شوفي كيف يفكرون الحريم وكيف يفكرون الرجال مت من الضحك خ

,,
,,
دحض وجحض وفحض
ما بثرونا به هؤلاء النسوه في الكتب و النت والتلفزيون والمجلات عن ما يسمى
"فن التعامل مع الازواج"
فهيّا بنا ندحض ونجحض ونفحض بعض ما اقترفته كيبورداتهنّن من هراء
وحده تقول
((((كنت إذا أردت إيقاظ زوجي من النوم للصلاة أغسل يدي بالماء حتى تكتسب نوعاً من البرودة
وأعطرها بالعطر المفضل لديه ، فإذا ما لامست برودة يدي جسمه الدافىء
واستنشقت أنفاسه عبير ذلك العطر استيقظ من نومه وإن كان يغط في سبات عميق.)))
طيب وان كان زوجها قروي وطمَر من سباته العميق ورجفها وقال لها :
شايفتني مصْفّر يوم انك تبخين في وجهي طيب
( مصْفّر = مغمى عليه)
وتقول وحده ثانيه :
(((قال لي بغلظة سوف أذهب للغداء مع أصدقائي هل تريدين شيئاً ؟
قلت له :
حسناً ولكن لا تتأخر لأن الكهرباء سوف تنقطع .
استدار نحوها في تعجب وقال :
من قال لك أنها سوف تنقطع ؟
أجابته بقولها : أ
نا أقول لك ذلك ، بمجرد خروجك من البيت يظلم كل شيء وبمجرد دخولك البيت يضيء كل شيء .
تبسم بعد أن أدرك ما ترمي إليه وذهب وكله شوق للعودة إلى البيت)))
اما يدرك ما ترمي اليه ..والله لو تثّور فيه ما ادرك ههه
ايه هيّن كله شوق للعوده للبيت
يا بنت الحلال ان ما قال لتس قبل تكملين رومانسيتس :
وش بيقطع الكهرب قطع الله ذا الخشه !!
واذا قلتي له
انا أقول لك ذلك ، بمجرد خروجك من البيت يظلم كل شيء وبمجرد دخولك البيت يضيء كل شي
قال اقول بس اخلصي وقولي وش تبين وخلي عنتس حركات المصاريه..
وتضيف هذي وتقول:
(((أرادت أن تمازح زوجها قالت له :
أفتح فمك وأغمض عينيك . أغمض عينيه وفتح فمه في تردد فإذا بها تلقمه قطعة من الحلوى
اللذيذة . وعندما أراد الذهاب قالت مرة أخرى :
أفتح فمك وأغمض عينيك ، أغمض عينيه من دون تردد وكله شوق إلى تلك الحلوة اللذيذة
فإذا بها تلقمه ورقة تلك الحلوى التي وضعتها في المرة الأولى)))
يا قلبي قلباه على السماجه
وش ذا الرومانسيه اللي تخلي الحرمه تدس القراطيس في خشة زوجها
ما صار فم صار طفايه عند اصنصير ههه
ووحده اخرى تقول:
(((أعتاد زوجي كلما ذهب مع الشباب في رحلة أن اخبىء له بين ملابسه رسالة حب
تعبر عن مشاعري نحوه وقت غيابه وحالي وحال أولاده من دونه .
وذات مرة لم أكن راضية عن سفره فلم أكتب له تلك الرسالة
وعندما عاد من السفر فاجأني بقوله :
لم أترك شبراً في الحقيبة إلاّ وفتشت فيه عن رسالتك التي عودتني عليها بل أني فتشت الحقيبة
ثلاث مرات في كل مرة أقول في نفسي لعلها وضعتها هنا ولم أرها لعلي أفتش جيداً عنها ..
. تندمت كثيراً على فعلي ذلك وأنا المح حنين الشوق في تعبيرات وجه ،
عزمت في نفسي بعدها إلا أقطع عادة حسنة كنت أقوم بها ما استطعت )))
شوفي وانا اخوتس
يا انتي يا زوجتس.. اكيد ان واحدن منكم مخفّه
وان كنت اشوف انتس وانا اخوتس مخفّه وصتيمه في آنن واحد علشان صدقتيه
هقوتس بيترك فلّة الحجاج مع خوياه ويقعد يدور على قرطاسه ههه
يا بنت الحلال شكله يدورها علشان يشقها لايقرونها خوياه ويذبّون عليه ههه
وهذي وحده الرومانسيه تدودل من اذانيها تعالوا نقتبس الكثير من خربطتها
لعلنا نجد فيها العبره والعضه.. تقول:
((في الصباح عندما تصحين زوجك من النوم اجلبي ريشة ناعمة واقعدي جنبه في السرير
والعبي بالريشة في وجهه بنعومة لحد ما يصحى وسمعيه كلمه صباح الخير حبيبي
ويكون مظهرك احسن مايكون .. وبهذا يبدا يومه بنشاط وحيوية )))
ان ما عاطس وتفل بوجهتس ما اكون اها بس....
علشان تحرمين تتميلحين وتلعوطين وجهه بريشه
وبعدين هو فيه حرمه بتقوم وتروح تشخص وتلبس علشان تصحي زوجها..؟
يقطع ام الفراغه يا ناس
اللي يقال لها سنعه منهم تنغزه نغزتين مع كتفه وهي معطيته ظهرها وان قام والا بقريح
وتقول
(((عندما تجلسون مع بعض للتفرج على التلفاز مثلا دائما الصقي نفسك به واجلسي في حضنه ..
ولو لم تكونوا متعودين على هذا جربي ولو سالك قولي بردانة وحضنك بيدفيني )))
ههه ههه قسم بالله استحيت منها وانا في بيتنا
تخيلي عاد وانا اخوتس انك زوجك نصراوي وتلصقين فيه وهو يشوف مباراة هلال ونصر
وخبرتس عاد بجماهير النصر وعشقهم لناديهم وحماسهم المنقطع النظير
ويسجل النصر هدف في اخر دقيقه ..قسم ان يدزّتس لين ترقع جبهتس في المجلى
شوفي وش تقول ذي
(((يوم من الايام اذا كنتو متزاعلين او تضايقتو من بعض بعد جدال او نقاش جيبي مرايا وقولي لزوجك غمض عينك وحطيها في وجهه .. وابدئي غزل منه شايف الانسان اللي اسرني حبه ؟؟ والله اني اموت عليه
هو اكيد بيتشقق من الانبساط وتلقي الابتسامة من هالاذن للاذن الثانية ))
ههه الله يخل عقل عقل عدوتس
طيب وان كانه هو نفسه مقتنع انه شيفه وقال مير يا تسذبتس تسذباه
والا فهم قصدتس بالغلط وقال :
ايه يا قليلة الحيا قصدتس تقولين .. لو اني شايفن خشتي في المرايه ما قعت اتزعّل وتدلع
وذي تقول
(((اشتري لزوجك مراية شكلها حلو .... بعدين اعطيها زوجك ومعاها الكرت مكتوب فيه:
في المراية هذي .... راح تشوف اجمل رجل في العالم)))
طيب وان كان فيه بوهه *****تظنين انه بيصدقتس يا اللوقيّه
وذي بعد
(((خذي وردة حمراء .. وحطيها في مكان زوجك راح يشوفها ..... واربطي فيها ورقة مكتوب فيها: اشكرك لانك دخلت حياتي))
وودكم انه يعفط الورده ويكتب في قفا نفس الورقه
" يا ليتني دخلت سجن ابو غريب ولا دخلت حياتس يا البثره"
شوفي وش عند ذي
ا(((أقولكم على فكرة بسيطة وحلوة ومن خلال تجربه اكتبي اغراض المطبخ
و ارسليها لزوجك على الجوال:

• 1 كيلو خيار
• طماطم
• بطاطس

الخ
وبعد الطلبات اكتبت

• 10 بوسه قوية
• 2 حضن دافئ
• 100 كلمة احبك يا روحي )))

وودكم انه يردعليها ويقول:
يا حبي لتس يا ام فلان احضان وبوسات ومية كلمة احبك
علشان بجيب لتس طماط وبصل؟
اجل لو اني جايبن لتس كزبره كان حبيتي رجولي
وذي بعد
(((لما تبغي زوجك يرجع من الاستراحة بدري يوم الاربعاء او الخميس ارسليله يوم مسج
وقولي فيه تعال بسرعه سويت لك مفاجأة ..
عاد مفاجأتك راح تكون بسيطة مرة ..حضري عشا خفيف ..
وطبعا مع لبس حلو ومرتب وميكاج ظريف ..
وبيت مبخر وعيال نايمين وبعد العشا قوليله حان وقت الترفيهه ..
وجيبي مونوبولي او اونو والعبو .. مرة راح تنبسطو ..)))
يقطع ام وساعة الوجه
يكون زوجها فالّها مع خوياه بلوت والا متحمسين على الدوري السعودي والا الاسباني
وتناديه وتقول مفاجأه وآخرتها اونو وضومنه ...
انا اقترح ان زوجها يستحمل ويلعب معها اونو ويشترط انه اذا فاز يرجع لخوياه
وتقول بعد:
(((وممكن الاسبوع اللي بعده ارسليله نفس المسج واطلبي بيتزا او فطاير من اي مخبز جنبكم
وتكوني من اول اشتريتي من السوبر ماركت كم نوع ايس كريم ( فانيلا , منجا , فراولة ,
شوكولاته )يعني انواع مشكلة من الايسكريم واعمليله طبق ايس كريم بعد العشا كحلا ..
واتفنني طبعا .. حطي كذا كورة ايس كريم وفوقها شوكولاته مبشورةاو عود بسكوت ..
انتي وشطارتك وطبعا وقت الترفيهه جا بعد العشا .. جيبي اي لعبه ثانية انتو تحبوها ..
والعبووهكذا كل اسبوع ارسليله مسج واعملي حاجة معينة ..
اذا كنتي شاطرة في المطبخ والحلويات اعملي تورته بالفواكهه مثلا )))
وش اللي تناديه علشان ياكل فطاير ومعجنات ..
من قل الغازات اللي فيه بتوكيلينه فطاير علشان يعجعج غرفتكم
ووش اللي تنادينه من خوياه علشان عسكريم عليه حثيربات كاكاو ..وش شغل البزران ذا
وذي بعد
(((وخللي اسبوع لوك بنوتة صغية من خلال لبسك والتسريحة ممكن قرنين زي الصغار بطريقة جذابة
وبكل ملونه ومدندشة وشبشب تويتي حق البيت واسبوع تكوني انثى ناضجة شبشب ريش وتسريحة تناسب انوثتك وهكذا .
واكيد الكلام المعسول البعيد كل البعد عن مشاكل الاهل والاطفال ومقاضي البيت ..
اليوم هذا لكم انتو وحبكم وبس ..وطبعا لما يكون رايح عند ربعه لا تقوليله انك راح تعملي شيئ
ارسليله مسج وهو يجيكي ركض ..والله يابنات هذه طريقه رهيبة تخليكي تشدي زوجك للبيت
في الويك اند ويصير هو ينتظره بفارغ الصبر)))
ههه ههه
اقول الله يرحم حالتس بس..
هو بيمشي لها الاونو لكن مهوب ممشي لها القرينات والتويتي ..
بعدها بيوديها لشيخ ينفث عليها
قاعد اتخيل الجلاده مسويه كذا لعبدو وطبت عليهم المهلهله
وهي لابس تن شبشب تويتي و تنطط بقريناتها ههه ههه
واخيرا ما اقول الا يا حبي لكم يا امهاتنا اللي اذا الوحده منهم اذا خربتها خربتها
وعبرت عن مشاعرها ورومانسيتها قالت لشايبها
جعلي ما ابتسيك ههه