خلطتي الخاصه للشعر

مرحبا خواتي
حبيت افيدكم بتجربتي في العناية بالشعر
بس احب اخبركم شئ مهم بالبداية
انا شعري خفيف من الله وامنية حياتي اشوف شعري غليظ
بس للاسف على كثر ما سويت خلطات وتجارب ماقد غلظ زين
بس من نواحي ثانية حال شعري احين افضل بكثير
التساقط تقريبا معدوم
شعري يبرق وصحي كثير مافي تقصف نهائيا
وزادت نعومته وصار افضل من قبل بكثيير
قبل كان باهت وضعيف جدا
جربت خلطات كثير كالعاده بس استقريت على خلطه وحده هي افضل شئ
وتقريبا تعالج كل مشاكل الشعر ومضمونه جدا جدا جدا
اول شئ تجيبين حناء نوعيه زينة
واللي ماتحب الحنه تستخدم السدر
بعد يعطي نفس المفعول بس الحنه احلى حق الكثافه
واللي تبي تستخدم الاثنين تقدر تحط مرة سدر ومرة حناء
المهم لازم تتأكدون انه نوعيه زينه مب غش
انا شعري قصير وخفيف ما احتاج استخدم كمية كبيرة
احط ملعقتين فقط من الحنه او من السدر بحسب اللي بستخدم
ملعقه خميرة فورية
حزمتين جرجير
وبصله متوسطه
و3 فصوص ثوم
انا احط هالمقادير لان شعري قصير وخفيف مثل ما قلت لكم
بس كل وحده تحط بحسب شعرها
يعني اللي شعرها طويل وغليظ تحط ضعف الكمية
ناخذ البصله نقشرها ونقطعها 4 اجزاء
ونحطها هي والثوم في اناء صغير ونصب عليهم كوب ماء متوسط
ونحطها على النار ونخليها تغلي 5 دقايق بس
بعدين نسكر عليهم ونغطيهم ونخليهم لين يدفون شوي
نخلط الحناء او السدر مع الخميرة
ونضيف لهم اي زيت يناسبكم وتستخدمونه
عن نفسي استخدم زيت دابر املا القديم
احط ملعقتين من الزيت على الحناء والخميرة
بعد كذا اجيب الماء اللي فيه بصل وثوم واحطهم بالخلاط الكهربائي وهم دافين
واضيف لهم حزمتين الجرجير
واخلطهم زين عشان اعصر البصل والثوم والجرجير
بعد كذا اجيب مصفاه صغيره
واصفي الماء من الخليط وارمي الباقي
عشان لا يأذيكم بنات وقت الغسال اخذوا الماي بس
واعجن فيه الحناء عدل
بعد كذا اغطيها واخليها بمكان حار عشان تتخمر
بعدين احط الحنه بشعري واهم شئ فروة الراس
احط فيها بكثرة وعلى الشعر كامل
اغرق الشعر حناء واخليها ربع ساعه تحت المروحه
عشان تنشف شوي
بعدين اخذ اللف مال الاطباق الشفاف الف به شعري واغطيه زين
بعدين اجيب قبعه استحمام بلاستيك واغطي راسي ايضا
ثم اربطها بقطعه قماش مخصصتها لهالخلطات
واخلي الحناء من الليل الى الصباح اغسلها
يعني 8 ساعات فما فوق
وبليز لاحد يقول مب زين ومادري شنو والدكتورة قالت والدكتور قال
الحناء معروفه من قديم الازل تنحط للشعر اقل شئ 8 ساعات
لاحد يفتي في هالموضوع رجاءا لاني خبرة
انا اخليها اكثر عن 12 ساعه
لاني متعودة احط خلطاتي 9 مساءا واغسلها على 12 الظهر
بعد كذا تغسلون شعركم بالشامبو عادي وتنظفون شعركم زين
اللي تبي تستخدم حمام زيت انصحها بحمام زيت فاتيكا تغذية مكثفه
اللي غطاه وردي لا تاخذون اللي غطاه بنفسي
ترى مب شئ كلش اللي غطاه وردي وايد ممتاز
واللي ماتبي بعد ما تنظف شعرها وتنشفه من الماي
تدهن شعرها بالزيت اللي يناسبها وتخليه بدون غسال
انا كنت اسوي هالخلطه يوم وترك يعني 3 مرات بالاسبوع لمدة شهر
بعدين خففتها وخليتها مرتين بالاسبوع
وبعد كذا ثبت على مرة بالاسبوع
وباقي الاسبوع ادهن شعري بالزيت ما اخليه بدون زيت
ومرة اسوي سدر ومرة اسوي حناء
والنتيجه اكثر من رائعه
مافي نتفه تقصف بشعري نهائي الحمدلله
والتساقط شبه معدوم ممكن تطلع لكم باليوم شعره او شعرتين بالمشط فقط
غير اللمعه والصحه اللي بتبين على شعركم
واكرر اهم شئ الاستمرار
الاهمال ترى يخرب كل شئ واللي يبي الدح ما يقول اح
لازم تتعبون على نفسكم شوي عشاان تحصلون النتيجه اللي ترضيكم
وعقب اكيد بترتاحون بإذن الله
هذا جدولي وان شاء الله يفيدكم
ولا تنسوني من دعواتكم بهالشهر الفضيل
ملاحظة : اللي يزيد عندها الحناء
تحطها بعلبها وتثلجها وترجع تستخدمها
بس ما تحتفظ بها بالثلاجة لا ترى تخرب لازم تخلونها بالفريزر تتجمد
ووقت الاستخدام ذوبوها
وتحياتي لكم يا حلوات