شبكتي بالتفيصيل

السلام عليكم ورحمة الله وبركاته
بصراحه شفت الموضوع مرة ضروري وحبيت افيدكم زي ما استفدت منكم وبالذات اني حست مرة ما ابغ البقيه يحوسوا
ملكتي كانت يوم 28 / 7/1430 هجري لله الحمد تمت الملكة على خير صح ان الكهرباء انطفت تقريبا ساعه ونصف بس الحمد الله .
اولا: كانت الشبكة في استراحة المقصورة في الجرف خلف مجمع ورش المحمدي ب 4000 اخذناها هوا يقلكم ب 5000 بس انتو وشطارتكم
ثانيا : حجزت البوفيه من عند الركن الشامي وكان ما شاء الله تبارك الله روعه واكله يجنن ب 4600 وعلى فكرة طلبت منه شكل طرطة غير وهذا شكلها وطبعا من ضمن السعر
كان في البوفيه 16 سخان من المأكولات المنوعه بس كثرت المشاوي
ومن المقبلات 4 صحون ورق عنب و4 تبوله 2 فتوش 1 متبل 1 حمص 1 سلطة ذرة 1 سلطة مدري ايش اسمها
ومن الحلويات ما لذ وطاب جبلي من 4 انواع كل نوع 25 حبه بالإضافه لصينيه الكنافه الكبيرة
ومن العصيرات جكين عصير كبار على شكل براده واحد كوكتيل والثاني جوافه
اما الفاكه والعصيرات الغازية جبناها من برا وهو رتبها
وخليته يحطلي 4 تباسي للرز شكلها فخم ومعاها غطايه كبيرة زي القبه
وانا حطيت عند العصيرات سبت فيه مناديل معطرة و اعواد اسنان بدا الشكل
ثالثا: الضيافه اللي على الطاولة الحلاوة كانت من شوكو لايف بصراحه حلو وطعم سواء حلوياته او معجناته كانت عبارة عن شمعذان ذهبي تحتوي على حلاوة وحلى بيتي ومعجنات الشمعذان الواحد ب 65
وهذه شكلها ع الطاولة
اما المناديل انا غلفتها وهذه صورتها
وهذه الكاسة شفافه غلفتها برضو وحطيت فيها مصاص للعصير واكياس سكر صغيرة وملاعق الشاهي الصغيرة
التل اللي تشوفوه هذا انا اشتريته وقصصته واختي رتبته ورشت عليه ترتر ذهبي .
رابعا : الكوشة من ديري سنتر وزي ما تشوفه ما يحتاج شرح معاها الممرات اربع استاندات من كل جهه
وكمان معاها طاولة الاستقبال فيها 3 كاسات فيها موية نفس لون الفستان فوشي و4 حطيت فيها حلويات
واحد حطيت فيه حلاوة اللولو من النقلي والثاني لبان والثالث حلاوة تمصيها تطلعلك هيل او قرنفل او شمر بضرو من النقلي والرابعه فيها سمسيه واشياء زي كدا تلقيها مغلفه من النقلي برضو
كمان المسكة من ديري سنتر وهذه صورتها
وكل شي من ديري سنتر ب 2200
خامسا : الذبايح كانت مطبوخه من مطبخ الكرام على كل ذبيحه 250 ريال طبعا غير سعر الطليان نفسها
سادسا : كاسة العصير اختي جابتلي هيا وغلفتها عند محل روعه صراحه احلى من عالم الهدايا مية مرة
لاني رحتله وانقهرت من تعامله المحل صراحه اللي غلفت كاستي عنده وهدية العريس ما اعرف اسمه بس شفته مركز وفاء الطبي مو قباله ع الخط في محلات كثير منها الثنيان اعتقد هوا اول محل على الطرف وهذه الصور تحكم
هدية العريس جبت الصينية دي وغلفتها عند المحل حطيت فيها ساعه من الدهام ب 1000 ومخلط عود من جنيد لعطور البحرين اسمه غروب ب 200 ريال روعه ومرة عجب خطيبي .
سابعا : الفستان من عند احمد بدوي في جده لونه فوشي وذهبي ب 6000 ريال وكان فزعه صراحه
واكسسوراته جبت حلق طويل شوية من كشك في الدخيل ما في غيره وجبت من عنده تاج مرة ناعم وحلو وبصراحه لفيت قباء كلها مالقيت احلى منه وبسعر حلو اعطاني هوا ب 45
سابعا : الكوفيره حجزت عند خديجة داوود وخجرجتني جونان في مشغل اطياف في الخالدية عندهم العروسة شبكة ب 800 ريال بس روعه
ثامنا : المصورة من لمسات اخترت ديجيتل اسمها امل مرة كويسة بس كنت ابغ كريستي كثير يمدحوها بس امل ما قصرت وصبرت معايا انتو عارفين عشان الكهرباء حتى قالتلي اذا ما فتحت اروح معاكي البيت اصوركوسعر الديجيتل3650 ريال .
تاسعا: التوزيعات كل مين جاب شي الجوزية واللوز اللي بالسكر والبسكوت المالح
وان شاء الله اني ما قصرت وما نسيت شي
دعواتكم ليا بالتوفيق