شفتك بقلبي قصه حلوه موت لاتفوتكم

1. *دبي- سيتي سنتر*


2. شهد: اله .. روعه .. حور تعالي شوفي هالنعال كيف يجنن


3. فيّ: ما شاء الله عليج .. زدتي الطين بله بهذي الصرخه


4. مايد: ما اعتقد


5. أحمد: بنشوف


6. عبدالله: اشوي اشوي لا تصحين علينا


7. و مشت عنهم و عيونها متروسه دموع *وااي قلبي عورني*


8. بيت بو مايد *


9. حور: أوكي يا قمر


10. فيّ: يلا بحسب

*دبي- سيتي سنتر*

فيّ و حور و شهد يتسوقن في السيتي حق سفرة لندن * بنات ما ينلامن يتسوقن قبل السفر و في السفر و بعد السفر .. باختصار حياتهن سوق X سوق * .. المهم فيّ عمرها 19 .. الحين لازم أوصفها إشوي.. كلا و لا البطله ..
هي حنطاوية .. عيونها عسلية .. عاديه لا وسيعه و لا شيات .. المهم لا طويله و لا قصيره .. يعني طولها 164 .. بس ما شاء الله .. الله عطاها جسم كل البنات يحسدنّها عليه .. و أ خيرا طلع شيء فيها حلو .. بس هي ككل فنانه حلوه و جذابه .. طبعا الفضل يعود لغمازتها .. مب جني وايد رمست عنها .. بس أرد و أقول من حقها يا ناس .. بطلة القصه ..
انزين خلنا نرمس عن حور و شهد كسرن خاطري .. بس ما برمس وايد عنهن.. يوم بيسوتن شيء مهم برمس .. حور هي أخت فيّ و عمرها عشرين .. و هي أربع و عشرين ساعه و يا إختها فيّ وايد تحبها و لو بإيدها بتم ويا إختها خمس و عشرين ساعه مب أربع .. و هي بعد حلوه بس أحلى ما فيها عيونها الوساع .. أوكي .. يا دور شهد .. و حليلها وايد اتريت .. شهد هي بنت عمهن و ما شاء الله عليها حدث و لا حرج .. لزقة عنزروت .. شوي لا تعفد و تسكن ويا حور و فيّ .. و ما دام بنات عمها حلوات فأكيد هي حلوه مثلهن .* ما نبا نجرحها *
انزين خلنا انرد لأحلى شيء السوق .. طبعا البنات عندهن هوايه ثانيه غير التسوق .. أكيد عرفتوا شو .. * الهذربه الزايده* .. يعني ما يستوي تمر ثانية هدوء و صمت .. استغفر الله هذا شيء محرم عندهن .. المهم أول ما طلعن من محل بنات الإمارات المفضل *زارا* .. سارن صوب *دبنهامز* عشان ما يدخلن في زحمة الشباب *الجيل الفاضي اللي ما وراهم شيء غير الهوامه في السناتر .. الله يعلم ليش !!* .. هيهيهي ياكم الدور ..
فيّ: بسكن لا ترمسن وايد .. ترى شبابنا ما وراهم غير مراقبة البنات .. والله هذي ضحكت في السنتر .. ولا رمست في السنتر بصوت عالي .. و الله يعينا على بنات هل الأيام ..
شهد: هي و الله مب امخلينا انسوي شيء .. على طول طلعوا رمسه .. و حليلنا و يقولون البنات ما
وراهن غير الحش ..
حور: هيهيهيهيهيههيههيه .. حرام قطعتوهم .. بس يستاهلون
شهد و حور: هههيهيههيهيه
فيّ: طاع .. خلاص أنا مب ماشيه و ياكن .. شبهات
حور: ليش؟؟
فيّ: تراكن ضحكتن في السنتر

شهد: اله .. روعه .. حور تعالي شوفي هالنعال كيف يجنن

فيّ: ما شاء الله عليج .. زدتي الطين بله بهذي الصرخه

أدري اتقولون الحين من وين ين النعله برع .. تراهن دخلن دبنهامز .. بس نسيت أبشركم .. * المهم الحين حور و شهد واقفات عند *فيث* .. مشت فيّ بتسير صوبهن .. و حليلها .. ما حست ابعمرها إلا داعمه كبت .. الله يسلمكم هذا الكبت اسمه مايد * مبروك ظهر البطل .. و أخيرا* .. خلنا نرمس عنه اشوي .. عن يعترضون و يقولون ما رمسنا عن البطل .. مايد شاب وسيم .. و أحلى شيء طويل.. عمره 25 سنه .. و ما شاء الله عيونه ناعسات .. المهم واحد ساير السنتر كيف تتوقعون شكله .. أكيد كاشخ .. يا ناس ساير سنتر مب أي مكان .. أوكي .. بعد لازم ما ننسى صفة الشباب الثانيه .. و هي الخقه .. عشان إعقن البنات على قولتهم * و الله كاسرين خاطري .. قاصين على عمارهم*
مايد: اسمحيلي إختي
فيّ: مسموح أخوي *إشوي لا تصيح .. داعمه كبت أكيد يعور ..هيهيهيه*
مشى مايد و ربعه و كملوا دربهم .. و حليلهم ظلمناهم طلعوا محترمين .. انتبهن حور و شهد للموقف و ربعن صوب فيّ اللي شوي لا تنقع من الصياح ..
شهد: ها شو استوى ؟؟
فيّ: يا أسخف الخسفاات .. ليش هديتوني روحي ..
حور: بس حبيبتي لا تصيحين .. إنتي ما كنتي تقصدين
فيّ: هي هذا نحنا انعرفه .. بس هم ما يعرفون .. أ كيد بيتحسبوني كنت قاصده هذا الشيء * و حليلها متعقده من الشباب *
شهد: ما اعتقد جي بيفكرون .. أشكالهم محترمين .. كل واحد ابغترته * و حليلها ما تدري إنا الغتره و العقال لزوم الكشخه و بس*
وطالعن البنات يكملن شوبنق .. و الله إنهن فاضيات عقب الي استوى بعد يفكرن يكملن الشوبنق .. بنات ما في شيء في الأرض يمنعهن عن الشوبنق ..
في ركن من أركان السيتي سنتر
أحمد: و الله إنها قمر .. شفت عيونها يا ميود .. فيهن شيء عجيب .. شيء يجذبك
مايد: يوم إنها عاجيتنك هل قد .. ليش ما رقمتها ..
أحمد: و الله الود ودي .. بس هي دعمتك إنته .. أنا شو يدخلني عرض في السالفه
عبدالله: زين والله يوم اتعرف إنا رزت الفيس من طبايع التيس .. يا تيس .. بس كلمة الحق تنقال .. ما شاء الله عليها جذّابه .. و لا إنت شو رايك ميود
مايد: هي و الله صدقت .. اتعق الطير من السماء
أحمد: يا فالح .. ليش ما رقمتها ؟؟
مايد: كسرت خاطري حسيت إنها منحرجه .. أنتوا لو شفتوا ويها غادي قوطي طماطه ..
عبدالله: ما عليك منها تلقاها متعمده و إحمرت من القهر لأنك ما عبرتها .. ههه * يوم أقولكم قاصين على عمارهم .. الله يهديهم*

مايد: ما اعتقد

أحمد: بنشوف

الحين أباكم تفتحون عيونكم عدل لأن الطامه الكبرى بتستوي .. عقب ما طلعن البنا ت من *مانجو* .. شافوهم شلة شباب و اتخبلوا .. عاد شبابنا مب ناقصين خبال .. على طول و بدون تفكير لحقوا البنات .. *و حليلهم .. ما بيفتكن إلا إذا طلعت شلة بنات ثانيه كشخه و من أستايلهم* .. بس للأسف الشباب ما كانوا يشفون غيرهن ..
عبدالله: ما قتلك يا ميود إنها قاصده .. هذي أول ما شافتك طلعت من المحل .. بنات آخر زمن .. بس ما علينا .. اشتغل يا أخ و رقمها .. و لا حرام بتموت علينا

• الحين البنت ما وراها شغله غيرإنها إدور الشباب في السناتر .. و لا واحد داعمتنه و اتقفطت عدل منه .. و الله إنا هل عبدالله ما فيه عقل *

أحمد: يلا عليهم .. * عفانا الله ملقوف*
مايد و الابتسامه شاق الويه: يلا *ما صدق الأخ*
طبعا الشباب ما قصروا بتعليقاتهم السخيفه .. سوري ما اعرف شو يقولون .. ما عندي خبره بس باحاول .. بلييز من غير تعليق ..
مايد: محلات هالعيون .. ودّي أكتب فيهن قصيد
شهد: مالت علي .. و حليلي على نياتي و اقول إنهم محترمين
حور: توه الناس .. بس و الله سخافه يشوفونا مب امعبرينهم
فيّ: لا يكون هو اللي دعمته
حور: هي
شهد: يلا نمشي بسرعه لأنهم زادوا الجرعه
و أول ما دخلن دبنهامز .. طبعا الشباب اللزقه وراهن .. سمعوا صوت عالي .. و حليلها فيّ طاحت طيحه مال حرام .. الحين عاد الشباب ما قصروا
عبدالله: الله يهديك ميود شو سويت في البنت
مايد: و الله ما ادري .. أنا احيد إني أعق الطير من السماء .. بس الغزلان اللي في السيتي ما أحيد
أحمد: طلعت خطير
عبدالله+ مايد + أحمد: هههييهيهيهاي *و صوتهم يعلى و يعلى*
وفيّ من الصوب الثاني دموعها أربع أربع .. * في هاي اللحظه علنوا عن هطول أمطار غزيره في إمارة دبي* .. و شهد إتحاول اتسكتها بس الشباب مب امقصرين .. عصبيت حور .. و سارت صوب مايد .. و عيونها كلها شرار ..
بس تعبت .. شو تتوقعون اتسوي حور اللي تموت على إختها ؟؟ و مايد و ربعه شو بيكون موقفهم ؟؟
الجزء الثاني
يلا خلانا انشوف الأخت حور شو بتسوي
حور: اسمحلي أخوي بس هذي مب رجوله إنك تضحك على بنت طاحت في السنتر
مايد و هو ميود ضحكته: بس أختي .. ما قدر إيود عمره و نقع من الضحك هههاي * و الله إنا لوح .. اتقوله إنك مب ريال ابطريقه غير مباشره و يضحك .. ريايل آخر زمن*
حور: بس النذل هو اللي ابضحكته السخيفه ايمع الناس و يخليهم يضحكون على بنت طايحه
عبدالله: اللهم سكنهم في مساكنهم .. شوي شوي علينا * أحر ما عند حور .. أبرد ما عندهم *
أحمد: لو سمحتي محامية الدفاع .. خليّ المنبطحه على الأرض ترمس .. و الله أنّها عايبتنه موت
حور و هي واصله حدها : مسخفكم .. كل واحد ابغترته و عقاله .. اللي يشوفكم يقول ما شاء الله على شبابنا في بعضهم محترمين .. بس و الله إنكم مظاهر

عبدالله: اشوي اشوي لا تصحين علينا

حور: يا أخ أنا إذا بصيح ما بصيح عشان تعليقات إنسان تافه .. بصيح عشان الله ما عطى أختي الطيبه عيون اتشوف بها .. احمد ربك إنا الله أنعم عليك بنعمة النظر و استغلها في شيء يفيدك دنيا و آخره بدال ما تسخدمها في جرح مشاعر غيرك ..

و مشت عنهم و عيونها متروسه دموع *وااي قلبي عورني*

طبعا الشباب ما عرفوا كيف يلقطون ويهوهم .. و أولهم الأخ عبدالله .. و اتمنى كل واحد منهم إنا ما ضحك بصوت عالي عشان الناس اللي اتيمعوا من ضحكاتهم ما يشفون ويهوهم المحترقه .. عاد شبابنا موودهم على طول ينعفس .. ما يستحملون التقفيط و خاصة في مكان عام .. * يستاهلون*

بيت بو مايد *

مايد كان يالس في الحجره سرحان و متغصص .. قلبه امعورنه .. يذكر كلام حور و كيف بينت ابكلامها إنه أنسان تافه و نذل .. و قلبه امعورنه على فيّ .. كيف إنه صيّح بنت و حسسها بعجزها .. * ما عليكم منهم شبابنا عصبيين بس وايد طيبين .. بسرعه يحسوون بتأنيب الضمير .. لا تستانسون وايد .. بعضكم مب كلكم* .. مره وحده يسمع
عليا: بو
مايد في هل لحظه يدور قلبه .. من الزيغه ما حصله * يا الطويل دوره في مخباك يمكن تلقاه*
مايد: اقول طلعي برع أحسن لا ردج لريلج مشوهه * خيبه ما يسوى عليها .. شرير*
عليا: ههه ضحكتني
مايد: و الله .. شو رايج اتجربين تضحكين لريلح بدون ضروس * الله يعينه .. أكيد بيدخل مستشفى الأمل*
عليا: يلا قول
مايد: شو أقول
عليا : يلا يا حبيبي قول ..
مايد: يا بنت الناس شو أقول .. أقول أني أحبج .. الجذّب حرام *الأخ واصل حده*
عليا: أبوي اللي ماخذ عقلك يتهنابه
مايد ابتسم بس للأسف اختفت الأبتسامه يوم تذكر كلام حور *عشان اتعرفون إنا البنات مب سهلات .. ملسونات .. ما شاء الله عليهن*
عليا: ميود .. بسألك .. بس رجاءً من غير تكسير عظام * وحليلها .. مخوفنها .. هذي ميزتهن البنات على طول يخافن*
مايد: يلا انشوف شو هو سؤالج .. و بعدين التكسير استوى شيء محرم من خذّج تعيس الحظ .. بس تدرين إديّ اتولهت على التكفيخ
عليا: أوولا تقصد سعييد الحظ .. و ثانيا .. أنا جسمي مرتاح من التكفيخ و الضرب .. و أخيرا .. قولي بلاك لأنك مب عايبني
تنهد مايد .. و قال كل اللي استوى .. ترى مهما حاول يغبي على أخته ما يقدر .. عليا هي أكبر من مايد بسنتين .. و يفهمون بعض و يحبون ياخذون راي بعض .. عليا طول السالفه ما نطقت بكلمه
مايد: آآآآآآآآآآآآه يا عليا لو تدرين كيف ندمان .. و الله إني ندمان أكثر و أكثر إني ما اعتذرت ..
عليا: ام .. مايد أنته كنت المفروض تعتذر .. لأنك بالاعتذار كنت بتحسن صورتك لأن الاعتذار ما يصغر الإنسان بلعكس كنت بتكبر في نظرهن .. و كنت ارتحت ضميريا و فكيتنا من غزوزك المدليه .. ههه
مايد: الود ودي اشوفها الحين و اعتذر .. لو اعرف اسمها جان حطيت الاعتذار في الجرايد
عليا: حشى ما يسوى عليك .. لو تفكر فيها يا مايد .. أنت ما اعتذرت يمكن لأنك كنت تحت تأثير الصدمه.. خلاص انسى .. بس لا تنسى الدرس اللي اتعلمته .. و اتعلم من غلطك و حاول ما تكرره
مايد: توبه
عليا : هههيه .. اقول ميود
مايد: قولي .. يا كثر ما اتقولين
عليا: خلاص ما بقول
مايد: يلا قولي .. حرام تم في خاطري اعرف شو بتقولين
عليا: انزين * ما صدقت* .. إنت ما اتخاف إنا يودن رقمك الشرطه .. و يحطون ويهك الجميل في الجرايد بدال اعتذارك
مايد: ههه و لا ما فكرت .. بس إذا حطوا ما بزعل لأني استاهل * قنوع الريال*
عليا: اوكي انا نازله تحت .. اترياك .. لا تساني و تضيع في بحر بعض الناس
مايد: إنتي متاكده إنج مب متولها على الضرب
عليا: اقول
مايد: يا رب صبرني .. قولي
عليا: اجلب ويهك
و تركض ابسرعه .. لأن مايد كان عادي بفلعها بقوطي الكوك .. مايد ميت من الضحك على شكل أخته الفرفوشه و الخبله اللي ما غيرها العرس و العيال و لا بيغيرها .. *آمين .. حلو انكون مثل ما كنا دووم*

• في بقعه من بقاع دبي *

فيّ: و الله كسروا خاطري .. ليش جي قلتيلهم يا حور
حور: و الله قهروني .. و بعدين إنتي اتعرفين إني ما أحب اشوفج اتصيحين
فيّ: fس هم ما لهم ذنب .. يعني كيف بيعرفون إني عميا .. ما اعتقد أنا مكتوب على يبهتي إني عميا
حور: و الله هذيج الساعه أنا ما كنت أشوف شيء جدامي .. و بصراحه اللي زاد الطين بله .. ربيعه بو تعليقات سخيفه
فيّ: بس ابصراحه .. أنا لو كنت مكانهم جان فطست من الضحك ..
حور: بتكونين سخيفه مثلهم
فيّ: كل ما اذكر الموقف اضحك .. ههه
حور: ههه .. والله كنتي انتيكه
فيّ: الحقي .. طلعتي سخيفه مثلنا
حور: لا و الله .. بس ما قدرت ايود عمري
فيّ: عيل لازم ما انلومهم لأنهم هم بعد ما قدروا ايودون اعمارهم
حور: و أنتي منو قالج إني أضحك عليج
فيّ: عيل
حور: أنا أضحك على أشكالهم بعد التقفيط
فيّ: بعد سخيفه
حور: اقول أنا أقربلج و لا هم يقربولج
فيّ: لحظه بفكر
حور: أقوم أحسن .. حاسه إني برتكب جريمه *صاداميه الأخت*
فيّ: حبيبتي حور
حور: توه الناس .. أمري
فيّ: ممكن اتسكرين الباب وراج
حور: أنتي تامرين يا قلبي
تطا ا اخ

• لحظه بجيك على الباب .. الحمدالله .. قت سليمه*
• بعد مرور شهر على سالفة التقفيط*
• حديقة الممزر – الشاليهات – يوم العوايل*

فيّ: أمي كم أهواها . أشتاق لرؤيها و أحن ..
الأم: بس بس .. ادخلي في صلب الموضوع ..
فيّ: أي موضوع ؟؟
الأم: أنا أعرفج إذا غنيتلي يعني وراج إنّ
فيّ : افا .. يعني أنا مصلحجيه
الأم: توج تدرين
حوور: واق قفطوها
الأم: أنتي مب أحسن عنها
فيّ: لقطي ويهج
حور: يعني كلنا مصلحجيات .. مم .. طالعين على منو ؟؟؟
فيّ: أكيد على وحده
الأم: حبيباتي سيرن اتمشن عند البحر
فيّ: الحين عرفت طالعين على منو
حور: قومي قومي .. ههه
كان الجو و لا أروع .. البحر ينن .. أتعرفون كيف شتانا حلو *يا حسره .. مره في السنتين اكون عندنا شتاء * .. المهم حور و فيّ يتمشن و يسولفن كالمعتاد .. مره وحده
حور: فيّ .. اتريني .. بسير ايب سكارفي الكشميري .. ثلجت
فيّ: يوم قتاج خذيه .. قلتيلي .. من زود البرد .. إنتي وايد منغشه بشتاكم
حور: طاع .. يعني محد يقدر يتمصخر * وحليلها اتوهقت*
فيّ: سيري و فكيني .. بس عندج دقيقه .. إذا اتأخرتي بحرقلج موبايلج

حور: أوكي يا قمر

فيّ: يلا بحسب

سارت حور و هي ترتقل من البرد .. زين ما انكسرن ظروسها .. و تمت فيّ في مكانها تتريا أختها .. بس فيّ حست إن حد واقف .. من الرعب .. حاولت تقنع عمرها إنها تتوهم .. للأسف ما شيء فايده .. تملكها الرعب .. صرخت مره وحدها
فيّ: حور .. والله أنج سخيفه .. مب كل يوم العيد اتزيغيني * أونها كول .. و هي اشوي لا تهز من الخوف*
بس محد رد عليها ..
فيّ و بصوت متقطع: ح ... ح ..و و ..ر * و أخيرا كملت
To Be Continued
شو البارت ؟؟ حلو و لا ؟؟ بليز لا تبخلوا علي بآرائكم مهما كانت