خلطتي المفضله من 12 سنه

إكليل

10-08-2022 - 02:09 am

مرحبا صبايا
كيفكم
من 12 سنه رحت مركز تدريب للتجميل
شفت صبيه لفتت نظري بحركتها وحيويتها
وبشعرها كمان...
قلت خساره المفروض تكون بتهتم بشعرها خصوصا وانها في مركز تجميل...
كان شعرها كتير جعدي
كتير جاف
كتير متقصف
كتير بكسر الخاطر
المفاجأة !!!!!!
بعد 3 شهور شفت نفس الصبيه.... لكن شكيت تكون هي ولا لأ
عارفين ليش ؟
شعرها تغير 80%
صار منزرو طري
في لمعه
وكلو حيويه
مع إنها ماكانت مستخدمه السشوار
حبيت أحكيلكم القصه منشان تقتنعوا زي ما أنا إقتنعت
والخلطه غريبه لكن جدا بسيطه
المكونات :
2 كأس زيت جوز هند
2 كأس ماء
1 باكيت تين مجفف ( موجود في السوبرماركت )
الطريقه :
قطعي التين أنصاف أو أرباع
اضيفي الزيت والماء
خلي الخلطه على نار متوسطه ... لحد ماتشوفي بقع الماء اختفت من الخلطه
أو احسبي نصف ساعه على نار هاديه نوعا ما
اتركي الخلطه تبرد ... صفيها ... حطيها في مرطبان زجاجي
استخدميها كحمام زيت مرتين في الأسبوع .... أو حسب الحاجه.
و أعتذر جدا للإطاله

التعليقات (8)

حلم فتاة

10-08-2022 - 04:32 am

يعطيك العافية اختي
انتي جربتيها؟؟
ممكن تقولين لي طريقة حمام الزيت كم مدة اخليه على الشعر؟

#CuTe#

10-08-2022 - 05:33 am

التين مايطيح الشعر؟؟؟؟؟؟؟؟؟

إكليل

10-08-2022 - 06:34 am

حلم فتاة
هلا حبيبتي
أنا جربتها من 12 سنه ومازلت مستمره عليها لهلا
بس بسويها بفترات متباعده
لأنها كتير بتنعم الشعر
وانا بكره الشعر السايح
بس للمعلوميه ممكن تستبدلي 2 كأس جوز هند
ب 1 كأس زيت جوز هند و 1 كأس زيت زيتون
زيت جوز الهند بينعم كتير
وزيت الزيتون بيقوي كتير
طريقة حمام الزيت :
دفي الزيت شوي على النار
حطي على شعرك ... خصوصا الفروه
إعملي تدليك بأصابعك للفروه وخلي الزيت ييجي كمان ببقية الشعر
هلا البسي بيونه نايلون
ممكن تحطي ورق نايلون اللاصق تبع الطعام
خليكي ساعه أو بالكتير ساعتين
شيلي النايلون
انتظري 10 دقائق .... علشان تبرد فروه راسك
وماتكون المسامات مفتوحه ...
غسلي شعرك باشامبو... ممكن تكرري الغسيل لحد ماينضف شعرك من الزيت
لا تقلقي من الريحه ... رح تروح أكيد لما يجف شعرك
لا تسشوري شعرك وهو مبلول
خليه ينشف 90 % هذا إذا بدك تسشوري
ملاحظه :
لو غسلت شعرك مباشره بعد ماتشيلي النايلون
رح يتساقط .... لأن المسامات ماسكرت منيح
أتمنى إني أكون وضحت
ولك كل الحب

إكليل

10-08-2022 - 07:35 am

#CuTe#
مين حكالك!!
أبدا حبيبتي
وناس كتير أعطيتها الوصفه ولهلا بستخدموها.
والخلطه هاي درسناها في المركز.... يعني لاتقلقي
مو أنا مخترعتها

أماني البدر

10-08-2022 - 08:36 am

نجربي والله يستر
مشكوره حبيبتي

@ أميرة الورد @

10-08-2022 - 09:37 am

مشكوره يالغاليه ..

اكرام2007

10-08-2022 - 11:39 am

جزاك الله كل خير حجربها و اقلك النتيجة تلسلمي

# تاليـا #

10-08-2022 - 12:40 pm

مشكوره
رااح نجرب بس مو انا بشووف احد غيري خ
سي يو

احطه لا ماحطه الا احطه تكفون ردو علي←
زيت anoop الهندي→