طريقتي في صنع الباكوره مزوده بصور

السلام عليكم
كيفكم يابنات عساكم بخير
هذي اول مشاركه لي معاكم وان شاء الله ماتكون الاخيره
حبيت اشارك معاكم في هذا القسم بهذي الاكله
هذي طريقتي في صنع الباكوره وانا اضفت عليها مثل البطاط والجزر الملفوف لنوع من التغيير
والحمدلله نجحت الطريقه وطلعت وايد لذيذه ومقرمشه
المقادير :
3 حبات بطاط متوسطه
4 حبات جزر متوسط
بصل اخضر 3 حبات
فلفل رومي بارد حبه وحده متوسطه
فلفل حار 3 حبات واللي يحبه حار يزيد حسب رغبته
كزبره حضرا تقريبا نص حزمه
ملفوف ( كرنب ) ربع ملفوفه متوسطه
كوب طحين رقم واحد للي نستعمله لصنع الكيك
وكوب طحين الحمص اللي نسوي فيه الباكوره
3 ملاعق سنوت ( ينسون )
ملعقه كاري وحده
ملح حسب الذوق
فلفل حار احمر ملعقه صغيره او حسب رغبة الشخص اذا يحب الاكل حار
وزيت للقلي
وطبعا قياس الملعقه اللي ناكل فيها
وقياس الكوب كوب الجبن البوك الكبير
الطريقه :
نقطع الحضار كلهم بشكل ناعم البصل الاخضر والملفوف الفلفل الحار والبارد والكزبره
مثل تقطيع السلطه الناعمه
بس البطاط والجزر نبشرهم لانه اذا قطعناهم مابيستون معانا بسرعه
بعد مانقطعهم نحطهم في طاسه ونخلط كل المقادير مع بعض
ونعجنهم بالماي حتى تتكون معانا عجينه لارخوه ولا قاسيه معتدله
نسخن الزيت ونحط بالملعقه نفس صنع الخنفروش ونقلي الباكوره حتى تصير لونها ذهبي ولاتنسين تحطي تحته ورق يمتص الزيت
ونقدمها للعايله اذا عاد ماقضوا عليها وانتي تسوينها من حلاتها
وهني وعافيه ع قلوبكم
ياريت اللي تجربها ترد خبر شو رايها في الطريقه حلوه ولا لاء
اتركم مع الصور
هذي العجينه بعد ماخلط كل المقادير صارت بشكل هذا
وهذي يوم احطها بزيت وقليها
وهذي بعد ماجهزت وحطيتها بصحن
وهذي المبشره للي بشرت فيها الجزر والبطاط الفتحات الكبيره
و خلصنا الصور والطريقه
ان شاء الله تجربونها وتضوقون الطعم كيف رهيب