حل للشعر الجاف

1. صباح/مساء الخير


2. خواتي بدخل بالموضوع دوغري >>


3. المهم >>كم مره قلت هالكلمه ههه


4. مع الوقت يابنات شعري انعدم مع اني بس صبغته حوالي 4 مرات بس

السلام عليكم ورحمة الله وبركاته يا حلوين

صباح/مساء الخير

خواتي بدخل بالموضوع دوغري >>

انا والعياذ بالله من انا كان شعري يضرب به المثل ههه جد والله وانا صغيره لين المراهقه ورب البيت شعري كان مثل شعور الصينيات بالتمام واحسن ناعم ناعم ماشاء الله واتسبح واجففه بالمنشفه بس واتركه لا استشوره ولا شي لانه ما يحتاج ويطلع ستريت يعني سيده مافيه طعجات ويجنن ماشاء الله حتى ملمسه حرير
المهم دايم كل مارحت لأحد وانا صغيره وربي كانو حريم جماعتنا تخوف حركاتهم يمسكوني على جمب ما ادري الا وحده خامتني تعالي يا حلوه كيفك تبين حلاوه اقول ايه تقول قولي لي وش تحطين على شعرك تخيلو >>اكره هالحركات والحريم اللي اذكرهم صرت ما امن لهم ولا لبناتهم اليوم ههه يعني لو سألت امي وش بتخسر
الزبده انه دائما كذا وكانو صديقاتي بالمدرسه دائما يلعبون بشعري ويعجبهم كانت الابله دائما تهزئني تقول انتي فاتحه مشغل في راسك ههه وربي صار لي مواقف لا احسد عليها
كانت وحده من البنات تقول انتي ما تتعبين كل يوم تستشورين شعرك وغير كذا ليه مو متقصف
قلت لها لا والله ما عمري استشورته ابدا وتصير عيونهم كذا ويقولون معقوله لا انتي تكذبين ومن هالكلام .. وما صدقوني الا يوم جا مطر مره وانا بالمدرسه وطلعت العب وهم كلهم واقفين ما يبون يتغرقون واللي ما تبي تخرب استشوارها ههه المهم كنا في الفسحه بعدين دخلنا واخر الحصص جف شعري ورجع زي ماكان وكلهن يذكرن الله
كنت ما استخدم الا زيت اللوز واذا ما عندي زيت زيتون واذا ما عندي زيت القلي اللي اسمه عافيه بس

المهم >>كم مره قلت هالكلمه ههه

بعد ما تخرجت من الثانويه تعرفون الجامعه واللبس والتغيير واللوك وهالأشياء...رحت صبغت شعري وقصيت وطلع حلو مره وعجبني وطمعت صرت كل ما شفت صبغه اصبغ ويله واقص ههه انا من النوع اللي احب اغير واجدد ما احب اجلس على نفس الشكل

مع الوقت يابنات شعري انعدم مع اني بس صبغته حوالي 4 مرات بس

بنات صار يطلع لي شعر خشن خشن خشن ينبت بين الشعر الناعم وربي قمة التحطيم واحيانا تخنقني البكيه يوم اتذكر كيف كان وكيف صار بنات وربي قهر وصار مره متقصف وملمسه موو ناعم وصار اذا تسبحت يطلع فيه شوي طعجات مو كثير بس مو زي اول ناعم ناعم
يطير وينفش شوي بعد الترويشه و اذا جف يصير متلبد ومتلاصق ما ادري شلون اشرح لكم
بس وربي اني مقهووره ونفسي يرجع زي قبل حتى كل من شافني قال وش مسويه بشعرك ليه تغير وصرت لازم استشوره اذا بطلع مكان يعني استشوار سريع لانه مو خشن بس عشان ما ينفش وتروح الطعجات البسيطه اللي فيه
وصار جاف جاف جاف ويتساقط بكثره
والقشره ما كنت اعرفها والحين فيني بشكل مو طبيعي
ابي حل واللي يسلمكم اللي تعرف برنامج لمعالجة الشعر التالف من الصبغات او اي شي يرطبه تقول لي ابي شي يرجع الحياة لشعري وربي متبهذل ورايح فيها
وبس