تبين تعرفين ليش الى الان ماتزوجتي

1. طيب ياحبيباتي دام انكم بسم الله عليكم وش حلاتكم


2. ووش طيبكم بقولكم ليش ماتزوجتوا الى الحين

السلام عليكم ورحمة الله وبركاته
كيفكم بنات شخباركم ؟؟
ان شاء الله كل وحده تدخل ياربي تكون حياتها من احلى الى احلى ومن تقدم الى تقدم يارب
وكل اوقاتها توفيق في توفيق
انا بصراحه شفت اكثر مواضيع البنات عنوسه ومدري ايش
اولا بقولكم شي ترى كلمة عانس تطلق على الرجل لايلعبون عليكم ويلزقونها فيكم
بعد وبعد معاد بقى الا هم يلزقون فينا
المهم تراي بأتفلسف من زمان ماكتبت وبطلع حرتي بذا الموضوع خل اوسع صديرااتكم يأحلى شي بالوجود انتم وه كم اني احووبكم ايتها الفتيات هاكم ذا الورده
<< شعندها جدتكم
قسم ماتهونون علي اشوفكم ضايقتن صدوركم وانا اتفرج عليكم خل نفرح ونستانس الدنيا فانيه ترى
اجل معاد بقى الا ذا الدفووش يصيحونكم وينزلون دميعاتكم اي والله اللي هزلت
المهم قبل اقولكم ليش انتم ماتزوجتوا الى الحين وادخل بصلب الموضوع
ابي اخذ تعهد على كل وحده << الله يكفينا الشر من اولها تعهدات
جد اتكلم مابي اسمع ولا وحده فيكم تقول انا عاانس لو ان شاء الله عمرها مليون خير ياطير فهمتوا لا احد يطريها لي ذا الكلمه

طيب ياحبيباتي دام انكم بسم الله عليكم وش حلاتكم

ووش طيبكم بقولكم ليش ماتزوجتوا الى الحين

بكل بسااطه يا حلوين لانه مابعد جاء نصيبكم فتأكدوا انكم ماراح تطلعون من الدنيا الا وانتم ماخذين كل ماكتبه الله لكم من الرزق ولو رزقك في يدين الناس قسم ماتشميينه لو شمه اللهم لا حسد بس الحمدلله ان الارزاق بيدين الله
في معنى الحديث
"اعلم ان ماأصابك لم يكن ليخطئك وان ماأخطئك لم يكن ليصيبك"
المهم بس بقولكم ذا السالفه تقولي مامتو الله يخليها لنا ياربي
وحده اعرفها تسولف علي
وقالت ابشرك ولدي زوجته قالت من زوجتيه قالت وحدتن مانعرفها والله
اصلا ماتصدقين والله شلون عرفناها
قالت مامتو شلون ؟
قالت مره ابي ادق على اختي بالشرقيه واثري غلطت بالرقم ودقيت على رقم ثاني المهم وردت علي حرمه وقمت اسلم عليها واسأل عن احاولها وكيذا بعدين انتبه ان الصوت موب صوت اختي
قلت انتي فلانه قالت لا والله انتي غلطانه
تقول قلت والله عجبتني سوالفك واخلاقك انتي مين ومن وين وكيذا
<<< دقت علاقه ام الشباب
عاد تعرفون الحريم وسوالفهم المهم تقول صرنا نكلم بعض وسألتني كم عيالك وكيذا
تقول قلت لها والله الحمدلله كلهم زوجتهم مابقى الا واحد يبي له وحدتن مديّنه وعجزنا نلقى له
قالت الحرمه والله عندي بنت وهي مدينه وكيذا وكيذا
المهم وقدر الله وصار ولد ذا الحرمه من نصيب ذا البنت اللي في الشرقيه
وهي ماتعرفهم ولا عمرهم شافوها ولاشي
ولا حتى فكرة مجرد تفكير فيهم
فلذلك لييش الحزن وضيقة الصدر وسعي صدرك ونصيبك بيجيك لحد بيتكم
فيه احلى من هيك
َََََ عاد شسموه بنات برب بروح اتعشى واكمل على الموضوع َََََ
حيخلصوه <<< شخباري يافيمتو
ََََ باك ََََ <<< ياسرعي ماابطيت ابد
ايه خلو اكمل لكم السوالف بس
يقول ابوي مرتن واحد بنشرت سيارته قدام بيت
المهم يوم طلع راعي البيت ويلقى ذا الرجال يهندس في الكفرات وكيذا
قام ساعده ويوم صلحوا السياره حلف عليه راعي البيت ان يدخل يتقهوى معه
المهم بعد ذا القهوه تعرفوا على بعض و تطورت العلاقات وصاروا اصدقاء
وجاء يوم من الايام ويجيهم ذا اللي بنشرت سيارته يخطب بنتهم ووافقت واعرسوا
وسبب التعارف وشو بنشر السياره سبحان الله رزق البنت
<<< عاد قولوا لاهلكم تميلحوا عند الناس وساعدوهم
يعني الحين كلنا متفقين ان الزواج قسمه ونصيب ورزق مكتوب
ليش العجله عاد
بهذا انا خلصت كلامي اللي له صله للموضوع وفي الاخير فيه دعاء يعني اللي تحس اني طولت عليه تنزل للدعاء وتدعي واسأل الله ان يجيب
بس عاد باقي شي يقرقع بخاطري
بنات ودي اقولكم سرر وهوايه عندي بس مابي احد ينط في عيني
ودي احش الحين في ذولاء الدفوش قسم انهم محومين كبدي
بس سبحان الله اللهم لا اعتراض مصيرنا نجتمع ههه <<< خربت الموجه
اجل الحمدلله والشكر اللي مايستحون عاادي عندهم يطلعون في الشارع بفنيله وصروال
ولا ياليتهم اذا صاروا بذا الشكل الخنفشاري <<< توها حافظه الكلمه
قصدي الشكل البشع ذا ليت الواحد يصير منكسر ومتفشل ومستحي
لا والله الا قوي عين زودن على شينه وخلاقينه
قسم انها تحوم كبدي لاشفت واحدن بفنيلته وصرواله وكيذا ودي اني معي خزيرانه والشط فيه لين يتوب ويحرم ويع وينا عايشين
اعنبوك استح طالعن بالشارع بفنيله وصروال وتحط عينك بعيون الناس
يالله انا ماادري ذولي وش يحسون به يعني الواحد يصير واثق بزود وكأنه ماسوى شي
ولا بعد من زين الزين يعني اذا شاف احد من ربعه مر من حارتهم يسلم عليه
قسم اللي مثلك يتغطى ابرك له ويسوي نفسه ماشافهم
بعد عيب وعليه شهود قلنا يمكن مضطر مستعجل قام يسلم على خلق الله
وكلذا كوم واذا قام يتميلح كوم ثاني يعني اذا في الصبح مرينا البنات وجت البنت بتركب
يطل اخوها بفنيلته وصرواله ماغسل وجهه ولاش مورم وكشته طايره ومنتوفه عاد الحين الله يحوم كبدوهم طايحين في تطويل الشعر حتى لوه خشن
يع قررف كيذا احس خياسهم يعايط اذا طلوا في الصبح ودي اقول رح فرش اسنانك ويع
ويطق ذيك الابتساامه يعنني تراي اخوها
رح الله يحووم كبدك جاين ترزز وتفشل الضعيفه اخيتك يالله صباح خير
عاد ياعمري اخته لا ركبت متفشله من اخوها بس ماتدري شلون ترقع الموقف
تضطر تسوي عمرها داايخه وتسحب على البنات ليين ينسون الصوره الحلوه
عاد اول ماترفع راسها يعني هي توقعت ان البنات نسوا اخوها ذا
يقولون لها البنات اللي تو طل من عند بابكم ابو فنيله وصروال هذا اخوك ههه ههه
ترد البنت تقول ماانتبهت بصراحه وودها تفلق ذا اللي تسأل
ومع شينهم ذا كله وخياس اخلاقهم وريحتهم المصرعه يقولون بصراحه المهور غاليه
ياخي قسم يحق لنا نرفع المهور بدل ضغط وبدل اخلاق وبدل ريحه وخياس وتتعبون وانتم تعدون البدلات
والبنيات ياعمري الوحده نعوومه وذووق وكشخه وحظها اخيس من وجه ذا ابو فنيله وصروال
يعني قسم بالله انا اذا فكرت انقهر ليش نستعجل على العرس ونهتم منه وحنا الحمدلله حالنا احسن مليون مره من احوال غيرنا
يعني الحمدلله عند اهلك نايمه وماكله وشاربه ودلع واذا قالت امك رتبي الصاله ضاق صدرك
يعني اكبر هموومك شي سهل
واصلا مايطلق عليه هم بس من زود الدلع سميناه هم
الحمدلله ماوراكم شي مثل المتزوجه اذا جت من الدوام لازم تطبخ ولا يطنقر الدفش اللي عندها ويقعد يلعن ويسب ومايبقى ولا باب الا شاته ورجفه
تنومين بكييفك ماعندك احد يزعجك ويخيسك اذا صار مايشاخر قام يتحلم ويشوت
والله البلشه داخلين رعب حنا
ولا تقعدين تحترينه واعصاابك تعباانه لايصير فيه شي وتدقين مايرد واذا جت 2 ونص شرف
وقال يوه مانمتي تقولين ورى ماترد يقول والله الشباب ازعااج وماسمعت
جعلك الصقه عشان نعذرك << استغفر الله استغفرالله رحمته
وحدتن من صديقاتي رجلها تأخر وتدق وجواله مغلق يوم جاء البيت اول ماشافها قام يضحك يحسبنها يعني مقطعها الشوق عليه مادرى ان البنت مرتااعه تحسبه صاير له شي
بس شنقول دفوش
المهم اني شكلي الله يقطع بليسهم بوزع حسناتي من زينهم
سبحانك اللهم وبحمدك اشهد ان لااله الا انت استغفر واتوب اليك
<< عشان ماياخذون ولا حسيينه وحده
في ختام هذا الموضوع ادري اني طولت عليكم بس قايله لكم مبطيه مااكتبت وبأفلها واخذ راحتي
يلا بنات اني داعيه فأمنوا
اللهم ياحي ياقيوم ياودوود ياودوود ياودوود ياذا العرش المجيد يا فعال لما تريد
اسألك بعلمك الذي لايرام وملكك الذي لايضام وبنورك اللذي ملأ اركان عرشك
أن ترزق كل من ارادت الزواج بالزوج الصالح الودود الطيب اللي مايحدر ولا يتسدر
ويخاف الله فيها ويحبها ويموت فيها ويدلعها ويعوضها كل سنينها
ياربي ياكريم ان تفرج همومهن وتحقق امانيهن عاجلا غير اجل
اللهم يسر امور زواجهم ياقاادر ياكريم وعجل بها ياعالم بأحوالهن
الله عوض من فقدت زوجها بموتن او طلاق بأفضل وأخير منه
اللهم ياحي ياقيوم فرج هموهم ووسع صدورهم واهدهنا واهدهم
واختم لنا ولهم بالاعمال الصالحه اللهم آمين
اللهم صلي على محمد وعلى آله وسلم كما صليت على إبراهيم وعلى آله
لا إله الا انت سبحانك إنا كنا من الظالمين
يامغيث اغثنا يامغيث اغثنا يامغيث اغثنا
ولا أوصيكم يابنات المداومه على الاستغفار لها مفعولها في كل شي
سواء زواج او غيره عن تجربه والله
احبتي اطلت عليكم ولكني والله اعلم احزنتني مواقفكم ومواضعيكم فاريد رسم البسمه على شفاهكم
فتحملوا ماجاكم
تقبلوني بصدرن رحب
محبتكم واختكم الكبيره وامكم وجدتكم وبنتكم الصغيره
سوسو