خريجونا والقدرات ويافرحه ماتمت

1. خريجونا والقدرات ويا فرحة ما تمت


2. فتحي حلواني

هذا مقال كان في جريده عكاظ الجمعه

خريجونا والقدرات ويا فرحة ما تمت

فتحي حلواني

هااه يابنتي يا فتو بشريني عسى قبلووكي في الجامعه والا الكليه ؟ ...لا كليه ولا جامعه.... ليه وانتي نسبتك حلوه.... مدري عنهم؟ شهر زمان وهما يمرمطونا في الموقع حقتهم... اسبوع ونحنا نسجل في البيانات واسبوع عشان تحديد الرغبات واسبوع عشان تأكيد الطلب لانه كنا مستنيين نتيجة اللي بيقولوا عليه اختبار القدرات تخيل يبويا 12 سنه بندرس ونتعب ونسهر ونزاكر عشان يقبلونا في الجامعات او الكليات وتجي ساعه او ساعتين زمان عشان هدا الاختبار اللي بيقولوا عليه قدرات و يدمروا فيه مستقبلنا وينهووا حياتنا بكل بساطه، يللا ما اقول الا حسبي الله ونعم الوكيل .. دحين انتي قاعده تبربري تقولي ايش فهميني ايش صار في النتيجه ؟ تعال اوريك النتيجة على موقعهم المحترم شايف ايش مكتوب بعد ما درسنا 12 سنه شوف ايش اخرتها وابغاك تضحك من جوة قلبك؟!!!! ... استني خلييني احط النظاره في عيوني لانه النظر صار على حركرك مكتوب ياستي (( وفقا للمعايير الاكاديمية للمفاضلة التي اعتمدها مجلس الجامعه فإنه يمكنك الدخول على رابط تحديد الرغبات مرة اخرى لاختيار برامج مدفوعة التكاليف)) ايش يعني يافتو الكلام ده ؟ يعني يبويا اللي ما انقبلت وتبغى تكمل دراستها تكُع فلوس عشان تنقبل في الجامعه ... فلووس ؟!!!! هيه ناقصه اللي فينا كافينا .... وبعدين حقون وزارة التعليم العالي ما كان ده كلامهم هما قالوا وبالفم المليان انهم ح يقبلوا 300 الف طالب وطالبه في الجامعات فين كلامهم ما طبقووه والا كل الحكاية كلام جرايد وبعدين السؤال اللي يدحدر نفسه كيف هادي الجامعات زي ما بيقولوا حقونها المسؤولين ما فيها مقاعد لكن لما تندفع الفلوس تكون المقاعد جاهزه ومتوفره شي غريب وعجيب ...واذا كانت المشكله انه في نقص في هيئة اعضاء التدريس زي ما بيقولوا كيف بقدرة قادر يكونوا هيئة اعضاء التدريس جاهزين لما تكون الحكاية فيها رسوم... وزي ما بيقولوا كمان اذا في نقص في هيئة اعضاء التدريس ليش ما يجيبوا دكاتره من بره البلد وميزانيتهم ما حتكلف وخلوا الجامعات تشتغل وفي التخصصات اللي تحتاجها البلد في المستقبل بدل من وجع القلب اللي بنشوفه كل سنه في حكاية القبول في الجامعات ياناس ياهووه يا مسؤولي الجامعات ماهي ناقصه مصاريف ومو كل عيله عندها فلوس عشان تدفع قيمه دراسة ولدها او بنتها الجامعات فيها مقاعد كتييره اقبلوا الخريجين والخريجات وبعدين تعالوا هنا فهموني ايش المبررات اللي عندكم عشان تحرموا وتدمروا مستقبل هادولا اللي اتخرجوا انهم يدخلوا الجامعات او الكليات والدوله الحمدلله مو مقصره عندها الامكانيات الضخمه انها تدبر لكل خريج مقعد مهما كانت نسبة الخريج وبعدين هادول اللي اتخرجوا اذا ما يكملوا دراستهم في بلدهم فين يكملوها وبعدين يكون في علمكم ترى في دوله عربيه قريبه مننا الخريجين اللي فيها اضعاف اضعاف اللي عندنا وكلهم بيقبلوهم في الجامعات عشان كده بقول وبالفم المليان يا مسؤولي الجامعات لا تقفلوا الابواب في وجوه الخريجين والخريجات لأنه زمان علمونا انه (العلم نور) والا انتو ايش رايكم وعيشووا كتير تشوفوا كتير
والله انه برد قلبي شويه يلا ابغى اراءكم ؟؟؟؟؟؟