تكفون ادخلو وساعدوني

السلام عليكم ورحمه الله وبركاته ...
بنات انا عضوه بالفراشه بس سجلت بنك جديد عشان المعارف بس ...
فراشات انا بقولكم شي اللي مو قادره اقوله لااحد مره ...
انا والحمدلله ماعلي قاصر ابدا ابدا ... من دون ماامدح بنفسي والكل شاهد لي وانا ماابي احد يشهد لي لانه ماحب احد يقولي كذا كنت اخاف من العين واشياء زي كذا وفعلا ...
عندي مره خالي من وانا صغيره بالمتوسط تقريبا وهي قالبه راسي انتي جماعتك ماراح يفوتونك هي طبعا مو مننا .
انتي ماتكبرين زين الا والخطاب بيكونون كوم على باب بيتكم ...(وانا ينتفخ راسي ههه) امحق ...
كنت مره استحي لانه تقولي قدام خالاتي وبنات خالاتي وامي ..كانت تقول لي اتمنى عندي ولد عشان ازوجك اياه لو انه اصغر منك ... المهم اخوها متزوج وكبير شوي قامت تمدحني عنده الرجال وقتها بغى يطلق حرمته ويبي يخطبني بنات خالتي الحمدلله ماقصرو فيه ادوه من الكلام اني ماصلح له لانه يصير عمهم ...
المهم تخيلو ناس كثير يتكلمون فيني ولا احد يجي مره انا مستغربه مو معناته اني ميته على الزواج لساتني ادرس بس مو معقوله اخلي نفسي كذا ..
والله بالافراح اسمع انه تكلمو عني وبعد الفرح بفتره ولا اسمع ولا حس .. ووالله ان ولد خالتي كان يبيني وجا مرتين عند ابوي هو بنفسه والوضع مبين وضع خطبه بس ماقدر يتكلم ليه مادري احس شي مربط الناس عني ...
وواحد من جماعتنا بعد كان يبيني ومجنن امه علي وكلمو ابوي وابوي ماعارض وبعد سنه كامله وانا متامله وكل يوم اقول بكره يجون ولا سمعت طاريهم اقول اكيد بيحددون موعد ولا شي واخرتها بعد سنه اتفاجا لمن جايين لنا هو وابوه وفرحانه على بالي بيجون يتكلمون الا يبشرون ابوي انه ملك من صدمتني والله مانزلت دمعه (الخيره فيما اختاره الله) وعارفه انه لو ربي ماكتب كذا كان ماصار ...
اخرتها امس مره خالي راجعه لنفس الموضوع واحد من اخوانها غير الي قبل بيطلق حرمته وجايه عند جدتي تقول انا بخطب فلانه اللي هي انا لاخوي والله نفسي فيها تتوقعون يرضون قالت خالتي وش يحدها تاخذ واحد مطلق حرمته وهي صغيره ومو مستعجله عالزواج ... وسكتت والله لمن تقولي خالتي تقول والله انا خفت عليك لمن تتكلم عنك تقول انا عاجبتني ولا قالت ماشاء الله ولا شي وهي عينها والله حاره والله ياما تكلمت باشياء وصار شي لهالاشياء...
اذكر من بينهم واحد من جماعتها اشترى سياره مره حلوه ماشاء الله وجات تقولنا والله افتكرها لمن تمدح فيها والله والله اليوم الثاني الرجال مسوي فيها حادث واشياء اكثر واكبر من كذا ...
خالتي قامت تقولي تريقه خذي اثرها وانا اقول بعقلي تقولينها تريقه وانا من جد بسويها ...
والله من زمان يابنات انا حاسه فيني عين وكنت اقول لامي لان احس باعراض غريبه وكانت تقولي لاتتوهمين بس والله صرت استحي اقولها فيني شي وبعد كرهت اقول...كل ماقلت شي انتي موسوسه... يمكن اكون موسوسه بس الا ذا عاد مدري الحين ابي رايكم ايش اسوي الحين انا بسوي لي رقيه هنا موضوعها مثبت انا بسويه بنفسي من دون ماحد يدري من البيت بس بعد خايفه والله من امس بس ابكي وخايفه كل ماحاول انسى اتذكرها واكرهها محتاره تكفون قولو ايش اسوي ...
لكم ودي