خطوه وأوصل للجنون

1. تمنيت ان بلدنا تكون شوي متطوره ويفتحون حضانات الى الساعه 3 على الاقل


2. ماهي صعبه علي استقدم شغاله ..بس ياعالم افهمووني انا ماابي

السلام عليكم ورحمة الله وبركاته
اسعد الله اوقاتكم بكل خير
طبعا اكيد مستغربين من العنوان ووش السالفه بس كلها كم سطر وتعرفون وش السالفه ووش اللي جد يدعو للجنون
> خارج النص < الكيبورد هذا بيكمل الناقص يبي يكرهني حتى الجلسه على النت لعنبو ابليسه ماله شهرين وش فيه قام يستهبل مدرري
المهم ..
بداية ابعطيكم لمحه سريعه عن وضعي وعن حياتي
انا سكون < قولي قسم
متزوجه لي سنه وشهر تقريبا حدي تزوجت دخلت بمعمعة التأثيث وبعدها على طوول دخلت بسالفة الحمل والحمد لله عدى على خير والحين عندي ولد الله يحفظه عمره 3 شهور وعليها
ساكنه بمنطقه بعيده عن اهلي ماعندي بهالمنطقه غير اختي .. وناس من الجماعه ماتربطني فيهم اي صله
موظفه ودوامي من 8 الى 4 .. والحمد لله عل كل حال
مشكلتي ياطويلات العمر ... انا من الناس اللي ضد الشغالات وضد تواجدهن في بيتي
لعدة اسباب منها
بيتي مايستحمل وجود اجنبيه .. يعني كلها 4 غرف وصاله ومطبخ ولكم الكرامه حمامين
الصاله والمطبخ وغرفة نومي وغرفة الكمبيوتر ( اللي هي المخزن وغرفة الملابس عندي ) كلها تقريبا مفتوحه على بعض .. والمجلس والمقلط وحمامهم معزوله عن هالجناح وبيني وبينهم باب
يعني بالله لو جبتها .. وخليتها عند ولدي فترة الصباح .. وين تنقلع عن وجهي باقي اليووم ..؟؟؟
وخصوصا زوجي ماشاء الله عليه اللي دايم عنده ضيوف < مأساه
وتتوقعين جية ضيوفه بأي لحظه
ثانيا ... انا انسانه غيوره بتقولون خبله تغار من شغاله ايه خبله < تبي تضارب
ومااتحمل وحده غريبه تناظر لزوجي او حتى تمر من عنده .. وهو دوامه شفتات .. يعني اسبووع مداوم معي .. واسبوع يدوام من الساعه 2 الى 10 < يعني هالاسبوع يكون متواجد فترة النهار
وبصراحه اللي شفته في بيت اهله وطريقة تعامل اخوانه واخواته مع الخدم .. مره مااعجبني حسيت الدنيا تسيب .. وعادي جدا الرجال يجي يملي على الشغاله اوامره واحيانا يسولف معها وانا هالشيء مااقبله ولا ارضى فيه بتاتا البته
طبعا لحد الحين مافهمتم وش الشيء اللي يجنن بالموضوع
طبعا ماراح يحس بمعاناتي الا الموظفه او الطالبه ومتزوجه .. جد جد صعب التوفيق بين البيت والزوج والطفل والعمل .. ارهاق جسدي الى ابعد الحدود
ومشكله لو كنتي من الناس اللي تبي توصل درجة الكمال .. يعني ودك ان بيتك يكون دايم على سنقة عشرره .. صعب والله مهما حاولتي .. لذلك انا كتبت هالموضوع
اليوم ولأول مرره احس بالعجز والحقد على المنطقه اللي انا فيها .. وعلى المملكه عمووما

تمنيت ان بلدنا تكون شوي متطوره ويفتحون حضانات الى الساعه 3 على الاقل

> للتنويه < انا احط ولدي عند بيت اختي وهي بعد موظفه ودوامها تقريبا نفس دوامي وعندها ولد عمره 8 شهوور .. ونخليهم عند الشغاله .. وطبعا انا حاطه للشغاله مبلغ معين .. ومع اني مااحبهم بس اللي مخفف الوضع علي هو ان اختي شديده وزوجها اشد .. وبنتها عمرها 5 سنوات على طوول معهم
لكن الوضع على قد ماهو مطمن .. على قد ماهو متعب .. بيتها بعيد عن بيت بمسافة 10 دقايق تقرريبا ودوامي ابعد .. ومن يووم داومت وانا اوقع متأخره وهالشيء راح يأثر على عملي بالسلب !!
لقيت حضانه تبعد عن بيتي شارعين .. بس مشكلتها الى الساعه 2 ونص .. ولما فاتحت اختي بالموضوع قالت لي بلا خبال .. وين بتودينه بعد الساعه 2 ونص قلت لها اجيبه عندي قالت اييه هذا لما يكون عمره سنه مو الحين .. خليه عندي الين يكمل سنه وبعدين شووفي < طبعا شغالتها ماباقي لها وقت .. يمكن كلها 8 شهوور وتروح .. وشغالات الحين صعبه تثقين فيها .. خصوصا انهن لا لغه ولاشيء
يعني لو استقدمت وحده ثانيه ماراح اقدر احط ولدي عندها .. ونفس الشيء صعب علي انا استقدم حتى لو اني انحديت لاني لازم اجلس معها فتره اختبرها فيها واعرفها عن قرب اكثر .. وهالفتره ماراح تكون اقل من 3 شهور .. ومن وين لي اجازه 3 شهوور
> احس كلامي ملخبط ويمكن كثير منكم مافهم او يقوول اختصري .. بس عاد لاتشرهون علي ودي اسولف <
بإختصار اكثر وبتحديد اكثر
انا ماابي انحد على الشغاله .. ومع ذلك حااسه ان وضعي عايم
يعني الحين اخذت نظره سريعه على البيت ولاحظت ..
الابواب مسحتها قبل ولادتي بشهرين .. يعني الحين لها 5 شهور < وعع
الجو عندنا رهيب هاليومين وعجاج على كيف كيفكم .. لقيت جناح الرجال صاير عدم من الغبار اللي عليه .. هذا وانا الصباح مغسله الحمام لكم الكرامه
سلة الغسيل مليانه ملابسي والغساله سلكها شكله خربان ماتشتغل الا اذا رصيت عليه < وش خربه وانا عمري مالمسته ولا غيرت مكانها
وملابس زوجي البيضاء يبغالها كوي .. والمخزن يبغاله ترتيب والمطبخ لي شهر مامسحت الدواليب العلويه .. والخضار يبغالها فرز والثلاجه مكركبه شوي يبغالها ترتيب والصاله ناقصها تحف وشوية تنسيق < ياربي جد جد ابنجن
الخميس والجمعه هاذي مافضيت اكوي ملابس زوجي لإني مزكمه وولدي مزكم
وقبل كم يووم كنت مرتبه المخزن .. وزوجي الله يهديه مضيع له اوراق وطلع جمييع الشنط وجلس يفتش فيها والمراتب لقيتها محيووسه وزي ماقلت لكم الجو عندنا عال العال الدنيا كلها غبار
والله لو يجوني ضيوف استحي اخليهم ينامون عليها < استنتجت مؤخرا انه لازم علي اشتري تلبيسه للمخدات والمراتب
انا مازلت عند كلمتي وادعي ليل ونهار ان الله لايحدني على الشغاله .. والمشكله ان كل من قابلني من بعيد وقريب قال لي كيف عايشه وكيف بيتك .. لا لا لازم لك شغاله
يمكن هو الشخص الوحيد اللي بصفي زوجي .. اما البقيه بما فيهم امي واللي تعرفني قد ايش اكره التعامل مع الشغالات تقول لي لازم لك شغاله
يمكن كثير منكم حيدخلون ويقولون فعلا لازم لك شغاله بما انك موظفه .. او بيقولون لي سيبي الوظيفه
وانا كلا الامرين عندي .. احلاهما مر

ماهي صعبه علي استقدم شغاله ..بس ياعالم افهمووني انا ماابي

والله ماعندي استعداد تجي وحده تقيد حريتي .. انا في بيتي البس اللي ابي البسه
مرره نجلس بالصاله مرره بالمجلس مرره بغرفة الكمبيوتر .. مرره بغرفة النوم .. انا كذا مرتاحه وزوجي كذا مرتاح ومبسوط .. وماتدرون قد ايش كلما اصريت قدام اهلي واهله على موقفي من ناحية الشغاله كلما كبرت بعينه وكلما جاء وشكرني وحب على راسي وشد على يدي
الزم لاعلي استقراري النفسي .. ماابي اصحى وانام وانا على هاجس ان هالشغاله ممكن تكون زي شغالة فلانه او فلانه ممكن تكون مريضه وممكن تكون داشره وممكن تكون ساحره وممكن تكون حقووده وهلم جراً < يمديكم على هلم جراً
انا كل اللي ابيه .. ابي ارتب جدول معين .. ابغى طريقه مجربه تخليني التزم بهالجدول
ابغى بديل لموضوع الشغاله
توي شفت موضوع عن غسالة الصحون واعجبني بس مطبخي جد مايستحمل .. ولما استقر في بيت ملك ذاك الوقت اجيبها
اشتريت قبل فتره مكواة بخار .. وجد جد ارتحت عليها وصرت اكوي بااستمتاع لإن النتايج شيء
السيراميك عندي امسحه كل 3 ايام .. والمطبخ اصلا انا قليل مااطبخ < وهالشيء مضايقني .. بس زوجي يصر احيانا اننا نتغدى نواشف وننام العصر بدل مااحوس وانا تعبانه من الدوام
مع اني مأدية جهدي الا اني مازلت احس انه بإمكاني تقديم الافضل بس ابغى توجييه
ترى وضعي الحين ارحم بكثير من بداية زواجي ووحمي .. اول كان بيتي مكركب فوق ماتتخيلون وغرفة نومي كلها ملابس والصاله كلها علب عصير واكياس ليز بالملح والخل
وماارتبها الا لما يدقون علينا ناس بيجونا . ذاك الوقت تلقوني اكسر بنفسي واجبر وارتب على حساب ان محد يقول كلمه من وراي
اهتميت للناس ونسيت اهم الناس < زوجي كنت ماخذه الوضع عادي من ناحيته
الين مرره حسيت على دمي ورتبت غرفة النوم ورتبت دولابه .. لما دخل حسيت جد انه انبسط وانه كان يتمنى هالشيء بس مايقدر يكلمني خوفا منه اني اتحسس من هالناحيه
ومن يوومها وغرفة نومي هي ارتب شيء بس الباقي < حوسه
> احس اني كثرت قرق والمفيد قلته بسطرين <
ارجع واقول
ابي منكم مسانده وابي منكم تشجييع ابي منكم ارآء .. ابي منكم كل شيء تقدرون عليه
ارحموا عزيز قوم ذل < مدي وش دخلها
احساس العجز صعب .. بس ابعرف شلون ترتبون وضعكم وكيف بيوتكم وبدون مبالغات وادعاء للمثاليه
وه وه احس جد اني ارتحت مع اني قرقت على روسكم واحس انكم بينكم وبين انفسكم تقولون مالها داعي هالمعلقه وهالروايه
ومع اني متأكده ان اللي في بالي كان شيء واللي كتبته شيء ..
مشووا حالكم وانا لاتذكرت شيء كنت ابكتبه .. ابرجع واكتبه < يااليل
ولاتنسون ابي حلول واللي يعافيكم
دمتم بود < هاذي من اثار الفضفضه واتمنى القى منكم اللي تتفهم وجهة نظري ورغبتي الشخصيه