حلوة اصلاً ما بغيته إلا عشانه عقبك
صدقيني هالأشياء تحسس الرجل انكم واحد...
لما تكونون في المطعم وجالسين تاكلون قول ( اسم الدلع ) ممكن تعطيني لقمة بيدك
أكيد بيعطيك قولي الله روعة الذ لقمة ذقتها بحياتي
بيقولك طيب انتي عطيني بيدك : ردي عليه و قولي والله وانا وش اكل به...
كع كع كع كع كع بعدين أكيد عطيه
لما يمدح لبسك و انتي طالعة لمسيار ولا قاعدة بالبيت حركي رموشك بسرعة و قولي حبيبي ما جبت شي جديد
خليه يدخل احياناً وهو يشوفك تلعبين بلاي ستيشن و منفعله مع اللعبه و ان حصل بعض السبات الخفيفة مافي مانع.. طبعاً للعبة..
ولما تشوفينه داخل عليك قولي ( اسم الدلع ) شفهم كل شوي يفوزون علي..
بيقولك احسن قولي شكراً هذا من طيبك بس بألعب لين أفوز و كملي لعب..
لما يقهرك بشي لا تترددين اضربيه بس ضرب بدلع .. مو تجيبين العيد
و قولي خلاص ماراح اكلمك أصلاً زعلت
بيقولك ابرك اضربي براسك الجدار اقعدي صيحي بصوت عالي
لين يقول خلاص آسف قولي ما أرضى إلا ببوسة
بيبوسك و قولي و ضمة و أكيد بيضمك قولي طيب تعال بأقولك سر بالغرفة و هناك تفاهموا على أقل من راحتكم
طبعاً كل هذا في بيتكم و في غرفة نومكم بس لما تكونون في زيارة عند أهله انظري له بنظرة احترام و هيبه
و اذا ناداك ردي عليه ب ( سم ) و لبيه تراها ترفع المعنويات بشكل مهو طبيعي للرجل السعودي
حسسيه انك ما تقدرين تفارقينه ولا لحظة و انه الهوى لحياتك
بس بعد حسسيه في لحظات انك قادرة تنسينه بثانية
كوني هادية ببعض الاحيان و مجنونة في احيان اخرى
حتى ما ياخذ عنك فكرة انك تافهة ولا ياخذ عنك فكرة انك ممله
وثقيلة ورسمية في القعدة
كوني رزينة و صارمة وقت الشدائد و ممتعة و متجددة وقت المرح
اتمنى اني اكون افدتكم بهالموضوع
و اللي عندها اي اضافة ياليت تدرجها في الموضوع عشان الكل يستفيد منها....