تفاصيل زواجي

السلام عليكم فراشات
رجعت لكم بعد 25 يوم من زواجي
اخباركم وشمسوين؟؟؟
وحشتوني
اليوم قررت اكتب أدق تفاصيل زواجي واللي حصل لي قبل الزواج
نبدأ بقبل الزواج بليلة
اتفقت من قبل مع صاحب محل الفستان اني استلم الفستان قبل الزواج بليلة
رحت يوم الاربعا للمحل وطلع لي كيسة فيها الفستان وفتحها الا اشوف فستان غير
قلت له:مو هذا اللي اخترته
قال :كيف موديله فستانك؟
انا طالعت وراي كان موجود الفستان الاصلي اللي اخترته بس لونه ذهبي وانا طلبت ابيض
قلت له نفس هالفستان
قال لصاحبه يجيب الفستان واحنا جلسنا ننتظره
دقايق الا ينزل ويقول الفستان مو موجود
انا قلت كيف موموجود؟؟ وين راح؟
قال لي:لاتخافي بنلاقيه وبكرا تستلمينه
انا سكتت ورجعت البيت ولما لاقوني خواتي وامي سألوني عن الفستان وقلت لهم اللي صار
صارت كل وحدة تقول ليش مااخذتيه وهو كذب عليك و....الخ
انا ماعرفت شقول وانقهرت ظليت ساكتة لنص الليل وبعدين قلت لاخوي اتصل على المحل سأله عن الفستان
اخوي اتصل عليه وقال له:الفستان موجود بكرا الصبح تعالوا
انا ماقدرت اصبر قلت لاخوي الحين نروح المحل اخذه الحين
قالوا لي لا بكرا نروح وانا عصبت فوق عصبيتي وقلت لا الحين ودخلت غرفتي ابكي
جا ابوي ربي يخليه وقال لاخوي قوم انا اروح معاكم
خواتي قالوا لاتروحين لاني كنت معصبة وابي اروح اتهاوش معاه ههه
امي تقول لاتضايقين نفسج وبكرا زواجج اخاف يصير لج شي بس انا ماسمعت لاحد
طلعنا واتصل اخوي على المحل قال له الحين بنجيك والرجال يقول بسرعة الحين بنسكر انا قلت عساك تقعد للصبح تستاهل
ههه طبعا بصوت واطي
وصلنا المحل وشفت الفستان وارتاح قلبي قلت له:جاهز اقدر اخذه؟
قال:لا انتي وين بتروحين اي مشغل؟ الاحلام؟
قلت له:اي
قال:خلاص بكرا لما توصلين اتصلي وانا اوصله لج
المشغل كان مقابل المحل
رجعت البيت وانا اشوي متطمنة خ
طبعا كانت الساعة 2 الفجر
فتحت الابتوب وكانت زوجة حماي داخلة المسن>>عرسهم معانا
تكلمت معاها وكل وحدة تقول معاناتها للثانية
جا ابوي قال:نامي بكرا وراج سهر وتعب
نمت الساعة 3 تقريبا
يوم الخميس 5 ربيع الاول 1434ه
يوم العرس الصبح الساعة 7
صحيت من نومي رايقة
ورحت للمطبخ غسلت الصحون >>ماخافت يطير الحنا الخبلة
نظفت البيت كله والساعة 9 ونص طلعت معا اخوي وزوجته للمشغل
وصلنا الساعة 10 اتصلت على المحل واخذت الفستان طلع واسع ورجع اخذه وعدله بس من ذكائي بس قست البلوزة اما التنورة قلت اكيد بتطلع عدلة
نادوني استشورا شعري وحطوا لي بودرة على وجهي ورقبتي وكتفي
بعدين دخلت غرفة المكياج وكنت متوترة وخايفة اطلع مو حلوة
قلت لها ماابي مكياج ثقيل كثير ولا ناعم كثير
قالت ماعليج انا احط لج اللي يعجبج
حطت لي المكياج في البداية ماعجبني حطت لي لونين تقريبا انا طلعت لخواتي نصهم قالوا خل تزيد لك الالوان ونصهم قالوا حلو
اختي الكبيرة قالت ماعليك منهم حلو تهبلين
والحمد لله عجب الكل العرايس كلهم قالوا نفس مكياجي
سووا لي التسريحة ونفس الشي ماعجبتني ><
عصبت علي المرا وقالت انتي تبين اشيا قديمة الحين كلشي تغير
بس الحمد لله عجبني بعد ماركبت التاج والطرحة
بعد ماخلصت اكتشف ان الطرحة مشققة ><
اتصلت عالمحل وغيرها لي
ماصارت الساعة 3 العصر الا انا خلصت ورجعت للبيت عالساعة 4
جلست مع اختي اسمع الزفة اللي بدخل عليها ههه
اختي هي اللي اختارت لي الزفة لاني ماعرفت
صلينا المغرب وعالساعة 7 المغرب رحت الصالة دخلت الغرفة بلبس الفستان
الا المصيبة التنورة طلعت واسعة
اتصلنا على اخوي جا اخذها ماادري وداها لخياط او للمحل المهم انهم ضبطوا لي المقاس
لبست وخلصت وكنت جاهزة من الساعة 8 بس انتظر الساعة 10 علشان ادخل
جاوا المعازيم وابتدا العرس والساعة 10 شغلوا لي الزفة
‫زفة‬â€ژ - YouTube
دخلت بعد الصلوات لما ابتدا الشعر الثاني
دخلت وصورت الى الساعة 1
بعدين طلعنا انا والعروس الثانية ودخلوا ازواجنا
بعدين قريب الساعة 2 دخلت انا للصالة >>العريس الثاني غطوه علشان مايشوفني ههه
دخلت وبعدي دخلت العروس الثانية والساعة 2:10 طلعنا انا وزوجي
وبكذا انتهت احلى ليلة من عمري
اتمنى عجبتكم التفاصيل اللي كتبتها وعسى ماتعبتوا وانتوا تقرون ههه