عرايس جدة

السلام عليكم مبروك وأنا مريت بنفس التجربة لأني قبل الملكة ماخليت ولا بقيت يعني صار عندي خبرة بالنسبة لفستان الملكة أخذته من دمتريوس بجدة مول كل إلي شافوه عجبهم والمكياج عند فاطمة والشعر حنان في صالون ريماس إنتي لو رحتيلهم قولي لفاطمة أنا من طرف عروسة بروفة كانت مسميتني كده في جوالها أما الكوشة لا تتعبي نفسك ولا شي روحي عند كامليا الدي جي كل إلي جاه الملكة يسأل عنه حتى إلي مايعرف يرقص رقص إسمه عصام وأجبلك النمرة بالنسبة للمسكة على حسب فستانك لو كان في حركات من الوسط والبطن تحاولي تكون صغيرة وأنا أشوف الورد الطبيعي في الملكة أحلى وأي سؤال أنا حاضرة

انا صممت فستاني في زانه الي في لي مول و بلنسبه لي المكياج انا عملته في دار الموضه مره حلو و خفيف و ازا انتي تحبي المكياج الكتير ريما حلو لاكن مره ثقيل انا ما احب كدا و صورتني شليمار مره كويسه

وعليكم السلام ورحمة الله وبركاته
هلا وغلا حبيبتي
انا مره حاسه فيك وبعطيك الكلام والنصايح من قلبي لان اللي اتمناه لنفسي اتمناه لغيري
شوفي انا بقولك على اللي عندي واللي عجبني وبصراحة
حابة اسأل العرايس واللي ملكوا من فين اشتريتوا فستان الملكة ويش احسن المحلات للفساتين
انا عن نفسي مره مااحب الجهاز واحب الخياطه مره يعني ارتاح اكثر فالخياطه لاني اكون مختاره القماش بنفسي والخياطه اعرف شغلها ومتعامله معاها
فانا انصحك تخيطي احلى واشيك وتضمني ماتكون في وحده معاها نفس فستانك صح ممكن في احد يكون معاه القماش او الموديل بس مستحيل يتجمعو الاثنين في وحده
فإذا عجبتك نصيحتي روحي لمنصر العيسائي تبع الاقمشه فروعه كثير في مجمع الشرق وطريق المدينة والتحليه وحراء
او عمر بن صديق في التحليه
والخياطات في كثير اسمع عنهم منهم الموضه بس مااعرف مكانها فين بالضبط
وفي فيروز هذه عند مدينة الحجاج
واما خياطتي اللي اتعامل معاها واللي بصراحه شغلها مره يعجبني في صالون ( * كروشي * ) قريب من تشيلز وانتي رايحه للجمجوم شفتي السفاره الامريكيه قدامها على طول من الجهه اللي يكون فيها تشيلز على يسار السفارة
والله خياطتهم مره روعة
وعلى فكره قريباتي خيطو عندها فساتين الملك والافراح وترى ماشاء الله اللي زواجها في ليلتي واللي في هيلتون يعني بجد الشغل تبع المشغل مره حلو
2-منو احسن شغل ريما ولا المقينة ومتي المفروض احجز عندهم قبل الملكة بكم شهر
انا اسمع ان الاثنين حلوين بس في بعد صالون اسمه ان بي ستايل قدام جده مول وخلف القثمي للمفروشات
مره شغلهم حلو وناعم يعني يطلعك عروسه ليدي ناعمه وبنفس الوقت حلوه
ريما اعتقد يثقلون مره فالمكياج
بس لو رحتي ان بي ستايل اطلبي اللي تعمل لك المكياج هي اللبنانيه ناسيه اسمها بس اللي فالاستقبال اسمها نجمه زكني عليها انك تبغي اللبنانيه وتقدري تعملي بروفه والاحسن انك تحجزي قبل بوقت عشان مايصادف انه في اليوم اللي انتي فيه عروسه ثانيه وماتاخذين حقك في التجهيز
3- ايش رايكم بتصوير سوزان باعقيل ولا تعرفون وحدة احسن علموني
المصورات ام طبعا سوزان باعقيل دخلت صالونها شفته حلو بس يعني مره السعر خيالي بصراحه ومبالغ فيه
بس شوفي انا شفت البوم صور صحبتي وشريط الفيديو عملته في فاملي مره روعة حتى غلاف البوم شريط الفيدو كان روعه عامله فيه صور العروسة والعريس
بس يتاخرون على مايعطوك الصور بس شغلهم حلو
واعتقد في مصوره اسمها ساميه بس مدري وين مو متذكره بس حلوه
4-مين تزوجت بفندق الدار البيضاء لان ملكتي فيها وكيف التنسيقات الخاصة بالقاعة وهل في مشرفة تساعدك
بصراحة مافي احد من قرايبي القريبين عمل فيها يعني اعرف كيف عملو الترتيبات بس في كثار من جماعتنا عملو فيها
مره حلوه القاعه ومرتبه وكل شي حلو بس مثل ماقلت لك ماادري عن الترتيبات اللي تسبقها سامحيني مااقدر اساعدك في هالشي
5- الكوشة مين وين اخدها هي والزهور
شوفي احنا فزواج اخويا عملنا الكوشه عند علوان اللي فالتحليه مره الكل انهبل على الكوشه وكانت حلوه وناعمه
انصحك فيه
والزفة ممكن احط مقاطع مختارة من اشرطة ولا اصمم شريط زفة
الزفه احسن تروحين للقاعة وتشوفين المسؤلة عن الديجي والزفات هي تسمعك كل شي جديد وترتبه لك ومنها تشوفيني كيف بتكون المسافه احسن من انك تعملين الزفه برا وطبعا ببلاش تعمليها من القاعه
بس اذا ماكان في مسؤله عن الديجي مع انه مااتوقع انه ماعندهم ساعتها اختاري الاغاني او الاناشيد اللي تبغيها لزفتك وروحي لاستديو كويس يعملها لك بس احسن شي تعمليها من القاعة نفسها لانها تكون عارفه ومرتبه لك الزفه وكم بيكون طول الممر وكذا
ويش عندكم فكرة بالنسبة لدبل
ام هذه ماعندي خلفيه عنها لان الصيف كله كنت مسافره وماحضرت زواجات فماتحضرني افكار جديده وحلوه تعمليها
وهل تنصحوني اعرض صورتي بالقاعه وهل في الملكة امسك باقة ورد انا عارفة اني زودتها بس الله يخليكم ردواا علي لاني محتاجة لاجوبتكم رجاء لا تخدلوني و اذا عندكم نصايح دلوني لاني وحيدة اهلي ومافي احد بيساعدني
لا عادي حبيبتي اسألي وخذي راحتك انتي اليوم في موضع الحاجه بكره احنا
انا من راي حلو لو تعرضين صورتك مره جنان واحس لازم تمسكين باقة ورد عشان ماتكون ايدك فاضيه ومع الخوف ماتعرفي وين توديها
وعلى فكره باقه الورد والكوشه لازم يكونو قريبين من لون الفستان لو كان فاتح وانصحك بالالوان الفاتحه والزهريه في الفستان
والباقة تكون تابعه للكوشه
وهذا يالغاليه اللي عندي سطرته لك من قلبي والله
وان شاء الله اكون ساعدتك
وعلى فكره انا ملكتي فالحج بتكون فاتمنى انك ماتبخلين عليا بالنصايح
بس انا للحين ماجهزت لها بعد العيد ان شاء الله راح ابدا
دعواتك لي
وعلى فكره الفرحه الاكبر هي رضا النفس والقناعه والجمال جمال الروح
وربي يجمع كل وحده بخطيبها ويوفق بينهم
ويرزق كل البنوتات الازواج الصالحين

وصح اذا ماكنتي تحبي تتعبي فالخياطه كثير يجيبو فساتينهم من جده مول
والاسواق الحين مليانه بس انصحك بالاخياطه احلى وارتب
وربي يسعدك ويهنيك ويوفقك يارب

الخياطة أحسن من الجاهز لكنها متعبة شوية
عندك محل "بنيتي" في طريق المدينة النازل
يعملوا الكوشة والطاولات بشكل حلو
بس سعرهم مرتفع

انا عملت فستان ملكتي عند زاكي بن عبود حلو وناعم جدا وفخم كله رسم
ادخلي موقعها وشوفي عينات من فساتينها
لو عجبك روحي

هلا اختي وعليكم السلام
انا زيك حايسه ملكتي في العيد وماني عارفه ايش اسوي بس صديقاتي ماقصروا وباقلك على الي اعرفه مع انه الاخت السنيوره ماقصرت الله يعطيها العافيه كفت ووفت.
1_ شوفي بالنسبه لفستاني سويته عند مصمم في المساعديه.
2_و ريما مكياجها مره ثقيل انا بالنسبه لي احب المكياج الناعم فيه عندك بثينه خلف المساعديه مكياجها ناعم وفيه جمالك في مركز الخياط بس مااعرف مكياجها للعرايس وفيه شامل والمفروض تحجزين من بدري على الاقل قبل الملكه بشهر.
3_انا للحين ماحجزت مصوره محتاره وحايسه اذا احد من البنات تقدر تساعدنا ياليت اما سوزان مااعرفها.
4_.........................
5_الكوشه وتلبيسات الطاولات والكراسي انا استاجرتها من نفس القاعه لانها عجبتني وخليتها ذهبيه لاني ماني حابه احد يعرف لون فستاني.
6_الشريط انا اخترت الاغاني وهوه ساعدني وخليتها مقاطع احسن شي بس الزفه اغنيه كامله والدبل انا زيك ماعندي فكره.
7_والمسكه لازم شي ضروري بس خليها ورد طبيعي احلى.
واتمنى اني ساعدتك وياريت البنات بعد يساعدونا...

...أختى أنا بقولك على شريط الززفه....لانى ااحس البنات خدمووكى كثير بالباقي بس بقي الشريط..
بكتب لك شلون ترتبين الآغاني بس ابى اعرف اول العريس بينزف؟..تحبين الزفه الطويله والا على طول ؟....
وعلى فكره ليش ماترووحين المساعديه أحمد البدوى ترى تصميمه حلوو بس يكون براسك انتى فكره ووممكن انتى تشترين له القمااشه مثلا من البازار الي بالمجمع مرره حلو........
او من العيسائي بس مشكلة العيسائي قطعه موجوده دايم...واحمد بدوى الحلو فيه يحط كريستال وشغل ويخلي الفستان
فخم حيل....ويسوى لك معاه اذا تبين مسكه وللشعر واكسسوار كاامل..المكياج بصراحه ريما عند خلود رائع
صح ثقيل بس انتى عرووس وقولي لها لاتسووين لي حركات كثيره وهى بتفهمك اذا مااتحبينه ثقيل...
أختى الله يوفقك وانتظر ردك على الشرريط..

ميرنا
الله يبارك فيك وبصراحة مشكورة وماقصرتي وان شاء الله امر على كامليا واشوف بس وين موقعة بالضبط وممكن ترسلي لي الرقم اذا ما فيها زود
baan
مشكوررة بس انا ماجربت مكياج ريما بس نصحوني فيه لكن مكياج المقينة جربت عند ماجدة صراحة كان مرة حلو وناعم
السنيورا
الله لا يحرمنا منك ومن نصايحكوانا بعد ملكتي بالحج حتكون مباشرة بعد انتهاء الدوام يعني هذي الاجازة الوحيدة اللي بقدر اجهز فيها وعلى كلام رفيقاتي اجهز واحجز من دحين قبل مايضيع الوقت ومالاقي حجز واضيع بين الرجلين
والله يوفقك ان شاء الله
وعلى قولك الفرحه الاكبر هي رضا النفس والقناعه والجمال جمال الروح وربي يجمع كل وحده بخطيبها ويوفق بينهم ويرزق كل البنوتات الازواج الصالحين
اللهم امين
ام جنى
تسلمي والله لايحرمنا من مشاركتك الحلوة
روحي بروحك
مشكورة عزيزتي وما قصرتي
بنوتة ذوق
تسلمي لي عزيزتي والله يوفقك
شوكولاين
العريس اكيد بينزف
تحبين الزفه الطويله والا على طول ؟..
احب الزفة الطويلة واتمنى ان تكون حلوة لان الملكة حتكون افخم من الزواج
والله يوفقكم جميعا ويرزقكم بالذرية الصالحة والزوج الصالح