تعالوا نتناقش

السلام عليكم
كيفكم صبايا؟؟
حابة اطرح عليكم قصة وحدة من قريباتي خلونا نناقشها و نشوف ايش الاسباب و ايش الحلول
الحق هي ما تدري اني بكتب مختصر قصتها بس انا قلت اكتبها لاني متاكدة انه في الاف زيها
بيعانوا من ظلم و جور الزوج و اهل الزوج
هي ببساطة اتخطبت و وقت الملكة زوجها دفع مهر بس 20 الف و طبعا على دفعات
بعد الملكة هاتك طناش و ما يجيها الا وقت ما هو يبغى
غير كدا مالها معنى بحياته لا يتصل و لا يرد ع اتصالاتها يعني يتهرب منها
اهلها لمن شافوا حالها سيء كدا قالولها انفصلي عنه و نرجعله كل شي
بس لانها خام ( يعني ما في رجال بحياتها الا ابوها و اخوها و لا تروح و لا تجي لاحد ) اتعلقت فيه
صار الزواج و ربي اراد انها من اول شهر تحمل
طبعا الوحام انتو عارفين كيف وضعه
ما رحمها لا هو و لا اهله كل ما تنزل لاهله لازم تسوي شي و تنزله معاها
و الا ام زوجها تغضب عليهم و تقلب الدنيا فوق رؤوسهم
و هو ما رحمها و مخليها تشتغل في البيت عادي و لاهمه
و هي مسكينة حمل و وحم و دراسة و تخرج كله في وقت واحد
ما رحمها او بمعنى اصح رماها ببيت اهلها الا لمن جاتها اعراض ولادة مبكرة بس ربي سلم
ولدت جابت بنوتة زي العسل ما شاء الله ربي يخليها لها
طبعا فترة حملها اكتشفت انه يخونها بس صبرت و سكتت
الان طالعلها بسمفونية جديدة
حالف عليها يمين لو سوت اي شي ما يعجبه هي طالق
لو اهلها جابو لبنتها شي هي طالق لو ايش ما عملت هي طالق
طيب اوك فهمنا انه ما يبغاها
طيب ليش ما يطلقها؟؟ ليش بيتلذذ في اهانتها
اما قلت يمكن عشانها طيبة و ع نياتها و شخصيتها ضعيفة
بس برضو دا ما يعطيه الحق انه يعمل فيها كدا
يعني زي ما دخلنا بالمعروف نخرج بالمعروف
هي عندها بنوتتين الان ربي يخليهم لها
و الثالث ببطنها دوبها اكتشفت انها حامل
و حالف عليها يمين لو ما طلع والد هي طالق و بيتزوج عليها
انا متاكدة مليون بالمية انه في ناس كثير كدا
و متاكدة انه مافي ظالم بحال
و مصير المظلوم ربي بياخد حقه من الظالم
بس بنات فكركم ايش الاسباب و ايش الحل برايكم؟؟
و فكركم ليش هو بيعمل دا كله؟؟ ايش اللي بيدور بدماغه؟؟
خلونا نتناقش في الموضوع دا
و اي وحدة عندها مشكلة و حابة تناقشها باننا نشوف الاسباب و نحاول نكتشف الحلول حياها
و بانتظار تفاعلكم