تعبت والله تعبت

1. السلام عليكم ورحمة الله وبركاته

السلام عليكم ورحمة الله وبركاته

من فتره احس اني ضايعه ومحتاره وما اعرف شو اسوي وكيف اتصرف .. انا مخطوبه من 5 سنوات و ملجت هالسنه وبديت ااكلم خطيبي وصرت كل يوم اكلمه وحبيته وهو حبني وكان يعاملني بكل لطف وحب كنت مستانسه معاه ومرتاحه ما كان مقصر بشي علي وكان يكلمني تقريبا طول اليوم اذا مب بالتيلفون كان بالمسجات بس من فتره ما اعرف شو صارله كل يوم يصدمني بشي ما توقعته يتغير بدون سبب .. استوى ما يكلمني الا اذا يبا شي مني و ما اسمع منه كلام حلو مثل قبل .. مرات يقولي كلام يجرح ويوم ازعل يقولي خلاص ما بمزح معاج مره ثانيه ويغيب طول اليوم عني ويوم افقده واتصل فيه او اطرشله مسج ابا اطمن عليه ما يرد علي .. بتقولولي كلميه وتفاهمي معاه .. جربت كل الطرق عشان اعرف شو صارله وليش متغير .. كل ما اسأله يزعل علي وما يكلمني .. اقوله شو فيك انا مقصره في شي ؟ قولي لا تخبي علي شي .. يقول لا مب مقصره .. ساعات اكلمه وويتم سااكت ما يرد اخر شي يقولي شو تبيني ارد عليج انا تعبان برقد او يتعذر بأي شي عشان ما يجاوبني ويسكر الخط ويوم يباني ايي يقولي كلمتين حلوين وانسى كل شي واردله بكل سهوله هذا الشي خلاه يتمادى انه كل ما يزعل انا ابدا واراضيه مع انه هو اللي يغلط علي.. بتقولولي تغلي عليه ولا تكلمينه احقريه .. سويت هالشي وما استفدت بالعكس ابتعد اكثر عني وزادت المسافه بينا ..
ساعدوني ما اعرف شو اسوي وكيف اتصرف وانا باقي على عرسي اقل عن شهر والله كرهت حياتي المشكله اني مب مقصره في شي وكل ما يغيب عني اخاف واحاتيه وارجع اكلمه
مشكلتي انه قلبي حساس واتعاطف بسرعه وما اعرف ازعل
تعبت والله تعبت وكارهه نفسي ياليت ما عندي قلب وما عندي احساس
لو افكر بعقلي اقول اني لازم اتركه ولو افكر بقلبي اتعلق فيه اكثر
محتاره واتمنى انكم تساعدوني في حل هالمشكله انا خايفه اني ما استمر معاه بعد الزواج