علاقتك باهل زوجك هل هي مثاليه

1. وحده غاليه علي وافديها بروحي عرفت من امي ان زوجة ولدها

صباح الخير فراشات
سوال دايم يدور ببالي
ليه دايم علاقة زوجة الولد باهل زوجها متوتره رغم انو تلقينها
علاقتها بالاخرين مو جيده الا ممتازه على النقيض
رغم ان الاولى هم اهل زوجها لانهم صارو اهلها وصارة زي بنت لهم وخاصه اذا صارو عسل معها ويتمنو رضاها؟؟؟؟؟؟؟؟؟؟؟
موضوع طويل ومتشعب ولانقدرنحصره في موضوع واحد بس احسه مهم انا استغرب اللي يقول اقرب الطرق للوصول الى قلب الرجل هي معدته؟؟؟
انا من واقع تجربتي مع من حولي تاكدت ان اقرب الطرق للوصول الى قلب الرجل هم اهله الى قضى كل عمره معهم ويفرح وتكبر بعينه زوجته لما تكون مقدره اهله وحابتهم وماتذكر الا محاسنهم
وصدقوني تصير بعينه احقر الناس لما تنتقدهم على كل صغيره وتدورالزلل عليهم وتهمل زيارتهم وماتماشيهم حتى لومابين هالشي قدامها
مره صارلي موقف ماراح انساه ابد ويمكن هو اللي خلاني افتح هالمواضيع للنقاش

وحده غاليه علي وافديها بروحي عرفت من امي ان زوجة ولدها

بتزور امي وقالتلي امي تعالي تقهوي معنا علشان اسلم عليها المهم انا رحت هي متزوجه قريب يمكن لها سنه ونص المهم انا جلست معها احلا من العسل لدرجه اني حبيتها وتعلق قلبي فيهاقمه بالذوق والاحترام عجبتني علاقتها بامي تقوم تفطر مع امي وتتقهوى معها العصروتسولف معها حسيتها ملت فراغ امي ووسعت صدرها سوت اللي ماسووه حريم اخواني جلست اربع ايام عند امي احلا من العسل وصرت امدحها لمي اقول ماشالله عليها عرفت تختار عز الله انها مرت ولد سنعه انا استغربت ان امي ماعلقت على كلامي ابتسمت وسكتت بعد كم يوم جت خالتها تسلم على امي انا اول مادريت رحت لاهلي ركض بسلم عليها لاني احبها كثير وهي وامي الروح بالروح بنات تفاجات
البنت مافرحت ولافزت لخالتها تسلم من ورا خشمها قلت يابنت لاتدققين يمكن مو قصدها المهم مرت الزياره على خيروبعد كم يوم وانا اسولف مع امي قلت لامي يمه وش رايك فيها قالت بنت حلال الله يوفقها قلت بس يمه مالاحظتي انها ماتسولف مع خالتها زي ماتسولف معك قالت الله يهديها
انا حسيت ان فيه انا وعرفت انها رغم انهم ببيت واحد ماتنزل لخالتها تخيلويمر يوم ويومين مايشوفونها تقول انها اذا سمعت باب الكراج يفتح نزلت تحت كانها جالسه عند اهله من وقت وتاخذ غداها وتروح غرفتها يعني تمثيل في ثمثيل وتقدر الغريب وتروح لهم واهل خالتها ماتروح لهم وتسبهم كل ماجلست واشيا واشيا المغزى من هالكلام ليه يصير هالشي؟
ليه تعتبر اهل زوجها خصم وعدو تحط خطط واكاذيب وتمثيليات بتعاملها معهم؟
ليه تحس ان خالتها ماتبيها هي لو كانت ماتبيك كان ماختارتك من ملايين البنات لولدها لولاها لما وصلتي لشريك حياتك
ليه ماتكوني طبيعيه في تعاملك معهم مانشوف الابتسامه والفرح الا مع اهلك واذا كان اهل زوجك عبستي وكشرتي وشلتي الدنيا فوق راسك؟
ليه تحطي نفسك في مقارنه بينك وبين امه؟ رغم انك ماترضين مرت اخوك تبدي نفسها على امك ولا تقلل من قدرها؟
ليه لما تروحين لاهلك تركضين للمطبخ وتشيلين الصحن عن امك وفي بيت حمولتك تشوفينها تغسل الصحون ولاتبالي بل تصل بك الوقاحه انك تجلسين ضيفه وهي تصب لك القهوة؟
يضل الكبير له احترامه في مجتمعاتنا العربيه سواء قريب او غريب
ليه كل سنه نسمع بلاوي عن حريم العيال اكثر من السنه اللي قبلها؟
ليه الحين ارتبط رفع الصوت وقله الحياء والحشيمه والكسل وقوة العين بمرت الولد؟
هل هو تقصير في التربيه ام قله الوازع الديني ام الا مبالاة وتاثير التلفزيون على حياتنا الاجتماعيه ايش السبب ؟
وين بنات الحمايل؟
الي ماينسمع صوتها الا بكلام كالطيب تتغاضى عن الصغائروتكبر عقلها تنزل الضحى وتجهز الفطور ولا القهوة وتنادي خالتها وخالها تسولف معهم ترد عليهم الصوت
تقدم لهم الهديه مو لازم مكلفه بس تدهن القلب وتلينه
تسال عن صحتهم ومواعيد ادويتهم من باب امجامله واظهار الحرص
تنبه زوجها اذا قصر بحقهم وتصير له عون لنيل برهم ودعائهم
تزور اقاربهم وتقدر العزيز عليهم اما بمباركه او تعزيه
تخفض صوتها ولا تكسر كلام خالها او خالتها فهذا يحبب بك عندهم
نصيحه ياقمورات
لاتسبي ولدهم عندهم ولاكن اذكريه بكل خير والا اصمتي
لاتكذبيهم وتالفي القصص عنهم ظنا منك ان بذلك تنفردي بقلب زوجك لان ربك بينصرالمظلوم ولو بعد حين ووسينكشف كذبك
خليكي ايجابيه في تعاملك وفعاله لاتجعلي حضورك وغيابك واحد عندهم كم دعوة فتحت لها ابواب السماء قيلت في ظهر الغيب علها تكون من نصيبك
افعلي ماترينه يرفع من قدرك وفكري هل هذا من صالحي ام اني سوف اندم عليه فكري قبل ان تفعلي لانك تعرضين نفسك ومن رباك والدينك للانتقاد
اياكي ثم اياكي من نقل اسرار واخبار اهل زوجك من باب الشماته والوشايه فمالاترضينه على نفسك لاترضينه على الاخرين
كوني معهم بالحلوة بافراحهم
وكوني معهم بالمره باحزانهم
لانهم لن ينسو لكي هذه المواقف
حبيبتي العروس
هذي وصايا علمتنا اياها الحياه من التجربه
تمنيت اني عرفتها قبل الزواج ولو بفلوس
جتك بطبق من ذهب كوني ذكيه وطبقيها
لتسعدي براحة البال وسعاده ابديه لان اهل زوجك
مو معك ساعه وبيروحون يمكن تشوفينهم اكثر من انك تشوفين اهلك فهنيا لزوج زوجته ابنه لامه
صدقيني مو احترام زوجك وبس حتى اقاربه لان الطيب بالطيب يذكريكفي انك بترفعين راس اهلك وبيقولون ونعم التربيه جعل اللي رباها بجنات النعيم
خلونا نفتح هالباب للنقاش ونسولف بحلول واقتراحات للوصول الى سعاده اجتماعيه وزوجيه مافينا كمال كلنا نحتاج نصايح وتوجيهات
لاتبخلون بخبراتكم واقتراحاتكم انتظر الردود على جمر
منقول من مدرسه الحياة