دورة ماك في الفورسيزن بقطر

السلام عليكم ورحمه الله وبركاته
هلا وغلا بكل الأمورات...
الصراحه وأنا أتصفح المواقع والمنتديات طحت لكم على موضوع جنان..
رائع وأكثر من رائع وهذا الموضوع كان جهد متعوب عليه من الأخت qtr221 وعجبني جدا وماحبيت
أفوته على اللي ما شافوه..
باختصار..
م M.A.C اك
ماركه روعه..وإذا جا طاري ماك ارتفعت الأعناق تدور المصدر..
لأنها ماركه روعه وماخذه عقل الكثير...
والموضوع عبارة عن دورة أقيمت في قطر في الفورسيزن من قبل ماركة ماك..من زمان..
والموضوع قديم فأكيد الأغلب اطلعوا على الموضوع حقها بس حبيت انقلها للاستفادة وللي ماشافوه..
والأخت qtr221 حضرتها وكانت تنقل أحداث هذي الدورة بشكل مفصل ورائع وأسلوب جدا رائع..
وإليكم أحداثها مثل ماوصفتها qtr221
هالنوع من الدورات ينطرح من قبل ماك مرة بالسنه
تجي خبيره عالميه وتعطينا مبادئ المكياج
كانت الدورة لمده يومين تاريخ 19 و 20/11/2006
وسعر الدورة 1250 ريال بعد الدورة نشتري بهالقيمه اي شي من منتجات ماك لمده شهر واحد
من الساعه 4 العصر لحد الساعه 8 بالليل
وكان عندنا بريكين بعد صلاه المغرب وبعد صلاه العشا نصلي ونرجع القاعه وناكل من السناك اللي حاطينه
غير العصاير والقهوة والشاي
وكانت المجموعه تقريبا 25 وحدة موزعين على 5 طاولات
ومعانا جميع خبيرات التجميل بماك اللي يشتغلون بالمحل
كانت الخبيره هنديه وعايشه بلندن تدرس طب بس بعدين غيرت تخصصها وقررت تكون خبيره مكياج
وتقول انها حطت مكياج لكثير من المشاهير مثل نعومي كامبل واشوريا وتوني بلير ههه
كان عنده فلم وثائقي وهي مكيجته بهالفلم وكثير كثير من المشاهير
واستلمت قبل فتره مكياج افلام كامله مثل فلم دافيداس الهندي
واول شي عطتنا اياه هو نقاط مهمه قبل بدايه اي مكياج :
1- لازم نستعمل سكراب للبشره مرتين بالاسبوع
2- اي بشره محتاجه لترطيب حتى البشره الدهنيه والمختلطه
كان اليوم الاول درس عن كريم الاساس بس
جابت خبيره التجميل الفلبينيه اللي تشتغل بماك وقالتلنا شوفو وجهها الحين بتلاقونه مسطح
ومع المكياج راح نخلي الوجه بارز وفيه ملامح
اول شي نستعمل البخاخ الفيكس تقريبا 4 بخات على الوجه كامل بما فيه العيون ونخليه لمده دقيقتين عشان تمتصه البشره
بعدين نحط كريم المرطب ويكون بكميه = ملعقه صغيره بس طبعا ما راح نستعمل كريم دهني
لا راح نستعمل الكريم اللي بماي مو دهن
تقول مو تحطون 5 نقط هذا غلط كميه وافره ونستمر بالتدليك للوجه والعيون من تحت لفوق لحد ما تمتصه البشره
ونحط البرايم وهذا يعطي لمعه للبشره
بعدين نحط الكونسيلر ويكون بكميه بسيطه
نحطها على الاصبع ونبتدي نسخنها بين الاصابع عن طريق الفرك
يعني تفركون اصابعكم ببعض وبعدين تحطون الكونسيلر بالصبع عن طريق الضغط على كل العين من فوق لين
تحت مو تنسون جهه الخشم كل العين بدون استثناء
وبالنسبه لحب الشباب والبقع الحمرا على الوجه
نحط عليها شويه من الكونسيلر عن طريق ضرب الفرشاه عليهم عده مرات
وشويه مزج لي تمتصه البشره وما يكون متكتل بمكان واحد
وبعدين نختار كريم الاساس اللي يريحنا سواء السائل او المضغوط الكريمي انا اخترت هالنوع
===> تابعو ..