تجربتي الشخصية في شبكتي في قاعة ليالي الشرق الماسية

1. عروستنا الحلوات الطعمات


2. قاعة النساء تشمل:


3. الكوافير:

عروستنا الحلوات الطعمات

اللي كانو معايا اليومين اللي فاتت وحيكونو معايا لما فرحي ان شا الله اللي ما اتحدد بالزبط متى يكون بس بعد شهرين ان شا الله (بصراحه متحمسه) كلكم تعرفو انو كنت اكلم جوزي من ايام الخطوبه وقبل 22 يوم ملكنا وقبل يومين كانت حفلة الملكه اللي حقولكم مجرياتها
اول شي انا فرحي حيكون صغير فسويت الحفله كبيره مره وفخمه على قد ميزانيتنا اللي كانت حصاد عملي وطبعا بمساعده اهلي ماديا ومعنويا
الملكه كانت في قاعة ليالي الشرق الماسية اللي خدمتها فندقية وكانت تكلفتها بس 28000 ل 310 سيده وبالنسبه للرجال 150 شخص ب 5000 بدون العشا (على فكرة السعر بعد ما ناكفنا المصري)

قاعة النساء تشمل:

القاعة + كابتشينو+ قهوة تركي+ شاي مغربي+ البوفيه (فخم مره لان اللي فيه اكلات بحريه يكون غالي) + نافورة الشوكولاته بتوابعها من فواكه وكيك ومرشملو وبسكوت + مدفع الورد اللي كان بالنسبالي مفاجاه لانو ما قالولي عليه + تورته العروسه تلاته طوابق وشكلها كان مو عادي على ستاندات فضه+ زفة العصير + تصوير فيديو لان اكتر من 300 شخص + دي جي + القهوه والشاي+ مشرفه عسل (سلوى) + عاملات لبسهم انيق وما تبغي شي الا تلاقيهم عندك ومشرفتهم وراهم+كوشه (ما ابغاها واخترت وحده من عندهم ب 3000 دفعت كاش يعني ما عربنت عشان كدا سعرها حلو و مع الكوشه المدخل والبلكونه وديكور الطاولات كلها وكاسة العصير وكانت ورد صناعي الكوشه معتمدين على ورد الكالا)
قاعة الرجال (حجزنا الفضيه) تشمل:
القاعة + التمر فاخر + القهوه + الشاي + العاملين + عصير
اضافات من عندنا العشا + الجسيس + البواخر + فيديو ومقابلات مع المدعويين

الكوافير:

لمسات روحتلهم على اني حضيره اخدت عليا 750 ريال واشتريت اساس الجسم ومرت اخويا حطتلي هوا وباقي تجهيزاتي كانت عن طريق موقع كوبون اخد عروض واشياء عن طريق كوافيرات رخيصين وشغلهم مرتب وكنت ولله الحمد مره حلوه ومره ما بين لاحد انو مكياج حضيره
الفستان:
عن طريق بوتيك احلى عروسه في الفيس بوك طلبية من امريكا
الاكسساوار والتاج:
من العفيف
التوزيعات:
بوب كيك على شكل بوكيه ورد شكلو وطعمو لزيز من وحده في جده
معجنات من محل اسمو المبتغى
اللدو واللبنيه من الجستنيه (اعتقد كدا لانو وصينا وحده وهيا سوتلنا) (زفيناها مع العربيه وعلب الملكه على اهل اول)
التشيز كيك واخوانو من وحده اسمها ام جنى (صحبتي جابتو ليا وكان مره لزيز)
مكسرات (ما اعرف من فين لان برضو عمتي جايبتها وفي اكياس صغيره)
شوكلاته من شوكلاين ام العريس جابتها وحطت كل وحده في علبه صغيره
اشياء طاولة المدخل
شوكولاته زي مالتيزر بس تغلفيتها زرقا بدل هيا بني
هولز
بولو
مكسرات صينيه
المصوره:
استديو شروق مدام ابتسام ابدعت معايا وخلتني كمان اختار حركات نفسي فيها كتبتها في دا الرد في واحد من المواضيع زمان
الاولى حقرب وجهي من وجهو لدرجة اطراف اخشامنا تلامس بعض والنظرات لبعض
تاني وحده بجلس واخليهم يرمولي بتلات ورد واخد صوره والورد في الهوا لسا طاير
تالت وحده عندي عطر مره شكلو فخم حاخد صوره وانا ابخ منو كاني اعمل اعلان لماركة جوسي كاتور (دي صورة العطر)
رابع صوره عندي فرشة بلشر مره شيك من ماركة استلودر حمسك علبة البلشر حقت استلودر في يد والفرشه في يد وانا اطالع في المرايه تلقطلي الصوره )(في الصوره المجموعه اللي عندي تقريبا)على فكره بس عشنكم عرايس انا المجموعه دي اشتريتها من سنه دحين منزلين شبها مره حلوه حشتريها لدبشي ان شا الله فخمه وشكلها حلو في التسريحه وبالنسبالي سعرها مناسبني
هذه الصورة تم تصغيرها . إضغط على هذا الشريط لرؤية الصورة بحجمها الطبيعي . أبعاد الصورة الأصلية 600x400 .
ايش رايكم حلوه الحركات ...؟؟؟.... عندكم اضافات ...؟؟؟...
معليش اخواتي ما صورو كل شي بس حوريكم اللي اقدر عليه
رفع الصور
اخيرا احب اوضح اني ما ندمت ابدا ولا بنسبه بسيطه اني اخترت القاعه دي لانو كل اللي دفعتو كان ولا شي جنب اللي قدموه ليا والصور ما بينت ولا شي ولا هيا حلوه قدام الطبيعه ما شاء الله تبارك الرحمن
وادعولي بالتوفيق في حياتي الجيه ..