رسالة الى كل طالبة مستجده في الجامعة

السلام عليكم ورحمة الله وبركاته
مساالخير
كيفك ؟؟ان شاء الله بخير ..
( اللي ماعندها وقت تقرا الموضوع كامل تقرا اللي بالأحمر والأسود هو أهم شي)
أكيد بتسألين,,وش تبي هاذي لاجتنا موضوع طويل ورساله خاصه فينا وش السالفه ..
السالفه ومافيها ياطويلة العمر ,,
اني بيوم من الأيام كنت مستجده زيي زيك بس الفرق بينا هو انك انتي لقيتي من ينصحك ويفتح عينك بس أنا للأسف لا ..
والله العظيم ,,
ماابي الا افيدك بخبرتي وتجربتي عشان ماتطيحين بنفس أغلاطي بيوم من الأيام وتقولين ياليت الأيام ترجع واصحح كل شي ..
صدقيني انا ماابي اتفلسف عليك ولااسوي نفسي كبيره وفاهمه
واعطيك نصايح وارشادات ,,بلعكس ..
الله العالم بنيتي ..
اسأل الله يعطيني على قد نيتي ..
في البدايه ,,
حابه اقول شي مرره مهم بالنسبه لي ,,
رسالتي هاذي موجهه للبنت اللي كافحت في ثالث ودرست واجتهدت وجابت نسبه وحابه تكمل وتدرس ..
مو اللي جايه وكل همها اللعب والوناسه وتبي الجامعه عشان توسع صدرها وتنبسط مو عشان تدرس ..
هاذي انا اقولها ,,,,
بليز
حطي رجوع للخلف ولاتقرين كلامي ,لأنه مو لك ..
ريحي نفسك ولاتضيعين وقتك الثمين عليه...
مع ألف سلامه ....
نرجع لموضوعنا ,,,
أول شي لازم تفكرين فيه يااختي هو طريقتك واسلوبك ...
لازم تتغير ..
بتقولين كيف ؟؟؟
الجامعه تختلف عن المدرسه ..
أول شي صداقاتك ,,
في الجامعه مو نفس المدرسه كل وحده تسولفين معها يعني صديقتك ,,لا ابدا ..
أكثر شي يميزها انها تجمع جميع انواع البشر ..
لاتستغربين اذا شفتي بنات من مذاهب مختلفه ,من بيئات مختلفه,من أفكار ومعتقدات ماعمرك حتى سمعتي فيها ..
اللي ابيه منك تحاولين قدر الإمكان تكون صديقتك المقربه من نفس طبقتك ,مذهبك ,أفكارك ,اسلوبك ..وكل شي
وأهم شي ,,
اسرارك لاتدري فيها أي بنت ,مهما كانت علاقتك فيها قويه..
واتصور اهم سر لازم تخبيه على البنات درجاتك ..
حتى لو تجيبين سي (يعني جيد)لاتقولين لأحد..
وهذا الشي اقوله لك من تجربه وحده من صديقاتي..
صدقيني العين حق ..
وكمان أكثر شي تختلف فيه الجامعه عن المدرسه ,,مناهجها ..
يعني المنهج الواحد في الجامعه يساوي ثلاث اضعاف منهج المدرسه..
وكلن على حسب قسمه ..
الحفظ ,,
احرصي انك تحفظين أول بأول لايتراكم عليك ..
مو زي ماسويت
آه بالقهر ..
تدرين وش كنت اسوي ؟؟؟
كنت ماافتح المنهج الا قبل الإختبار بساعات قليله ..
من زود الغباء اللي فيني والتعود على مناهج المدارس القليله ..
الفهم,,
اذا عندك مادة فهم زي الكمي مثلا (يسمونها رياضيات بالعامي)
احرصي انك تفهمين بنفس المحاضره وتكتبين اهم شي الكتابه
اكتبي محاضراتك بنفسك ولاتعتمدي على فلانه وعلانه ترا بعض البنات ترفض تخليك تصورين دفترها ..
وبالبيت انتبهي ,,
لاتقعدين على النت والتلفزيون وتخيبين خيبتي ..
حاولي تحلين تمارين اضافيه بأقصى سرعه ,,وبتحسين بمعنى كلامي هذا وقت الإختبار ..
رجاءا لاحد يفهم من كلامي
انه يعقد نفسه 24 ساعه ,,لا ,التوازن حلو ..
قسمي وقتك زي ماتحبين ..
وقت للطلعه ,وقت للنت ,وقت للمذاكره,وقت للتلفزيون وهلم جراا ..
كتابة المحاضرات ,,
بهاذي من زود تناحتي ماكنت اكتب واعتمد على البنات ..
بس اللي كنت اشوفه يسونه البنات مرره عجبني ,,,
في طريقتين ..
وحده لمواد الفهم والثانيه لمواد الحفظ..
1/ التخطيط والنوتات :
راس مالها كتاب الماده ونوتات وقلم تخطيط ..
النوته :الأوراق الصغيره الملونه اللي تتلزق من ورا..
قلم التخطيط:القلم العريض اللي ينخطط فيه على الكلام ويصير واضح..
والطريقه سلمك الله ,تخططين مع الإستاذه والأشياء اللي تقولها ومو موجوده على الكتاب تكتبينها بالنوته وتلزقينها وبس ..
وافضل شي استخدامها في الحفظ ..
2/الورق ,,
ورق مسطر عاادي ,وملفات على عدد موادك+ملف اضافي,اقلام ملونه عاديه ..
تخلين لكل ماده من موادك ملف خاص فيها ..
وتخلينه بالبيت عشان لايثقل عليك الشنطه..
والملف الزايد تاخذينه معك للجامعه وتحطين فيه 10 15 ورقه..
وتكتبين المحاضرات وتحتفظين فيها بالملف هذا وإذا وصلتي البيت توزعين كل محاضره على ملف الماده الخاص فيها ..
وبس.....
أكيد بتقولين ..
وليه مااجيب دفتر كبير واريح عمري من سالفه الورق ؟؟؟؟؟
يااختي بالجامعه بتصير شنطتك على كتفك أغلب الوقت
موزي المدرسه ترمينها بأي مكان..
ومايسوى عليك تشيلين دفتر وش ثقله طول النهار..
والله العظيم ان شنطتي مسويه اثرعلى كتفي من ثقلها ,,ورقبتي صارت تعورني منها..
اربع كتب كنها مجلدات ودفتر كبير ,,الله لايلومها المسكينه..
وكمان نصيحتي لك خذيلك شنطه خفيفه وكبيره بنفس الوقت
عشان ماتضطرين تشيلين شي بيدك..
لبسك,,
ياكثر المواضيع اللي تسأل عن اللبس والكشخه..
اذا تبين نصيحة وحده مجربه..
خذيلك تنورتين وحده سودا عاديه والثانيه جنز..
وشكلي بالبلايز على كيفك..
واحرصي يكون لبسك مريح ومناسب للصباح مو زي بعض المناظر اللي نشوفها عالصبح ,,والله ثم والله اناا نضحك ونتريق
على اللي تبالغ بالتسنع والكشخه ,,خلي مظهرك عادي وغير متكلف وكمان مريح احرصي ان لبسك لازم يكون مريح ..
مره من المراير يقالي بكشخ ..
ولبست بلوزه ضيقه ,,وجزمه عاليه ..
بغيت اموت ..من جد..
ولااستفدت شي الا التعب ..
وقلت لنفسي لو غبت احسنلي ..
تخيلي معي ..
لابسه ضيق وجزمه عاليه وامشي بطريق طويل عيا ليخلص..
ومضطره اجامل واضحك ........
يوه
مبي اتذكر هاذاك اليوم ..
الشي الثاني ,,
ياكثر مانسمع ..
النجاح حظ,الأستاذه ماتصحح,فلانه مافتحت المنهج واخذت أي بلس(ممتاز)..
كل الكلام هذا نصب بنصب ..
واللي تقوله ماتبي الا تحطمك ..
وماعندها ماعند جدتي ..
اسمعي باليمين وطلعي باليسار..
وبس س
أسألك بالله لو تحسين بفايده من موضوعي لو 1%
تدعيلي ان الله يفرج همي ويحقق اللي في بالي .ويرزقني بالزوج الصالح.
واذا ماحسيتي بأي فايده ,,عطيني خبر ..
وبخلي المشرفين يودونه للي لم يسمح فيه في التو واللحظه ..
صدقوني والله حاسه فيكم..
واللي تبي تضيف شي على الموضوع تضيف عليه ولا تشاور..
واتمنى اكون افدتك وانتبهي لاتعيدين أخطائي لأني نصحتك بالنصايح اللي بنصح فيها أختي ان شاء الله ..
وشكرا لك..