شلة بنات في مكة رواية صرقعه وهبال بشخصيات حقيقية

1. بسم الله الرحمن الرحيم


2. "ديمه"وبصوت أعلى: والله مااقوم.


3. وفجأة صرخت عليهم أ.منى بعصبية..وتجلس كل وحدة مكانها..

بسم الله الرحمن الرحيم

بداية..أحب أذكر لكم سبب كتابتي لهالقصة:وهو اني وفي احدى ليالي رمضان 1428 دخل علي اخوي فرحان يقول انه بيروح رحلة لمكة مع أصدقائه,,,طبعا أنا من زود النذالة سويت نفسي مني مهتمة وعلا طول طردته من غرفتي لكني في داخلي أشب نار..
وبما اني خيالية(على قولة صديقاتي) جلست أتخيل نفسي أنا والشلة المحترمة في رحلة ايمانية لمكة..
تحمست مرة مع الفكرة,وجلست أضحك لما بس تخيلت الاشكال... عز الله اعتمرنا...وبالطبع راح أدخلكم معاي في أجواء القصة واتمنى تعيشون الأحداث, مع العلم ان شخصيات القصة كلها حقيقيةو موجودة على أرض الواقع:وراح أعرفكم بأنفسنا:-
احنا شلة ثانوي مكونة من 8 بنات ورغم اختلاف شخصياتنا تماما الا انه كان يجمعنا شي واحد وهو الصداقة اللي من أيام الابتدائي.وكأي شلة في العالم..لازم يكون بيننا أحداث ومغامرات وأحيانا(مشاكل)<<<ياكثرها .....عموما ماراح أطول عليكم,,,اليكم القصة:
"بثيناتي"اسمها الحقيقي_بثينة_:هي أكثر شخص عاقل بالشلة..خاصة انها ماشاء الله ملتزمة جدا لكنها مع كذا كانت تتقبل هبال البنات بهدوء وحكمة,,باختصار,,هي نعتبرها امنا.
"لميس"مرجوجة ومزلبة بالدراسة,تحب الطقاق,قلبها طيب وصافي,صريحة جدا,نحب نستهبل عليها لانها أكثر بنت فينا تتقبل ثقالة الدم مننا وتبلعها بصبر وتحمل.
"ديمه"عربجية,دايم توجع روسنا بفلسفاتها الكثيرة,متقلبة,تحب الحياة الفري وياكثر ماتتشكى من تعقيد الاهل وقوانينهم.الشي المميز فيها "عطاسها" المزعج .
"البندري"تهتم بشكلها جدا جدا,فيها شوي دفارة,,وترفع الضغط خاصة لين هاوشتنا باننا نسكت علشان تفهم الدرس,طيبة وحنونة،دايم ماتشوفها تضحك بالذات على هبال صديقة عمرها"رنيم".
"رنيم"قليلة عليها كلمة مهبولة,عنيدة,وتمشي اللي براسها،قمة وناستها اللعب بأعصاب البنات علشان ينقهرون,تحب تمطرس بالأكل.نصيحة:لا تجلس حولها اذا شفتها مجتمعة مع ديمه في وقت الفطور لأنك بترجع أكلك كله من القرف<<<يع
"هيونة" خطر,,ابتعد,,انت امام مخلوق عصبي جدا,,وممكن في لحضة يجيك طراق أو بوكس عابر,لكن مع كذا كريمة جدا وتدخل القلب على طول ببساطتها معاك,كلمتها المشهورة"يالعبدة" >>>وياما جا الشلة كدمات وجروح من يدها الكريمة واسألوا مجرب.
"الريم" قمة الهدوء لدرجة اننا مانحس انها معنا,ناعمة,كريمة مررة,تحب تخدم اللي قدامها.
"دانا"خيالية جدا,مزاجية,مو أي احد يعجبها,والله يعين اللي تكرهه...تجيه دعاوي الله لايوريك,وياما تتسيخف ع البنات خاصة"لميس",,مشكلتها إنها مرة ملولة وتطفش من الشي بسرعة,بس أفكارها حلوة وطفولية.

• **************

(شلة بنات......في مكة)
قررت ذات يوم المدرسة المحترمة إنها تطلع مجموعة من طالباتها في رحلة دينية لمكة المكرمة..وكان طبعا من ضمنهم شلتنا..بس ليه اختارونا بالذات؟؟ولماذا؟؟..لاتسألوني..لكن أتوقع لأننا(مؤدبات مرة)!!!!
المهم كانت الفرحة ماهي واسعتهم وأول ماتشوفهم تعرف ياعمري أنهم بنات مدرسة مدردعة وماشافوا خير..
(لاتفهموني غلط)لأن كل البنات عوايلهم مقتدرة ماديا ويمكن سافروا لخارج المملكة بعد..لكني أقصد انهم أول مرة يسافرون مع بعض...وفي ليلة السفر دقت "رنيم" على "البندري":
"رنيم": هاه بندورة..خلصتي من تجهيز شنطتك؟
"البندري": لا توني..أف..بصراحة محتارة ..اخذ كتاب النحو ولا لأ..أخاف ناخذ درس هناك.
"رنيم": البندري تستهبلين؟؟..وين بندرس يعني ..في الطيارة..ولا فوق الكعبة...لا لا..عند زمزم احسن ؟؟
"البندري": لاتستهزئين..خلاص ماراح أخذ ولا كتاب ارتحتي؟؟..إلا على فكرة وش خذيتي معاك؟
"رنيم":ثوب عرس و مايوه و ستارة..ويمكن آخذ معلاق الملابس بعد>>>مسويةتضحك..
"البندري": هيه؟؟؟
"رنيم" أنا ادري عنك انت وهالسؤال..وحدة بتروح مكة وش بتاخذ يعني؟؟
"البندري": أقول...من دقيتي وانت ماغير تتريقين علي..أقوم اجهز شنطتي أبرك لي منك يا ام المعاليق.
"رنيم": باي..ولا تنسين كتاب النحو..ههه.
وفي الطرف الاخر كانت ديمه تكلم دانا ويسولفون عن الرحلة بشوق..وكان الشي اللي يجمع هالبنتين انهم رسامات و خياليات بشكل غير طبيعي,,وياما تطنزوا عليهم البنات وعلى خيالهم الواسع:
"ديمه": يوه يادانا..مني مصدقة..أخيرا بنسافر مع بعض..كل شلتنا..والله وناسة.
"دانا":ألاه..تخيلي أول مانرجع من السفر يقولون لنا بناخذكم لباريس مرة وحدة؟>>عاد بدا الخيال.
"ديمه":ايه وتكون هالمرة مع بنات خالاتنا وخوالنا بعد..ويكون عادي نفتش ونسوق..
"دانا":ونقابل رسامين فرنسيين ونعرض عليهم رسماتنا ويعجبون فيها ويسوون لنا معرض على حسابهم في أغلى فندق في الشانزيليزيه و.....
"ديمه":لحظة دانا..معاي خط ..
(شوي وترجع ديمه...
"ديمه": الوو..دانا..هذي البندري وتراني شبكتها معنا.
"البندري": أهلين بنات كيفكم؟
"دانا": الحمدلله..وينك بالقاطعة أدق عليك مشغول؟
"البندري": كنت أكلم رنيم...اف يابنات جننتني،،تخيلوا,,أقولها وش بتجيبين معاك..تفول مايوه وفستان عرس ومعلاق. >>>>خ بتذبحنا هالبنت.
"دانا"_"ديمه":ههه..حلوة.
"البندري":لا والله من جد طفشتي قلت أصك السماعة منها قبل لا أنفجر..هاه؟ جهزتوا شناطكم؟
"ديمه": أي والله..ماباقيلي غير شنطتي الصغيرة..باحط فيها كريماتي وأغراضي الشخصية.
"دانا": أما أنا مخلصة من زمان..الا على فكرة بنات..لا تنسون مذكراتكم..خل نسجل ذكرياتنا لحظة بلحظة.>>>مسوين رومانسيات بس مايليق..
"ديمه":ايه صح ذكرتيني,,.......أقول,,امي عصبت علي لاني من الظهر ماسكة التلفون..عن اذنكم ..بيباي,(ويصكون السماعة)
وفي اليوم التالي(اليوم الموعود..الساعة6صباحا)
"استاذة منى":يلا...وين صديقاتك؟؟الاقلاع بعد ساعتين..وياله يمدينا ع المطار...
"لميس":مدري استاذة...هم قايلين الساعة ستة بنكون في المدرسة.............هذي الريم جت.
"الريم"وهي تفسخ عباتها: غريبة محد جا غيرك؟؟
"لميس":ايه والله..الله يقطع بليسهم..مخليني فرجة لاستاذه منى..كل مابغت تهاوش..جت عندي.
شوي وتدخل "البندري"ووراها على طول"بثيناتي"..وفي غضون دقائق كانت الشلة مكتملة..
"بثيناتي":..عساكم سألتوا الله من خير هالسفرة وخير مافيها؟>>مطوعة تراها فلا تستغرون هالثقل.
"هيونه": مالقيتي الا هالاشكال يدعون؟...السفر ماخذ عقولهم... ماعندك أحد..
"لميس:عاد شف من يتكلم؟؟...لا..هيون..عيني عليك باردة..من دخلتي المدرسة وأنا اشوفك من تسبيح لتهليل
"رنيم":ايه واضح..سبحان الله من كثر ما تسبح حتى لو سكتت تسبح عيونها بدالها.>>خخ حلوة رنيم "البنات":ههه
"ا.منى"بس انتي وياها ويلا البسوا عباياتكم..ع الباص.>>جعلك الباص اللي يمرمطك يارب.
(ويركبون البنات الباص,,وكان معاهم 3 مدرسات فقط:"منى"المساعدة_"صفية"معلمة دين_"نورة"معلمة عربي
وفي المطار:
"دانا":بنات لايفوتكم نقاب أبله نورة...كنها طقاقة..>>>>حش بريئ
"رنيم": ماشفتي ديمه الله يفشلها تنسى انها لابسة عباية وتركض عند الناس.
"بثيناتي":هيه.."حاشوش"..يكفي حش..شيلوا شناطكم..خل يوزنونها.(ملاحضة:حاشوش هذي معناها عند يثياتي "لاتحشون"فلا تخافون ولا تستغربون من هالكلمات الغريبة اللي بتطلع عليكم بين حين واخر)
(وفي الجانب الثاني:
"لميس": ديمه الله يفشلك لا تركضين.
"ديمه": وش أسوي..والله انسى واحسب اني في المدرسة.>>>مدري متى تعقل هالبنت
"البندري": المشكلة انك ملفتة انتي وجزمتك البرتقالية,
"ديمه": ياماما..على الاقل سبورت وكشخة.. أحسن من اللي يلبس كعب بالمطار,
"البندري": يالسخيفة..كم مرة قلتلك..هذا شبشب مرتفع شوي..مو كعب
"ديمه": ايه..ايه..العبي علينا..تلقاه حق عرس اختك كاشخة فيه.
"لميس"خلاص..بدينا بالطقاق..ويلا تراهم دخلوا صالة الانتظار(اكثر ناس يتطاقون في العالم هالبنتين الى يومك)
(وأول مادخلوا الصالة..ركضوا البنات عالواجهة الزجاجية حقت الطيارات)
"ديمه":بنات..شوفوا شوفوا..هذي هي طيارتنا قاعدين يجهزونها.
"رنيم": تتوقعون وين بتسافر طيارتنا؟
"هيونه":اوهوه..بدينا بالأسئلة الغبية.>>معليش ياهيون لنا 12سنة متحملين دلاختها.
"بثيناتي": ماعليك منهم روينيمة حبيبتي..اسألي أنا باجاوبك.
"رنيم": طيب بثيناتي..حنا ليه نسافر مكه مع اننا مو بوقت حج؟بعدين ليش مانسافر لها بالقطار؟ واحنا أصلا من الاساس ليه بنسافر مكة؟>>>اقطع ابو الاسئلة هع
"دانا":ياعمري بثيناتي نشبت بالأسئلة الغبية.
"هيونه":خلها..محد قالها تسكتني.
"أ.منى" من بعيد: بنت انت وياها..تعالوا اجلسوا أماكنكم..خير واقفين مثل البزارين قدام خلق الله.
"البندري" بصوت واطي: أي خلق؟؟ أنا ماأشوف غيرنا و3 هنود بالصالة..،
"دانا": أكيد ماراح يكون فيه غيرنا..أجل أحد يجي للصالة قبل موعد الاقلاع بساعة ونص؟
"ديمه":..امشوا بس امشوا..منا رايقين لهذي وصراخها.
(ويجلسون الشلة على الكراسي بعد نص ساعة بدا دخول الناس للصالة وماتموا ساعة الا والمايك يعلن عن دخول الركاب للبوابة 5 اللي متوجهة لمكة المكرمة)
وفي الطيارة:
"البندري": قومي..والله ماتجلسين..أنا أللي عند الشباك.>>بدينا بالطقاق كالعادة
"ديمه": أقول لاتحلفين..انا من زمان قايلة اني حاجزة هالمكان.
"البندري"بصوت عالي:والله ان تقومين..

"ديمه"وبصوت أعلى: والله مااقوم.

وفجأة صرخت عليهم أ.منى بعصبية..وتجلس كل وحدة مكانها..

كان في الصف الاول:البندري وديمه وبثيناتي و اللي وراهم الاستاذات أما دانا وهيونه ولميس فكانوا في الوسط علشان كذا ما يمديهم يتهاوشون على الدريشة وكان جالس معاهم عجوز,و وراههم الريم ورنيم جنبهم فلبيني وزوجته..وتتوالى الاحداث:
"دانا"وكانت جنب العجوز بالضبط:أقول..ورى ما تبادلني وحدة منكم..أبي أجلس قريبة من يثيناتي شوي.
"لميس":لا ياماما..صرفي..جلسة جنب العجوز لأ..انت اللي تورطتي.
"دانا":حرام عليكم..تراها عجوز حليلة وهادية..لكني ودي أسولف مع بثيناتي بس.>>ههه تصريف
(( شوي وإلا يسمعون صوت شخيرالعجوز وهي تكلم نفسها بالحلم)
"هيونه":ايه صح..باين عليها هادية ورومانسية بعد..عشان كذا بنكرمك بجلوسك جنبها.
وبعد قليل وزعوا الوجبات على الركاب.
"رنيم":الريم ..شوفي شلون ياكلون اللي بجنبنا.انا لازم اعلمهم مضار الاكل الكثير.
"الريم"..ايه...الله يقرفهم.>>>ههه تسلكلها
(وفي الامام كانت الاوضاع مختلفة)
"لميس":والله اننا ظلمناها..شكلها بالعكس..عجوز اتيكيت..شوفوا شلون تاكل بالشوكة؟
"دانا":ايه والله..صرت انا اللي أستحي انها تشوف أكلي عندها .
"هيونه":قولوا ماشاء الله..تصدقون أول مرة أشوف عجوز تاكل بهالبراعة والرقة....
(وماكملت هيونه كلمتها الاخيرة الا وتتغرلهم العجوز ذيك التغرة...هاع
"هيونه"بهدوء وصدمة: سمعتوا اللي انا سمعته ؟
"لميس"بهدوء: تتوقعين مركبين معنا بقر في الطيارة؟
"دانا"بصراخ: هذي تغرة..تغرة..الله يغربلكم..تغرت عند اذني الله لايوقفها.
"لميس":وع..ايه والله وصلتني الريحة وانا هنا.>>>يع
"دانا" وهي تقوم من مكانها:والله مااقعد جنبها..بقوم..مااتحمل.
"هيونه"تسحبها: دانا اجلسي بلا فضايح..كل اللي في الطيارة يناظرونا حنا وازعاجنا.
(وتطل عليهم رنيم من ورى بوجهها:
"رنيم":هييه انتوا..شعندكم؟؟ فيه وحدة حاطه نغمة جوالها تغريد بقرة؟>>>ياسلام ع اللغة.
"لميس" وهي تدف وجه رنيم على ورى:رنيم حبيبتي..منا ناقصينك.فارجعي مكانك ابرك لك.
(وفي المقاعد الجانبية:
"البندري": يارب..يارب..ينفتح الشباك وتطيحين منه.
"ديمه":ههه..مايمديني اطيح منه ياماما..لانه صغير.
"البندري":يارب..يارب..ينخسف فيك كرسيك وتطيحين على سطح هنود.
"ديمه":ههه..مايمديني ياماما..اصلا لوطحت بتطيحين معي لانك جنبي.
"البندري"بعصبية: ديماه...كلي (.....................)>>الفاظ رقيقة غير صالحة للنشر.
(وعلى صرخة البندري فزت بثيناتي من مكانها وطاحت على الارض لانها ياعمري كانت نايمة)
البندري ماقدرت تمسك نفسها وانفجرت بالضحك ..أما ديمه قامت على طول تساعدها لان الناس كانت عيونهم عليهم والمدرسات متفشلات وساكتات من الفشيلة)
"دانا":بنات..شوفوا..ماكأن هذي بثيناتي على الارض؟؟
"هيونه":ايه والله...وش تسوي ع الارض؟
"لميس"بشهقه:هيه...لا يكون طايحة الله يفشلها...يوه يالفشيلة!!!!!
شوي وتطل عليهم رنيم بوجهها مرة ثانية:
"رنيم": بنات ليه بثيناتي منسدحة ع الارض؟تتوقعون تبي تنام وتتمدد؟
"دانا"تدف وجههابعصبية:رنيم..منا رايقين لك..
(وتلتفت ع البنات:
"دانا": شوفوا بنات..من جد والله..بنسوي نفسنا مانعرفهم..وخل يصير اللي يصير..مو ناقصين فشايل ثانية.
"هيونه":ايه والله.........ش..هذي ديمه جت.
"ديمه": ...بنات.. ا.منى تقول خل وحدة منهم تبادلك علشان ازعاجنا زاد.
"دانا ولميس وهيونه":.......................................... ..........
"ديمه":وجع ان شاالله..أقولكم وحدة تبادلني!!!
"دانا ولميس وهيونه":...............
"ديمه" فقدت أعصابها وتسحب المجلة اللي كانت تقرى فيها لميس بقوة
"ديمه":هيه..هيه..أكلم جدار؟
"لميس"بكل رقة:لو سمحتي بغيتي شي؟؟ >>>يعنني ما اعرفك
"ديمه":؟؟؟؟؟؟؟؟؟؟؟؟؟؟؟
"دانا":على فكرة..تصرفك بالمرة وحش..قصري صوتك لما تكلمين اللي قبالك.
"ديمة": دانا!..لميس!..هيون!..هين..انا أوريكم. >>>ياويلكم
(وترفع صوتها للناس بتعمد:
"ديمة": دندون..ههه..وش اخبار طيحتك قدام ابو عبد الله الحارس..العام.ههه.تذكرين؟؟؟
وانتي لمو حبيبتي..ترى عادي حتى لو تهاوشتي مع بنات المتوسط ومسحوا فيك الارض..أما انتي ياهيونه ف...
"هيونه"وهي توقف بسرعه":بس.....يالعبدة...انطقي يلا مكاني. ..
(وتجلس ديمه بسرعة وهي فرحانة اما دانا ولميس فكانوا حاطين المجلات على وجيههم من الفشيلة وتكملها رنيم عليهم وترز وجهها:
"رنيم": دانا..لميس..انتوا من جد صارلكم كذا؟طيب ليه ماقلتولي عشان اضحك؟..
"دانا": هين..انا ذابحتك ذابحتك ياروينيمه.,,بس صبرك لين نوصل.
(واخيرا..اعلن الطيار عن اقتراب الوصول الى مطار الملك عبد العزيز بجدة..وولعت لمبات ربط الحزام)
وفي المطار:
أ.منى:يلا بسرعة ياطالبات..ما أبغى أي تأخير..نخلص اجراءاتكم وعلى طول عالميكروباص.
"البندري":ليه استاذه....خل نقعد في جدة شوي..
"أ.نورة": لا والله.. شايلين همكم وخبالكم في مكة وشلون لو رحتوا جدة..يلا بس.
"رنيم"بصوت واطي: الحين من كلمها الملقوفة ذي؟
"ديمه": يقالي مسوية شخصية.. تلقاها اول مرة تركب طيارة بحياتها.
"بثيناتي": حاشوش. (وهنا جت بثينة كفخة على وجهها من شنطة لميس لانها زودتها هي وهالحاشوش)
(وصلت الشلة الى مكة اخيرا وراحوا للاوتيل اللي حجزوا فيه وعلى بال ما وصلوا ورتبوا وارتاحوا شوي كان على العصر)
"أ.منى": شوفوا ياطالبات..الان بنصلي العصر ونتجهز وعلى طول بننزل للحرم.
"دانا"فرحانه بصوت عالي: هي يه
وفجأة سكتت تدريجيا لما شافت البنات كلهم التفتوا عليها ويناظرونها باستحقار
(ملاحظة:دانا ياعمري دايم تتحمس وتتفاعل بقوة..وعشان كذا تتعرض من صديقاتها في النهاية للتفشيل) "بثيناتي": قوموا صلوا يلا..ياويل اللي أشوفها تأخر الصلاة.
"البنات": ان شاالله عمتي.
"ديمه"وهي تطل من الشباك:ياسلام..أحس براحة نفسية لما أجي لمكة.
"لميس":...بدا التفلسف.
"البندري"وهي تركض لديمه: وخري..وخري خليني أشوف مكة.
(وأول ماطلت التفتت بعصبية لديمه:
"البندري": تنصبين علينا..وين مكة؟؟
"ديمه": أي تنصيب؟ يابقرة انا قلت مكة...مو الكعبة..
"البندري" بعصبية: ووش الفرق يعني؟ >>يقطع ابو الدلاخة يابنيدر..روحي ذاكري نحو ابرك
"رنيم": يوه..الحين وش يفهمها هذي.
"دانا": الكعبة هي المربع الاسود اللي تشوفينه في التلفزيون..أما مكة فهي اسم المدينه.
"ديمه": فهمتي يالدلخة؟
"البندري": هيه..هيه..ما أسمحلك.....(ويبدا الطقاق مرة اخرى بين ديمه والبندري ..أما رنيم فمسكت قلم ووقفت قبالهم وهي مسوية مذيعة.
"رنيم": أعزائي المشاهدين ننقل لكم وعلى الهواء مباشرة أحداث حرب الجارات بين بنيدر وديمه الدميمه مع العلم انها المرة الخامسة بعد المائة في هذا اليوم فقط...
(اما هيونه ولميس والريم ودانا فكانوا يضحكون وكانت الغرفة ازعاج لين ما انفتح الباب ودخلت بثيناتي.
"بثيناتي": صليتوا ؟
(سكتوا وكل وحدة قامت تناظر في الثانية وتصرف ....
"رنيم": والله هم السبب كل ماجيت أصلي قالوا لا تعالي صيري مذيعة وضحكينا.
"ديمه": رنيموه يالكذابة..وتحلف بعد..الله أعلم من اللي شب الطقاق بيني وبين بنيدر.
"دانا": ايه صح..رنيم كانت توز بين ديمه والبندري ولميس كانت توز بيني وبين الريم.>>تدخل نفسها بالغصب
"لميس": قلبتيها علي يالحمارة لكن هين..الشرهه على اللي يعطيك"حلوا للحلوا"..هاتيه..هاتيه.
("الحلوا للحلوا" هذا احدى الحلويات اللي مدمنتها الشلة منذ قديم الزمان وأطلقت عليها هذا الاسم لاسباب خارجة عن نطاق القصة)
"بثيناتي":أقول قوموا صلوا والله ان جت أ.منى ماعليها من أحد,,بتلبس وتمشي.
(ويركضون البنات بسرعة لسجاجيدهم..أما بثينتي طلعت وهي تقول:لا تنركون الخشوع.
وبعد الصلاة نزلت المجموعة بقيادة أ.منى بعد توصيات وتحذي