تجربتى الشخصيه مع سورة البقره

1. # # # تنبيه هام جدا # # #


2. # # # ودى شوية معلومات عن فضل سورة البقره يا أحلى فتاكيت # # #


3. 1- أنها بركة ولا تستطيع الشياطين البقاء في مكان تقرأ فيه :


4. 2- أن فيها أعظم آية في القرآن وهي آية الكرسي :


5. وآية الكرسي سبب للحفظ من الشيطان لمن قرأها :


6. متفق عليه .


7. 4- أن اسم الله الأعظم في سورة البقرة :

انهرده يا أحلى فتاكيت هاحكلكم حكايتى العجيبه مع ( سورة البقره )
وكانت بدايتها تقريبا من حوالى 5 أو 6 سنين
وأقسم بالله إن كل اللى هاقوله ليكم حصل معايا وسبحان الله
فى يوم من الأيام كنت قاعده باقرى فى مجلة ( زهرة الخليج ) والمجله دى بحبها جدا وهيه نمره واحد عندى وفضلها كبير عليا قوى وطبعا ده بعد فضل الله تعالى
لقيت موضوع عن لقاء مع ساحر بس الساحر ده تاب عن اللى كان بيعمله وبقى معالج بالقرآن الكريم والرقيه الشرعيه وكان بيتكلم عن اساليب السحره
وقال إن الشئ الوحيد اللى يمنع أى ساحر إنه يأذى أى شخص هوه ( سورة البقره )
طبعا مع المحافظه على الأذكار
وحكى قصة واحد جه ليه بيعانى من عدم توفيق فى حياته وخاصة فى شغله وكل لما يعمل مشروع يفشل فنصحه بقراءة سورة البقره لمدة 21 يوم كامله
وفعلا الشخص ده عمل بالنصيحه وقرأ سورة البقره وفى اليوم ال21 بعد ما خلص قراءتها ونام
حلم إن فيه جن وعفاريت وحيوانات من كل نوع ( أسود - كلاب - قطط - حشرات - تعابين ) وغيرها
موجودين فى البيت ولقاهم بيكلموا بعض وبيقولوا إنهم خلاص هايسيبوا البيت ده لأنهم مش قادرين يقعدوا فيه عشان صاحب البيت بيقرى سورة البقره
وفعلا شافهم طالعين من باب البيت
فراح للساحر اللى اصبح معالج وراقى وحكى له الحلم فقال ليه الحمد الله كده الأذى اللى كان موجود فيك وفى بيتك خلاص أصبح ليس وجود وتم شفاءك بفضل الله وبفضل سورة البقره
وفعلا بعدها الشخص ده احواله إتحسنت جدا وربنا وفقه فى حياته وخاصة فى شغله وفى مشارعيه
ففى الفتره دى كنت حاسه إنى محسوده فقلت لما اقرى أنا كمان سورة البقره لمدة 21 يوم
وفعلا بدأت قرايتها وكنت بقرآها مره واحده يوميا فى جلسه واحده والوقت اللى كنت بقرآها فيه كان فى الغالب بيكون بعد العصر وقبل المغرب
والحمد الله ربنا قدرنى وقدرت أكمل ال21 يوم
وفى آخر يوم بعد ما قرتها كنت مستنيه أنام بالليل عشان أشوف حلم وأعرف إذا كان هايحصل معايا زى ما حصل مع الراجل ولا لئه ولا هاشوف حاجه تانيه
وكانت المفاجأه وغير متوقعه خالص
ههه
تفتكروا إيه اللى حصل يا احلى فتاكيت ؟؟؟؟؟؟؟؟؟؟
كنت فى الوقت ده قاعده فى الأوضه ولقيت جرس الباب بيرن ( ترن - ترن - ترن )
فماما او حد من اخواتى راح فتح الباب وطلعت مين يا ترى ؟؟؟
طلعت جارتنا فى الشقه اللى جنبنا على طول ودى بقى صاحبتى قوى وبتحبنى قوى
لقيت ماما جيه بتقولى فلانه ( جارتى وصاحبتى ) عيزاكى فقلت ليها مش عارفه هيه عيزانى فى إيه أنا كنت فاكره إنها عيزانى أروح اقعد معاها شويه
فماما قالتلى مش راضيه تقول عملاها مفاجأه
ههه
المهم طلعت لقتها واقفه على الباب وبتقولى أنا جيبالك ( عريس )
ههه
طبعا فرحت وقلت ليها طيب ادخلى ونتكلم فى الموضوع على راحتنا وتقوليلى التفاصيل
عارفين قالتلى إيه لا مش هاينفع إنتى تدخلى حالا تلبسى عشان العريس معايا وموجود فى الشقه عندى
واحنا شقتنا وشقتها جنب بعض على طول بينا وبينها حيطه
راحت أختكم عملت كده من هول المفاجأه
ههه
عشان دى كانت أول مره يحصل فيها الموضوع ده
لأن أى عريس كان بيتقدم إما بيتصلوا بالتليفون أو يبعتوا حد يكلمنا ويحددوا ميعاد للمقابله قبل ما يجوا يشرفونا
المهم اختكم دخلت لبست اللى على الحبل ههه
والعريس شرف بعد حوالى ربع أو نص ساعه
بس مش حصل نصيب يا فتاكيت
المهم فى الموضوع إنى كنت قاعده مستنيه إنى أنام عشان اشوف حلم تخليوا بفضل سورة البقره والقرآن الكريم
نزل عليا عريس من حيث لا أدرى وفى اليوم ال21 من بداية قراءتى لسورة البقره
بقيت طبعا بعد كده أواظب عليها واقرآها لمدة 21 يوم
وكل مره بفضل الله لازم عريس يتقدملى ويجى البيت أو حد يكلمنى بره البيت سبحان الله
وعلى فكره مش كان لازم ال21 يوم يخلصوا ده حتى اثناء القرايه كان فيه عرسان بيتقدموا ليا يا فتاكيت
وفضلت على كده فتره طويله
وفى يوم وأنا قاعده بتفرج على ( قناة الناس ) وكان فيها الشيخ ( سالم أبو الفتوح ) ربنا يباركله ويجازيه كل خير ويجعله من السعداء فى الدنيا وفى الآخره
يارب آمين
وكنت باحب أتابع البرنامج بتاعه وأسلوبه فى الحوار
لقيته بيقول ( الآنسه اللى متأخره فى الجواز ) تقرى سورة البقره مره واحده يوميا لمدة 6 شهور كامله
فقلت فى نفسى هو انا لازم أكون متأخره فى الجواز عشان أعمل كده
خت بعضى وطلعت البلكونه وقفلت على نفسى الباب وقرتها وخلصتها بفضل الله
على فكره قريبتى دى كانت قرت سورة البقره وفى اليوم الخامس من بداية قرايتها إتصلت واحده من قرايب جوزها او والدته بوالدتها وطلبت إنها تخطبها لإبنها
والحمد الله تم الجواز على خير
أكمل ليكم بقى إيه اللى حصل بعد 6 شهور
بعد حوالى شهر أو أقل من شهر إتقدملى جوزى وتمت الخطوبه والجواز على خير فى حوالى 3 شهور
ولله الحمد وطبعا كل شئ بأمر الله وقدره وبفضله سبحانه وتعالى
وعلى فكره لما كنت بقرآها كان الخير بيعم على كل البيت وحتى على أخواتى
فى مره كنا نايمين والساعه كانت حوالى 8 الصبح
لقينا خبط جامد على الباب فاستغربنا مين اللى جاى فى الوقت ده وبيخبط كمان بالطريقه دى
تخيلوا لقينا مين واحد جارنا جاى وجايب عريس لأختى بس مش كان معاه العريس المره دى كان معاه أبو العريس
ههه
والله العظيم هذا حصل وطبعا دخل وإتكلم عن إبنه وعن شغله ومميزاته وعن طلباته فى العروسه
وأعتذر عن إنه جاى فى الوقت ده بس قال إنه كان بيكلم جارنا على عروسه لأبنه فقال ليه عندى طلبك وخده من إيده وجابه عندنا
بس مش حصل نصيب يا فتاكيت
وطبعا من ساعة اللى حصل معايا من اول مره ( 21 ) يوم وانا قلت لكل أصحابى وجيرانى على سورة البقره
والحمد الله كل واحده فيهم دلوقتى متجوزه وفى بيتها حتى اللى كان سنهم كبير ربنا كرمهم بجوازات زى الفل
وربنا يهنيهم ويسعدهم ويبارك فى حياتهم جميعا
يارب آمين
ولله الحمد ولله الفضل
اللهم لك الحمد ولك الشكر كما ينبغى لجلال وجهك وعظيم سلطانك
وفيه كمان واحده قريبتى كان باباها بخيل مع إن حالته الماديه كويسه جدا
بقت تقرى سورة البقره هيه ومامتها وبتحلف ليا إن كل اللى كانوا عايزينه باباها جابه ليهم واكتر كمان
وحياتهم إتغيرت 360 درجه وبقت تمام
وبتقولى لما نبقى عايزين حاجه من بابا بنقعد انا وماما نقرى سورة البقره قبل ما نطلب منه والحمد الله بيوافق على طول
وفعلا هموا دلوقتى فى مستوى تانى خالص غير اللى كانوا فيه ربنا يباركلهم يارب آمين
شفتوا قد إيه فضل سورة البقره والقرآن الكريم ليس قبله ولا بعده أى شئ
ارجو من كل فتوكه إنها تقرى ( سورة البقره ) مره واحده يوميا لمدة ( 6 شهور ) بدون توقف حتى لو كان عندك العذر الشرعى إقريها من على الكمبيوتر أو البسى جوانتى واقريها من المصحف
ففضلها عظيم ولا يستطيع احد أن يحصر بركات سورة البقره
فقد قال رسولنا الكريم صلى الله عليه وسلم :
( إقرؤا البقره فإن فى اخذها بركه وفى تركها حسره ولا تستطيعها البطله ) بمعنى السحره
وأمانه على كل فتوكه هاتقرى سورة البقره تيجى تقولنا إيه اللى حصل معاها وتحكى تجربتها عشان الكل يستفيد إن شاء الله

# # # تنبيه هام جدا # # #

مش هاسامح أى واحده تنقل الموضوع ده لأى منتدى تانى من غير ما تقول إسم صاحبة الموضوع ( فسدقه ) وان الموضوع منقول من ( منتدى فتكات ) وكمان هادعى عليها بعدم التوفيق فى حياتها لأنى أمنتها أمانه وهيه خانت الأمانه
ولأن تجربتى دى انا كتباها حصريا لمنتدى فتكات فقط
أحلى وأروع وأجمل وأغلى منتدى
وربنا يرزق كل فتوكه وكل مسلمه وخصوصا المتأخره فى الزواج بالزوج الصالح الطيب اللى يعزها ويقدرها ويكرمها ويسعدها ويجعل بينها وبينه الموده والسكن والرحمه عاجلا غير آجلا
يارب آمين
وأرجو منكم الدعاء لى بالذريه الصالحه الطيبه وإنه يجعل بينى وبين جوزى الموده والسكن والرحمه
وجزاكم الله كل خير
ومش تنسوا التقيم وإلا إنتوا هاتبقوا المسؤولين عن اللى هايحصل وذنبكم على جنبكم
ههه

# # # ودى شوية معلومات عن فضل سورة البقره يا أحلى فتاكيت # # #

1- أنها بركة ولا تستطيع الشياطين البقاء في مكان تقرأ فيه :

عن أبي أمامة قال : سمعت رسول الله صلى الله عليه وسلم يقول : " اقرءوا القرآن فإنه يأتي يوم القيامة شفيعا لأصحابه اقرءوا الزهراوين البقرة وسورة آل عمران فإنهما تأتيان يوم القيامة كأنهما غمامتان أو كأنهما غيايتان أو فرقان من طير صواف تحاجان عن أصحابهما اقرءوا سورة البقرة فإن أخذها بركة وتركها حسرة ولا تستطيعها البطلة " . رواه مسلم .
عن أبي هريرة رضي الله عنه قال : قال رسول الله صلى الله عليه وسلم : " لا تجعلوا بيوتكم مقابر إن الشيطان ينفر من البيت الذي يقرأ فيه سورة البقرة " . رواه مسلم

2- أن فيها أعظم آية في القرآن وهي آية الكرسي :

عن أبي بن كعب قال : قال رسول الله صلى الله عليه وسلم : " يا أبا المنذر أتدري أي آية من كتاب الله معك أعظم ؟ " . قال : قلت الله ورسوله أعلم قال : " يا أبا المنذر أتدري أي آية من كتاب الله معك أعظم ؟ " . قال : قلت ( الله لا إله إلا هو الحي القيوم )
قال فضرب في صدري وقال : " والله ليهنك العلم أبا المنذر " . رواه مسلم .

وآية الكرسي سبب للحفظ من الشيطان لمن قرأها :

عن أبي هريرة رضي الله عنه قال : وكلني رسول الله صلى الله عليه وسلم بحفظ زكاة رمضان فأتاني آت فجعل يحثو من الطعام فأخذته فقلت لأرفعنك إلى رسول الله صلى الله عليه وسلم قال إني محتاج وعلي دين وعيال ولي حاجة شديدة فخليت عنه فأصبحت فقال النبي صلى الله عليه وسلم :
يا أبا هريرة ما فعل أسيرك البارحة قال قلت يا رسول الله شكا حاجة شديدة وعيالا فرحمته فخليت سبيله
قال أما إنه قد كذبك وسيعود فعرفت أنه سيعود لقول رسول الله صلى الله عليه وسلم إنه سيعود فرصدته فجاء يحثو الطعام وذكر الحديث إلى أن قال فأخذته يعني في الثالثة فقلت لأرفعنك إلى رسول الله صلى الله عليه وسلم وهذا آخر ثلاث مرات تزعم أنك لا تعود ثم تعود . قال دعني أعلمك كلمات ينفعك الله بها
قلت ما هن قال إذا أويت إلى فراشك فاقرأ آية الكرسي الله لا إله إلا هو الحي القيوم حتى تختم الآية فإنك لن يزال عليك من الله حافظ ولا يقربك شيطان حتى تصبح فخليت سبيله فأصبحت فقال لي رسول الله صلى الله عليه وسلم ما فعل أسيرك البارحة قلت : قال ما هي قلت قال لي إذا أويت إلى فراشك فاقرأ آية الكرسي من أولها حتى تختم الآية الله لا إله إلا هو الحي القيوم وقال لن يزال يا رسول الله زعم أنه يعلمني كلمات ينفعني الله بها فخليت سبيله عليك من الله حافظ ولا يقربك شيطان حتى تصبح وكانوا أحرص شيء على الخير فقال النبي صلى الله عليه وسلم : أما إنه قد صدقك وهو كذوب تعلم من تخاطب منذ ثلاث ليال يا أبا هريرة قال لا قال ذاك الشيطان
رواه البخاري
3- أن في سورة البقرة آخر آيتين وهما سبب للحفظ لمن قرأهما :
عن أبي مسعود قال : قال رسول الله صلى الله عليه وسلم : " الآيتان من آخر سورة البقرة من قرأ بهما في ليلة كفتاه .

متفق عليه .

4- أن اسم الله الأعظم في سورة البقرة :

عن أسماء بنت يزيد رضي الله عنها أن النبي صلى الله عليه وسلم قال : " اسم الله الأعظم في هاتين الآيتين : ( وإلهكم إله واحد لا إله إلا هو الرحمن الرحيم ) وفاتحة ( آل عمران ) : ( الم الله لا إله إلا هو الحي القيوم )
رواه الترمذي وأبو داود وابن ماجه وهو صحيح .
فى أمان الله ورعايته وحفظه والف سلام وتحيه لاخواتى الفتاكيت
منقول