عمتي عقدتني وسببت لي حالة نفسيه

1. بكتب معاناتي بشيء من التفصيل .. حتى محد يلومني ..


2. من العصبية خليت السفرة زي ما هي وخرجت .............

السلام عليكم .. صباحكم سعيد ..

بكتب معاناتي بشيء من التفصيل .. حتى محد يلومني ..

انا متزوجة من خمس سنوات تقريباً .. وراح ابدأ بالمشكلة الأكبر .. وهي عمتي ( أم زوجي )
من يوم عرفت نفسي عروس وهي معاي في نفس البيت.. ثلاث اسابيع بس كانت شهر العسل إلا وهي جايه عندي.. مع ان عندها اولاد ثانيين متزوجين بس مو قاعده إلا معاي .. تقول تحبني لأني طيبه ومحترمه وما أرد عليها بأي كلمة تجرحها مثل باقي سلفاتي .. وهذا اللي اهلي ربوني عليه الاحترام والتقدير للكبير .. بس حرام من يوم وانا عروس!! حتى ما اقدر اجلس مع زوجي أي جلسة إلا لازم تكون فيه ولازم تسمع كل كلمة نقولها .. لو انها عمة محترمة كان بتحملها .. لكن لو اذكر بعض المواقف اللي تسويها ما اظن فيه وحده تستحملها عشان كذا سلفاتي الباقين يتكلموا عليها
طبعاً عمتي من النوع اللي لازم يعرف كل صغيرة وكبيرة في البيت ولازم تتدخل فيها ولازم رأيها هو اللي يمشي وانا صح والناس كلهم غلط .. المشكلة ان زوجي شخصيته ضعيفه قدامها ما يدافع ولا يقول لا يا أمي هذا صح وهذا غلط ..مثل اخوانه الباقين يدافعوا عن زوجاتهم
أول شي الأكل .. لو تموت جوع ما تاكل من طبخي .. لازم هي اللي تسويه تقول ماتعرفين تسوين شي .. حتى القهوة والشاي لازم تقوم بنفسها تسويها .. كل ما قعدنا على وجبة انا وزوجي تقعد تسب في طبخي وتعلمني طريقتها وانها هي اللي صح وانتي ماتعرفي شي .. مع ان زوجي ياكل وساكت يقول عاجبه بس ما يقنع امه
واذا ما طبخت .. قعدت تبكي قدام بناتها .. ماطبخت لنا شي خلتنا بجوعنا .. اهلي ساكنين في الدور اللي فوقنا واحيانا اروح لهم إذا زوجي مو موجود .. صرت ما ابغا اقعد معاها دقيقه لحالي .. حتى كلامها عن زوجي كله سب هذا ما فيه خير هذا ولد شوارع وحق بنات وجواله مليان .. يعني تدخل الشك في قلبي غصب .. عشان كذا اتهرب منها ولا ابغا اسمع كلمة منها .. والمشكلة .. تتصل على بناتها وتقعد تبكي .. راحت وخلتني لحالي .. بجوعي ..
وقلت مره هيا ما بطلع لأهلي إلا واسوي لها الأكلات اللي تحبها وفعلاً طبخت لها وتعبت والله .. وحضرته على السفرة وقعدت قصدي بقعد آكل معاها واطلع .. إلا تقول .. لا لا ما ابغا بروح آخذ لي كورن فليكس!!

من العصبية خليت السفرة زي ما هي وخرجت .............

أثاث بيتي .. لأنها هي اللي اختارته قبل زواجي .. ما تبغانا نغيره أبداً مع ان الحال متيسر والحمدلله والكنب انعدم وراحت موضته وابغا اغير في بيتي مثل ما احب .. لكن لا .. وفي كلمة دايماً تكررها لزوجي حتى صارت معلقة في عقله الباطن ( لاتمشي ورا كلام الحرمه ) انا تعقدت منها صراحة .. شوي واقول مالك دخل في بيتي ..وشكلي راح اقول لها صدق وبكيفها لو تزعل هي وولدها
وإذا جاب لي شي .. يقول لاتخلين امي تشوفه .. كل شي بالدس !!!!!!!!
ملابسي .. ما اقدر اتدلع قدام زوجي والبس زي ما ابغا واظن قصدي مفهوم .. .. لدرجة أني حملت وولدت وحملت وفيه ملابس من تجهيز عرسي ما قدرت البسها .. ليش .. لأنها موجودة طبعا!!
حتى النوم ما تنام إلا لما تتاكد أننا نمنا وخلاص ما عاد فيه حس بالبيت .. وكل ساعه تقوم تتعذر بالحمام .. وهي اصلا تبغا تشوف فيه احد ولا لا .. وايش قاعدين نسوي ..
احس انها كاميرا مراقبة في البيت .. مو أم .. ومو بس مراقبة .. إلا تسجيل كمان .. واذا اجتمعت مع بناتها .. تفرط الشريط كله .. سوت وقالت وفعلت ولبست وطبخت ونامت .. وتفرجت في التلفزيون ووش اكلت اول ما صحيت يعني كل شي كل شي
ولما اخرج من البيت وهي فيه صرت اقفل غرفتي بالمفتاح صراحة لأني اكتشفت انها تدخل وتفتش اغراضي حتى الخاصة .. ما اقول تاخذ شي لا والله .. بس ليش اللقافة ليش تتفرج .. وتعرف كل درج من غرفة نومي اش فيه داخله لا حول ولا قوة إلا بالله ..
في البداية زعلت وراحت علمت زوجي شوفوا اللقافة لحد فين .. بس وقفت قدام زوجي قلت له شوف .. بيتي مفتوح لأمك واخواتك من باب الشقة لين الغرفة الثانية .. إلا غرفتي محد له دخل فيها .. هذي خصوصياتي وانا حره فيها ... كان يبغا يزعل بس كويس انه تفهم
واخواته حدث ولاحرج .. كأن بيتنا هذا اللي مافيه الا غرفتين صار ملجأ للأيتام والمشردين .. كل ما زعلت وحده من زوجها جت عندي وقعدت بالشهور .. وبس أنواع الطلبات من زوجي وكل يوم وهم في سوق ولا ملاهي وزواجات وكلام .. طيب فيه اربع اخوان غيره .. على الأقل يساعدونا في المصروف .. لكن ولا شي .. لاهم استقبلوا اخواتهم ولا هم يبغون يساعدونه في المصروف ..
والله تعبت تعبت تعبت .... حتى الكلام الحلو والدلع ما صرت اشوفه ولا اسمعه من زوجي .. صارت معاملته جافه وصار ما يبغا يقعد في البيت .. من كثر الزن اللي يجي على راسه من امه وأخواته .. يالله من جد انا راسي يصدع منهم فكيف هو!! .. لدرجة أنه جاته فتره صار يخون فيها .. صار يكلم بنات يتسلى .. بس الحمدلله رجع لصوابه ... هو اسبوع واحد بس اذكره أن امه سافرت مع ولدها الثاني حضرت زواج ورجعت .. عندي .... رجعت فين ............ عندي
لا وكمان معاها مفتاح للبيت وتجي من غير ما تقولنا .. دقيت عليها قالت لا لا مابنجي إلا بعد يومين ...( تكذب كانت في الطريق جايه ) وطبعاً فرحت ما صدقت اخيراً بتنفس بآخذ راحتي .. البيت ما فيه أحد .. راح زوجي للدوام .. وانا قمت اكنس وانظف البيت بملابسي الداخليه اللي مو كأني لابسه بس ولا قطعه ثانيه عليّه .. إلا هي دخلت فجأة بسم الله الرحمن الرحيم .. وقلبي طاح من الخرعه وانطلق على غرفتي البس ... وياليتها تعتذر أو شي .. لا بالعكس قعدت تضحك بصوت عالي .. قالت ايه ايه معاي مفتاح للبيت !!!!!!!!!
وحكاية الخاتم ما انساها .. ولا راح اسامحها .. كنا رايحين لمناسبة .. وجت عندي قالت سلفيني أكبر خاتم ذهب عندك اعطيتها واحد قالت لا لا اكبر .. اعطيتها واحد احبه وغالي على قلبي وخذته.. وقالت اذا رجعنا بعطيك قلت طيب .. ولما رجعنا .. وتجمعوا عندي حمواتي وسلفاتي وحنا قاعدين عالقهوة .. قالت قدامهم لبنتها .. وش رايك بالخاتم اللي اعطتنياه هدية !!!!!!!! طبعاً انا انصدمت وما عرفت اش اقول اول مرة اتعرض لموقف كذا .. بس بكل بلاهه قلت فداك ياعمه تستاهلين اكثر .. كان نفسي افضحها اقول لا ما اعطيتك هات الخاتم .. بس ما ادري كيف ما ادري اش صار لي ..
أنا الحين شوي وانجن ... صار عندي شغالة .. وكل يوم تحرشني عليها تبغاني اكرهها غصب .. تقول الشغالة تحب زوجك وتسوي قدامه حركات .. الشغالة .. ما تنظف .. وجودها زي عدمها .. ما نحتاجها ... الشغالة تكلم هنود .. الشغالة تضرب بناتك .. وهي والله انها بريئة من هذا كله .. بس هدفها اننا نسفرها تقول زيادة مصروف !!
لما رحت تعاقدت سنتين في غير مدينة زوجي .. بس تتصل عليه .. زوجك قاعدين ندور له عروس .. لو كان مارحت ما فيك خير .. وتقول له .. زوجتك المفروض ماتخليها تروح يمكن تسوي لك مصيبة !! حسبي الله ونعم الوكيل .. ورحت ورجعت وهي باقي عندي في بيتي ماراحت ولا جت ...
وكل شوي تسألني كم راتبك وكم رصيدك وش دخل ابوك .. بس بجد صرت اقول وش دخلك !! تبغا ترفع ضغطي هذي العجوز بأي شكل ... على فكرة إذا قلنا عجوز تزعل تقول لا انا باقي شباب .. واذا قلنا طيب البسي واكشخي وتزوجي قالت لا انا عجوز ... مدري كيف
وايش بعد من حكايات ..
وبس
بداخلي كثير كثير لكن تعبت اصابعي وانا اكتب مرة ابكي .. مره افتح عيوني عشان اشوف حروف الكيبورد ..
لحد يقول أمه ... خلاص أمه عرفنا أن لها احترام وتقدير وانها على العين والراس وانها ربته وتعبت عليه ومدري ايش..... بس كمان الزوجة لها احترامها ولها حقوقها .. ولها حق انها تتمتع مع زوجها .. أنا حاسة الحين ان زوجي زي اخوي بالضبط ما في اي مشاعر إلا مشاعر اخويه بس .. ومشاعر زوجية وقت النوم ..حتى النوم والله ما اتهنا فيه لأن عمتي المحترمه ما خلتنا نجيب غرفة لبناتي وماسكة غرفتهم عالفاضي .. فصاروا البنات معاي ..
وغرفتي صارت حوسه .. وأحياناً اخلي ملابس البنات برا الدواليب عشان يفهم ابو الشباب أن ماعاد فيه مكان لملابسهم واغراضهم .. ابغاه يتحرك شوي يحس فيني .. أحياناً احس أنه متضايق بس مو قادر يتكلم .. مو قادر يقول لأمه كلمة .. والله حاله
ايه نسيت حاجه ... حاجه تضحك والله .... أحياناً تتعامل مع زوجي قدامي كأنها ضرتي !! تعرفوا كيف
تقعد تقول له كلام حلو وتدلعه وتاخذه بحضنها وتحك راسه واذا هي قعدت جنبه تحط راسها على صدره ... والا اذا جا من مكان تقول ها حبيبي جوعان ولا عطشان اش تحب اسوي لك واش تحب اجيب لك عصير ولا لبن ولا شاي ... وإذا تكلم عن الفلوس إذا فلس مثلاً نهاية الشهر .. تقول أنا لك ياحبيبي وانت لي .. ولا يهمك
الحمدلله والشكر