حياتي على الهامش

1. لي 7 شهور متزوجه


2. احيانا اقتنع بزوجي واحيانا اقول يابخت فلانه على زوجها ..


3. يمكن بعض عيوبه الي ماحبيتها :

بسم الله الرحمن الرحيم.. المستشار الكريم: السلام عليكم ورحمة الله وبركاته، وبعد.. أعتذر مقدماً إن لم أتمكن من طرح مشكلتي بشكل واضح، لأنني أعاني من عدم وضوحها حتى في ذهني..اكره الاستشارات لاني اكره وضع نفسي في موقف العجز ..
بالبدايه انوه لشيء اني عانيت من اكتئاب حاد لمده 4 سنوات في فتره زواجي الاول وبعد الانفصال لاني عجزت اتكيف واتقبل فكره الطلاق واخذت ادويه كثيره .... بعد 4 سنوات من انفصالي تزوجت يمن شاب عمره 39 سنه وانا عمري 27 .. انا سبق لي الزواج وفشلت فيه اما هو فلا.. اعاني حاليا من حالة اكتئاب تشل تفكيري .. وحياة على الهامش..!

لي 7 شهور متزوجه

احيانا اكون قمة في التفاؤل والنشاط واخطط للدراسةا واخطط لمشاريع كثيره .. واحيانا العكس وانطوي على نفسي وارقب الناس واتمنى ان ظروفي احسن .. كنت في فترة الخطوبه احس اني انسانه محظوظه والان احس اني محظوظه على ايش؟

احيانا اقتنع بزوجي واحيانا اقول يابخت فلانه على زوجها ..

من ناحية الجمال والشكل انا الحمد لله جميله جدا وهذه مشكلتي .. يمكن من صغري تصورت اني لازم ارتبط بشخص افضل من الجميع واستغرب جدا لما تتزوج احدى قريباتي من شباب من اسرتنا وهم اقل جمال مني .. كنت اقول في نفسي طيب ليه مايخطبوني انا ؟ ليه اخذو بنت خالي او بنت خالتي مع اني اجمل واحسن ماديا واجتماعيا ..
تزوجت انا من شخص بعيد مو من العائله والشهاده لله ماقصر معي بشي ابدا ويحاول يسعدني دايما وعمره ما غلط علي.. واذا طلبت فلوس مايقصر .. يمكن تقولون وين المشكله لحد الان :
المشكله اني احس اني مااحبه وانا اشوفه متلهف علي ..!
يمكن لانه غير وسيم ابدا ؟ ويمكن لاني بغيت اتزوج من ناس معروفه بالعائله وماحصل لي فحسيت اني اظطريت اخرج برا العائله
تراودني مشاعر ظلم و ان الدنيا غير عادله .. وان احلامي تتحقق لغيري .. اشياء اتمناها وادعي كثير انها تتحقق لي ماتصير رغم اني مو ناقصني شي وغيري تجيه امنياتي على طبق من ذهب.. !

يمكن بعض عيوبه الي ماحبيتها :

مثلا مايبغاني اتتحجب بالسفر - يشرب الخمر - يدخن - يكرهني لما انصحه ولا لما اتمسك بحجابي واشياء البعض يرى انها بسيطه بس انا اشوفها كبيره..
مرات اكتئب واجلس بس اراقب الناس واشوف بنت خالي الي تزوجت من نفس عائلتنا وهي اقل مني جمال واصغر مني بست او سبع سنوات .. يعني اعد جميله وزواجي يتأخر واتطلق واظطر اخذ واحد مو من العائله وهي اقل جمال مني وتتزوج بسن صغيره ؟
وبنت خالتي الي تزوجت من شخص يحمل شهادة الدكتوراه .. واخرى تزوجت من اخر كنت احلم فيه ..!
احيانا استرجع وارضى واستغفر واقول هذا الي ربي اختاره لي اكيد فيه خيره ويمكن لو ربي رزقني باحد ازواجهم ماكنت استمريت معاه .. لكن ارجع لهمي وارجع افكر انهم جدا مرتاحين وانهم حققو الي يتمنوه وماذاقو مراره طلاق ولا اظطروا للزواج من شخص خارج عائلتهم .. كنت ابكي على نفسي بعد كل مناسبه اقول ليه الناس ماتشوف يتعدون القريبين والحلوين ويروحون للاقل جمال طيب ليه ؟
في كل مناسبه تجمعنا احس الهم على وجهي وهم مبين عليهم مرتاحين مع ازواجهم.. ودي احد يقنعني مايوبخني .. ودي احد يشرح لي كيف ربي يقسم ارزاق الناس وكيف الناس ماتحس بظلم وكيف احساس العبد لما يشوف نعمه لغيره ماحصلت له هو واشياء كثيره ماادري وشلون اشرحها بس الي ابي اوصله ابي ارتاح واريح بالي وارضى .. اكيد كل انسان له نصيبه من الهم لكن وشلون اقتنع وشلون احط براسي ان برضو قريباتي الي تحققت لهم اشياء كنت اتمناها يعانون مثل ماانا اعاني ؟
لاتتوقعون اني احسدهم ابدا ودايما ادعي انه مااصيبهم بحسد ولا شي لكن شي في قلبي ماقدرت اتجاوزه واتمنى منكم تساعدوني وتطلعوني من حيرتي
ودي اعرف هالافكار الي تراودني من الاكتئاب ولا من سوء تفسيري للامور ولا هي فعلا مشكله ؟ احس بعجز تاام وشلل بتفكيري