غيرة خوات زوجي وش الحل معها

بدخل مباشرة بالموضوع
مشكلتي خوات زوجي يغارون بشكل يقرف
هما 3 اخوات وحده متزوجه ودايم عند اهلها وما عندهم شغل الا وين راحو والا ليش ما يطلعونا وان تأخرت عنهم اسبوعين قامو على زوجي وليش انتم ما تجونا انتم ما تبونا!!! (زوجي كل يومين يمرهم)
انا موظفه وما اصدق يجي نهاية الاسبوع الا وانا طافيه من التعب
وفي احسن الاحوال نقضي للبيت
ما كان عندي شغالة فوقفت العزايم لاني ما اقدر على بنتي الصغيرة ولا اقدر اقبل الطبخ والحوسه بلحالي لان عددهم 10 اشخاص ومستحيل تقوم وحده من البنات تساعدني حتى لو تمسك بنتي وقت التقديم
المهم يا طويلات العمر البنات طفشانات لان المتزوجه كل اربعاء وخميس وجمعه عند اهلها
قامو يسألون امهم ليش اخوي (اللي هو زوجي) ما يحجز لنا شاليه بمناسبة الاجازة الوطنيه!!
حنا مضغوطين لاننا بنحج وبعد الحج بندفع اجار البيت ومأجلين اشياء كثيرة لهالاسباب
وزوجي عطى خواته قبل العيد 1500 ريال يعني ما قصر معهن
الام طيبه ومغلوب على امرها جتني اليوم وعطت زوجي 1000 ريال عشان يحجز لخواته
ولعبت على بناتها وقالت ترا زوجه اخوكن حاجزه لكن شاليه
قال زوجي لامه جيبو معكم قهوه وشاهي زود ردت امه قالت لا والله ما اقدر اقول لهن مع العلم انهن 3 خوات وحماته ساكنه مع اهله يعني باتحمل كل العزيمه بلحالي
قلت لزوجي دام اننا بنطلع بشاليه اتصل على زميلك يجي هو واهله بس رفض يقول ما يصلح هذي عائليه
(كيف عائليه وحاجزاستراحه اجل لو رسميه وش بنسوي))!!!
خواته ما يحبن يكون معهن احد بالمكان اللي يجلسن فيه
ما ادري كيف اتعامل مع هالعائله ما يبون احد
ناس رسميه جدا حتى بينهم
انقرفت من الوضع يعني اذا بعزمهم لازم استعد وكأني اعزم ناس غريبين
اللي يقهر بالموضوع ان زوجي كل ما تحسنت نفسيته طلعو علينا خواته بسالفه مالها داعي وتنتكس حالته
كانن يغارن منه لما امه تهتم فيه بزيادة ولما تزوج وطلع من عندهم صارن يغارن مني حتى امه اللي هي امه ما تغار مني بالعكس دايم تدعي له وتقوله رزقك الله باللي ابيها....
وش العمل معهن لاني تعبت ومليت منهن
لا تقولون خواته قبل يصير زوجك الزوجه احق برعايةزوجها والبنت اللي ما تزوجت والدها احق بها يعني ما لهن حق يقارنن بيني وبينهن وكأنهن زوجات له مو خوات