زوجي ودوامه

بسم الله الرحمن الرحيم
انا لجأت لكم اخواتي بعد الله حتى تحلوا مشكلتي
انا متزوجة من تسع سنوات وعندي ثلاث اولاد
المشكلة ان زوجي دوامه شفتات اول لليل واخر لليل ونهار
وانا حاسه بملل فضيع لان زوجي اكثر شي يهتم فيه هو طلعاته ووناسته وانا وعياله اخر شي
بالاول كنت اسكت واطنش واقول معليش خليه ينبسط ويكيف
يعني لما يكون دوامه اخر لليل يبتدي دوامه من الساعه 11 وهو يحسبها من الساعه تسعه هو عند اصحابه
ولما يكون اول لليل ينتهي دوامه الساعه عشره ونص ومن يرجع من العمل على طول دايركت للشله بدون
مايمر علينا البيت ولاحتى يشوفنا انا وعياله
واذا كان دوامه نهار وهذا الي باط جبدي تلقوه نايم اربع وعشرين ساعه
يروح العمل الساعه سته ونص ويرجع الساعه ثنتين يتغدى وعلى طول ينام
حتى لو كنت ابي اسولف معاه يغمض عيونه لين اسمع شخيره واطلع من الغرفه
يصحى على المغرب ويصلي وشوي ويرجع ينام يصحى الساعه تسعه ودايركت للشله حتى الساعه وحده
ويجي وعلى طول للسرير وينام ويصحى على صلاة الفجر يصلي ويسبح وللعمل
وهذا هو روتينه كل يوم
وانا زهقت خلاص ومااقدر اصبر اكثر من كذا
حاولت معاه بالطيب وبالدلع مافاد حاولت معاه بالصراخ يوعدني انه يهتم فينا شوي بس وعوده مثل
الدخان بسرعه يتبخر
انا ما اطالبه يجلس معي اربع وعشرين ساعه لا هو من حقه بس ابيه على الاقل يخصص لنا لليله وحده بس
مايروح لشلته ويجلس معي انا وعياله
لما اتفاهم معاه يظن اني ماابي له الخير ولا ابيه ينبسط
والله العظيم يابنات حتى لو كنت محتاجة لاغراض من السوق مثلا يطلع معي ويحاول يعجلني عشان اخلص
اغراضي بسرعه ولو اتأخر شوي يقول اني انا متعمده اأخره عشان مايروح لشلته وينبسط
والي زاد الطين بله ليلة الجمعه ولدي كان مريض ومسخن وديناه الدكتور وكتب له على بخار
ابو الشباب رفض !!!!!
يقول ماله داعي البخار وحالته ماهي محتاجة صار هو افهم من الدكتور؟؟!!
وكل هذا ليه طبعاً عارفين عشان لايتأخر على شلته
عاد هذا الموقف القشة الي قصمت ظهر البعير وللحين حاقده عليه وعلى جماعته الي يجلس معاهم
حتى ساعات استغفر الله من كثر مااشوفه ملهوف على هالشله هذي اشك فيه ويدخل في قلبي ريبه
مع اني عارفه كل واحد يجلس معاهم بس وش اسوي قاهرني
انا اسفه طولت عليكم الكلام بس ابيكم تكونون معاي بالصورة
وارجوكم يابنات شوفوا لي حل قبل لااجن واطلع من طوري وتصير مشكله لالها اول من تالي
ملاحظة..
لاتقولون اغريه وماادري سوي له حركات رومانسية
لان زوجي من النوع الي مهما تسوين له مايقدم مصلحته ووناسته على اي شي ثاني
انا في انتظار افكاركم وبسرعه