فتاه عشرينيه

حبيباتي اليوم عندي قصه واقعيه لوحده أعرفها من واقع الحياه وما عليكم أمر أعطوني رأيكم المنطقي طبعا..
في بنت عشرينيه ذات خلق ودين ومتعلمه و فاهمه في يوم من
الأيام بعد يأس البنت من سماعها (إنتي حلوه بس إيش فيكي ماتزوجتي) الكلمتين دي أثرت بطريقه مو معقوله عالبنت فقررت في يوم من الأيام إنها تدخل على مواقع
الزواج المشهوره وتدور إبن الحلال((حسب ظنها))المسكينه مره طيبه وعسل والله الكل يشهد بأخلاقها وتربيتها وجمالها وعلمها ورزانتها,,المهم نرجع للقصه ..كتبت
مواصفاتها ومواصفات الأدمي إللي تبغاه طبعا أنهالت الطلبات
عليها قالت خليني أجرب أرد على واحد وأشوف إيش يصير , وردت عليه وكلمها وكلمتوا وأتعلقوا ببعض
وأتفقوا إنو يتزوجوا بعد ماأرتاحو لبعض وقلها أرسليلي صورتك أوريها لأمي البنت أترددت ملايين المرات بس رضخت في النهايه وأرسلت الصوره ومره بعد مرره بدأ يطلب
صور جريئه شويه والبنت الغلبانه مصدقه وترسل وإللي
مايتسمه قلها أعطيني رقم أمك وأخوك ولي أمرك يعني
أكلمه وأطلبك والبنت زي الهبله أعطته الأرقام بس حتصير
مصيبه لو عرفه إنو الإنترنت له علاقه بالموضوع قلها خلاص
اقولها أحد من جماعتكم دلني عليكم وقالت
طيب وكلم أمها والأم المسكينه قالت طيب
نفكر ونرد عليك الأم صدقت وبعد كم يوم كلم الأخ
والأخ قال تمام نسأل عنك ونرد عليك..مرت
الأيام ومرت الأيام بعد ماأخذ الصور والله يعلم
إيش سوى بيها وكمان طلب منها تحولو فلوس علشان تساعده في سعر
التذكره عشان يجي البنت أرسلتله مبلغ وقدره كل إللي عندها
(((طبعا أختفى بعد ماأخذ الفلوس)) ..قلت الإتصالات تتصل
عليه مايرد الأم تتصل مايرد تستناه عالأونلاين مايظهر بدأت
تقلق البنت ماهي قادره توصل له تقولو فص ملح وداب والبنت
المسكينه عايشه في رعب أهلها فقدوا الثقه فيها لإنهم شكوا في حالتها وصارت أشياء أرفض إني ماأذكرها حسب رغبت صاحبة القصه..
والله أنا عجزت أفهم الموضوع وماعرفت
حل والبنت عايشه في كأبه فظيعه والله بنت ناس وعيله ما وداها
وراى إلا كلام الناس
الله يسامحهم ليش ماترحموا الناس من لسانكم
البنت أتزوجت ولا ماأتزوجت مالكم ومالها ومن جد
الله يسامحهم إللي كانوا السبب...
والله يستر عالجميع مستنيه ردودكم..