تعالوا أحكيكم اش سويت في فرحي

السلام عليكم ورحمة الله وبركاته
كيفكم صبايا يا حلوات ...
الحمد لله خلاص تم زواجي على خير
وكملت شهر واسبوع
طبعا الكل الكل عجبه الزواج من إلى ...
الحمد لله ربي وفقني وطلع أحلى زواج بشهادة الكل ...
بأبدأ لكم من أول ما صحيت ... على الساعة 11 تقريبا .. على طول شور محترم ..
بعد الظهر.. رحت لمشغل ريما ...
رغم ان أغلب صاحباتي قالو لي روحي لمسات أو منة سنتر
بس الحمد لله ... رحت ريما وكان مكياجي بشهادة الكل ... جدا رائع ...
الله يجزاها خير ... صفيه .. من جد أحسن وحدة في صالون ريما ..
والشعر عملته ليا ردينا ... برضو مرة كان حلو ..
تشقير .. فتله .. استرخاء ...
ع المغرب خلاص كنت جاهزة..
لا تقولوا لي بدري ...
أنا كذا أحب أضبط أموري بدري
عاد يوم وصلنا القاعة ... قاعة نوف
أسوأ قاعة في العالم ... ما عندهم اي ذرة أخلاق ... وأخلاقهم شينه .. حسبي الله عليهم نكدوا علينا الله ينكد عليهم ..
تخيلو .. أنا وصلت القاعة قبل أخويا ومرته ..
وهما اللي جايبين ليا الفستان ...
ادارة القاعة رافضة تدخلهم من مدخل العروسة ..
يقولو من مدخل المعازيم ... يوه .. أمي مسكينه تعبت معاهم لين دخولوهم
يلا الحمد لله ما صار قدام أحد ..
وتشدد زاايد على الأطفال ...
طبعا أتكلم عن قرايب العروسة والعريس ..
تخيلو عيال أخويا وأختي ما بيدخلوهم ... والله مرة كانت اسوأ غلطة يوم اخترنا قاعة نوف ... بس يلا مافي شيء كامل الحمد لله جات على ذي ومحد لاحظ ..
نجي للزفة ..
قبل لا أتكلم عنها .. أبأشكر الأخت العنود99 اللي هنا في المنتدى .. ماشاء الله ... خلت الحفل من جدا اسطوري بمعنى الكلمة ..
استأجرت أجهزتها ... بالعرض اللي كانت منزلته
تخيلو معايا
تهيئة الزفة كانت خلفية مؤثرات .. مع أصوات أهلي وصاحباتي يباركون لي .. 7 ثواني كل وحدة تقريبا
والكشافات مسلطة ع الكوشة ... وتغير ألوان القاعة قبل الزفة كل نص دقيقة لون تقريبا
عاد قبل لا أطلع من الباب وأطلع البلكونة .شغلت البخار ... والكشاف الملون اللي موجه عليا مساعدتها ماسكته .. عاد يوم خرجت صار البخار خفيف من فترة وفترة ..
ويوم جا وقت رمي الورد ... طبعا أنا ما رميت ورد ... رميت قلوب اللي تجي زي المخدات
واو واو يا بنات ... شغلت العنود 99 وقتها مدفع الورد ... ما اقدر اوصف لكم ...
بس منظر خرافي تخيلو مع الأضواء ...
خلوني اوصف شوي عشان تستوعبوا
بدون صوت ... مع هواء ... مع ليزر مثبت في المدفع ... وبتلات الورود زي لمن ترمي رريش من فوق ... تلعب فوق في الهواء ... ملونة طبعا ..
وبعدها حطت في المدفع أوراق ملونه .. تلمع والوانها خرافيه ... معاه زي الأكليل ..
يوه من جد الكل من الحماس صار يصفق .. ويصفر ... طبعا كثير طلبو رقمها من أخواتي ومني .. عاد يوم جا وقت نزول الدرج يسعدها ربي صارت تنفض الورد والورق من فستاني الله يسعدها وربي ذوق ..
عاد مع الممر شغلنا الفقاعات ... وكان جو مرة حماس ...
ويوم طلعت الكوشة ... وأخذت الإستدارة ..
شغلت نافورة النار من يميني ويساري ...
واو واو ... القاعة كلها نوري من النور ..
وكان شيء حماس
المعازيم يوم استوعبوا صفقو وصفروا ...
الله يوفق كل العروسات .. ويسعدهم ويخلي ايامهم كلها أفراح وسعادة ..
لو في اخطاء املائية اعذروني
ما سويت مراجعة ما عندي وقت