تعرفو ايش معنى كلمة تعبت دي ما توصف اللي فيا

1. انا بقولكم الحكاية و انتو احكمو لاني بجد مليت و ربي مليت

انا بقولكم الحكاية و انتو احكمو لاني بجد مليت و ربي مليت

زوجي من عشاق الكورة زيه زي اي رجال لحد هنا ما قلنا شي لكن الكارثة لو فريقه انهزم انواع النكد يصير و يحط حرته فيا كاني انا اللي قلتلهم انهزمو و مو بس بالكورة باي شي يصير و ما يكون على هواه يحط حرته فيا امس قعدت جنبه و هو بيتفرج المباراة و المعلق بيتكلم و قال هيجي هدف و ما خلص الكلمة الا و جاه و انا دووبي ابغى اضحك على كلامه انه دوبه بيقول هيجي و جا فكرني بنفسي لمن احس بالشي و يصير دوبي ابغى افتح فمي الا صار يزعق و اسكتي و مدري ايش انا انفجعت ما حوج الموضوع لدا كله سكت و لا فتحت فمي بكلمة و قعدت ابكي من قهري لاني ما سويت شي قبلها قلتله انا جيعانة استناك نطلع نتعشى برا و لا اكل قالي كلي و بما انه مافي شي معين مشتهيته فقمت اكلت تمر و بس قلت دحين نخرج ان شاء الله فخليني اكل شي خفيف و انتو عارفين جوعة الحوامل قد ايش بتكون حارة و غير كدا عارف اني طفشانة و مضايقة و نفسي اخرج تخيلو عشان الكورة و انه فريقه انهزم ما صار و لا من دا كله و ربي من قهري دخلت نمت بس ما نمت على طول قعدت ابكي قلت يمكن دحين يجي و يراضيني لكن اضحك على مين الظاهر على نفسي و فعلا يا بنات ما جا و لا اعتذر و لا شي و نمنا و انا من اول قلتله انا ما احب ننام و احنا زعلانين لكن انا ما قدرت اتحمل اكثر من كدا كله على راسي فلا صالحته و لا شي بس كتبتله ورقة باللي في خاطري و حلفت ما اكلمه الا اذا هو كلمني غير كدا و لا شي و انه الشي دا يهز منه شعره ههه و لا شي قبل شوية جاني قالي جهزي نفسك بنروح عند اهلي و انا بصراحة محروقة منه يا ناس انا طفشانة و مع الحمل ما بشوف باب الشارع الا فين و فين بجد بجد الوضع مقرف قلتله لا مني رايحة شدينا شوية و هو اخد بعضه و خرج عند اهله عشان يودي ابوه صلاة الجمعة و يجيني العشا
يا بنات انا ما بادلع او شي بس والله طفشت و تعبت كل مرة اقول هيتغير و اتناقش معاه بدا الموضوع انه انا ما دخلني لكن لا حياة لمن تنادي يا ناس الدنيا اخد و عطا و الحياة مرة تمشي على كيفي و مرة تعاندني كذا مرة احاول افهمه الشي دا و ما بيفهم انا كمان انسانة و ليا احساسي انا مو جدار متحرك و لا اباجورة و ربي مقهورة قهر ما يعلم بيه الا الله و لا همه احد والله لو مو اللي في بطني كان سبتله البيت و مشيت عارفة هتقولو السبب عبيط و غيرك بيعاني اكثر من كدا و بيتحملو لكن انا ما اقدر قلة الاعتناء و الاهتمام دي انا ما اتحملها
قولولي ايش اسوي و ربي فاض بيا و ما ابغى اقول لاهي عشان لا تكبر المشكلة و ما ابغى اتصل عليه او ابعتله رسالة لانه ما يستاهل ابغاه يحس بغلطه يحس اني بني ادمة عايشة معاه مو جماد