فراشات من جربت خلطة السمسم الأسود للشعر

1. لين ربكم سبحانه و تعالي ياب لي الحل لين باب بيتنا ههه


2. 3 ملاعق أكل لكوب ماي مغلي و ينخلط عدل و يصير نفس الشوربة و بث


3. الطعم : لذيذ , حلو

فراشات أنا أصرح من البداية ها لا تقولون لاطشة الموضوع و ناسباه لنفسك ..الموضوع منقول للفائدة
و يا ريت البنات اللي جربوا هذه الخلطة يفيدونا ...أول شي اقروا و قولو لياليوم قصتنا عن تساقط الشعر ...( اللي حذالها ذرة أو مكسرات تسحب صحن و تستعد ترانا بنطول)
هذه قصة لوتس مع تساقط الشعر و أكيد في وايد بنات يعانون من ها المشكلة
سويت فحوصات عشان أشوف اذا في شي ناقص سواء حديد أو غيره و الحمدلله و الشكر مافي شي ( اللهم أدمها علينا نعمة) و طبيعة غذائي متوازنة و أحاول أحافظ عليها , بس ما أدري هل سبب التساقط هو نسبة الكلور في الماي و الا العوامل المتغيرة للجو ما أعرف احترت ..المهم جربت كل شي :

• حنة مع ان جلدي مرات يتحسس منها
• ماسك شعر من الزبادي و العسل و مرات أضيف سدر
• زيوت مختلفة بس ما أخلطهم مع بعض كل زيت بروحة يعني اسبوع أحط جوز الهند و مرات زيت زيتون - زيت سمسم - زيت خروع - زيت لوز
• دكتور جلدية وصف لي مجموعة أمبيولات للشعر بس أول ما خلصت رد الشعر يطيح أذكر الأمبيولات كان سعر البوكس الواحد لمدة شهر تقريبا 500 درهم
• دكتورة وصفت لي فيتامينات للشعر العلبة تكفي شهر ب تقريبا 300 درهم و هو كورس لمدة 3 شهور يعني 900 درهم ههه

جربت وايد أشياء و خسرت فلوس بس ما فادتني هاي الأشياء الا بشكل بسيط من ناحية اللمعة و بنية الشعرة و شوي كنت بقطع شعري و أنا محتاسة فيه لكن لا حياة مع اليأس و لا يأس مع الحياة

لين ربكم سبحانه و تعالي ياب لي الحل لين باب بيتنا ههه

الوالد الله يطول بعمره ( وربي يحفظ لكم كل عزيز و غالي من كل شر) بحكم طبيعة عمله , معاه علاقات بعدد كبير من الناس من مختلف الجنسيات , تعرف زمان على عائلة صينية ( أدري بتضحكون - صينيين مرة وحدة) بس جدا حبوبين و وايد طيبين و الريال يحب الوالد وايد و دايما يستشيره .المهم زارونا في البيت هو و حرمته , الحرمة عودة لكن ما شاء الله و لا شعرة بيضا و بعد غزير تبارك الرحمن , كان خاطري أسألها بس استحيت و شفتها تلمح خيوط الذهب الأبيض اللي تارسة راسي ههه بس ما علقت ,أنا شردت رحت غرفتي أونه أعدل الجذلة عشان أغطي الشعر الأبيض و رديت , تمينا نسولف وناسة الصراحة . وروحوا... بعد فترة أظني اسبوعين دخل الوالد البيت و معاه كيس ريحته وايد حلوه تشبه النسكافيه, قال هذه هدية من الحرمة الصينية و ريلها عشاني ... زين شو اللي داخل الكيس ...أدري فيكم فضول
فيه بودرة نفس الكوفي يوم ينخلط بالكوفي ميت , عرفتوا اللون ؟ يعني بني على أبيض و ريحته نفس الكوفي وسيده غمست صبعي فيه أونه بطعم (حركتي الشهيرة) طعمه لذيذ , سألت الوالد شو ها ؟ قال ان الحرمة وريلها يقولون عندهم في الصين و في كوريا دومهم يشربون هذا , حتى يشربون الصغارية و هو مفيد للشعر , يقوي الشعر , يسوده , ينمي الشعر, يوقف ابيضاض الشعر ,يغذي البشرة و مفيد لمشاكل المعدة و الكبد و العظام و الحرارة لانه فيه نسبة من الكالسيوم و وايد عناصر بس الوالد ما يتذكرها ههه و هي سبب سواد شعورهم و غزارتها
طبعا هالبودرة كلها مواد طبيعيه و أهم مادة فيها السمسم الأسود اللي ما يستغنون عنه حتى لو تلاحظن الدرامات الصينية او الكورية دومهم يطبخون بزيت السمسم .
الطريقة :

3 ملاعق أكل لكوب ماي مغلي و ينخلط عدل و يصير نفس الشوربة و بث

الطعم : لذيذ , حلو

أنا ما كملت شهر بعدني للأمانة بس اللي لاحظته لين الحين , ان تساقط الشعر و لله الحمد خف بنسبة 85 % و فرق عن أول و الشيب ما قام يزيد بس ما أدري اذا بتخلص من الشعر الأبيض بستمر و بوافيكم بالمستجدات , يمكن قريتوا موضوعي عن الكتم عشان نحاول نرقع هالكم شعره البيضا .
في بعض الناس ما تثق بالمنتجات الصينية و الآسيوية أنا ممكن أندرج تحت هالقائمة يعني ما بجرب شي ما أعرف مكوناته , بس أبدا مب ندمانه على هالتجربة , والصراحة هذا الريال و حرمته لأنهم يعرفون الوالد من زمان ما ييبون لنا الا الشغلات الرهيبة اللي جودتها عالية و أكثر عن شي جربناه و كان روعة خصوصا الشاي الأخضر , الريال يضحك يقول أونه الشاي الأخضر في كارفور مقصة هذاك ما يعتبر شاي أخضر و بالفعل يوم ياب لنا شاي أخضر واو تدرون عندهم شاي أخضر عبارة عن كور صغار و يوم ينصب عليهم الماي الحار ,شوي شوي يتنفتح هالكور و داخلها ياسمين , شاي أخضر بالياسمين و ريحته تجنن و الطعم لذيذ مافيه المرارة اللي في الشاي ما كارفور
ووايد أشياء ان شاء الله بصورهم اذا باقي منهم شي وبحط الصور ( كأني طلعت برا الموضوع) المهم جاري الاستمرار في شرب هالخلطة و ان شاء الله نتغلب على الشيب ...دعواتكم و حاولوا تحطون سمسم أسود في أكلكم لأنه وايد مفيد و لا قيته في هذا الموقع حد جربه يا بنات فيدونا الله يبارك فيكم
http://greentown.yolasite.com/%D8%A3...8%A7%D8%AA.php
في انتظاركم