زوجي خانقني الين اغمي علي

السلام عليكم
قولوا لي يا بنات وش اسوي
انا زوجي حليل و ما يجي منه هذاك الشر والقشاره
بس انه احيان يغثني الين احس اني ودي اموت
والله ما ابالغ اصير اتمنى الموت
لانه ينشب في حلقي على اتفه الاشياء
ويعيد ويزيد في السالفه فوق العشرين مره والله ما ابالغ
احيان يسال نفس السؤال اكثر من عشرين مره او ثلاثين مره
الين توصلين مرحله ودك تصيحين
وانا اجاوب نفس الجواب على العشرين مره
ومافيه فايده
يزن يزن يزن يزن
ولما يزعل يصير يصارخ كنه شايب واحيان علشان انا هاديه يعصب زياده ويقول كلام ما ينقال
زي غصب من ورا خشمك
رضيتي ولا ما رضيتي هذا اللي بيصير
تبين ولا بالطقاق
ومن هالحكي اللي ماله سنع خاصه اذا انا ما سويت شي
اعطيكم مثال على اللي صار امس
رجعت من دوامي تافله العافيه علما باني اداوم الى الساعه 5 واللي معي كلهم في اجازات يعني اكرف لحالي ومسويه رجيم وما اخذ بريك الغدا يعني كرف وجوع
جاني رساله من سلفتي انها ولدت هذا الكلام الساعه 12 الظهر
واختبصت علشان ما شريت لها هديه ولا استعديت
ورتبت نفسي ودقيت على خواتي وامي علشان اجيب لها الهديه وازورها اليوم
لان بكره فيه عرس عند اهل زوجي وما يمديني اروح بكره لها
وخبصت نفسي علشان اسوي الواجب مع مرة اخوه لاني اخاف تطلع من المستشفى وانا ما رحت
وكلمت امي مسكينه وخربت مشوارها اللي كانت طالعه له علشان تجي معي
وكني خبله رحت بعد الدوام حاسبت على الهديه وخليتها في المحل علشان امره بعد العشاء على مايغلفها واروح لسلفتي
ورحت البيت ركض اتحمم واتصلح وحالتي صعبه
طبعا كل هذا وزوجي ما بعد قال لي ان مرة اخوه ولدت
اللي قهرني انه قال لي يوم شافني البس نسيت اقولك ان فلانه ولدت
قلت ايه جاني مسج منها كلم امك شف هي ودها نوديها معنا
علما بان عندها سواق ولها بنات ممكن يودونها بس قلت من باب التلطف معها حرمه كبيره زي امي
بعد شوي جا قال امي بتروح هي وخواتي بعد المغرب ويوم شفتهم بيروحون ما قلت لها اوديك ولا ما اوديك
هنا عاد بدت المشكله
قلت له بكل هدوء اللحين ليه اهلك ما قالوا لي ان مرة اخوك ولدت
يعني الحرمه لو ما ارسلت لي ما دريت
وبعدين ليه ما قالوا ندق عليها نقولها ترا حنا بنروح علشان اذا تبي تجي ولا شي
حتى لما دق زوجي ماقالت له امه بنروح جب حرمتك ولا خل حرمتك تجي ولا اذا حرمتك تبي تجي ولاشي
وهذي ثاني مره تصير
حتى سلفتي اللي قبل كذا انحاشوا عندي مدري ليه
ولما سالت عن بيت اهلها لاني عروس جديده ما اعرفهم
قالوا لي بعيد بعيد خلاص اذا جتنا في العيد شوفيها وباركي لها
هذا والحرمخ ( سلفتي الثانيه ) والدة في رمضان
استغربت وضاق صدري بس مشيتها
بس هذي ثاني مره يسوونها مدري ليه ما يحبون ياخذوني معهم
يا ناس كل امهات الازواج يبون حريم عيالهم يجون ويسوون الواجب خاصه لاهلهم
والله خواتي كلهم امهات ازواجهم يعلمونهم كل شي اول بأول
وحتى ازواجهم علطول يعلمونهم ولو ما سووا الواجب يزعلون بعد
الا انا
اراكض وراهم مراكض زوجي واهله
حسيت نفسي غثيثه وذابه وجهي
المهم ما علينا
انا بس قلت للرجال ليه اهلك ما كلموني
طبعا حطوا في بالكم الكرف والجوع والاحباط والهديه وانهم سافهيني
وانا كني خبله رايحه اجرجر امي بعد معي بزعمي ذربه
تدرون وش قال
قعد يهاوش ومعد سكت
صراخ صراخ صراخ
اعوذ بالله
غصبن عليك تروحين
هم اكبر منك
انتي اللي تدقين وتقولين لهم بروح معكم
عجبك عجبك واذا ما عجبك بالطقاق
وش تبين اسوي تبين اقول لامي عيب عليك يمه دقي على حرمتي
ما يخسى الا انتي تخليني ارد على امي
امي علشانها حبيبه تطولين لسانك عليها ولا لو انها شيطانيه وموريتك شغلك ما عرفتي تقولين هالحكي
المهم ومن هالحكي الزين
بدون مبالغه يمكن ثلث ساعه ولا نص ساعه وهو فاتح حلقه
وانا ولا رد كني مكبوب علي سطل ثلج
انصدمت
انا ما قلت شي
وانت شايفني اراكض وزانقه نفسي
وناشبه في حلق امي الين وافقت تجي معي
علشان الحق على واجب اهلك للي والده وللعرس
وهو عارف اني تعبانه وكارفه وان المعي في اجازات
والله يا بنات تنزل دموع وانا وجهي متشنج وعيوني طايره
ما توقعت انه يصارخ علي هالصراخ
انا ما قلت في امه شي ولا قلت عنها شي ولا فتحت فمي بس قلت ليه ما قالوا لي بس
تحسبونه سكت
ابد ماشاء الله عليك مستمر الين شافني خلاص بديت اتشنج
انا اول مره يصير لي كذا
صرت احس كل جزء في جسمي مشدود كن يديني بتتقطع
رجولي فيها حراره الين راسي
اسناني بغت تتكسر من الشد
انسدحت على السرير ابي احاول افك هالشد
مو راضي كل ماله يزيد وكل مالها الافكار في مخي تزيد
صرت اقول انا وش حادني عليه
انا ليه اسوي في نفسي كذا
ليه مرة اخوه اختي ولا امي ولا بنتي
بالطقاق هو واهله
انا ما يكفي اني صابره ومتحمله وساكته
كل هالكلام يجي في بالي
يديني صارت مسكره بقوه ما اقدر افتحها
واحس اني بنخنق
لما شافني كذا طلع من الغرفه
بعدين رجع
وكمل الناقص
يقاله بيتفاهم اللحين
يقول اللحين انتي ترضين انا اغلط على امك
ترضين اقول في امك شي
قلت ما قلت شي
هالكلمه طلعت مني بالحسره من كثر ما انا مو قادره اتكلم من الخنقه
طبعا نظامه حق العاده خذوهم بالصوت
الا انتي قلتي الا انتي
وانتي وانتي وانتي
معد صرت اسمع يا بنات
صار الصوت حقه يتلاشى شوي شوي
وكل جسمي تصلب صار زي لوح الخشب
وبس اعض باسناني ولا عاد ادري انا وين
بس اطالع السقف واحس النور يخف ويزيد
وبطني احسها تطلع وتنزل معد ادري ويني فيه
تشنجت وصحيت في المستشفى عطوني ابره تفك التشنج وتهدي
يوم صحيت كل جسمي يعورني واظافري من كثر ما انا مسكره يديني بقوه مجرحه يديني
وفكي يوجعني مدري ويني فيه
افتح عيوني اشوف زوجي ووجه مو واضح
دريت اني اغمي علي ووداني المستشفى
طبعا الابره خلتني زي المسطوله
لا زعلت ولا خانقت ولا عاتبت
بس اتبسم
ودايخه
ويالله امشي
مشاني ووداني البيت
وامي حاس قلبها فيه شي لاني مواعدتها وقايله لها يا ماما وحنا طالعين بنمر ناخذ الهديه ترا حاسبت عليها
وبس تدق على جوالي
وعلى جواله
وتدق وتدق المهم لما طلعنا
قال الله يخليك كلمي امك قولي لها انك كنتي نايمه ولا اي شي
انا خذت السماعه مدري ويني فيه
باين على صوتي قالت لي امي وش فيك قلت دايخه
رحت المستشفى
قالت وش فيك انتي زعلانه
اول مره امي تقول لي كذا كنها حاسه والله يا بنات خنقتني العبره معد قدرت اكمل المكالمه بدت الدموع تنزل والصوت بدا يخرب
خذ السماعه مني قال خاله مافيها شي بس جايعه مسويه رجيم وما تاكل
علشان كذا داخت ووديتها المستشفى
وهو يغمز لي وامي طبعا ما صدقت الين قبل شوي تدق تقول وش فيك
انتم متخانقين
ترا باين عليك صوت مو صوت دوخه جوع
شكل فيك شي
واللحين هو في الدوام وانا مدري وش اسوي معه
يكلم عادي كانه ما سوا شي
وش الحل
كيف اعاقبه علشان معد يعيدها
ما ودي امشيها عادي لان هالمره انا بغيت اروح فيها
والله من تزوجته وانا كذا اكتم في نفسي احس في الاخير بيصير لي شي ما يتصلح
اولها قولون عصبي
واللحين تشنج
مدري وش بيصير فيني بعد
دبروني كيف اتصرف