حزينه متضايقه ودك إن أمانيك تتحقق تعالي والله ثم والله ماتندمين مهم للحزينات

1. ماألطفك بنا يارب ..ماأرحمك بنا يارب ..


2. سبحآن الله حتى مايصيب الإنسان يؤجر عليه..


3. وفيه دورات لتعزيز هالجانب في الأنسان ..

هالقسم يخيم عليه الحزن قليل مواضيع تحث على الأمل والتفاؤل وعدم القنوط من رحمه الله ..
حبيباتي وربي لو تعرفون كيف ربي يدبر أمورنا بحمكه وكل شئ بقدر إنكم لتشكرونه في كل دقيقه وثانيه وتقعدون ساجدين له ليل ونهار ..
سبحان الله ربي مايظلم أحد وصدقيني طال الزمن أو قصر يالغاليه إنك راح تأخذين نصيبك ومقدارك من السعاده ..
بعد العسر اليسر إعرفي دائماً إذا مريتي بأمر عسير إن الفرح قرب والحزن راح يزول ..
وحياتنا لالالالالازم تتغير ..
بقولكم مثال :مثلاً أنا ماتزوجت وعشت حزينه وأقول خلاص آنا ماراح أتزوج طول عمري ..
قال تعالى( ولا تيْأَسوا مِن رَوْحِ الله إنّه لا ييْأَسُ مِن رَوْح الله إلا القومُ الكافرون ) – يوسف 87
في هالحاله إنتِ الغلطانه لأنك قنطتي من رحمه الله ونسيتي إنه هو مدبر الأمور ..
قال تعالى( وَ مَنْ يَّقْنَطُ مِن رحْمَة رَبِّه إلا الضَّالُّون ) – الحجر 56
وإنك مالك غير ربك وأدعيه ليل نهار وربي مايضيع تعب إنسان ..
وعلى فكره ترى الدعاء لو ماتحقق في الدنيا نصيبك موجود في الأخره ..
مافيه عمل يسويه الإنسان ومايؤجر عليه أعجبتني عباره :
أؤمن بشده :أن الله يؤجل أمانينا ولا ينساها ..

ماألطفك بنا يارب ..ماأرحمك بنا يارب ..

سبحآن الله حتى مايصيب الإنسان يؤجر عليه..

عَنْ أَبِي سَعِيدٍ الْخُدْرِيِّ ‏وَعَنْ أَبِي هُرَيْرَةَ رَضِيَ اللَّهُ عَنْهُمَا، عَنِ النَّبِيِّ صَلَّى اللَّهُ عَلَيْهِ وَسَلَّمَ قَالَ: " مَا يُصِيبُ الْمُسْلِمَ مِنْ نَصَبٍ وَلَا وَصَبٍ وَلَا هَمٍّ وَلَا حُزْنٍ وَلَا أَذًى وَلَا غَمٍّ حَتَّى الشَّوْكَةِ يُشَاكُهَا إِلَّا كَفَّرَ اللَّهُ بِهَا مِنْ خَطَايَاهُ ".
يالغاليات سواء كنت مطلقه أو أرمله أو تأخر عنك الزواج وإنتِ تتمنينه وعندك ثقه إنك راح تتزوجين وآمل وتفاؤل وتدعين ربك وربي مايخيب رجاك وأملك ..
ياأخواتي وربي هذا الكلام أقوله لكم من قلبي لا نقلته ولاشئ
هذي همسات أرسلها لكنّ يالغاليات وأسأل الله أن ينفع بها ..
حآبه أسأل سؤال وين مساحات الفرح بحياتنا!..
ليه في كل مكان نروحه يطغى عليه جانب الحزن
وين الفرح والبسمه الحلوه
ليش مانكون المتفائلين في زمن اليأس ..!
يعني معليش شوي دنياك فيها حزن وهم إنتِ أقلبيها لفرح..
ترى والله الحياه حلوه وتهوبل بس نفهمها
ممكن الشرط شوي صعب وهو إننا نفهمها لكن لالالازم مانكون مستسلمين ..!!
إذا سماؤك يوماً تحجبت بالغيوم ** أغمض جفونك تبصر خلف الغيوم نجوم
والأرض حولك إذا ما توشحت بالثلوج ** أغمض جفونك تبصر تحت الثلوج مروج
أي شئ تتمناه نفسك من زواج وغيره وماتحقق لك عليه بأمور :
1_سؤال الله والدعاء والإلحاح فيه وعدم التشكي بعض الناس تقول:
يارب أنا ليش ماتزوجت ,يارب أنا ليه تطلقت ..
ماتصير كل هالأمور ربي قدر وفعل وإنتِ عليكِ الصبر من غير سؤال ..
2_عدم إتخاذ بعض الأيات والسور في القرآن أنها من مسببات الزواج
التوكل على الله وعدم الإعتقاد آن إستجابه الدعوه فيها ..
3_كثره الدعاء وخاصه في السجود والثلث الآخير من الليل ..
وفي شئ مهم بعد :بعض البنات تكون إنطوائيه وماتحب تطلع ولا تتكشخ ولالالالاشئ والسبب إنها ماتزوجت !..
ياأختي وربي مايصير آبداً لازم يكون عندك آمل ويبان حتى على مظهرك الخارجي ..
آوكيه ماقدرتي تتحكمي في قلبك ع الأقل مظهرك الخارجي خلينا ع كلمه من برآ الله الله ومن جوى يعلم الله بس المهم نكون آكثر حرص في الأمور ومانهمل أنفسنا ..
سبحان الله فيه مثل قديم جداً رائع (كما تفكرون تكونون)
أنا مفكره إني بقعد حزينه طول عمري خلاص بقعد حزينه
آنآ مفكره إني ماراح أتزوج ماراح آتزوج
شفتم كيف لازم يكون عندنا حسن ظن ..
يقول الحق سبحانه وتعالى في حديثه القدسي: "أنا عند ظن عبدي بي إن ظن خيرًا فله وإن ظن شرًا فله".. رواه مسلم،
فيه نقطه مهم وأنا بنفسي جربتها السالفه مافيها إني كنت عازمه على آمر بس كنت متردده وربي يابنات دعيت الله أولاً ومن ثم قمت بتمرين نفسي جداً رائع
مثلاً: أناحزينه وآبغى الفرح يدخل حياتي وش آسوي ..؟
طبعاً قدره الله فوق كل شئ لكن هالتمرين فعال ومميز
تجيبي ورقه وقلم وتكررين فيها هالعباره 24مره وآكثرر وردديها في نفسك ويومياً
تكتبين :أنا أنسانه سعيده ولايعكر صفو حياتي شئ
طبعاً يستخدم هالتمرين لكل شئ بشرط:
آنك تجيبين عكس العباره
يعني آنا حزينه آكتب آنا سعيده آنا مطلقه آكتب آنا مثلاً :راح أتزوج وتصير حياتي حلوه
آنا ماعندي ثقه بنفسي أكتب أنا عندي ثقه بنفسي بحجم السماء والأرض
آوهم نفسي إن هالشئ موجود فيني
وربي يابنات روعه جربوه يومياً قبل النوم
وهالكلام مو من عندي ترى أطباء نفسيين يحثون على هالشئ
وإللي تبغى تتزود في هالجانب تكتب بقوقل عبارات التفاؤل والقدره على الإنجار

وفيه دورات لتعزيز هالجانب في الأنسان ..

اللهم ياسامع الصوت وياسابق الفوت وياكاسي العظام لحماً بعد الموت اللهم ياألهنا ويا ملكنا وياسميع الدعاء اللهم إني أسالك بكل أسم سميت به نفسك أو أنزلته في كتابك أو علمته أحداً من خلقك أو إستأثرت به في علم الغيب عندك أن تجعل القرآن العظيم ربيع قلوبنا ونور صدورنا وجلاء آحزاننا وذهاب همومنا وغمومنا اللهم إني أسألك أن ترزق بنات المسلمين أزواج نقيين طاهرين يخافونهم فيك وأن ترزق شباب المسلمين بنات طاهرات نقيات يخافونهن فيك وأن ترحم مواتنا وموت المسلمين وتغسلهم بالماء والثلج والبرد وتنقيهم من الذنوب والخطايا كما ينقى الثوب الأبيض من الدنس وتدخلهم جنات الفردوس يارب العالمين وجميع المسلمين اللهم وأشربنا من حوض نبيك صاحب الوجه الأنور والجبين الأزهرشربه لا نظمئ بعدها ..
اللهم آمين ,,اللهم آمين ,,,اللهم آمين
هذا وصلِ اللهم وسلم على نبينا محمد وعلى آله وصحبه والتابعين ومن تبعهم بأحسان إلى يوم الدين ..
والسلآم على من أتبع الهدى
أختكن المحبه لكنّ الخير دوماً
قلبي أصيل