على كف القدر نمشي ولاندري عن المكتوب روايتي الاولى حصريا

استمري اختي وان شاء الله نكون عند حسن ظنك
وانا متشوقه لقراءة روايتك

هلاا وغلاا
استمري وابدعي يالغاليه وحنا معاك وان شاء الله بنستمر معاك لآخر المشوار ولآخر القصه وراح تشوفين تعليقاتنا وتشجيعنا وانا واثقه انك بتنبسطين من الفراشات..
يشرفني اكون اول من يرد عليك يالغلا..
يلا عاد نبي القصه>>طماعه بس شسوي اعشق القصص..
تقبلي مروري
>>لاحرمني الله منكم<<

اختي &مارينا 2006&
تسلميلي يالغلا كللك ذوق .... واتشرف بكونك اول الداعمين لي بهالمنتدى ....مرسي
واتمنى اني احظى بمتابعتك .... ولعيونك بابتدي بوضع الراواية

&& اميرة الذكريات &&
تسلميلي يا ذوق وقصتي بتكون في متناولك بعد لحظات .... وبيني وبينك صديقتي هي اللي انصحتني بمنتداكم يالفراشات ... وقالتلي ان روايتي بتضرب هنيه ... وان شاء الله اكون قدها يالغلا ....
ومشكورة يا ذوق
اختك : غ لا الروح

وعشان تكونون بالصورة حبايبي هذي القصيدة اللي استوحيت منها روايتي ..... اقروها قبل لا ابدأ
على كف القدر نمشي ولا ندري عن المكتوب
عبارة كنت أرددها صدق من صاغ معناها
مشينا دون لا ندري وشربنا من بلاها كوب
وهذي حال الدنيا رمتنا ما رميناها
تضحكنا تبكينا تمشينا على المطلوب
على كف القدر نمشي دروب ما رميناها
من الكاسب من الخاسر من الفايز من المغلوب
مع الأيام تحصدنا وحنا ما حصدناها
وأنا واحد من الآلاف أعيش بعالمي مرعوب
أحس الأرض مهزوزة من أدناها لا أقصاها
نظرت الناس من حولي وكم بالناس هو منكوب
حوادث هزه الوجدان أجل بالعين شفناها
ألا يا عمري الفاني ألا يا حقي المسلوب
متى عيني بليل الياس لذيذ النوم يهناها
متى يحالفني الحظ ويصحح وضعي المقلوب
يعدل قسوة الأيام وغلطة ما ارتكبناها

نبدأ بشخصيات القصة :
(( القصة تتمحور حول 5 بنات زميلات وتربط بينهم علاقة صداقة عميقة لطالما قلت في هذا الزمن وبطبيعه الحال تمر كلن منهن بدرب مختلف في الحياة ))
الشخصيات :
نورة – نجد – هنوف – خلود – سارة
نوره ( بنيه جميلة بمعنى الكلمه بيضاء وطويلة وضعيفة بس مليانه شوي وشعرها اشقر لين اخر ظهرها شكلها بصراحه اقرب للاجنبيات وكل من شافها يحلف انها اجنبية ويستغرب من كونها بدوبة بس متحضرة شوي نورة اللي يعيبها العناد والراس اليابس و لسانها بيني وبينكم متبري منها ههه )
نجد ( لا هذي غير غير عن كل الشلة هي بدوية وهذا واضح من كلامها ولهجتها اللي تعتز فيها حيل نجد فيها الجمال العربي الاصيل هي مو جميلة بس هي بالاصح نسميها مزيونه شوية عليها ….واحلى ما فيها عيونها اللي خلقة من الله مكحله …. وطولها اللي مخلي لها هيبة … اما شعرها فمحد من الشلة يقدر ينافسها عليه لانه طويل واسود … نجد عفوية وحساسة حيل رغم ان كلام الناس ما يهمها … قمر الشلة )
هنوف ( ناعمة البنت بس مو لدرجة نجد ونورة شعرها اسود كاريه مدرج قصير جنية الشلة لان عليها رجه وصرقعة وسوالف استهبال مو طبيعة رغم هذا نقدر نقول انها معقدة شوي البنت من الرياجيل والزواج وهالسوالف فحياتها كل استهبال ودراسة )
خلود ( البنيه الدلوعه وحيدة امها وابوها ... فهم مدلعينها بشكل غير طبيعي ... ساكنة بقصر ابوها بعزها ومعزتها وذربة بشكل تستفز فيه البنات...... ورومنسيتها زايدة حبتين شعرها لين نص ظهرها بني حرير ..... كل همها الموضه واللبس والمكياج وباقي الامور ضاربه فيها عرض الطوفه بس فيها طيبة وحسن نية دايم مضيعتها )
سارة ( صديقتها الخامسة وهي بنت عادية الجمال وضعيفة بس ملامحها حاده شوي تموت بالنقد والتطنز على البنات شعرها خشن شوي فمعقدها بعيشتها ومستواها الدراسي اقل من بنات الشلة وعلى الرغم من هذا البنت فيها غروور مو طبيعي مو راضيه تخليه والغيرة اللي ماكلها وهالشي اللي حذروها البنات بس هي لولا تهورها الدايم كان هي بخير بس تبقى هالبنت جزء من شلتنا وكل البنات يحبونها رغم عيوبها )
* اما فرسان قصتنا فما راح اعرفكم فيهم لانهم بيطلعون لكم مع الاحداث وبيكملون القصة كشخصيات رئيسية ...........
نبدا القصة :::
(( الجزء الاول ))
دق تليفون نوره وهي نايمة على السرير الساعه 7 الصبح وكانت المتصلة نجد ...... نوره بقلبها تقول يالله صباح خير هالبنت لو احطها بجهازي بدال المنبه احسن لي كل يوم هي اللي تقومني قبل المنبه ....
نجد: صباح الخير
نوره : وعمى ان شاء الله نجدوه فجرتي اذني حسبي الله على ابليسج ... جذي الناس يقومون والا حتى يصبحون
نجد: والله يا نوير هذا جزاي اني بقومج وانشطج مالت على هالخشه زين
نوره : اول شي عشرين مره اقولج اسمي نوره الله ياخذ عدوج مو نوير اعنبو دارج قلبتي اسمي من اسم بنت الى اسم عجيز خرفانه ...
نجد: هاه ... شفيهم العجايز هن الخير والبركه ترى ماارضى عليهم
نوره : ادري ادري انج ما ترضين عليهم يالخبلة منتي عجيز مثلهم ههه
نجد : عجيز بعينج يالداجه توني ما كملت 19 سنه محنا كبر بعض... يعني لساتني بأول شبابي
نوره (شهقت ) : نجيد انتي متصلة تقوميني للدوام والا تلهيني عنه ..تأخرت ما تريقت ولا لبست شي عشان اروح الدوام يلا باي باي اكلمج وانا بالطريق ...
نجد : تستاهلين يا حبج للنوم عله لا نمتي ما قمتي يلا البسي باي
وراحت نجد تركض للحمام وعقبها لبست بدله بنطلون جينز وتي شيرت فوشي لين الركبة وعدلت ملفعها الاسود وفيه ورده فوشية من كرستال على جنب ولبست كعب فوشي ضعيف وحطت كحل اسود وبلاشر وقلوس فوشي وركضت تهابد وتركض تحت على الدرج والا وامها واختها ريم تحت يتريقون وابوها يعدل غترته بيطلع للدوام ....
ام نوره : نوروه تعالي تعالي علامج طايرة تريقي
نورة : يمى زين زين بس بشرب عصير البرتقال ... شربته وطارت بين السما والقاع لسيارتها ,,,,
ركبت سيارتها ( لكزس ) وداست للجامعه ....
نسيت لا اقولكم ان البنات كلهم يدرسون بكلية الطب اول سنه ( مستجدات ) ...جابوا نسب عالية بالجامعة ونسبهم كانت متقاربه من 91 الى 97 كلهم شطار ما شاء الله عليهم من ايام الثانوية كانوا يتنافسون على المراكز الاولى ودايم كانت نورة الاولى عالدفعه وهنوف الثانية .....
وهي بالطريق ( دقت الحنانه نجد عليها ) ونوره كانت توها سايقة السيارة فخوافة ما ترد على التليفون وهي سايقة ...... بس من حنة نجد اضطرت انها ترد عليها ...
نوره : نجدوه ووجع انا الحين اسوق وتعرفين اني ما احب أرد على التليفون وانا اسوق تبين تربكيني انتي ؟
نجد : اسمله علينا ... نوروه يا مال البلش اخرعتيني يالملسونه وينج فيه ؟؟؟
نوره : ويني بعد عند بوابه الجامعه اسفط السيارة واجيج يالحنانه
نجد : ههه تصدقين شكلج يونس وانتي معصبه .. يلا تعالي البنات متجمعات نبي نسولف قبل لا يجي الدكتور ويغثنا ...
نوره : زين انتوا وينكم ؟؟؟؟
نجد: حنا بالكلاس قاعدات تعالي باي
وشوي والا نجد داخله عليهم وتصارخ ( تبي تخرعهم ) قوه يا صبايا
شهقت نجد( لا نها شافت اثنين من الشباب قاعدين ورا يسولفون وانخرعوا منها .... وقاموا البنات _ شلتها _ يضكون عليها )
( طبعا اتعرفون ان كلية الطب مختلطة يعني بنات وشباب في المحاضرات ومو مفصولين بس البنيه نست روحها ههه)
قعدت متفشلة ومنحرجه من موقفها ....
نجد: هههاي هذا ذنبي اليوم يومنج تزفيني
هنوف : ههه عادي تعيشين وتاكلين غيرها يا حلوة .....
خلود :ههه نواري لا تتضايقين عادي موقف صار بس شكلج كان يونس ههه
سارة ":يختي شفيج منهبلة اليوم في وحدة تسوي جذي الحمد لله والشكر عالعقل شيقولون عنج الشباب ( قالتها بنقادة )
ردت عليهم نوره : يختي انطمي انطمي انتي وياها مالت عليكم زين اكلتوني ... وراحت خذت ملفها وكتابها وقعدت قدام قبال الدكتور
البنات : تعالي تعالي خلاص نوره شفيج ذابحج الثقل مساع شزينج
خزتهم نورة بطرف عينها وماردت وقعدت قدام..........
دخل الدكتور ... ودخلوا وراه الطلبة والطالبات (( ما احب طبع الطلبه اذا قعدوا برا واذا دخل الدكتوردخلوا وراه جنهم سرب...ا نثبروا من الاول واقعدوا انطروه داخل )) ...
خلصت المحاضرة .... وطلعوا البنات لان عندهم بريك ( استراحه ) ساعه وبعدها عندهم محاضره
وراحوا كل الشلة المشتله للسكوير ( اللوبي ) >> وهو مكان وسيع يقعدون فيه الشباب والبنات بين المحاضرات
قعدوا البنات وقاموا كالعاده يحشون بالرايح والراد (( حريم هذي طبيعتهم )) ههه .....اللي يعلقون بينهم على لبسها والصبي اللي يعلقون على قصة شعره وما يخلون احد بحاله بس طبعا تعليقاتهم بينهم بس عشان محد يسمعهم .....
فجأه وينقلب وجه نوره الوان ...... وانتبهت لها نجد والتفتت تبي تشوف الشي اللي قلب نوره ... شافته
شافت بدر ( ولد خالة نوره ) وهو بالسنه السادسة بنفس الكلية ... مار هو وربعه يسولفون
وعين نوره ماطاحت منهم ... التفتوا عليها البنات كلهم (( لان كل الشلة يدرون عن حب نورة لبدر ))
هنوف : نوره وين رحتي عند حبيب القلب ..... هاه
نوره ماردت عليها
اشرت لها نجد انها تسكت وتخلي نوره
وهمست نجد تكلم نوره : نوره مدري ليش متعبة عمرج على واحد مو حاس فيج... طنشيه
ردت عليها نوره (بحسرة): بس انا عندي احساس كبير انه يدري عن شعوري ناحيته
نجد: والله من هبالج مبينه له حبج .... عشان جذي شايف روحه عليج ... ومو معبرج يالخبلة
نورة(وهي تطالع فيه من بعيد وهو يسولف ويضحك مع ربعه) : خليها على ربج نجد خليها على ربج
هنوف المرجوجه : يلا صبايا انا جوعانه امشوا للكفتيريا باكل ... وانتي هيه ( تقصد نوره ) بطلي هبال ولا تطالعين ولد خالج ترا والله الرياجيل ما يستاهلون الحب (((( معقدة البنت صح ههه)))
نجد معصبه عليها : جوع جدي انثبري لازم تبلعين يعني .... يا حبج للاكل لويحصلج تاكلين الصحون كلها ... ومصيبه تاكل اكل الدود ولا يبين عليها ...
هنوف : ههه موتي حره ... ويلا يالعلل امشوا وراي للكفتيريا .... وهين يا نجد ان ما خربت لج عباتج هاللي كاشختلي فيها بالاكل ماني هنوف
نجد: ههه بامج خير سويها وربي لرد الصاع صاعين ... مفصلتها غاليه يا قلبي
(( نجد ما تلبس بدل مثل باقي البنات دايم تلبس عبي بحكم مثل ما قلت كونها بدويه حيل فأهلها ما يرضون ولا هي تحب لبس البدل اصلا ... بس عبيها دايم غريبه وحلوة فيها حركات كرستال ملون يعني حلوه )) وهم نوره بعد تحب تلبس عبي بس مو دايم يعني تنوع بين البدل وبين العبي ....
وطلعوا من السكوير رايحيين للكفتيريا بعد هوشاتهم الدايمه (ما يقعدون راحه هالبنات )
وهم بالطريق مر عليهم بدر ورفيجه خالد (( بدر وخالد حيل علاقتهم قويه مع بعض )).... ولبسهم دايم الدشداشه والغتره وطاقين النظاره الشمسية كالعاده .... لانهم ما يحبون يلبسون بدل الا بالسفر
بدر( طويل وحنطاوي وجذاب بس ضعيف شوي واحلى ما فيه ابتسامته .... وهو نكته )
رفيجه خالد ( طويل وله جسم رياضي وحنطاوي ... بس وسيم ....واللي مزينه عقله وثقله... وفيه وفا مو طبيعي ) وكلهم اعمارهم 24سنة
مر بدر جنب البنات وهم ماشين وشاف نورة بينهم .... ابتسم ووقف يسلم عليها
بدر : مرحبا نوره ... شلونج يا بنت خالتي..؟؟؟
طبعا البنات ما وقفوا كملوا طريقهم للكفتيريا ... وبعد خالد عن بدر ووقف بعيد شوي عنهم وهو يطالع بنورة من ورا النظارة ...
ردت نوره ( بفرح ) : هلا والله بدر ... انا تمام انت شلونك؟؟؟ وشلون خالتي ؟؟؟
بدر: بخير الله يسلمج تسلم عليج ... ها شلون الدراسة معاج؟؟؟
نوره : الحمد لله ماشية مع اني توقعتها اسهل من جذي.....
بدر ( يستهبل ): الله يهداج كلية طب وتبينها سهلة شلون بالله ؟؟؟ فهميني
استحت نورة وسكتت : صح كلامك ....
قالها بدر : يلا اخليج الحين بس امانه لو بغيتي شي قوليلي لانج مثل اختي سلمى (( قالها متعمد لانه يعرف بحب نوره له من تصرفاتها ونظرتها اللي فاضحتها ... بس عشان يقهرها ويستانس على ردة فعلها ))
انقهرت نورة ... وقالت بسرعة : يلا باي اخليك الحين بروح لصديقاتي
ابتسم بدر لانه حس انه نرفزها بكلامه : بايات (( بدر من داخله انسان طيب مو خبيث بس ما يدري ليش هو يحب ينرفز هالبنت بالذات ويغتر عليها .... يمكن عشانها بنت خالته؟؟ ... او يمكن عشانها تهورت وبينت له حبها؟؟ ... يمكن كل شي جايز بهالدنيا ))
دخلت نوره كافتيريا البنات وهي معصبة ومفوله من التعصيب ....
نوره قطت شنتطتها على الطاولة بقوة
نجد: شفيج شفيج حستي اكلنا يا المتهورة
نوره : يوه بروح اخذ لي اكل.... ترا مالي خلق لانتقاداتكم
وقامت تاخذ لها اكل .... وقعدت خلود تطالع فيها من بعيد وهي تمشي ... فانكسرت خاطرها على رفيجه عمرها
وقالت: هالبنت مو طبيعية من دخلنا هالكلية انقلب حالها 180درجة ما ادري شفيها ... ياربي الله يعين
هنوف ناقده على خلود ) لا شوي شوي يالبارده لا تتلف اعصابج ههه يعني ما تدرين شفيها؟؟؟ اللي فيها من سوالف هالخبل ولد خالتها فيها مالت عليه صج الرياجيل بليدين احساس مثلج خلود ههه
خلود ( طفرانه منها ): مالت عليج يالمعقده .. اسكتي اسكتي بس مخلين الاحساس خله لج يا مرهفة المشاعر.. نجد شوفيها ترا هالبنت حاطه دوبها ودوبي فكيني منها هالنسرة قطيعه
نجد: بس انتي وياها اسكتوا فضحتونا بالكفتيريا كل البنات سمعوا سوالفكم يالغثيثات يا مال السد اللي يسد حلوقكم ...زين
هنوف : زين يا ابلة ههه
نطت ساره بعد ما كانت تراقب نورة وكلامها وحركاتها ودخلت عرض بالسالفة بين البنات وقالت : ياربي هالبنت ماعندها كرامة متى بتفهم ان الصبي ما يبيها .. عايفها ...غصب يحبها يعني ؟؟؟
انصدموا البنات من كلامها وفتحوا حلوقهم منذهلين من اللي سمعوه ... صحيح انهم يعرفون ان ساره تغار من زمان من نورة لانها اشطر واحلى منها ... بحيث ان ما في وجه مقارنه بين نورة وسارة ... بي ما توقعوها تحقد عليها للهدرجه ........
ردت نجد : سويروه يا مال الوجع اللي يوجعج انتي ماتستحين ... شلون تقولين عن رفيجتج هالكلام ؟؟؟
خافت سارة من لهجتها وقالت : هاه لا انا ما اقصد بس كنت ابي اقول انها ما لازم تتعلق بوهم ... حرام
ما اقتنعت هنوف بكلامها وقالت : والله وهم والا مو وهم انتي مالج شغل. بين البنت وولد خالتها حاشرة روحج ليش ...؟؟؟
جت بترد عليها ساره الا ونورة طابه عليهم مع اكلها ... فاضطروا يسكرون الموضوع ...
قالت نورة : بنات تدرون انه الدكتور س2 الظهر بيمتحنا
(شهقوا البنات كلهم وغصوا بالاكل )........... واكلهم كالعادة ورق عنب وتبولة وعصير...... يعني عشتوا مسويات ريجيم ......
ردت نجد : يا ويلي وليه ما قلتي لنا عشان ندرس ؟؟
هنوف : نوروه ووجع ليش ما تكلمتي وقلتي لنا من امس .... عشان ندرس بعد احنا بدون دراسة ما نفلح
سارة بحقد : نورة شنو هالحقد اللي فيج ( كلن يرى الناس بعين طبعه يا ساره ) ليشما تقولين لنا والا عشانج شاطرة يعني شفتي روحج علينا ... وقلتي بالطقاق خلهم يسقطون ...؟؟؟
انصدمت نورة : شفيكم بنات اكلتوني ... وبعدين شهالكلام يا ساره انتي تعرفين اني مو جذي ولا الخباثة عادتي وترا توني دريت وانا عند المطعم قبل خمس دقايق قالتلي وحدة من البنات وانا مثلكم انصدمت .... بس شنسوي بعد ؟؟؟ لازم نمتحن
وكملوا البنات اكلهم ... ودق تليفون خلود
ردت : هلا دادي .. انا تمام
قاموا البنات يعلقون عليها كالعاده ......
هنوف : ههه ياربي يا هالبنت يا كثر مياعتها دادي الناس يقولون هلا يبه وان كثروا ومصخوها قلوا بابا.. لكن هالبنت مياعتها بزود
سمعتها خلود وردت عليها بسرعه : مالج شغل انتي شحارج ؟؟؟ يالملقوفه
قالت لها هنوف : اقول ردي بس ردي على دادي لا تنطرينه على التليفون ههه
خلود : يوه منج غثيثة (وردت تكلم ابوها )
قالت لهم سارة : يلا يلا قوموا المحاضرة بتبدا بعد شوي
قاموا البنات بسرعه وراحوا كملوا الثلاث محاضرات اللي باقية لهم اليوم ..... وبعدها ركبت خلود سيارتها ( رنج روفر ابيض ) وراحت البيت قبلهم
اما البنات الباقيات فقعدوا يتغدون بالكلية والساعه 4 ركبت نورة سيارتها وخذت معاها سارة عشان توصلها لبيتهم لان سايقها تأخر عليها ....
وراحت هنوف بسيارتها ..... ونجد جالها السايق .........
بالليل عالساعة 9 دقت هنوف على نوره............
هنوف : هاي ماي دير
نورة : هلا هلا هنوف
هنوف: شلونج ؟ شخبارج ؟ من زمان عنج؟ يالقاطعة جذي لي مدة ما شفتج (تستهبل)
نورة: ههه ايه مدة طويلة بس من 5 ساعات يالمفترية
هنوف: يختي هوا 5 ساعات شويه دي كتير
نورة : هنوفوه شفيج متأثرة بالكلام المصري
هنوف : ههه لا ابد وانا اختج بس توني خالصة من فلم مصري ....
نورة : .......... ( بعالم اخر)
هنوف حست برفيجتها متضايقة ومتكدر خاطرها ...... قالت بنفسها : اكيد من سالفة اليوم
هنوف : نوروه ترى حالج مو عاجبني هاليومين
نورة : ولا انا عاجبني حالي.....
هنوف : والحل معاج ...؟ ومع هالعلة الغثيث ولد خالتج
نورة : لاتسبين وبعدين معاج وترى الحل بيد ربج مو بيدي
هنوف (عصبت ): لا بسب وبسب وبسب بعد ... من هاللي قلب حالج فوق تحت .. يختي شوفي نفسيتج شلون تغيرت من هالسنه هاذي ...!! وترى انا رفيجتج من عمر يعني ملاحظة حالج عدل
نورة : ما ادري يا هنوف ( وقامت تبجي )
هنوف حز بخاطرها حالها وتندمت انها كلمتها بهالموضوع بس كان لازم تعدل حالها المايل ) وقلت لها:
شوفي يا نورة مو عشانج رفيجتي انا اقولج هالكلام لا انا اقول من احساسي ان هالولد ما يستاهلج ولا يستاهل دمعة من عينج .....
نورة : هنوف مدري شفيه علي كل ماشافني قام يستفزني بأي طريقة لين يخليني اطفر واحنا على هالحال من ومان من كنا صغار ........
هنوف : بس لا تبجين وربج بيفرجها.... بس تبين مني طنشيه وهو بيركض وراج ....
نورة : ما اقدر يا هنوق صعبة اطنشه .. وصعب اكثر اني اتقبل سوالفه اللي يطفرني فيها
هنوف : خلاص يا نورة اتركي اللي كاتبه ربج يصير
نورة : ونعم بالله.... الا بسألج عن البحث المطلوب مننا
هنوف : ايه شفيه ......................(( وكملوا سوالف بحوث وكتب مالكم فيها )) ههه
وبالليل س 9:30 شبكوا الخط البنات وقاموا يسولفون ... ضحك وسوالف ... وعبط .....
اليوم الثاني ....
دخل نورة الكلاس مبجر ما لقت احد الا طالبة وهي ما تعرفها .. فحطت كتبها بالكرسي وطلعت للسكوير ....
دخلت السكوير يوه ما في احد .... شفيني داشه مبجر اليوم الكلية ....؟؟؟
************************************************** ***

اليوم الثاني ....
دخل نورة الكلاس مبجر ما لقت احد الا طالبة وهي ما تعرفها .. فحطت كتبها بالكرسي وطلعت للسكوير ....
دخلت السكوير يوه ما في احد .... شفيني داشه مبجر اليوم الكلية ....؟؟؟
قعدت نورة بالسكوير وقامت تقرا مذكرات ماده صعبة معقدتها .... وشوي ودخلت عليها سارة
سارة : قوة نورة ... شفيج جايه الكلية مبجر اليوم ؟؟؟
نورة : هلا سارونه ... مدري جايني نشاط زايد شوي اليوم ... فقلت اجي مبجر
سارة : وين البنات ؟؟؟؟
نورة : محد جا بس انا ....
وشوي والا اسرة بققت عيونها من بدر اللي كان داش للوبي ...
سارة : نوروه شوفي شوفي من جا ؟؟؟
طالعت نورة بالمكان اللي تطالع فيه سارة والا تلاقي بدر ... يطالع يتلفت وجنه يدور له احد مو لاقيه ... شافهم وجا لهم ...
بدر مبتسم : صباح الخير ....
البنات : صباح النور .... 0 طبعا ساروه قعدت ما قامت ولا تسألوني ليش لانها ملقوفه شوي )
بدر: شلونج نورة :؟
نورة : انا بخير ... وانت؟؟
بدر: تمام ... نورة ما عرفتينا باللي معاج ....! ( سارة تشققت من الوناسه ان فيه احد عبرها وبدر بعد )
نوره بنفسها ( يا لقافتك يعني لازم تدري ): هذي رفيجتي ساره
بدر( لقاها فرصه ينرفز نورة كالعادة ) : اها ما قلتيلي ان عندج رفيجه حلوة جذي ( ساره الدنيا مو شايلتها)
نورة ( ماتت من القهر ) : والله مو لازم تعرف
بدر : بس بس لا تعصبين شقلنا احنا .... خلاص بس حبيت اسلم عليج واقولج اذا محتاجه شي ؟؟ بعد انتي بنت خاتي لازم نتوصى فيج....
نورة : لا سلامتك مابي شي
سارة لقتها فرصة: بلى يا ليت بدر اذا كنت فاضي تشرح لنا هالمذكرة اللي مع نورة لانها معقدتنا كلنا .. اذا سمحت ؟؟؟
نورة ( انقهرت من جرأتها ... هذي وهي توها تتكلم معاه طيحت الميانه .. انا اوريج يا سارووه ): ما له داعي ...
بدر : لا لا خلاص انا مستعد اشرحها لكم ....كم نورة عندنا احنا ؟؟؟ ( بدر كان يعز نورة من معزة خالته )
وبعدين لو سقطتي فيها يا نورة امي بتحط الحره فيني بتقول ليش ما ساعدتها ؟؟؟ هذي مثل اختك ..( قالها بيقهر نورة )
سارة : خلاص بنحدد الوقت اللي يناسبنا ونقولك ...
نوره ( صج هالبنت ما تستحي فشلتني )
بدر : خلاص اتفقنا ... والحين انا استئذن بروح اشوف رفيجي خالد من مساع وانا ادوره ومو محصله .. باي
البنات : باي
نورة على طول التفتت لساره : ساروه صج ما تستحين بسرعه طيحتي الميانه مع الولد وقمتي تشرطين
ساره : يوه عادي نونو الولد مبين عليه حبوب ... وبيساعدنا عشان ننجح لا تعقدينها بروحنا مستجدات ضايعات ما ندري شالسالفه .. وبعدين انا تعمدت عشان تتقربين منه يالهبلة ... هذا جزاي ابي مصلحتج؟
نورة : بس بس انطمي البنات جوا
خلود: هاي بنات
نورة : وعليكم الهاي ... الناس يسلمون
خلود : ياي نونو شفيج صايرة معقده اكيد اعدتج هنوفوه
نورة : ههه لا تسمعج الحين صدقيني بتحط حرتها فيج ...
خلود: بروحها مو مخليتني بحالي..مأزمتني هالبنت
البنات : ههه
وجو بعدها نجد وهنوف .... وقاموا يسولفون وراحوا بعدها للكلاس لان المحاضرة بدت
طلعوا من المحاضرة وراحوا للكفتيريا ...........
خلود: بنات ترا امي مسويتلي حفلة عيد ميلادي ولازم كلكم تجون ....
نجد : اكيد نجي يا قلبي لو ما جيناج نجي لمنو ... ابشري
نوره : خلاص اوكي ببلغ امي
سارة: هاه .. مدري بشوف اهلي... ان شاء الله يرضون
هنوف : انا يا خلود اسمحيلي يمكن يدخلون جدتي االمستشفى ومضطرة اقعد معاها وقت ثاني اجيج ان شاء اله
(( نسيت لا اقولكم ان هنوف يتيمه ابوها وامها توفوا بحادث لما كان عمرها 13 وجدتها هي اللي ربتها وساكنه بالبيت مع جدتها وعمها بس لان ما لها غيرهم بالدنيا ... وعمها اسمه نواف (24 ) ويدرس برا بايرلندا طب ... ويجيهم من وقت للثاني.... هو متعلق بهنوف حيل لانها من ريحه اخوه الغالي )
خلود : حسافه هنوف .. الحفلة ما تنور الا بوجودج بس ما دامه ظرف اضطراري بنسامحج
هنوف: تسلميلي خلوده
وكملوا البنات سوالفهم عن حفلة خلود اللي بتكون يوم الاربعاء يعني بعد 3 أيام ..... وكل وحده بتستعد لها من الحين (( حركات البنات بعد ))
وانتهى الدوام على خير ... بالليل كانت نجد قاعده مع جدها وابوها بالصاله وامها ومرت اخوها بالمطبخ يسون العشا ....
نجد تموت بجدها حيل ومتعلقه فيه وهو بعد يموت فيها لانها حفيدته الكبيرة بعد اخوها طلال ..
الجد: نجد يا بوج وش سويتي بالجمعيه ؟؟؟
ابوها: أي جمعيه يبه؟؟
الجد: هذي بعد ما غيرها اللي تروح لها كل يوم الصبح
نجد : ههه جدي قصدك الجامعه
الجد : أي عليج نور ... هذي هي ما غيرها ... وش سويتي بها ... وش علومها؟؟
نجد : علوم الخير جدي... ابد ماشيه فيها وانا بنتك
الجد: بعدي والله كفو يا بعد راسي
نجد : يبه خلود مسويه حفلة ببيتهم وودي اروح لها... ممكن؟؟
ابوها: لا شي يوديج لبيوت الناس اقعدي بس مالج حاجه
نجد ( متضايقه ) : تكفى يبه الله يخليك والله ضايق خلقي من الدراسه وبعدين كل البنات بيروحون لها وانا باخذ امي معاي ماني رايحه بروحي
ابوها : لا يعني لا ... نجد لا تغثيني
الجد: بس يا ابوطلال لا تضيق لا بنتي خلها تروح تونس مع ربايعها ... لاتكسر كلمتي
ابوها: ما عاش من يكسر لك كلمه يبه ... خلاص نجد روحي يبه جدج توسط لج كالعاده ... محد مخربج علي الا ابوي
الجد + نجد : ههه
راحت نجد تساعد امها ومرت اخوها ( خزنه ) بالمطبخ وقالت لهم عن الحفلة.... وطلبت من خزنه تروح معاها السوق عشان تشتري بدله لهالمناسبه وهدية لرفيجتها ...... ووافقت خزنه
دقت بالليل نجد على نورة وفلوها ضحك وسوالف وشبكوا هنوف معاهم بالمكالمة .....
بعد ثلاث ايام ( موعد حفلة خلود )
تجهزوا البنات واتفقوا انهم يطلعون مع بعض لبيت خلود
لبست نورة بنطلون جينز فيه شغل ذهبي من تحت وبدي ذهبي فيه كرستال مع تراجي (حلق ) ذهبي طويل وحطت مكياج ذهبي ....
ونجد كانت لابسه ثوب تايجر (نمري) وفيه شغل احمر من فوق .... قصير.... لا بسه تراجي لونهم احمر ... وحاطة مكياج ناعم حيل وروج احمر .... وفاله شعرها الطويل ومسويته بف ....
ساره كانت لابسه بدله ورديه طويله مع حزام فضي ... ومكياج وردي ناعم .... ومموجه شعرها وحاطه ربطه ورديه ....
خلود... كانت ناعمه هالبنت مستشوره شعرها الكاريه الاسود ... ولابسه بدله زيبرا اسود وابيض فيها شغل كرستال اسود.... طويلة وفيها فتحه على طرف ....
............. دخلوا البنات بنت خلود وشافوا الناس كانت البيت مزحوم فوق وبالسرداب بعد ...شوي وشافوا م خلود باركو لها وراحوا يضبطون اعمارهم ... وشوي ودخلت عليهم خلود
خلود: قوة يقولون فيه بنات معجبات يسألون عني ؟..
البنات: هلا خلود ..... كل عام وانتي بخير
( سلموا عليها وعطوها الهدايا ... ورحوا تحت بالسرداب مع امهاتهم عشان الرقص كان تحت )
استانسوا البنات ورقصوا وفرفشوا ....وكانت خلود كل شوي لما تمر عليهم يعلقون عليها ( مهبل هالبنات )
جت خلود باخر الحفلة وقعدت معاهم تاكل من الكيكه بعد ما تعشوا من البوفيه
وشوي والا في وحده من الحريم تناديها ....
المره : خلود خلود
خلود ( انتبهت لها ): هلا خالتي ام حمد ..... وراحت لها
ام حمد : خلود حبيبتي ... منو هذي ام نفنوف تايجر اللي كنت قاعده معاها؟؟
خلود : هذي رفيجتي نجد .... وياي بالكليه خالتي
ام حمد : ايه يحليلها .... شكلها بنيه مؤدبه وحلوة بعد
خلود : أي خالتي هذي نجد رفيجتي من عمر .... تهبل هالبنت
ام حمد : خلاص حبيبتي روحي لرفيجاتج استانسي
شوي وردت لهم خلود .....
ساره ( ذبحها الفضول ) : خلود من هذي المرة اللي نادتج... شكلها ذربه ؟؟؟
خلود: أي هذي خالتي بدريه ام حمد ... هذي رفيجه امي من عمر.... كانت تبيني ورحت لها ... بطلي لقافه
ساره : ههه حرام عليج انا ملقوفه
نجد : انتي ام اللقافه كلها
نورة : لا وانتي الصاجه جدتها ههه
سارة: ترا ما تضحكون مليقات
نجد : ما عليج زود ههه
وكملوا السهر ضحك وسوالف ... وامهات البنات كانوا قاعدات فوق يسولفون مع بعض... ولما صارت الساعه 11ردوا لبيوتهم .......

وبهذا القدر اكتفي اليوم بالفصل الاول .... على ان استمر فيها بدعمكم وتشجيكم .... في انتظار ردودكم وتعليقاتكم على القصة ...............
>>> بدعمكم سأستمر <<<
اختكم : غلا الروح

انا الى الان مقريتها بس اول ما انتهي ارد عليك مع تمنياتي لكي بالتوفيق