خافوا ربكم لمتى احنا نتحمل كلامكم

بسم الله الرحمن الرحيم
كلامي موجه للبنات اللي بس ينقدون علينا يوم نشكي الحال
ياختي قولي خير ولا اصمتي
بعض المواضيع احنا نشوف بهالقسم وحده ضايقه الدنيا فيها وجات وكتبت همها وضيقتها بتفاصيلها
تجيك وحده ترد عليها عيب عليك ومدري وشو
ليه عيب؟
استغرب من جد ليه عيب؟
فيها شي اذا وحده فضفضت يعني؟
ولا بس حلال عليك انتي ياصاحبة الرد انك تفضفضين واحنا حرام علينا؟
وربي شي يقهر اذا يجون ناس مو حاسين فيك وبمعاناتك ويردون بردود بدون اي حساب لمشاعر صاحبة الموضوع
اللي تقول عيب ليه تطلبين العرس بالمنتدى
واللي تقول خافي ربك جايه تتشكين وتاركة الشكوى لرب العالمين
واللي تجي بالخاص تقول على انه نصيحه عيب تتشكين وتطلعين اسرارك بالنت
يعني وش نسوي بالله؟
نموت بحسرتنا حتى الفضفضه ممنوعه؟
يعني اغلب البنات هنا الوحده على بالكم انه بالسهوله تكتب موضوع تشكي فيها حالها؟
وربي مافيه وحده كتبت قصتها الا بعد ماضاقت فيها الوسيعه
اذا امي واختي وصديقاتي مقدر اقولهم شي يخص لهفتي للزواج لمين اشكي؟
لقيت ناس بالمنتدى همهم همي وقلوبنا على بعض وش المانع افضفض وش المانع اقول اللي مضيق صدري
والاقي احد يواسي
كلنا هنا هذا حالنا بس نبي نطلع شي بخواطرنا عشان نرتاح
وهذي جايه تقول عيب
لا مو عيب ليه عيب يوم تطلب الوحده انها تتزوج؟
ليه عيب يوم تبي الوحده تستر نفسها
استغربت رد لوحده بموضوع قريته تقول لصاحبه الموضوع ترا الزواج مو للعفه فقط!! عجيب!!
اوكي اذا قلنا الزواج مو للعفه خلاص انتي ياللي قلتي هالكلام خلي زوجك لا يقربك ولا يلمسك وخليك بالبيت وقومي بباقي مسؤلياتك واشوف انتي بتقولين هالكلام او لا
ناس مايحسون اللي فينا وجايين يلومونا على مواضيعنا
واغلبهم اما متزوجات عشان كذا تقولك الزواج غثا وقلق ووجع راس
اذا كان الزواج وجع راس خلي زوجك يطلقك ويتزوج وحده تبي العرس منها ترتاحين من وجع الراس ومنها زوجك ياخذ وحده تبي تعرس صح ولا لا؟
وبعضهم تكون صغيره تقول عيشي شبابك وانسي العرس
انتي ماعشتي اللي عشناه
والله مايحس بالنار الا رجل واطيها
ليه عشان الكلام ببلاش كلن يتكلم ولا يحسب حساب مشاعر الغير ليه ليه
ايه نبي نعرس
ايه نبي نعف انفسنا
ايه نبي زوج اشتغل ببيته وتصير بيني وبينه مشاكل وازعل منه ويزعل مني
ايه ابي بزر سعابيله طايحه حتى مو مشكله
ايه نبي كذا
ايه نبي نعيش سنة الحياه
كل الكائنات الذكر والانثى يتزاوجون
ليه انا ممنوعه اني احلم بهالشي؟
ليه مو بشر احنا مثلا؟
اللي ابي اقوله لكل وحده قبل ترد على موضوع فيه شكوى للحال: خافي ربك انتي قبل تردين
كفايه جروح فينا وانتي جايه تجرحين زياده
والله ماتدرين اذا صاحبة الموضوع اللي رديتي عليه بردك اللي كله جروح ماتدرين يمكن ترفع يدها وتدعي الله انه يبلاك بمثل مابلاها عشان تدركين بعدها قيمة الزواج والعفه والستر
الله يستر علينا بالزوج الصالح انا وكل بنات القسم وكل بنات المسلمين
يارب لاتشمت بنا الناس يارب
يارب اسعدنا يارب
يارب كل من اعفت نفسها عن الحرام يارب عوضها بزوج يسعدها ويقضي لها حاجتها ويكون لها عون بالدنيا والاخره
امين يارب
امين يارب