تحذير هام من مشغل سواريه بالرياض

السلام عليكم ورحمة الله وبركاته ..
بقولكم قصتي بالكامل وربي الشاهد على كلامي وانا محاسبه عليه يوم القيامه ...
قبل زواجي كنت ادور على كوافيره وبحكم اني ماقدر اروح مشاغل كنت ابي البروفات تكون في البيت عندي
عطتني وحده رقم كوافيره اسمها ( نسرين ) لبنانيه من مشغل (سواريه)
دقيت عليها وجت البيت وسوت لي بروفه عالسريع وانا ماعجبني شغالها بس قالت شغلي احلى من كذا بس عشاني مستعجله ورايه عروس
ووافقت قلت ان شاءالله شغلها حلو لان اللي عطتني رقمها مدحتها لي وغير كذا ماكان فيه وقت على موعد زواجي عشان ادور غيرها
ودفعت لها العربون بس مكياج بدون تسريحه لاني حجزت كوافيره غيرها تسريحه >>كنت مجربتها من قبل
وخواتي دفعو ل ( نسرين ) عربون للمكياج والشعر ،،،
ويوم زواجي جت للقصر وجابت معاها وحده اداريه تشتغل تخيلو
يعني مو كوافيره ولا لها علاقه بالمكياج والشعر !!!
جابتها تسااعدها !!
كيف عرفنا .؟؟؟ لان الكوافيره اللي جتني تسوي شعري شافتها وقالت هذي اداريه اعرفها مو كوافيره
وغير كذا هذي الاداريه سوت شعر اختي وقالت نسرين ( والله بيطلع منك شغل حلو حسبي الله عليها صرنا تجارب عندها
وطبعا نسرين لما بدت تشتغل قلت شوفو ترى اسفنجات الشعر لها سعر كل وحده تبي تسريحه بف تدفع 50 ريال قيمة الاسفنج !!!!
توها تتكلم الاخت طيب فرضا ما كنا عاملين حساب فلوس زياده وليش ما قالته يوم اتفقنا من قبل ؟؟!!!
ودفعو خواتي كل وحده 50
وراحت تقص الاسفنج نصين كل وحده لها نص !!!
وحنا دافعين قيمة كل اسفنجه >>>شوفو كيف النصب عيني عينك
طبعا شغلهم بالتسريحات جدا سيئ
اختي طلبت تسريحه ورتهم الصوره قالت الاداريه >>مادري وش اسمها
هذي التسريحه يبيلها وقت >> طيب على ايش حنا دافعين فلوس ؟؟!!!!
واختي الثانيه شعرها ما جلست ساعتين على بعضها الا بدت الخصل تطيح وخربت التسريحه !!
طبعا المكياج اللي عندها تقريبا اغلبه شبه مخلص
حتى كريم الاساس زين انه كفانا وماخلص
بعد ساعه بالضبط قبل ما يجون الناس ساح مكياج خواتي وامي وخالتي وبناتها
نجي لحالتي ،، انا كنت طبعا اخر وحده الساعه تقريبا 8 ونص او 9 بدات تسويلي المكياج
وكان جوالها يدق طبعا زوجها يدق وبدت تسوي المكياج بسرعه عشان ما تتاخر على زوجها وانا كل شوي اقولها عدلي,, لا مابي كذا,, وماكان شغلها حلو ابد ابد ابد
وكان شغلها على السريع واخر شي كريم اساس الجسم حطته لي بعلبه وقالت خلي اختك توزعه على يدينك ورقبتك >> طيب انتي وش شغلتك !!!!
وطلعت بسرعه هي والي معاها >>> خساره اني ماعرف اسمها ولا كانت كتبت اسمها
يا بنات لا تقولون قطعتي رزقها
هذي وحده نصابه وغشاشه والرسول صلى الله عليه وسلم نهانا عن الغش
هي اخذت فلوسها كامله وما ظلمناها بشي
ليش هي تظلم وما تسوي شغلها بكل امانه ومصداقيه
وجايبه معاها وحده مالها اي علاقه بالمكياج والشعر
انا ماهمني الفلوس خلاص صار اللي صار والحمدلله على كل حال
بس لازم نوقف هالمسخره الى متى يلعبون بعقولنا !!!
حبيت احذركم منها واللي تبي رقمها على الخاص عشان ما تتورط مثلي وتدق عليها لان لها اسم ثاني مادري وش هو
والله يعيننا على نصب الكوفيرات واستغلالهم (مو كلهم بس فيه نصب صااير كثير )
طبعا المفروض اني اكتب هالموضوع من زمان بس راح عن بالي واللي ذكرني وحده كانت تسئلني عن هالمشغل
وتذكرت كل شي صار معاي وقلت بنزل موضوع
وبالتوفق لكل العرايس ,,,